Matayo 8

Yesu akumuponia umunya wukoma

(Maliko 1:40-45; Luka 5:12-16)

1Neke Yesu avelige isulunuka ukuhuma kukidunda, amalugu ga avanu gamufwatite. 2Ndawe baho asige umunu umunyawukoma swe ifugama itigila, “Mutwa wone wiwenda nelese!” 3Ndawe Yesu agololige iliwoko swe akumupamisa, neke atigile, “Ndisaka! telelage.” Ulusika lulo umunu yula uwukoma wula watelye. 4Ndawe Yesu amulongelige umunu yula ukutigila, “Ulamulongela munu yeyeavesaga, ino bitage ukilagile ku mutambisi, neke utawule ikitawulwa ndawe mwealonje Musa, ukilagile ukutigila uponite.”

Yesu akumuponia umunya ukoma

(Luka 7:1-10)

5Yesu peinje mu Kapelenaumu, umuvina va avanyigalu avalumi asile neke amusuke, 6itigila, “Mutwa, umukami vangu kukaye avasise mutamwa litela. Ivawa hilo” 7Ndawe Yesu amutigilige, “Nzusa ndimuponie.” 8Ndawe umuvina va avanyigalu avalumi amupitulige Yesu itigila, “Mutwa nene sinywaniti veve wingile mukaye ya nene nda; longe lukani hela umukami vangu apona. 9Pakuva nayi nene ndi munu hela ndimuvike nu wunzagila, na yinene ndina vanyigalu avadodo kwa nene, pendonzile kulu yumwi ukuta, ‘Bite!’ aibita; na uyu, ‘Wuse!’ akusa; na penige kulu mukami vangu, ‘Pige iki!’ aipiga.” 10Neke Yesu pe apulike ulo, asasave, swe akuvalongela vala vevamuninilige, “Nachene nguvalongela, sindendilaluwona ulufuuwo ulukomi ndawe ulu, kwa yeyeavesaga mu Isilaeli. 11Nene nguvalongela, avanu wolofu savalahuma kumihago na kufuka, nawo savateng'emala pamwi pawulilo na Abulahamu na Isaki na Yakobo ku wutwa uwa kuchanya. 12Neke vala avinogela ukuva muwutwa uwo savatagwa kwivala kulwisa, kwesakuva ni kivembo nu kugelesula amino.” 13Ndawe Yesu amutigilige umuvina va avanyigalu va avalumi, “Wibitilage kukaye, luvesage ndawe lweufuuvitwe.” Swe ndawe umukami vakwe aponige lulusika lulo.

Yesu iponia avanu wolofu

(Maliko 1:29-34; Luka 4:38-41)

14Yesu peyeafikite kukaye ya Petulo, amuwene mwayuva umukwive va Petulo avasise muwuhaga mutamwa mbungo. 15Ndawe Yesu amupamisige iliwoko swe imbungo yikumuleka, ndawe alamukige akuvatelekela.

16Ikimunyi kila pakinyamihye vavaletite kwa Yesu avanu wolofu avevina amasoka swe Yesu akuvahumya amasoka mbevali kwa lukani, na ukuvaponia avalivatamwa. 17Apigite ulu sambi akwise sesali ndonge na umuvisi Yesaya:

“Umwene ategwe

uwuhomefu wetu,

na ukutegula ifitamwa fyetu.”

Avahwanite ukuva vigendo va Yesu

(Luka 9:57-62)

18Yesu peawene ililugu lya vanu limupilime, atige valowoke inyanza vabite kumwambu. 19Ndawe umwigisi uyumwi va indagilo abitige kwa Yesu nu kumulongela, “Mwigisi nene ngufwata mbekuli kukwe ubita.” 20Ndawe Yesu amupitulige, “Ing'eve sina mapalika na ifidege fina wusulya; neke Umwana va Umunu mugaya nambi pa wusuupo.” 21Neke uyungi va avanyigendo vakwe atigilige, “Mutwa leke tasi mbite ngamutage dada.” 22Ndawe Yesu amulongelige, “Ninile nene! Valeke avafwe vavatage avafwe vawo.”

Yesu ikatusa ikifulufumbi

(Maliko 4:35-41; Luka 8:22-25)

23Nape Yesu inje mukipugu, avanyigendo vakwe vamuninilite. 24Neke pechuse ikifulufumbi munyanza mula swe kivanga ukutova nu kusudya ikipugu mululenga, neke umwene Yesu eagonelye. 25Ndawe avanyigendo vabitige kukumulamusa vitigila, “Tutange Mutwa twifwa!” 26Ndawe Yesu avatigilige, “Mbi ndawuli mwivanya muhwehwe nu lufuuwo lukefu?” Swe ilamuka nu kukenyele ikifulufumbi swe inyanza yitendemala wunofu. 27Swe avanu visasavala vitigila, “Mbi munu muki uyu, ye na kifulufumbi na inyanza fikumupulika?”

Yesu akuvaponia avanu vavili avanyamasoka

(Maliko 5:1-20; Luka 8:26-39)

28Nape alowike kumwambu ya inyanza, kulutanana lwa Avagelasi, avanu vavili vakali avanyamasoka vamusye Yesu, vahumige kufyanga, siekwali munu ye akolige ing'asi iyo nda. 29Ndawe baho vavangige ukukoola, “Uuuwi! Twina kiki veve na hwehwe vemwana va Nguluvi? Ndawuli wusile ututese ulusika wesilulakwila?”

30Ino baho pepina kipinga cha ingubi chakwamiligwe. 31Ndawe amasoka, gakumusukige Yesu, “Wone ukutudaga twisuka utusindike mukipinga icha ingubi.” 32Ndawe Yesu agalongelige amasoka itigila, “Mubite” ndawe gahegige muvanu vala nu kwingila mungubi; sweno ikipinga mbekili kikimbila nu kwitosa mu nyanza nu kufwa.

33Avanyakukwamila ingubi swe vikimbila, nu kubita kuboma nu kulonga ing'ani mbesili na sa vala avanyamasoka. 34Swe avanyaboma mbevali vakusa ukumutang'anila Yesu; nape vamuwene vamusukite ahege mulutanana lwawo.

Currently Selected:

Matayo 8: HeNT2004

Highlight

Copy