YouVersion Logo
Search Icon

Amǝ Mishan 12

12
À wal lú Jemis sǝ a oasǝ Bitǝrus a ndàkurban
1A baku mǝno ka Murǝm Hirǝdus mǝnana à tunǝki ama Agǝripa ka tita pea aɓea amǝkwaɗi aɓa ikǝlisiya tanni. 2Bwal Jemis, mǝ'eam Yohana, kasǝ meali nǝ nggeabyau. 3Lang sǝn mǝnia yì gir pe ka pwasǝ bum aɓwana-mǝgule mala amǝ Yahudi ka, nyartu bwal Bitǝrus gbal. (Mǝnia ka pe a pwari Lamsan mala Bǝredi mǝnana yis pa'ari raka.) 4Lang bwalǝna Bitǝrus ka pǝlǝa tsǝa à kya oasǝi a ndàkurban. Tamsǝ asoje arǝ abanì ine ɓǝa yallí, sǝ koya banì ka ndanǝ asoje ine. Kànì mala Hirǝdus ka nda mǝnana ama nǝ̀ pakki Bitǝrus ɓashi lú a ɓamǝsǝ ɓwapǝndǝa anzǝm Lamsan Yalimuru.
5Anggo ka, Bitǝrus na a ndàkurban, sǝ amǝkwaɗi ka à came arǝ pak hiwi nǝ ɓabumia kat aban Ɓakuli ata cau male.
Gir'ndǝlǝki nǝ́ puro mala Bitǝrus a ndàkurban
6Àkǝ̀ bu du mǝnana ɓǝ̀ ban fana ka Hirǝdus nǝ̀ pakki Bitǝrus ɓashi ka, Bitǝrus na ntulo, abuí andǝ akusǝi ka à tākia nǝ ansolo, sǝ nda a nre ka asoje ɓari. Aɓea asoje came à kǝ yal kun ndàkurban. 7Ɓalǝu ama nǝ̀ kasǝ ka, nggea tǎlaban karara yi angŋǝna ɓa ndàkurban, sǝ mǝturonjar mala Mǝtalabangŋo puro yi came a ɓadǝm Bitǝrus. Pǝlǝa dǝurǝki Bitǝrus a mkpamtari, loasǝi a ntulo, sǝ ne wi ama, “Lo a kaurǝa!” Kara ansolo puri bu Bitǝrus à sukkio a nzali.
8Pǝlǝa mǝturonjar ne wi ama, “Oasǝ agir a rǝo, sǝ wu oasǝ ankura.” Bitǝrus pakki anggo kat. Mǝturonjar ne wi ama, “Ado ka, mak nggea-daura murɓe mo sǝ yiu atam.” 9Bitǝrus lo puri ɓa ndàkurban aban ká ata mǝturonjar. Amǝno anggo kat ka, kǝ twali kǝla lorǝo na, ko panǝ sǝlǝe ama mǝsǝcau na ɗang. 10À kya kuti ban amǝyal kun nda mǝdǝmbe, à kya kuti ɓaria. À nǝ̀ ngga bwal nggea kunɓala-bolo mǝnana soa nggeala ka, kara kunɓala-bolo man mǝnbia wia nǝ ɓamuri. Pǝlǝa à puro aban o amur njarmǝgule, ɓālǝi ama nǝ̀ kasǝ ka, mǝturonjar ndǝrmina.
11Anzǝm man ngga Bitǝrus nyare aɓa sǝlǝe male, sǝ na ama, “She ado sǝ kǝ kpakam ama mǝsǝcau na! Mǝtalabangŋo tasǝ mǝturonjar male ɓǝ̀ amsǝam a bu Hirǝdus sǝ aɓalǝ agir mǝnana kat aɓwana-mǝgule mala amǝ Yahudi kuro a muram ngga!”
12Lang mǝnia ka kpani wi ka, kara soa ɓala mala Maryamu, nggea Yohana Markus. Akàm sǝ amǝkwaɗi pas rambǝa aban pak hiwi.
13Pǝlǝa Bitǝrus wal kunɓala, sǝ muna-ɓala mǝnana à tunǝki ama Roda ka, yiu aban loasǝi wi kun ɓala. 14Lang ongŋǝna gi Bitǝrus na ka, kara nying mǝn kun ɓala, nyar nǝ mire, nǝ banɓoarnado, kya ne ko ya ɓwa ka ama Bitǝrus na aban came a nza a kunɓala.
15À banggi wi ama, “Ɓamuro pǝlǝ nǝ pǝlǝa!” Sǝ lang muna ɓine, cam kingging ama Bitǝrus na ka, nda à na ama, “Ɓǝ̀ nda na ka, mǝturonjar mala Ɓakuli mǝnana yálkiyi ka nda.”
16Sǝ Bitǝrus camarǝ walki kunɓala. Lang à yì mǝnǝni wi kunɓala sǝ à sǝni ka, à pak ndali.
17Bitǝrus pǝlǝa nea wia nǝ bui ama ɓǝa duk kunia piu, pǝlǝa bǝlia wia ɓālǝi lang sǝ Mǝtalabangŋo pusǝì, pur nǝi a ndàkurban ngga. Nea wia ama, ɓǝa banggi Jemis andǝ amǝ'eamrǝarǝu amǝnia yì agir ka, pǝlǝa nyia kutio o a ɓe ban.
18Nǝ dǝmbari ka, asoje amǝ yalban ngga ban twalo zurǝì a rǝia, à pǝlǝ ɓalǝia ɓà amur mana kumban sǝ Bitǝrus ka à sǝni raka. 19Hirǝdus tsǝa ɓǝa alte, sǝ a kumi ɗang. Mgbi ka asoje amǝyalban nǝ ɗikiban, pǝlǝa tsǝa ama ɓǝa wal-luia. Anzǝm man ngga, Hirǝdus nying nzali Yahudi kutio o kya do a Kaisariya zuku.
Lú mala Hirǝdus
20Hirǝdus ka bumi lullo arǝ amǝ Taya andǝ amǝ Sidon, nda sǝ à wario a tarǝia aban yi à nǝ̀ ngga gilǝki cau, acemǝnana kǝ girlina mana a nzali mala Hirǝdus ka nda à akiyi kam ngga. Lang à kumǝna gbasha aban Bǝlastus, muna ɓala mǝnana murǝm earnǝi ka, pǝlǝa à zǝm cau mala dotarǝu aɓa dorǝpwala.
21A pwari mǝnana Hirǝdus kasǝi à nǝ̀ dum nǝi ka, oasǝ adaura murǝm-ɓwa male, pǝlǝa eauwe do a bunomurǝm sǝ na cau nǝ aɓwana mǝnana à ram ngga. 22Aɓwana loasǝ gia à kǝ noki ama, “Man ngga gi ɓe kǝ ɓakuli na, gi ɓwapǝndǝa na ɗang!” 23Àkǝ̀ banì, mǝturonjar mala Ɓakuli kwak Hirǝdus turi a nzali, acemǝnana twal gulo Ɓakuli ka. Anggwaso li, kara wu.
24Sǝ cau mala Ɓakuli ka came arǝ lidǝmbǝa, ɓwapǝndǝa pas pǝlǝ amǝkwaɗi.
25Lang Barnabas andǝ Sawul malǝna turo mishan malea a Urǝshalima ka, pǝlǝa à nyare a tarǝia andǝ Yohana, mana ɓe lullǝi ama Markus ka.

Currently Selected:

Amǝ Mishan 12: mbu

Highlight

Share

Copy

None

Want to have your highlights saved across all your devices? Sign up or sign in