Mat. 27

Ba Fun Kpa Yesu A La Nyɛ Pailɔt Ni

(Maak 15.1; Luk 23.1-2; Jɔn 18.28-32)

1Chɔɔsa funɛ wa pisi, Koosa dam kɔkɔɔrsi ta awa Ju tima nihɛɛti ta maga fun lagmi a na dɔŋa di ba kpu Yesu. 2Ba funɛ sɛm peti, ba fun vɔu o nisa a kpa un a la nyɛ gɔbnati nyuhu tiina naa ba yir Pailɔt ni chen.

Chenani Judas Fun Sou

(Tuma 1.18-19)

3Judas, naa funɛ li Yesu gantɛl, o funɛ na ka ba di Yesu sou sɛria, o tuha fun chɔk. O fun bur kaali Koosa dam kɔkɔɔrsi ta awa nihɛɛti ta wati di o la nyɛ ba malɛ aniita fumtora naa ba bɔ un chen, 4a ŋɔ ba, “Koosa na mu galimsa. N funɛ li naa nin vɛ nyɛn ni gantɛl niu. Ma di o sou sɛria lalaknɔ.” Ba fun ŋɔ un, “Baŋnɛ chen ya ya? I tum chen.”

5Judas funɛ nu ba sɛma, o fun zer malɛ ta a yo ta Koosa bar jɛɛmi dam ti bambaan ni. O fun kaali a la tɛ o titi wa ŋmɛn a sou.

6Judas funɛ li, Koosa dam kɔkɔɔrsi ta fun wa a wa pini malɛ ta a ŋɔ dɔŋ ni, “Malɛ na funɛ yau baal ti sou. Ya chiksɛ ta wa la nɔɔni di ya kpa a a gbaari Koosa bar jɛɛmi dam malɛ ta ni.” 7Ba funɛ wa na dɔŋ peti, ba fun kpa malɛ ta a yau tɛɛnɛ naa ba funɛ yir tempilsa bar kɔɔri. Ba funɛ daŋni ba kpa dooni a burgi hɔɔra bar hugsiwa. 8Chendaha ba yir doon tɛɛnɛ ti chɛl bar nyɛni hali wa zinan.

9Koosa witiina Jɛrɛmaya funɛ sɔbi nannɛ saha digi a ŋɔ di,

“Ju tim ta funɛ la nɔɔniu di ba zi bɔ malɛ aniita fumtorau a yau tempilsa bar kɔɔri tɛɛnɛ ti.

10Adaha ba fun kpa malɛ ta a yau dooni a chi chenani Koosa fun ŋɔ min chen.”

Chenani Koosa dam kɔkɔɔrsi ta fun tum nyɛ Jɛrɛmaya sɛm ya wuti.

Pailɔt Fun Pɛɛsi Yesu Awa Sɛma

(Maak 15.2-5; Luk 23.3-5; Jɔn 18.33-38)

11Yesu fun chiŋi Pailɔt suwachak ni. Pailɔt fun pɛɛsi un, “Hin ya Ju tim koor chenn?”

O fun ŋɔ, “Chenani i kut ŋɔ chen.” 12Koosa dam kɔkɔɔrsi ta awa Ju tim nihɛɛti ta funɛ fiksi unu, o moori.

13Pailɔt fun bukoo pɛɛsi un, “Wu damata naa ba sɛm a du hin ni nan, i wara nu aa? I wa kpak wu digi a la zi sɛmm?”

14Yesu fun moori a vɛ sɛm wu digi. O fun ya Pailɔt alaazibu kinkan.

Ju Tima Fun Di Yesu Siwi Sɛria

(Maak 15.6-15; Luk 23.13-25; Jɔn 18.39–19.16)

15Ba wuzu zen wuzu Pailɔt yaa fun puk dɛ naa ba yaa tɔ nara chen zɔɔnɔ a nyɛ nibɛgim li. 16Ba naa maga funɛ lagmi Jɛrusalɛm ni funɛ zim ba naa ba tɔ dɛ ni chen digiu. Ba funɛ yir un Barabas. 17Zɛmɛ ta fun wa lagmi Pailɔt dam til ni. O fun pɛɛsi ba, “Ma daŋni mu yisi Barabasrɛ a nyɛ ma koo mu yisi Yesu naa ba yir Kristo chen a nyɛ maa?” 18Pailɔt funɛ zimu di Koosa dam kɔkɔɔrsi tima handɔta daha ba fun kpak Yesu a wa o wati.

19Pailɔt funɛ kani sɛria bar diili dɛ ti ni, o haan fun holi a ŋɔ un, “Dusum ti mu dɛ namsu kinkannɛ baal nɔ daha a li mu deesi ni. O nin wa to. Adaha i yisi un a ta.”

