Jɔn 9
9
Yesu Fun Tiibi Naa Ba Lul Wa Nyulumsa
1Wuzu digi Yesu funɛ val a la chene a la na baal naa ba fun lul wa nyulumsi ni chen. 2O gantɛl tiŋsi ta fun pɛɛsi un, “Ya kunyana, yɛrɛ ba fun lul un ka o nyulumi? O tum tagna daharɛ o nyulumi nan, koo o nyana awa o niin tum tagna daharɛɛ?”
3Yesu fun ŋɔ ba, “O nyulumsi ti wa kpak wu digi wa o tum tagna ni koo o nyana awa o niin tum tagna ni. O nyulumu chen ni nara zi na chenani Koosa kpok zi tumu. 4Lalaknɔwa nyinbaan puk a nyɛ ya di yaa tum tuma a nyɛ naa funɛ tum min ni chen. O wa zi vusi ka nyinbaan ti tɔ ya bu vɛ koti a tum wu digi. 5Chenani mu nyɛn tɛɛnɛ nɔ maga ni nan, min chi fitina a chaani a nyɛ tɛɛnɛ nɔ tim maga ni.”
6Yesu funɛ sɛm peti, o fun tɔsi nantɔsa a du hɛɛra ni a gɔɔri a kpa tiksi baal ti se, 7a ŋɔ un, “Kila a la sɛm i se a li pul naa ba yir Sailom chen.” Sailom ti mun ya, ‘doonani mu fun tum hin’. Nyulum ti fun kaali a la sɛm o se ta dooni a lɛli. O fun bur wa.
8Doone o kandɔŋsa awa ba naa funɛ na un ka o sumi sumi kina chen fun a pɛɛsi dɔŋa, “Baal nɔ, o laata yaa kani bar nɔ a sumi kina chenn?”
9Bɔnɛ fun ŋɔ, “Warɛ,” amaa bɔnɛ ka fun ŋɔ, “O laata. O chillɛ.”
Baal ti titi fun ŋɔ ba, “Min chen.”
10Ba fun a pɛɛsi un, “Yɛrɛ i ya i se tima lɛli?”
11O fun ŋɔ ba, “Baal naa ba yir Yesu chen, waa funɛ tɔsi nantɔsa a du hɛɛra ni a gɔɔri a kpa tiksi mu se ni a ŋɔ min di mu la sɛm mu se ta a li Sailom pul ti ni. Mu fun la sɛm a dooni a puk.”
12Ba fun bukoo pɛɛsi un, “Leene baal ti ka?”
O fun ŋɔ ba, “Mu wa zim.”
Farisi Tima Wa Fun Zim Chenani Yesu Tiibi Un Chen
13Doone ba fun kpa baal naa ya nyulum chen a kaali Farisi tim ta wati. 14A wuzu naa Yesu fun ya vɛri ti a du baal ti se ta ni di a puk chen funɛ ya Ju tim ta hiisi wuzurɛ. 15Farisi tim ta fun pɛɛsi un, “Yɛrɛ o ya i se nama lɛli?” O fun ŋɔ ba, “Baal naa ba yir Yesu chen, kpa vɛri a du mu se ta ni. Mu fun la sɛm a aa na.”
16Farisi tim ta funɛ nu o ta, ba bambe fun purigi. Ba bɔnɛ fun ŋɔ dɔŋ ni, “Naa ya chen wa li Koosa wati, domi o tum ya hiisi wuzurɛ.”
Ba bɔnɛ ka fun ŋɔ dɔŋ ni, “Tum tagna nitumi wa koti a tum tum zene a chi nan.”
17Ba fun bukoo pɛɛsi un, “Baal naa i ŋɔ di waa puk i se nan, yɛrɛ i lisi kpa la o wati?”
O fun ŋɔ ba, “O ya Koosa witinsi ta digirɛ.”
18Farisi tim ta se wa fun su di baal ti funɛ ya nyulumnɛ a bur a na. Adaha ba fun yir baal ti nyana awa o niina, 19a pɛɛsi ba, “Ma be nɛɛ? Ma lul un nyulum, yɛrɛ o kaa ya a bur na?”
