但以理書 7
7
但以理个異象
(7:1–12:13)
看到四隻野獸
1-2在伯沙撒做巴比倫王个第一年，有一暗晡，𠊎 — 但以理發一隻夢，看到一個異象。𠊎將該暗晡所看到个記錄下來：
有一陣風對四面八方吹來，打到大海面頂。 3又有形狀無共樣个四隻盡大个野獸對海肚上來。
4第一隻野獸像獅仔，總係有鷹鳥个翼胛。𠊎又看到，牠个翼胛剝掉了；牠企起來，像人恁樣兩腳企在地面上；又給牠有人个心。
5第二隻野獸像人熊，用兩隻後腳企起來；牠个牙齒咬等三支膁𥯟骨。有聲音對牠講：「食啊，盡量食肉！」
6𠊎又看到，另外一隻野獸出現。牠像豹仔，總係背囊有四隻翼胛，像鳥仔个翼胛，又有四隻頭；牠得到統治權。
7𠊎又看到，第四隻野獸出現了。牠當強壯，又盡得人驚。牠用大鐵牙咬碎獵物，然後用腳蹂踏。牠㧯頭前三隻野獸無共樣，牠有十支角。 8𠊎緊看這兜角个時，角中間生出另外一支細角；這細角將原來有个十支角挷掉三支。這支細角有像人个目珠㧯一張講大話个嘴。
看到永存个
9𠊎又看到，有設立幾隻寶座，頂高坐等該萬古永存个。佢个衫像雪恁白，頭那毛像當白个羊毛。佢个寶座係火，寶座个輪仔像烈火。 10對佢面前噴出烈火，像一條大河壩。在寶座前服事佢个有千千；企在佢面前个有萬萬。佢宣佈開庭，書卷也打開來。
11𠊎注意看个時，又聽到該支細角講大話。𠊎注目一看，第四隻野獸㓾掉了，身屍受毀壞、又㧒落火中燒掉。 12賸下來該三隻野獸，牠兜个權柄搶走了，總係還留牠兜个生命，直到所定个時期。
13在暗晡時出現个異象中，𠊎看到有一位當像人子，坐等雲來，到該萬古永存个面前， 14接受權柄、榮光㧯王權，使逐國、逐族、講逐種話个人全部服事佢。佢个統治會永遠長存；佢个主權永遠無窮盡。
解釋異象
15𠊎 — 但以理所看到个異象害𠊎憂愁，操煩無平安。 16𠊎行到一個侍從面前，請佢為𠊎解釋這一切个事。所以佢為𠊎解釋這異象。 17佢講：「這四隻大野獸係指將來世界上會興起四個帝國。 18總係至高上帝个聖民會接受王權，掌管這王權直到永永遠遠。」
19𠊎想愛較清楚知第四隻野獸个事，因為這隻盡得人驚个野獸㧯其他三隻野獸無共樣。牠用銅爪鐵齒咬碎獵物，然後用腳蹂踏。 20𠊎也想愛知牠頭那頂个十支角㧯後來正生出來、挷掉另外三支角該支細角係麼介意思。該支細角有目珠㧯講大話个嘴，看起來比其他个角還較得人驚。
21接等𠊎又看到，該支細角㧯上帝个聖民相㓾，打贏佢等， 22直到該萬古永存个來到，為至高上帝个聖民伸冤。上帝聖民接受王權个時節就到了。
23該侍從又對𠊎解釋講：「該第四隻野獸係指將來世界上興起个第四個帝國。它㧯其他个帝國無共樣，它會吞掉全世界，蹂踏、打碎全地。 24該十支角係指接等統治這帝國个十個君王。後來另外一個王興起來，㧯以前个王無共樣；佢會征服其中三個王。 25佢會講悖逆个話，㧯至高个上帝做對頭，又迫害上帝个聖民。佢想愛改變佢等个宗教法律㧯節期。上帝个聖民會受佢統治一時期、兩時期、又過半時期 #7:25 「一時期…半時期」抑係譯做「三年半」。。 26後來，天頂个審判者愛開庭審判，將佢个統治權搶走，徹底消滅它。 27至高个上帝愛將天下个國家、王權㧯能力賜給佢个聖民。佢等个王權永遠無窮；世界所有个統治者全部愛服事並順服佢等 #7:27 「佢等个王權…順服佢等」抑係譯做「佢个王權…順服佢」。。」
28這件事到這為止。𠊎 — 但以理非常著驚，面色變到癧青。𠊎將這一切个事全部放在心肚。
Currently Selected:
但以理書 7: THV12Hdb
Highlight
Share
Compare
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012