馬可 14
14
殺害耶穌个陰謀
(馬太 26:1-5；路加 22:1-2；約翰 11:45-53)
1𨃟過節㧯除酵節个前兩日，祭司長㧯經學教師陰謀愛祕密捉耶穌，將佢㓾死。 2佢等講：「𠊎等毋好在節期中下手，免得惹起民眾个暴動。」
婦人家用香油膏耶穌
(馬太 26:6-13；約翰 12:1-8)
3耶穌在伯大尼發癩个西門屋下；食飯个時，有一個婦人家帶一隻玉罐仔來，底背裝盡珍貴个純哪噠香油。姖打破玉罐，將香油倒在耶穌个頭那頂。 4筵席中个人有兜盡無歡喜，彼此議論講：「樣般恁打喪呢？ 5這香油做得賣三百零隻銀錢 #14:5 一隻「銀錢」係當時工人一日个工錢。，拿來救濟窮苦人啊！」佢等就責備該婦人家。
6總係耶穌講：「由在姖！做麼介為難姖哪？姖為𠊎做个係一件盡靚个事。 7因為常常有窮苦人同你等共下，若係愛，你等隨時做得救濟佢等；總係𠊎毋係常常同你等共下。 8姖已經盡所能个做了；姖將這香油倒在𠊎个身上係為𠊎个埋葬先做準備。 9𠊎實在㧯你等講，普天下，無論福音傳到麼介所在，逐儕都愛講起姖所做个事，來紀念姖。」
猶大出賣耶穌
(馬太 26:14-16；路加 22:3-6)
10耶穌十二個學生當中，有一個加略人猶大；佢去見祭司長，愛將耶穌交給佢等。 11佢等聽到猶大所講个，就非常歡喜，又答應拿錢給佢。對該時起，猶大就尋機會愛出賣耶穌。
耶穌同學生共下食𨃟過節个晚餐
(馬太 26:17-25；路加 22:7-14，21-23；約翰 13:21-30)
12除酵節个第一日，就係㓾𨃟過節羔羊該日，學生來問耶穌講：「你愛𠊎等去㖠位為你準備𨃟過節个晚餐呢？」
13耶穌就派兩個學生，吩咐佢等講：「你等入城去，會堵到一個人帶等一罐水，你等就跈等佢； 14佢去到㖠家，你等就問該家个主人講：『先生講：𠊎㧯𠊎个學生食𨃟過節晚餐个客廳在㖠位？』 15佢會帶你等去看樓頂一間佈置好个大房間；你等就在該位代𠊎等準備。」
16兩個學生出去，入去城肚；所堵到个全部㧯耶穌對佢等講个共樣；佢等就在該位準備𨃟過節个晚餐。
17臨暗仔，耶穌㧯十二個學生全部到齊。 18佢等坐下來食个時節，耶穌講：「𠊎實在㧯你等講，你等當中同𠊎共下食个，有一個人愛出賣𠊎。」
19學生就盡憂愁，一個一個問佢講：「敢係𠊎？」
20耶穌應講：「係你等十二儕當中个一儕；㧯𠊎用共隻盤仔搵餅个，佢就係。 21照聖經所講，人子會受害；總係出賣人子个人有災禍了！佢莫出世還較好！」
主个晚餐
(馬太 26:26-30；路加 22:15-20；哥林多前書 11:23-25)
22佢等食个時節，耶穌拿起餅仔，感謝上帝後，就擘開，分給佢等，講：「拿來食；這係𠊎个身體。」
23佢又拿起杯仔，感謝上帝後，交給佢等；佢等全部就啉。 24耶穌講：「這係𠊎个血，係證明上帝㧯人立約个血，為盡多人來流出个。 25𠊎實在㧯你等講，𠊎絕對毋會再啉這葡萄酒，直到在上帝个國啉新酒該日。」
26佢等唱一首詩，就出來，到橄欖山去。
耶穌預言彼得毋認佢
(馬太 26:31-35；路加 22:31-34；約翰 13:36-38)
27耶穌對佢等講：「你等攏總會離開𠊎，因為聖經記載：
上帝講：
『𠊎愛攻擊牧人，
羊群就分散掉去。』
28總係𠊎復活以後，愛比你等先去加利利。」
29 彼得講：「就算別人全部離開你，𠊎絕對毋會離開你！」
30耶穌對佢講：「𠊎實在㧯你講，今暗晡，雞仔啼第二擺 #14:30 有兜古卷無「第二擺」。以前，你會三擺毋認𠊎。」
31 彼得用還較堅定个口氣講：「就算𠊎一定愛同你共下死，𠊎也絕對毋會毋認你！」
其他个學生也全部恁樣講。
在客西馬尼園祈禱
(馬太 26:36-46；路加 22:39-46)
32佢等來到一個所在，名安到客西馬尼；耶穌㧯學生講：「你等在這位坐，等𠊎去祈禱。」
33然後佢帶彼得、雅各㧯約翰共下去。佢開始感覺盡憂傷痛苦， 34對佢等講：「𠊎个心艱苦到會死。你等留在這位，愛警醒噢！」 35佢行前兜仔，就伏在地上，懇求上帝，若係做得，毋使俾佢經歷這個痛苦。 36佢講：「阿爸，𠊎个爺啊，在你凡事都能。求你將這個苦杯徙走；總係，毋好照𠊎个意思，愛照你个旨意。」
