Matayo 17

Yesu ipituka uluhwano

(Maliko 9:2-13; Luka 9:28-36)

1Na pefilutye ifilo fimutanda Yesu avategwe Petulo na Yakobo na umwanakwave Yohane, swe akuvasindika kukidunda kuchanya. 2Na wevakumulava, Yesu apitwike uluhwano lwake, uwusu wakwe wamalavadike ndawe ilisuva, neke na gimyenda jakwe jave myelu nda lung'ali. 3Neke vala avadatu swe vakumuwona Musa na Eliya vilongana na Yesu. 4Ndawe Petulo amutigilige Yesu, “Mutwa apo lunofu hwehwe twikale baha! Wone wiwenda nene nzenge fyuwo fidatu ipa, ikimwi cha veve, neke ikimwi kiva cha Musa na ikingi kiva cha Eliya.” 5Petulo we pealonga, ilifufu lyelu lyaasile pevevipwali neke iliswi lyahumite mwifufu litigila, “Uyu ye Mwanangu umwende vangu, yendinogelwa nave, mu mupulikage yuyo.” 6Pevapulike ulu avanyigendo vagwe pasi kinyalileme nawo vave na muhwehwe mukomi.

7Ndawe Yesu aasige neke avapamise, itigila, “Mulamuke mulava na muhwehwe.” 8Neke na pevakang'we amiho gawo sivamuweni uyungi, vamuwene Yesu hela iyena.

9Nawo pevasulunukige uluhuma kukidunda Yesu avalonje akuvaginalisa itigila, “Mulalongela munu ulu lwe muluwene mbaka Umwana va Umunu peave yeasilibwilwe uluhuma kuvafwe.” 10Ndawe avanyigendo vamuwusige Yesu vitigila, “Kumbi ndawuli avigisi va indagilo vitigila ulwa luvaje Eliya yeatale ukusa?” 11Ndawe Yesu apitulige itigila, “Nachene lwelulo, Eliya yeaasa ukuwuyapisa mbesili. 12Neke nguvalongela ukuta, Eliya yeakasile, neke avene sivamukagwi nda, neke avene vamupije lwevawendige vavene. Umwana va Umunu nave, ateseka mumawoko gawo.” 13Ipo avanyigendo pevalukagwe ukutigila, avalongelige isa Yohane umubatisi.

Yesu akumuponia umunyakilambo umunyalisoka

(Maliko 9:14-29; Luka 9:37-43a)

14Nawo vave vakwitang'ana na ililugu lilila lya avanu, umunu uyumwi amubitye Yesu akumufugamila itigila, 15“Be Mutwa, ndegepele umwanangu ina ililibisi ifwaha pakomi, pakuva kolofu aigwila mumoto na mululenga. 16Nane ndamuletite ku vanyigendo vako, neke valemwe ukumuponia.” 17Nave Yesu ndawe amupitulige akumutigila, “He! Nye, nye mbegalo ingaya lufuuwo, na imbegalo ya uwuyasi! Mbi ndikalasa na nyenye mbaka panili? Na mba pendivakangalila mbaka panili? Ongo mundetelage tandi ipa uyo munyakilambo.”

18Vave vakumuleta, Yesu alikenyele lila lisoka, ndawe nalyo lyahegige, na munyakilambo yuyo aponige lulusika lulo. 19Ndawe avanyigendo vaasige kwa Yesu palubali neke vamutigile, “Kumbi ndawuli hwehwe tukalemilwe ukulihumya lisoka?” 20Neke Yesu avalongele, “Pakuva mwina lufuuwo lukefu. Nachene nguvalongela, wone muke muve mwina lufuuwo ndawe ulupeke lwa umuhaladali, muke muhwanite mukilongele ikidunda iki, ‘Hege ipa bite kula,’ nacho kihega. Sikololi ulukani uluke luva lutalamu ukupigika kwa nyenye.”

[ 21“Ilisoka ilindawe ili, silihwaniti ukuhega pesi ukwimila ulwifunyo na ukwiyima ukulya.]”

Yesu ipilukila ukulonga kangi ulwa ifwa yakwe

(Maliko 9:30-32; Luka 9:43b-45)

22Na pevakong'ine ku Galilaya, Yesu avalonje ukutigila, “Umwana va Umunu atawulwa mumawoko ga avanu. 23Nawo vamuwulaga, neke kangi asilibuka ikimunyi icha wudatu.” Sweno avanyigendo vihuguvala pakomi.

Amahombo ga imbemenenge iya itembeli

24Na peyevafisile ku Kapelenaumu, avakong'asa imbemenenge iya itembeli vaasile kwa Petulo neke vamuwuse, “Ngali Umwigisi venyu sihombagi imbemenenge iya itembeli?” 25Petulo ndawe avatigilige, “Nda aihomba.” Na peafisile kukaye, umwene Yesu atasile ukumuwusa Petulo, “Wiwona ndawuli Simoni? Avatwa va mung'i vavikong'asa imbemenenge ukuhuma kwa vanani? Ukuhuma ku vanawo apangi ku vagenzi.” 26Neke Petulo atigile, “Ukuhuma kuvagenzi.” Neke Yesu amutigile, “Apo lino kwekutigila avanyang'i sivihombagi. 27Neke hwehwe tulemwe ukuvavifya, bite ku nyanza ukatoose indovano. Pe ukwegite isomba iyitala, mumulomo gwayo uliwona iligobole ilikwilye imbemenenge iya itembeli kwa nene na veve. Tegulage neke ukavahombe imbemenenge!”

Currently Selected:

Matayo 17: HeNT2004

Highlight

Copy