以西結書 47
47
對聖殿流出來个泉水
1該人帶𠊎轉到聖殿門口。有泉水對門檻下背向東流，因為聖殿係向東个。水對聖殿南片个地泥下經過祭壇南片流出來。 2接等，該人帶𠊎對北門出來，帶𠊎𫟧外背轉到向東个外門。看到有水對門个南片流出來。 3該人用尺去量，對門向東量五百公尺；佢喊𠊎在該有水个地方行過去，水就到𠊎个腳目。 4佢對該位再向前量五百公尺，水到𠊎个膝頭。佢對該位又向前量五百公尺，水到𠊎个腰圈。 5佢再對該位向前量五百公尺，河壩水深到行毋過去，泅水正過得去。 6佢㧯𠊎講：「人子啊，你愛注意看！」
後來，該人帶𠊎轉到河壩滣。 7𠊎在該位看到河壩兩片有當多樹仔。 8佢㧯𠊎講：「這條河壩向東流過約旦河谷，流入死海。河壩水流入死海，會使鹹水變做淡水。 9這條河壩經過个所在會有各種生物㧯魚類。河壩水使死海个水變好水，水流到个所在全部會有生命。 10河壩滣會有人企等打魚；對隱‧基底到隱‧以革蓮全部會有曬網仔个所在。死海會像地中海共樣有盡多魚類。 11總係附近个湳仔㧯濕地个水還係當鹹；做得製鹽。 12這條河壩兩片會生各種果樹，果子打到結結，好做食物。樹葉毋會燥掉，果子無時斷。逐隻月會有新出个果子，因為這河壩水係對聖殿流出來个。果子可以做食物，葉仔可以做藥材。」
地界
13至高个上主恁樣講：「你等愛照地界將土地分給以色列十二支族；約瑟支族愛得兩份 #47:13 「得兩份」：約瑟兩個孻仔，瑪拿西㧯以法蓮，各支族愛分到一份。。 14𠊎識向你等个祖先發誓愛將這垤土地賜給佢等做產業。這下你等愛公平來分這垤土地。
15「北片个地界：對地中海向東經過希特倫，再到哈馬隘口、西達達、 16比羅他、西伯蓮 (這兜城市在大馬士革王國㧯哈馬王國之間)、哈撒‧哈提干 (在浩蘭王國堘頭)。 17北片个地界對地中海向東直到哈薩‧以難，用大馬士革㧯哈馬南片做界。
18「東片个地界：大馬士革㧯浩蘭个交界向南，順等約旦河 (河西係以色列，河東係基列) 直到死海个他瑪#47:18 「他瑪」係根據古譯本，希伯來文个意思無清楚。。
19「南片个地界：對他瑪向西南到米利巴‧加低斯个河壩，再轉向西北，順等埃及邊界細河壩到地中海。
20「西片个地界：對地中海向北到哈馬隘口西片對面个所在。
21「你等愛照以色列逐支族分這垤土地。 22你等愛抽籤分這垤土地做產業。住在你等當中个外族人㧯佢等在這位出世个子女全部愛分到土地。你等愛款待佢等像以色列人共樣，俾佢等在以色列逐支族中抽籤分土地。 23外族人暫時住在㖠一支族，就在該支族中分土地。𠊎 — 至高个上主恁樣宣佈了。」
Currently Selected:
以西結書 47: THV12Hdb
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
