YouVersion Logo
Search Icon

Ifipigo 20

20
Pawulo ibita kangi ku Makedoniya na ku Ugiliki
1Lila liyowo lya ku Efeso lyavelige yelisisile Pawulo avakong'ise vala ave vafuuvitwe, akuvakangasa imitima. Sweno, ndawe avilagige, ivanga ulugendo ibita ku Makedoniya. 2Alutilige igendela munanana sa ing'i sila akuvakangasa imitima avanu akuvalongela ing'ani nzolofu pambele afisile ku Ugiliki 3kwe ikalite lusika lwa myesi gidatu pe akwigelanisa ukubita ku Siliya swe avelige akulukagula ulwa Avayudaya vevina lukani lubi kulumwene, swe ndawe alamulige ukupiluka ikola ku Makedoniya. 4Neke Sopatulo umwana va Piho, ukuhuma ku Beloya, ahelelise nave, kangi na Alisitako na Sekundo ukuhuma ku Tesalonike, Gayo ukuhuma ku Delibe, Timoti, Tikiko na Tolofimo va mulutanana lwa mu Asiya. 5Iwo vatutalye vilongola sambi vakatusindile kula ku Toloya. 6Hwehwe, pekilutye ikimunyi ikikomi cha Imikate je simihate uwuhahu, swe ndawe twahovige ikipugu ikikomi ukuhuma ku Filipi na pefilutye filo fihanu twafisile kula ku Toloya. Uko twikalite filo fimufung'ati.
Pawulo akwitang'ana na ave vafuuvitwe ku Toloya ulwa umudugo
7Ikimunyi icha pa Jumamosi pamihye petwetukong'ine pamwinga sambi tugumegule umukate, Pakuva Pawulo e alamwe ukuhega ikimunyi cha kavili, avadaliche avanu musika hilo mbaka mukilo mwilangali. 8Mula mukibupa cha pachanya, che twetwipwali, mwemofili ifing'ali fyolofu ifikwaka. 9Neke munyakilambo uyumwi yeitambulwa Otika eateng'eme pakinang'ana ulusika lwe Pawulo adalikige. Otika avanzile ukusinzila ludodo ludodo neke pambele akwibatika na itulo ndawe agwisige pasi uluhuma mukibupa cha ikaye ya wudatu uluhuma kuchanya. Vamusafile pasi yeafwe. 10Neke Pawulo asulunwike pasi, swe igondama, akumukumbatila itigila, “Mulemwage ukuhuguvala pakuva akaali pe ina uwumi mulumwene.” 11Sweno ndawe ililige kangi pachanya swe imegula umukate swe ilya. Ave peadalika Ulukani Ulunofu mbaka pekwidandaluka, ndawe ahegige. 12Avanu vala vamwegwe yula munyakilambo vakumusindika kukaye iva mumi hilo, ulo lwavapelye ulusikimiko.
Ulugendo ukuhuma ku Toloya ukubita ku Mileto
13Hwehwe twahofile ikipugu ikikomi swe twilongola ukubita ku Aso kwetwetulagine ukumufika Pawulo. Ulu lwetwetulagine; pakuva awendige ukubita uko igendela mubalali. 14Pe, atufisile kula ku Aso, ndawe twamutegulige mula mukipugu ikikomi, ndawe twabitige ku Mitulene. 15Ukuhuma uko twagenzile twifika ku Kiyo pamilawu. Ikimunyi chakavili twasuupite pa Samo, ikimunyi cha wudatu kangi twafikite ku Mileto. 16Neke Pawulo ealamwe ukugendela mululenga sambi alemwe ukukola ku Efeso ulwa alafuvalila mu Asiya. Angufisige sambi afike ku Yelusalemu manyi luhwane akifike ikimunyi ikikomi cha i Pendekosite.
Pawulo akuvilaga avavaha va ilikanisa lya ku Efeso
