馬可 16
16
耶穌復活
(馬太 28:1-8；路加 24:1-12；約翰 20:1-10)
1安息日一過，抹大拉个馬利亞、雅各个阿姆馬利亞，㧯撒羅米買兜香料，愛去膏耶穌个遺體。 2禮拜日打早，日頭正出來，姖等就去墓地。 3-4在路上，姖等心中想：「有麼人好𢯭手將墓門口个石頭徙開哪？」 (因為該係一隻大石頭。) 總係姖等擎頭一看，石頭已經徙開了。 5姖等行入墳墓，看到一個後生人坐在右片，身上著等白色个長袍；姖等非常著驚。
6該後生人講：「毋使驚，𠊎知你等係尋被人釘十字架个拿撒勒人耶穌。佢無在這位，已經復活了！你等看，這係佢等安葬佢个所在。 7你等去㧯厥學生，特別係彼得，講：『佢愛比你等先去加利利；在該位你等會見到佢，就像佢以前㧯你等講个。』」
8姖等愊愊掣又感覺奇怪，黏時離開墳墓，蹌等走。姖等無將這個事㧯麼人講，因為姖等盡驚。#16:8 最早个古卷到第八節就結束。有兜古卷加結尾一；大部份个古卷加結尾二；也有古卷加結尾一㧯結尾二。
結尾一
該兜婦人家去見彼得㧯佢个朋友，將所聽到个全部㧯佢等講。事後，耶穌親身差派厥學生，從東到西，傳這神聖、不滅、使人得到永遠拯救个道理。阿愐！
結尾二
耶穌對抹大拉个馬利亞顯現
(馬太 28:9-10；約翰 20:11-18)
9禮拜日打早，耶穌復活後，最先對抹大拉个馬利亞顯現。 (耶穌識對姖身上逐出七個鬼。) 10姖去㧯該兜跈耶穌个人講；佢等當在該位傷心流目汁。 11佢等聽到耶穌復活㧯馬利亞已經看到佢个消息，總係無人相信。
對兩個學生顯現
(路加 24:13-35)
12這事以後，耶穌用另外一種方式對兩個愛去鄉下个學生顯現。 13這兩儕倒轉來㧯其他个學生講，佢等還係毋信。
對十一個學生顯現
(馬太 28:16-20；路加 24:36-49；約翰 20:19-23；使徒行傳 1:6-8)
14最後，十一個學生坐等食飯个時，耶穌對佢等顯現。佢責備佢等，因為佢等毋單淨無信心，又硬頸，毋信佢復活後看到佢个人所見證个。 15佢對佢等講：「你等愛去普天下，對全人類傳福音。 16信又接受洗禮个，定著得救；毋信个，會受定罪。 17信个人會有行這兜神蹟个能力：佢等會奉𠊎个名逐鬼；講新个靈語； 18用手捉蛇；啉到有毒个東西也毋會受傷害；按手在病人身上，病人就會得到醫治。」
耶穌受接升天
(路加 24:50-53；使徒行傳 1:9-11)
19主耶穌㧯佢等講這兜話以後，受接到天頂去，坐在上帝个右片。 20學生出去，逐所在傳福音；主㧯佢等同工，用佢等所行个神蹟來證明佢等所傳个道係真實个。
Currently Selected:
馬可 16: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