20Koosa dam kɔkɔɔrsi ta awa tɔhɔn nihɛɛti ta fun ŋɔ zɛmɛ ta ni di ba sumi Pailɔt o yisi Barabas a kpu Yesu. 21Pailɔt fun bu pɛɛsi ba, “Nara balɛ na, antirɛ ma daŋni mu lisi?”

Ba fun ŋɔ, “Ya daŋni Barabasrɛ.”

22Pailɔt fun bu pɛɛsi ba, “Baal naa ba yir Kristo nan, yɛrɛ n kaa ya un?”

Ba fun ŋɔ, “Nyɛ ba kpaasi un a mari daakakli daha ni o sou.”

23Pailɔt fun bu pɛɛsi ba “Yɛrɛ? Tum tagna baŋnɛ o tumm?”

Ba fun tɛsi kinkan a ŋɔ, “Nyɛ ba kpaasi un a mari daakakli ti daha ni o sou.”

24Pailɔt funɛ zimu di o wa zɛmɛ ta sɛm ta wa kpak mun ka ba daŋni ba dam, o fun zɔk ni a sɛm o nisa zɛmɛ ta maga suwachak ni a ŋɔ, “Mu nisa wa to baal nɔ sou ni. Ma waa dɔ un.”

25Zɛmɛ ta maga fun ŋɔ un, “Koosa la zi na ya wa ya nilulɛ galimsa a lɛrgi ya diŋsa o sou daha.”

26Doone Pailɔt fun yisi Barabas a nyɛ ba, a nyɛ ba ka tuk Yesu wa vurmsi ni. Ba funɛ tuk un peti, o fun ŋɔ di ba kpa un a la kpaasi mari daakakli ti o sou.

Lanjimasa Funɛ Mɔmsi A La Zɔ Yesu

(Maak 15.16-20; Jɔn 19.2-3)

27O lanjimasa fun kpa un a la zu Pailɔt dɛ zen, a fun yir ba dɔŋtima ba wa. 28Ba fun ur Yesu kilaarɛ a zer ba gar sɛm digi a wa laari un. 29Ba fun kpa sɔta a wa sɔ a chi koora nichiga a kpa chik o nyuha a kpa da a baŋ o nindil ni. Ba fun wa gbiri o suwachak ni a mɔm un a ŋɔ, “Ju tim koora, ya zaami hinu.” 30Ba fun tɔɔsi nantɔsa a du un ni a kpiti da ti a mo o nyuha. 31Ba fun mɔmsi un peti a kpa gar sɛm ti a ur a zer o titi kilaarɛ a laari un, a kpa un li di ba la kpaasi un a mari daakakli ti ni o sou.

Ba Fun Kpak Yesu A Kpaasi A Mari Daakakli Ni

(Maak 15.21-32; Luk 23.26-43; Jɔn 19.17-27)

32Ba funɛ nyɛn nyinbaan ni a la chene, ba fun la chem baal naa ba yir Simɔn a li Sairini pulum ni. Ba fun lɛrgi un a nyɛ o zer Yesu daakakli ti a baasi a tiŋ ba kaali. 33Ba fun la tel doonani ba yir Gɔlgɔta. Chen mun ya, ‘nyukɔkri bar’. 34Doone ba fun kpa luri a wa nyɛ Yesu ni a daŋni o nyɔ. O fun lɛmsi un a vɛ nyɔɔli.

35Ba fun kpak un a kpaasi a mari daakakli ti ni a kpa o gata a dau di ba yo walɛ di ba na anti kaa di a. 36Ba funɛ peti a maga, ba fun kani a hiisi a la nyini un. 37Ba fun wa sɔbi o yaali a ŋɔ, “Yesu nɛɛnɛ. Waa ya Ju tim koora.” Ba fun kpa chenani ba sɔbi chen a mari o nyuha a li daakakli ti ni. 38Ba fun kpaasi ŋmɛɛrsa nara balɛ gbanko a gbaari Yesu ni, digi o nindil ni, digi o ningal ni.

39Ba naa funɛ nyɛn dooni chen, fun val la gali a la gumsi ba nyuuna a pini o zoma a ŋɔ, 40“Hin funɛ ŋɔ di i zi chɔk Koosa bar jɛɛmi dam ti a bur sa un wuzu butora chen niuu? I sir ya Koosa bere, yisi i titi a tu wa daakakli ti ni ya na.”

41Koosa dam kɔkɔɔrsi ta awa Koosa chiksɛ nibiksɛ ta awa tɔhɔn nihɛɛti ta, ba gbanko funɛ mɔmsi un a la ŋɔ dɔŋ ni, 42“Maa na. O laata fun yisi nara chen a vɛ koti a yisi o titii? O funɛ ŋɔ di o ya Ju tim koorrɛ. Ma nyɛ ya na o zi yisi o titi daakakli ti ni a tu wa tɛɛnɛ, chen ni ya se zi su unu. 43O ŋɔ di o ya Koosa bere ka o si su un. Ma nyɛ ya na Koosa baga nyɛn di o wa yisi un lalagau.”

