Jɔn 2

Kena Tim Baal Naa Funɛ Kpa Haan

1Wuzu bilɛ gantɛl nɛɛ, baal digi fun kpa haan a li tɔhɔn naa ba yir Kena a li Galili pulum ni. Yesu niina funɛ nyɛn dooni. 2Ba fun yir Yesu awa o gantɛl tiŋsa gbanko di ba wa haan fali dam ti. 3Ba naa funɛ wa haan fali ti ba zaami chen fun nyɔ sin a peti, Yesu niina fun wa ŋɔ un di sin ti maga peteu.

4Yesu fun ŋɔ un, “Yɛrɛ i wa min wati? Mu saha ha wa tel.”

5Doone o niin ti fun burgi a ŋɔ dam ti bisi ni, “Maa tum chenani maga o ŋɔ ma.”

6Dasisa nɔra funɛ nyɛn dam ti ni. Dasi bɛgim zi zu galɔŋsau a dugli fumtora. Ju tim ta wa kaa di diwe dam ti ni, ba yaa zɔk dasisi ta nire a sɛm ba nisa. 7Yesu fun ŋɔ dam ti bisi ni, “Ma zɔk ni gbaari dasisi ta ni a su.” Ba fun zɔk ni a gbaari a maga ni a su. 8Ba funɛ ya chen peti, o fun ŋɔ ba, “Tɔ, lalaknɔ ma zɔk a la nyɛ nihɛɛ naa la nyini hɔɔri ta ni o nyɔ.” Ba fun zɔk a la nyɛ un. 9O fun lɛmsi ni naa funɛ burgi sin chen, a vɛ zim doonani o liili. Dam ti bisa ba naa funɛ zɔk a nyɛ un, ba waa funɛ zim doonani o li. O fun yir haan fali baal ti a ŋɔ un, 10“Nara yir ba dɔŋtima di ba lagmi a di diwe, ba yaa te kpa sin lɛmnɛ a nyɛ ba di ba nyɔ. Ba wa nyɔ sin lɛm ti puŋ, dam ti bisa yaa kpa sin tagin tirɛ a wa gbaari ba. Amaa ba wa kpa sin lɛm tirɛ a tiŋ gantɛl.”

11Chenani Yesu fun nyɛ ni ti burgi sin Kena ni a li Galili pulum ni chen, funɛ te ya o tum zen. O tum zen ti funɛ biksi o gantɛl tiŋsi ta di Koosa kpok nyɛn un ni. O tum zen ti daha ba se fun su un.

12Kpaali ti saha funɛ wa gali, Yesu wa o niin ti awa o niinbisa awa o gantɛl tiŋsi ta fun si dooni a kaali tɔhɔn naa ba yir Kapɛrnaum a la nyɛn wuzu bilɛ.

Yesu Fun La Zu Koosa Bar Jɛɛmi Dama

(Mat. 21.12-13; Maak 11.15-17; Luk 19.45-46)

13Wuzu zen naa Ju tim ta funɛ yir val la gali chen saha funɛ wa dugli, Yesu awa o gantɛl tiŋsi ta fun kaali Jɛrusalɛm, 14a la zu Koosa bar jɛɛmi dama. O fun na nidamata ka ba yogli nuhɛ, piisisa awa kosa. Malɛ nichɛrɛ gbanko funɛ kani ba tebulsi muni ni. 15O fun a dɛu gagbasa a kɔɔri vurma a duŋni ba naa la yogli nuhɛ ta awa piisisi ta wa ba sela a ta. O fun a burgi malɛ nichɛrɛ tim ta tebulsa gbanko a ta a pisi ba malɛ ta. 16Doone o fun ŋɔ ba naa la yogli kosi ta chen, “Ma kpa a a li bar nɔ. Yɛrɛ ma lisi di ma tumu nan a kpa mu nyan dam ti a burgi yawa?” 17O gantɛl tiŋsi ta fun a lisi chenani ba fun a sɔbi a li Koosa sɛm tɔn ti ni a ŋɔ,

“Chenani mu baga nyɛn Koosa dam ti ni zi chɔk minu.”

18Chɛɛm ti funɛ wa gil, Ju tim ta bɔnɛ fun wa pɛɛsi Yesu, “Anti nyɛ hin nyinbaan di i val aa kiya nan? Tum tum zen ya zim di Koosa chiŋɛ i gantɛl niu.”

19Yesu fun ŋɔ ba, “Mu zi tum tum zenu a nyɛ ma. Ma zak Koosa bar jɛɛmi dam nɔ a lɔ ka mu sa un wuzu butora wuzu.”

20Ba fun ŋɔ un, “Ya walɛ funɛ kpa bun fumnaasi danɔrawa a sa un. I wa kikpa wuzu butora a bukoo sa un.”

21Amaa Yesu wa funɛ sɛm Koosa bar jɛɛmi dam naa nyɛn Jɛrusalɛm ni chen wɛ. O funɛ sɛm o titi bara wɛwa. 22Yesu funɛ sou ka Koosa lɛli un a li o sou ni, o gantɛl tiŋsi ta fun lisi chenani o fun sɛm chen. Ba fun zim di o sɛma awa chenani ba fun sɔbi o wɛ a li Koosa sɛm tɔn ti ni chen, ya wutirɛ.

Yesu Zim Chenani Nibinsa Bambe Duu

23Yesu funɛ di Ju tim ta wuzu zen naa ba yir val la gali ti chen a li Jɛrusalɛm ni, nidamata fun na tum zene naa o tum ka ba se fun su un. 24Amaa Yesu funɛ zim chenani nibinsa lisiu kinkan. Chendaha o wa fun nyɛ o si su ba. 25O wa funɛ daŋni di nara biksi un chenani nibinsa bambe du.

Currently Selected:

Jɔn 2: tpmNT

Highlight

Copy