阿摩司書 6
6
以色列个滅亡
1住在錫安享受安樂个人，㧯在撒馬利亞山頂恅到安全个人啊，你等慘了！你這兜大以色列國內个名人，受人尊敬个人啊，你等慘了！ 2你等到甲尼城去看，也到大哈馬市，然後到非利士人个迦特城去看哪！這兜國家當中，有㖠個無比猶大㧯以色列較強？它兜个土地，㖠個無比你等个較闊？ 3你等恅到大難臨頭个日仔還盡遠；事實上，你等使殘暴个統治緊來緊近。 4你這兜人慘了！你等只有知橫在象牙个眠床頂，抑係坐在安樂椅，食等細牛㧯肥羊个肉； 5唱等新編个歌，像大衛恁樣用豎琴伴奏； 6一碗又一碗个好酒緊啉，還膏上等个香水。你等恁樣享福，總係無為約瑟後代个衰微來悲傷。 7所以，你等會最先被人逐出國外去；你等放蕩宴樂个生活就恁樣結束了。
8至高个上主 — 萬軍个元帥上帝指等自家發誓，講：「𠊎盡惱以色列人 #6:8 「以色列人」原文直譯係「雅各」。个驕傲；𠊎盡恨佢等住个像宮殿个屋。𠊎愛將佢等个京城㧯底背所有个交給敵人。」
9若係一間屋還賸十個人，這十個人到尾也會無命。 10死人个親族來拖身屍去燒 #6:10 「燒」抑係譯做「為佢行燒火禮」抑係「為佢燒香料」。个時，佢會對屋肚最尾間个人講：「有人㧯你共下麼？」
該人會應講：「無了。」
親族講：「毋好出聲，𠊎等做毋得講起上主个名。」
11看哪！上主一命令，大間、細間个屋仔全部會橫淨淨，成做垃圾堆。
12馬會在巖石頂走麼？人會在海肚 #6:12 「海肚」抑係譯做「該位」。駛牛耕種麼？總係，你等將公平變做毒藥，將正義變做苦藥。 13你等自誇打橫羅‧底巴#6:13 「羅‧底巴」：這地名㧯希伯來話「虛空」个發音相近。。你等講：「𠊎等敢毋係靠自家个力量佔領加寧#6:13 「加寧」：意思係「角」，象徵列強。！」
14上主 — 萬軍个元帥上帝恁樣講：「以色列人啊，𠊎愛使外國个軍隊佔領你等个國家；北對哈馬隘口，南到亞拉巴海滣 #6:14 「亞拉巴海滣」可能指死海滣。，佢等愛來踐踏你等。」
Currently Selected:
阿摩司書 6: THV12Hdb
Highlight
Share
Compare
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012