阿摩司書 4
4
1住在撒馬利亞个婦人家啊，愛聽𠊎个話！你等肥到像巴珊个牛乸。你等欺負艱苦人，壓迫窮苦人，喊老公斟酒給你等啉！ 2至高个上主指等自家个聖名發誓，講：「該日一定會來，有人會用鉤仔將你等鉤出去，就像魚仔被鉤仔鉤到。 3你等會一個一個被人拖到最近个城牆缺口，豁出城外 #4:3 「豁出城外」抑係譯做「向黑門山豁出去」。。」上主恁樣宣佈了。
以色列還係毋回頭
4至高个上主恁樣講：「以色列人啊，做你等到伯特利去犯罪啊！做你等到吉甲去盡量犯罪啊！做你等逐朝晨獻牲儀，三日奉獻一擺所得个十分之一啊！ 5做你等去獻有酵个餅做感恩个祭啊！做你等誇口恁大方个甘心祭啊！反正這兜事係你等自家盡好做个！
6「係𠊎 — 上主將飢荒降到你等逐隻城肚，使你等个糧食斷絕。總係你等還毋歸向𠊎。 7你等个農作物收割前三隻月最需要雨水个時節，𠊎毋落雨。𠊎在這城落雨，在該城毋落雨；𠊎使這家田地有雨，使該家田地枯燥。 8有兩三城个人民嘴燥到軟怠怠，到附近个城市尋水也無法度解渴！總係你等還係毋歸向𠊎。
9「𠊎 — 上主使你等个五榖發病、發蟲；𠊎派草蜢食淨你等个青菜、葡萄、橄欖、㧯無花果。總係你等還係毋歸向𠊎。
10「𠊎 — 上主使你等發瘟，像以前降給埃及人共樣。𠊎在戰場將你等个青年㓾淨淨，搶走你等个戰馬 #4:10 「搶走你等个戰馬」抑係譯做「又將你等搶來个戰馬㓾掉」。。𠊎使你等鼻孔被營中死屍个臭味沖到會死。總係你等還係毋歸向𠊎。」
11上主恁樣講：「𠊎已經消滅你等當中个人，就像𠊎 #4:11 「𠊎」希伯來文直譯係「上帝」。毀滅所多瑪㧯蛾摩拉共樣。你這兜賸到無死个人就像對火堆肚抽出來个一支柴。總係你等還係毋歸向𠊎。 12所以，以色列人啊，𠊎愛責罰你等。因為𠊎愛對付你等，你等愛準備好勢來見𠊎 — 你等个上帝！」
13看啊，上帝造山，也造風，
將自家个旨意㧯人講；
佢將日時頭變做暗晡頭，
佢腳踏高地，統治普天下。
佢个名安到上主 — 萬軍个元帥上帝。
Currently Selected:
阿摩司書 4: THV12Hdb
Highlight
Share
Compare
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012