37佢倒轉來个時，發現三個學生睡掉，就㧯彼得講：「西門，你在這睡目係麼？無法度警醒一點鐘久嗎？ 38你等愛警醒祈禱，免得陷落迷惑。你等確實心靈甘願，總係肉體軟弱。」
39佢又行過去，還係用共樣个話祈禱。 40然後佢又倒轉學生該位，看到佢等又睡掉，因為佢等个目珠擘毋開；佢等也毋知愛㧯佢講麼介正好。
41耶穌第三擺倒轉來，㧯佢等講：「你等還睡目，還在該位休息嗎？罅擺了，時間到了，看啊，人子已經被人出賣到罪人手中囉。 42䟘起來，𠊎等來去！看啊，出賣𠊎个人到了！」
耶穌被人捉去
(馬太 26:47-56；路加 22:47-53；約翰 18:2-12)
43耶穌還講等話个時，十二個學生中个猶大來到。有一大群人帶等刀仔、棍仔同佢共下來；佢等係祭司長、經學教師，㧯長老派來个。 44出賣耶穌个人事前給佢等一隻暗號，講：「𠊎唚麼人，佢就係你等所想愛个人。你等愛捉到佢，嚴嚴看守，將佢帶走。」
45 猶大一到，即時行到耶穌面前，喊講：「先生！」又唚佢。 46所以佢等就下手捉耶穌。 47企在塍頭个人當中，有一儕挷出刀仔，對大祭司个僕人劈過去，將佢个耳公削掉一隻。 48耶穌對佢等講：「你等帶等刀仔㧯棍仔出來捉𠊎，看𠊎做強盜係麼？ 49𠊎逐日在聖殿肚教人，常常同你等共下，你等並無捉𠊎。總係，這個事係愛應驗聖經所講个話。」
50這時，所有个學生全部離開佢逃走。
51有一個後生人，身上單淨披等一垤麻布，跈在耶穌个後背；佢等就想愛捉佢， 52總係佢㧒掉該垤布仔，打赤膊走掉。
耶穌在議會受審判
(馬太 26:57-68；路加 22:54-55，63-71；約翰 18:13-14，19-24)
53佢等將耶穌帶到大祭司該位去；所有个祭司長、長老，㧯經學教師全部聚集在該位。 54彼得遠遠跈等耶穌，直到大祭司个庭院肚，坐在警衛个當中焙火。 55祭司長㧯全議會想盡辦法尋證據告耶穌，來定佢死刑，總係尋毋到麼介證據。 56好多人出面做假見證告佢，總係佢等所講个鬥毋到。
57後來有幾個人企起來，做假見證告耶穌講： 58「𠊎等聽到佢講過：『𠊎愛將這座人手所起个聖殿拆掉，三日內起一座毋係人手所做个聖殿。』」 59連這個控告，佢等所講个也鬥毋到。
60所以大祭司在大家面前企起來，問耶穌講：「這兜人告你个，你無麼介話好應係麼？」
61耶穌恬恬，一句話也毋講。大祭司又問佢：「你係毋係基督，係該應當受稱頌个上帝个孻仔麼？」
62耶穌應講：「𠊎係！你等會看到人子坐在全能者个右片，坐等天頂个雲降臨！」
63大祭司就扯裂自家个衫，講：「𠊎等毋使別个證人了！ 64你等有聽到佢侮辱上帝个話。你等講愛樣般判佢？」
佢等全部判佢有罪，應當處死刑。
65有兜人就對佢呸口潾，又揞等佢个目珠，用拳頭乸打佢，問佢講：「先知啊，試揣看，係麼人打你？」該兜警衛也拉等佢，用巴掌乸搧佢。
彼得毋認耶穌
(馬太 26:69-75；路加 22:56-62；約翰 18:15-18，25-27)
66該時，彼得還留在下背个庭院肚。有大祭司个一個使女行過來， 67看到彼得在該位焙火，就看等佢，講：「你乜係同拿撒勒个耶穌共下个。」
68 彼得否認講：「𠊎毋知，也無了解你講麼介。」然後，佢出去前院。這時，雞仔就啼 #14:68 有兜古卷無「這時，雞仔就啼」。。
69過一下仔，該使女又看到佢，就㧯企在塍頭个人講：「這儕係佢等當中个一個！」 70彼得又否認一擺。
又過一下仔，塍頭企等个人再一擺對彼得講：「你確實係佢等當中个一個，因為你也係加利利人！」
71 彼得就發誓咒詛講：「𠊎毋識你等所講个人！」
72即時，雞仔就啼第二擺 #14:72 有兜古卷無「第二擺」。；彼得正想起耶穌對佢講過个話：「雞仔啼兩擺 #14:72 有兜古卷無「兩擺」。以前，你會三擺毋認𠊎。」彼得就忍毋住，噭出來。
Currently Selected:
馬可 14: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