20Ba fun ŋɔ, “Ya be ya un. Ya waa lul un nyulum, 21amaa ya wa zim chenani o ya a na koo naa lɛlɛ o se ta. Ma la pɛɛsi un chenani o ya o se ta lɛli. O ya nihɛɛu a la zi sɛm ma.” 22Ba funɛ sɛm chene, domi hansura funɛ kpak ba Farisi tim ta daha. Ba funɛ piin ŋɔ di nandigi la nɔɔni di Yesu ya naa Koosa fun vɔu di o zi tumu wuzu digi chen, ba wa zi nyɛ ba bu jɛɛmi Koosa a li ba bar lagmi dɛ ni. 23Chendaha ba fun ŋɔ, “O ya nihɛɛu a la zi sɛm ma. Ma la pɛɛsi un chenani o ya o se ta lɛli.”
24Farisi tim ta fun bu yir baal naa bu vɛ nyulumi chen a ŋɔ un, “Baal naa lɛlɛ i se chen ya tum tagna nitumirɛ. Ta nyɛ un jirima, amaa ka nyɛ Koosa wa jirima.”
25Baal ti fun ŋɔ ba, “O ya tum tagna nitumi koo o wa ya, mu wa zim. Mu zim di mu funɛ ya nyulumnɛ, amaa lalaknɔ mu nau.”
26Ba fun bu pɛɛsi un, “Yɛrɛ o ya i se na lɛli?”
27O fun ŋɔ ba, “Mu piin ŋɔ mau ka ma vɛ nuuli. Ma bur a daŋni mu ŋɔ ma a gbaariuu? Ma gbanko daŋni ma tiŋ unuu?”
28Ba funɛ nu o sɛm ta chen, ba funɛ zulimi un a ŋɔ, “Hin ya o gantɛl tiŋsi ta digi. Ya waa ka ya ya nawaal Mosis gantɛl tiŋsa. 29Ya zim di Koosa funɛ sɛm sɛma a nyɛ Mosis ni, amaa naa lɛlɛ i se ta chen, ya wa zim doonani o li.”
30Baal ti fun ŋɔ ba, “Ma wa zim doonani baal nɔ li a wa lɛli mu se na. Baŋ alaazibu wɛnɛ. 31Nara maga zim di Koosa wara nu tum tagna tiin nɔ. O ka nu ba naa la nyɛ un jirima aa tiŋ o tutɔ nɔrɛ. 32Tɛɛnɛ nɔ maga piili ni kpa la hali wa zinan, nandigi ha wa lɛli naa ba lul wa nyulumsa, se. 33Chenani o tum chen biksi di o li Koosa watɛɛ.”
34Ba fun ŋɔ un, “Ba funɛ lul hin di i yaa kitum tum tagniwa. I kpa i nyuhurɛ a mo yaa?” Ba fun zaksi un a li ba bar jɛɛmi dɛ ti ni a ta.
Farisi Tima Wa Fun Koti A Nu Yesu Biksi Ti
35Yesu funɛ nu chenani ba ya un, o fun wa ŋɔ un, “I si su mu waa nibine beuu?”
36Baal ti fun ŋɔ un, “Mu kunyana, ŋɔ min chenani o du, chen ni mu gbanko si zi su unu.”
37Yesu fun ŋɔ un, “N waa naa la sɛm nan ya un. Hali i koti a na minu lalaknɔ.”
38Baal ti fun gbiri Yesu suwachak ni a jɛɛmi un a ŋɔ, “Mu kunyana, mu si su hinu.”
39Doone Yesu fun ŋɔ, “Mu funɛ wa tɛɛnɛ nɔ maga di mu wa nyɛ ba naa se vɛ lɛlirɛ lɛli a biksi ba naa ŋɔɛɛ di ba se lɛlɛu ka a vɛ lɛli.”
40Farisi tima ba naa funɛ dugli dooni, bɔnɛ fun nu ka o sɛm. Ba fun ŋɔ un, “Hin la daŋni i ŋɔ di ya se wa lɛli.”
41Yesu fun ŋɔ ba, “Ma se fu vɛ lɛli, mu fu wa zi na ma galimsa. Domi ma ŋɔ di ma se lɛlɛu ka a vɛ lɛli, mu zi na ma galimsau.”
Currently Selected:
Jɔn 9: tpmNT
Highlight
Share
Copy
Want to have your highlights saved across all your devices? Sign up or sign in
© 1993, Ghana Institute of Linguistics Literacy and Bible Translation
