阿摩司書 1
1
1在烏西雅做猶大王，約華施个孻仔耶羅波安二世做以色列王个期間，大地動前兩年，提哥亞村一個牧羊人 #1:1 「牧羊人」抑係譯做「畜盡多羊个人」。阿摩司看到上帝啟示有關以色列个異象。下背个記載係阿摩司个話。
2佢講：
上主對錫安像獅仔吼吼滾，
對耶路撒冷像雷公𠾐𠾐滾。
牧場个青草轉黃；
迦密山个樹林枯燥。
上帝愛審判以色列个鄰國
有關敘利亞
3上主講：「大馬士革人再三犯罪，𠊎一定愛責罰佢等。佢等像用有鐵齒个打榖機打五榖恁樣，用殘忍个方法攻打基列人。 4所以𠊎愛放火燒哈薛王个王宮，將便‧哈達王个宮殿燒掉。 5𠊎愛敲掉大馬士革个城門，消滅住在亞文平原个人民㧯伯‧伊甸个領袖。敘利亞个人民愛被人捉到吉珥。」上主恁樣宣佈了。
有關非利士
6上主講：「迦薩人再三犯罪，𠊎一定愛責罰佢等。佢等將鄰國个人民捉去，賣給以東人做奴才。 7所以𠊎愛放火燒迦薩个城牆，將王宮燒掉。 8𠊎愛消滅住在亞實突个人㧯亞實基倫个領袖。𠊎愛責罰以革倫城；所有留在城肚个非利士人全部會死。」至高个上主恁樣宣佈了。
有關泰爾
9上主恁樣講：「泰爾人再三犯罪，𠊎一定愛責罰佢等。佢等毋遵守㧯同盟簽个條約，反轉將鄰國个人民賣給以東人做奴才。 10所以𠊎愛放火燒泰爾个城牆，將王宮燒掉。」
有關以東
11上主恁樣講：「以東人再三犯罪，𠊎一定愛責罰佢等。佢等全無憐憫个心，用刀劍迫害佢等个親族以色列人。佢等个發譴一直無停；佢等閼到毋肯煞。 12所以𠊎愛放火燒提幔个城市，將波斯拉个王宮燒掉。」
有關亞捫
13上主講：「亞捫人再三犯罪，𠊎一定愛責罰佢等。為到發展土地，佢等甚至剖開基列地懷胎婦女个肚笥。 14所以𠊎愛放火燒拉巴个城牆，將王宮燒掉。戰爭發生个時，會有相㓾鬥打个聲，像狂風暴雨。 15佢等个國王㧯官長全部會被人捉走。」上主恁樣宣佈了。
Currently Selected:
阿摩司書 1: THV12Hdb
Highlight
Share
Compare
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012