Yuhani 8

Swadringai ka ababai

1[Mwatavananenga makanaelre ku laumawmase, ai ku Yesu wamwa lregelrege ka Ulrive. 2Sakakaiyane ki mialrealre, la siwlri mwa ki daane ki Twaumase; ku laumawmase la kainganai makanaelre silape iniane, ku Yesu la nene, si pathagili bulru liniane. 3Ku tarabulrubulru ki Sisiu si swa Palrisai la mailuku ku tangea ku ababai; kai alisu sa icengecenge pasalrisalriu ki sawvalai kiapwalra. Kwini laumawmase la paacegecege iniane pukabicelrakane, 4si kivaga ki Yesu, “Sinsi, kikai ababai kai, sa icengecenge pasalrisalriu ki sawvalai kiapwalra. 5Ku Musi piakai ki hulrice padrekadrekase naiane, ku miyaiya kai ku ababai arakaiyane ku lrenege papacai. Lu kidremedremesu ngitwatumane?” 6Kai lalasu kiasanu arakaikai kikai ki vaga si tulilisi ki Yesu, silape ku atakaiyane si kukusu. Ku Yesu la lukwane, si arakai ku dadiputhane papacase pikai ki daedae. 7Kwini lalasu la kai icelrecelrebe ku akivagane iniane, ku Yesu la acegecege, si iya kai liniane, “Ikai numiane aneaneana ku kaiyana pasalriu, kai lri katumane aswala malra ku lrenege si cabiri iniane.” 8Sa maka iyanga kwini, la peela guruthungane, si ikai daedae pacapacase. 9Kwini lalasu sa kilalra kwini vaga, la twalai ki marwarudrangenga ku caili tarungangeea katwase ubere, laka kathaanenga ku Yesu si kwini ababai acegecegeana ikai kwini. 10Ku Yesu la acegecege, si kivaga iniane iya kai, “Kudra lalasu mwainunga? Kadrwa ku asuru si tupasalrivane muswane?”

11Kwini alisu la iya kai, “Sinsi, kadrwa.”

Ku Yesu la iya kai, “Mathariri, la mialriaku, kainaku lri tupasalrivane muswane. Lu katwasa, la madha pasalrisalriwnga!”]#8.11 Yakai ku lasidrumane ka hungu ku kai wapacase kikai yadringi ki [ ] ka vaga; la ikaai ku lasidrumane ka hungu ku wapacase pikai lrilrikudru ki Yuhani 21.25; la mialri ikai ku lasidrumane ka hungu ku wapacase pikai lrilrikudru ki Luka 21.38; la ikaai ku lasidrumane ka hungu ku wapacase pikai lrilrikudru ki Yuhani 7.36.

Ku Yesu ledra ki yakawmasane

12Ku Yesu la iya kai ki laumawmase, “Ledraku ki yakawmasane; ku twapapalra nakwane, lri malra ku ledra ki niake, kai lri ikainga ki dradrimitane dadavace.”

13Ku swa Palrisai la iya kai iniane, “Ngiapapelaelaelasu; kwi taiyanesu kadrwa ku luludane.”

14Ku Yesu la iya kai, “Adravane ka ngiapapasikaiyaku kawriva, ku taiyaneli mialri ka patengane; asi lwiyane wathingalaku ka twalainwaku kainganai, ka lri papinwaku katwase. Kai numi wathingale ka twalainwaku kainganai, ka lri papinwaku katwase. 15Kunumi yai arakai numi ku lekete ki umawmase si drele ki umawmase; ai kainaku lri turingaringau ki aneaneanenga. 16Adravane turingaringavaku ki palrapalra, kudra turingaringauli pacengecenge; asi lwiyane kainaku ka tangeangea turingaringau, amani kwidra siakawlu nakwane ka Ama ku palrali turingaringau. 17Amia kai ku pacase ku hungu ka hulrice numi, lu tadrusa si mararamau ku sapelaelane lini ki umawmase, ku tapelaelane lini ngiamia. 18Ngiapapasikaiyaku pelaela, kudra siakawlu nakwane ka Ama la mialri pasikai nakwane pelaela.”

19Kwi lalasu la kirimu kivaga, “Ku Tamasu la ikainu?”

Ku Yesu la tubalre, “Kai numi wathingale nakwane, la kai numi thingale ki Ama; alaiyasi thingale numi nakwane, nai tara thiingale numi ki Ama.”

