但以理書 3
3
尼布甲尼撒下令拜金像
1 尼布甲尼撒王造一座金像，高二十七公尺，闊三公尺，安在巴比倫省个杜拉平原。 2王召集所有个大臣，包含總督、省長、副省長、參謀、財政大臣、法官、地方官㧯逐省所有其他个官員，喊佢等參加尼布甲尼撒王安這座金像个開光典禮。 3所以所有个總督、省長、副省長、參謀、財政大臣、法官、地方官㧯逐省所有其他个官員全部聚集來參加典禮。佢等企在尼布甲尼撒王安个金像頭前个時， 4傳令官大聲宣佈：「逐國、逐族、講逐種話个人啊，有命令傳給你等： 5你等一聽到羊角、簫、七弦琴、古箏、豎琴、笙㧯所有其他樂器个聲音，全部愛伏落去拜尼布甲尼撒王安个金像。 6麼人毋伏落去拜，就愛黏時被人㧒落盡猛个火爐底背。」 7所以，聽到樂器一響，逐國、逐族、講逐種話个人，全部伏落去拜尼布甲尼撒王所安个金像。
但以理三個朋友受控告
8該時，有兜巴比倫人來控告猶太人。 9佢等對尼布甲尼撒王講：「願王萬歲！ 10國王啊，你識命令，聽到該兜樂器一響，所有个人全部愛伏落去拜金像； 11麼人毋伏落去拜，就愛黏時被人㧒落盡猛个火爐底背。 12王所派去管理巴比倫省事務个猶太人 — 沙得拉、米沙、亞伯尼歌這三儕違背王个命令。佢等毋服事王个神明，也毋伏落去拜王所安个金像。」
13 尼布甲尼撒聽到這事，就大發譴，命令將這三個人帶到佢面前來。 14尼布甲尼撒對佢等講：「沙得拉、米沙、亞伯尼歌，你等斷真毋服事𠊎个神明？毋伏落去拜𠊎安个金像係麼？ 15這下，你等一聽到羊角、簫、七弦琴、古箏、豎琴，笙㧯所有其他樂器个聲音，就愛伏落去拜𠊎所造个金像；毋拜个人黏時愛被人㧒落盡猛个火爐底背。敢有麼介神明能救你等脫離𠊎个手呢？」
16 沙得拉、米沙、亞伯尼歌應王講：「尼布甲尼撒啊，𠊎等毋使為自家辯護。 17𠊎等所事奉个上帝能救𠊎等離開盡猛个火爐，也會救𠊎等離開你个手 #3:17 本節抑係譯做「若係𠊎等所事奉个上帝能救𠊎等離開盡猛个火爐㧯你个手，願佢恁樣做」。。 18王啊，就算佢毋救𠊎等，你愛知，𠊎等也絕對毋服事你个神明，毋伏落去拜你所立个金像。」
但以理三個朋友受判死刑
19 尼布甲尼撒聽到就變面，向沙得拉、米沙、亞伯尼歌大發譴。所以佢命令將火爐燒到比平常加猛七倍， 20又命令軍隊底背盡強壯个士兵將這三儕捆起來，㧒落火爐底背。 21士兵就將這三個人捆起來，將佢等㧒落去。該時這三儕還著等衫褲、外袍，也戴等帽仔。 22因為王个命令盡嚴，火爐燒到非常猛，對火爐底背噴出个火舌，卻將執行命令个士兵燒死。 23該時，沙得拉、米沙、亞伯尼歌還係被人捆等，㧒落盡猛个火爐底背。
24忽然，尼布甲尼撒王著驚到跳起來，問佢个大臣：「𠊎等敢毋係將三個人捆起來，㧒落猛火个火爐底背？」
佢等應講：「國王，係啊！」
25王問：「𠊎樣會看到有四個人在火底背行來行去呢？佢等全部無被人捆等，也全無燒到个樣仔；該第四个看起來像係神明 #3:25 「神明」抑係譯做「天使」抑係「神子」。。」
三儕得到高升
26所以，尼布甲尼撒行近盡猛个火爐口，大聲喊：「沙得拉！米沙！亞伯尼歌！至高上帝个僕人，請你等出來！」佢等黏時對火底背出來。 27所有个總督、省長、副省長、㧯王其他个官員全部圍過來看這三個人，看到佢等一些仔也無燒傷；頭那毛無燒到，衫褲全無變色，身上也無臭火煙。
28 尼布甲尼撒王講：「願沙得拉、米沙、亞伯尼歌个上帝得到稱頌！佢派天使來解救信靠佢个僕人。佢等甘願冒生命个危險反抗𠊎个命令，也毋肯伏落去拜麼介神明；佢等專心敬拜佢等个上帝。
29「這下𠊎命令：無論㖠國、㖠族、講㖠種話个人，所有譭謗沙得拉、米沙、亞伯尼歌个上帝个，全部愛斬斷手腳，佢个家愛成做垃圾堆；因為無別個神明有辦法像恁樣施行拯救。」
30所以，王高升沙得拉、米沙、亞伯尼歌三儕个官位，在巴比倫省擔任較高个職位。
Currently Selected:
但以理書 3: THV12Hdb
Highlight
Share
Compare
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012