17Uluhuma ku Mileto Pawulo atumite lukani ku vavaha va ku Efeso sambi vatang'ane nave. 18Peyevafisile kulumwene avatige, “Mukulukagula lwendave ulusika mbeluli pamwinga na yunyenye uluhuma ikimunyi kila ikilongola chendafiche mu Asiya. 19Mukulukagula lwendamupigilige Umutwa kwa kwilevesa hilo, na kwa inzihosi na mung'ani inalamu sesafikite ukuhuma kwa Avayudaya. 20Mukulukagula ulwa sindawonigi lutalamu pakudalika apelu na mukaye senyu na ukuvigisa chechekivesaga chekihwanite ukuvatanga nyenye. 21Ndavakenyelige mbevali Avayudaya, na avangi avamyanza, vamupitukile Nguluvi na ukumufuuwa Umutwa vetu Yesu. 22Lino, mupulikise! Nene, Pengumupulika Umuhe, ndibita ku Yelusalemu wesingulukagula ulufika nene. 23Lwengulukagula lwe ulwa ukutigila Umuhe Umwelu akunzolelela ulwa muboma mbesili ukutigila ukupingwa na uluteseko ifyo fyefinzindye. 24Nene, sindihosa hilo ulwa uwumi wangu ukuva kinu hilo kwa nene pesi kula ukukwisa na ukusinda ikipigo chendatumitwe na ukupelwa na Umutwa Yesu sambi migage, kwekutigila ndalikage ulukani ulunofu lwa uwuwuya wa Nguluvi.
25“Ngave ndibita uko na uko mwanyenye ndidalika Uwutwa wa Nguluvi. Neke lino, ngulukagula ukutigila asukuli nave munu mwanyenye yesaambona kangi. 26Pede, neng'ino de nguvalongela pelu ukutigila manyi sambi luwoneke umuyenyu uyumwi va nyenye peayasile, nene mba ndimugaya lwakulongwa lwelweluvesaga. 27Pakuva sindasiniti nambi ludodo ukuvalongela ulukani lwealuvikite Nguluvi tupigage. 28Mwikomalilage yunyenye; muligosage lila lilugu lye Umuhe Umwelu akavavisile nyenye muve valongola va ilikanisa. Mulikwamilage likanisa lya Nguluvi lyealigusile kwa idanda ya Umwanakwe. 29Ngulukagula hilo ulwa penyesile nene amagwami amakali gavasila gingila ukwenyu, gava magaya lusungu kwa ikipinga. 30Na ukuhuma mwa nyenye vawoneka avanu vevalonga ing'ani isa uwudesi sambi vavayase avanu vavafwate avene. 31Na palulo muvela miho mukwiwuka ulwa kwa ulusika lwa myaka gidatu, pakilo na pamunyi sindalekiti ukuvapavila mbemuli kwa inzihosi.
32“Na swe lino, nguvavika nyenye mumawoko ga Nguluvi avakwamile mulukani lwa uwuwuya wakwe. Umwene yeahwanite ukuvakangasa nyenye sambi muhwane ukupelwa uwufunyilile wula weavaviche avanu vakwe. 33Nene nambi sukumwi sindabodochi amagobole, nambi isahabu, nambi imyenda ja munu yeyeavesaga. 34Mulukagwe yinyenye ukuta ngapigige ndikola amawoko gangu yinene sambi ndikwavile fyengulwime nene na avayangu. 35Ngavelige mbepali nguvalagila mwigage ukutigila kwa ukupiga ndahihyo twidaga ukuvatanga vala avahomefu, tukwiwuka ing'ani isa Umutwa Yesu umwene weatige: ‘Lwinoga hilo ukutawula sindawe ukwanukila.’”
36Pealonzile ulo, Pawulo afugime pamwinga nawo, swe akwifunya. 37Neke mbevali vavembite; swe vakumwilaga vakumukumbatila na ukumunonela. 38Ulukani lwelwavahuguvike hilo lwelula lweatige sivamuwona kangi. Swe, ndawe vamusindikige mbaka ku kipugu ikikomi kumwani.

Currently Selected:

Ifipigo 20: HeNT2004

Highlight

Share

Copy

None

Want to have your highlights saved across all your devices? Sign up or sign in