20Kikai vaga kai, taiyane ki Yesu sa ikai daane ki Twaumase ikai ki talawbubulane bulrubulru ki umawmase. Sa kamani kwidra kadrwa ku pwalra iniane, asi lwiyane kudra vaini kaiyana wadaruru.

Ku amwaneli kai numi lri maka dulru mwa

21Ku Yesu la iyanga kai liniane, “Lri katwasenga naku, lri silape numi nakwane; ai lri pacai numi ikai ki pasalrivane numi. Ku amwaneli, kai numi lri dulru mwa.”

22Ku lamabelenge ki swa Yuda la iya kai, “Amia kikai kai lasu ‘Ku amwaneli, kai numi lri dulru mwa’, lri kidrangiaini kai lasu?”

23Ku Yesu la iya kai, “Twalai numi ki kadaengane kainganai, laka twaladhaku belenge kainganai; swakai numi kikai kawmasane, kainaku twalai kai kawmasane. 24Lakamani ku iyali, lri pacai numi ikai ki pasalrivane numi. Alaiyasi kai numi kasalru ka amaniaku kudra ‘Ngiaikai si ka palralrawthane ikai’, lri pacai numi ikai ki pasalrivane numi.”

25Kwi lalasu la kivaga, “Aneanesu?”

Ku Yesu la tubalre, “Singipathagili peaelaelanga naaku numiane#8.25 “Singipathagili peaelaelanga naaku numiane” ku wahunyake madu iya kai “Anau ngithaanga pelaela numiane”.. 26Pangukai numiane, makaalra ku naika akawrivaneli, naika asaibangane. Ai, kudra amani ku siakawlu nakwane yai tengatengane; peaelaelaku sikakathane ki yakawmasane ku kilalrali patwalai iniane.”

27Kwi lalasu ku taiyane ki Yesu patharukai ki Tama kai pwalringalringau. 28Lakamani ku pelaela ki Yesu liniane, “Lu cidingi numi pubelenge ki Lalake ki Umawmase, lri thingale numi ala ka amaniaku kudra ‘Ngiaikai si ka palralrawthane ikai’, si lri thingale numi kainaku ngiasasingikai pia ku manemane, amiaku sikakathane ku bulru nakwane ki Ama. 29Kudra amani ku siakawlu nakwane yakai tapalra nakwane; kai wasarare nakwane, si pakasepele nakwane, asi lwiyane paiyaiyaiyaku ku kadalameini ku awngane.”

30Takaalra ku laumawmase ku kialalra kilakikai vaga ki Yesu si kasalru iniane.

Ngialralrailraingi ka umawmase si duri

31Ku Yesu amia kai ki masalru iniane ka swa Yuda, “Alaiyasi palululudu numi kai bulruli, amani ku patengatengane ka situli; 32lri thingale numi ku patengane ka sabulrwane, ku patengane ka sabulrwane lri dulru baai numiane ku angilralraingane.”

33Kwi lalasu la tubalre, “Amani nai ku lagagane ki Aberahame; kadrwana ku taaduriane nai ki naneaneanenga, amiasu kai, ‘Lri maka dulru numi ngilralraingi’, kikai vaga manemane ku pacugane?”

34Ku Yesu la iya kai liniane, “Nau pudriadriingai pelaela numiane, sanaka pasalriu ka umawmase, duri ki pasalrivane makanaelre. 35Ku duri ikai ki tacekecekelane kai mapapedrenge ku taetalaneini; ai ku lalake yadringi kai ki tacekecekelane. 36Alaiyasi ka Lalake ki Twaumase ku pangialralraingi numiane, amaninga numi kudra patengatengane ka ngialralrainginga ka umawmase. 37Wathingalaku numiane ka lagagane ki Aberahame, ai kiasanu papacapacai numi nakwane, asi lwiyane kai numi tarwamara kai bulruli. 38Kai iyali yai pelaela nakwane ki Ama; kunumi laka paiya numi ku pelaela ki tama numi.”

39Kwi lalasu la tubalre, “Ku cucungulane nai Aberahame.”

Ku Yesu la iya kai, “Alaiyasi ka patengane numi ka lagagane ki Aberahame, lri tara piya numi ku pia ki Aberahame. 40Peaelaelaku sikakathane ku kilalrali patwalai ki Twaumase ku patengane ka sabulrwane, la kisanu papacapacai numi nakwane. Ku Aberahame kadrwana ku piaini ku miyaiya kikai! 41Paiya numi ku tapiane ki tama numi.”