44Ŋmɛɛrsi naa ba fun kpaasi a gbaari un ni chen, gbanko funɛ pini unu.

Chenani Yesu Fun Sou

(Maak 15.33-41; Luk 23.44-49; Jɔn 19.28-30)

45Nha funɛ wa tel sal baan nyuha, doon fun wa biri a vusi hali saha naa niparɛ yaa par a si chen. 46Chen saha tirɛ Yesu fun tɛsi kinkan a ŋɔ a li o titi sɛm ni, “Ɛli, ɛli, lama sabagtani.” Chen mun ya, “Koosa, Koosa, yɛrɛ i gil min?”

47Nara bɔnɛ fun chiŋi dooni a nu chenani o sɛm chen a ŋɔ dɔŋ ni, “O yir Koosa witiina Ɛlaijarɛ.” 48Ba nidigi fun chɔ a la zer kizɛrgi a tau kinyɔɔli haasi ni a kpa sak da ni a tɛ un.

49Ba naa funɛ chiŋi dooni ŋɔ dɔŋ ni, “Ma nyɛ ya pɔ a na Ɛlaija zi wa suŋi unu.”

50Yesu fun bukoo tɛsi kinkan a sou.

51O funɛ wa sou, gar zen naa ba fun kpa purigi Koosa bar jɛɛmi dam ti chen, o fun chɛɛsi a li buudaha ni hali a wa peti tɛɛnɛ ni. Tɛɛnɛ fun zigsi ka gbɛntɛla pɛgsi. 52Hugilsa fun puk ka Koosa nara ba naa funɛ siti chen bɔnɛ si ba sou ni. 53Yesu funɛ si o sou ni wuzu butora wuzu, ba fun kaali a la zu Jɛrusalɛm. Nidamata fun na ba dooni.

54Lanjimasa kɔkwa nihɛɛ awa o lanjimasa ba naa funɛ chiŋi bɔnɛ a il Yesu, ba funɛ na tɛɛnɛ zigsɛɛ awa chenani maga yɛɛ, hansura fun kpak ba kinkan. Ba funɛ sɛm dɔŋ ni, “Wuti baal nɔ sir ya Koosa bere.”

55Nihaana ba naa funɛ tiŋ un a la suŋi un a li Galili ni chen, gbanko fun a chiŋi bar boli ni a nyini chenani funɛ ya. 56Ba bɔnɛ sɔna funɛ ya Mɛri Magdala awa Mɛri, Jems awa Josɛf niina, awa Zɛbɛdi bisa niina.

Ba Fun Kpa Yesu A La Sogli Un

(Maak 15.42-47; Luk 23.50-56; Jɔn 19.38-42)

57Dusum funɛ wa biri, malɛ tiin digi fun wa dooni. O sɔn funɛ ya Josɛf. O tɔha funɛ ya Arimatia, ka o tiŋ Yesu. 58O fun kaali Pailɔt wati a la sumi di ba yisi Yesu a li daakakli ti ni a nyɛ un o la sogli. Pailɔt fun la nɔɔni a tum chen. 59Ba funɛ yisi un a dau, Josɛf fun zer gar gali a mɛɛsi un, 60a kpa un a la du gbɛntɛl bɔ fali naa ba fun te kɔɔri a nyɛ Josɛf ni. Ba fun bilimsi gbɛntɛl zen a tɔ bɔ ti zɔɔnɔ a kaali. 61Mɛri Magdala awa o tɔguma Mɛri ba naa funɛ tiŋ Josɛf chen, ba fun kpalimi dooni aa nyini hugil ti.

Lanjimasa Funɛ Il Yesu Hugil Ti

62Asibri wuzu fun wa pisi, Koosa dam kɔkɔɔrsi ta awa Farisi tim ta fun lagmi a wa Pailɔt wati. 63Ba fun ŋɔ un, “Ya kunyana, nusun tiin ti ha funɛ vɛɛn nyɛn, ya funɛ lisi o wɛu di o ŋɔ ya di wuzu butora wuzu Koosa zi wa lɛli unu a li o sou ni. 64Tum i lanjimasi ta ba la il o hugil ti hali wuzu butora wa tel. I ya chen, o gantɛl tiŋsi ta wa zi koti a la ŋmɛ un a ŋɔ nara ta ni di Koosa lɛli un a li o sou ni. Ba la ŋɔ nan, o zi bɔmu a kaali chenani o fa du ya wati.”

65Pailɔt fun la nɔɔni a ŋɔ ba, “N zi nyɛ ma lanjimasi tau ma wa ba la il o hugil ti chenani ma daŋni.”

66Ba wa lanjimasi ta fun kaali a la tel Yesu hugil ti mun. Ba fun pɛɛsi zɔɔnɔ ti buŋkul fari ti, a kpa lanjimasi ta a chiŋsi ba bar chiŋɛ ni.

Currently Selected:

Mat. 27: tpmNT

Highlight

Copy