Kwi lalasu la tubalre, “Ku Twaumase kathane ka Tama nai, kai nai ka nikibubuliane ka lalalake!”

42Ku Yesu amia kai liniane, “Alaiyasi ka patengane ka Tama numi ku Twaumase, nai tara kadaalame numi nakwane; asi lwiyane twaladhaku ki Twaumase kainganai, laka yakainga naku ki kikai. Kainaku ngiasasingikai kainganai, amani ku siakawlu nakwane. 43Anu kai maka pulringau kai taiyaneli? Asi lwiyane kai numi maka pwacalringane kai vagali. 44Sakwa ka lalalake numi ki Akema, ka kiadredreedreme ku apasalaladhane pia ku piapia ki tama numi. Twalai ki sapathagili amani ku papacai, kai sakaikai ki patengane ka sabulrwane, asi lwiyane kadrwa iniane ku patengane ka sabulrwane. Takaumawmasaneini ki atavuvulrucane; asi lwiyane amani ku taratavuvuvulrucu, laka tangadrane ki atavuvulrucane. 45Amani sa iyaku kikai patengane ka sabulrwane, la kai numi kasalru nakwane. 46Ikai numiane aneane ku lri dulru pelaela tupasalrivane nakwane? Kikai peaelaelaku kudra patengane ka sabulrwane, anu kai kasalru nakwane? 47Sanaka lalalake ki Twaumase, lri tara kilaalra ku vaga ki Twaumase; kai numi ka twalai ki Twaumase kainganai, la kamani ku kaika kilalra numi.”

Yesu si Aberahame

48Ku lamabelenge ki swa Yuda kiavaga ki Yesu, “Swa Samaria amia nai muswane, ka kiaikai ki aidridringane, bekace pasalriu kwi taiyane kwini?”

49Ku Yesu la tubalre, “Kainaku ka kiaikai ki aidridringane; mwasakenaku ki Ama, ai twasinalreme numi nakwane. 50Kainaku kiapasilape ku amalrane ku lrigu, ai yakai ku atalingikaiyane nakwane kisilape, si sakai ku aparamaramavane. 51Twakucingalraku pelaela numiane, ku paluludu kai sabulrwaneli, lri kai pacainga palralrawthu.”

52Ku swa Yuda amia kai iniane, “Kikai yai arwa thingale nai muswane ala ka kiaikaisu ki aidridringane! Wapacainga ku Aberahame, ku layuginsia la pacainga, ai amiasu kai, ‘Kudra paluludu ki bulruli, lri kai pacainga palralrawthu’. 53Lri dulrusu abebelengaku iya ki cucungulane nai ka Aberahame? Ku Aberahame wapacainga, ku layuginsia la mialri pacainga, ngiatatwaneanesu ku takaumawmasanesu?”

54Ku Yesu la tubalre, “Alaiyasi ngilralrigwaku, kudra lriguli kadrwa ku paluludane. Kudra walrigu nakwane amani ku Ama, ka amani kwidra Twaumase nai iyaiya numi. 55Kai numi ka wathingaleana iniane, ai wathingalaku iniane. Alaiyasi kainaku wathingale iniane iyaku, lrika miyaiyaku numiane ka madraedrangelre. Ai wathingalaku iniane, si palululudu ku sabulrwaneini. 56Ku cucungulane numi ka Aberahame, nakiaragai si sidrama turamuru ku akelaneli ku vai; sa drele, la kiraraagai turamuru.”

57Ku swa Yuda la iya kai iniane, “Ai kaisu wadarurwana ki taramalrimale ka caili, wadrelengasu ki Aberahame#8.57 “wadrelengasu ki Aberahame” yakai ku lasidrumane ka hungu ku amia kai “ku Aberahame wadrelenga muswane?”?”

58Ku Yesu la tubalre, “Lri tukucingalraku pelaela numiane, sakaiyana kitulalake ku Aberahame, amaninga naaku kudra ‘Ngiaikai si ka palralrawthane ikai.’ ”

59Sa iya kwini, ku lalasu la siludu ku lrenege si lri cabiri iniane, ai mwabere ku Yesu, twalai ki daane ki Twaumase katwase ulatadre.

Currently Selected:

Yuhani 8: NDV

Highlight

Copy