Amǝ Mishan 2

Yiu Mala Bangŋo Mǝfele

1A pwari mala Lamsan mala Pentikos#2:1 Lamsan mala Pentikos: Mǝnia ka nda ɓe lamsan mǝnana amǝ Yahudi kǝ pe mala ɗenyi nǝ pwari mana à pea wia Nggurcau mala Musa ka. À kǝ pe nǝ anongŋo lumi-tongno a nzǝm Lamsan Yalimuru, sǝ karǝ arǝ pakiɗire bumpwasǝa malea mala pwan mǝssa a ɓaban. ka, amǝkpata Yesu na a tarǝia aban mǝ mwashati.#2:1 Ɓalli gbal aɓa: Pǝris 23:15-21; Nggur 16:9-11. 2Zuku ka, kara à ok gǝshi gir pur a kuli kǝla gǝshi gung-mbulo mǝcande aban ɓua. Yi lumsǝ ɓala mǝnana à ndakam aban do ka. 3Pǝlǝa à sǝn gir mǝnana nda kǝla alasǝ bǝsa, yi sulǝ amur koyan atea ka kat. 4Aɓwana mǝnana kat abanì ka, à lumsǝia nǝ Bangŋo Mǝfele, sǝ à tita na cau nǝ aɓea kún ɗàngɗáng, mǝnana Bangŋo Mǝfele pea wia rǝcandǝa mala ne ka.

5A baku mǝno ka, amǝ Yahudi mǝnana amǝ ɓanggi Ɓakuli na, mǝnana à purkio arǝ anzali mala ɓanza kat sǝ à yiu ka, à ndakam nǝ do aɓa Urǝshalima. 6Lang à ok mǝnia yì loasǝban ngga, ɓwabunda ɓangŋa yiu yi rambǝa. À ndali acemǝnana koyan atea ok amǝkpata Yesu aban na cau nǝ akún malea. 7Gir nî pea wia ndali sǝ dupia wia gir-gyambǝliban kǝrkǝr, sǝ à kǝ na ama:

Amǝnia yì aɓwana kat ka, amǝ Galili na re? 8Sǝ lang sǝ sǝm oea aban na cau nǝ a kun la sǝm? 9Sǝm ngga sǝm purki arǝ anzali Pataya, andǝ Medes, andǝ Elam, andǝ Mesopotamiya, andǝ Yahudi andǝ Kapadosiya. Sǝ aɓea ɓwana ata sǝm ngga à purki arǝ anzali Pwantus andǝ Asiya, 10andǝ Firigiya, andǝ Pamfiliya, andǝ Masar, andǝ abuban mala amǝ Libiya mǝnana tù nǝ Sayirin ngga, andǝ anzali Roma, 11andǝ Kǝreti, andǝ Arabiya. Aɓea aɓwana ata sǝm ngga amǝ Yahudi na, sǝ acili sǝm ngga aɓwana na mǝnana à pǝlǝ amǝkpata peri mala amǝ Yahudi ka. Sǝm kat ka, sǝm ok aɓwana man aban na cau nǝ a kun la sǝm amur agir-ndǝlǝki mǝnana Ɓakuli pea ka!

12Yia kat, à cam abanì aban ndalǝki, muria zuriki, à kǝ ɗiki rǝia ama, “Mana nda ɓa mǝnia yì gir ka?”

13Sǝ aɓea ɓwana aɓalǝ aɓwabunda ka à nyesǝ ce gir oalban na, à kǝ na ama, “Mùr-ɓǝlanggun anap na à nu sǝ kǝ walia ka!”

Bitǝrus hamnǝ cau mala Ɓakuli a pwari Pentikos

14Pǝlǝa Bitǝrus lo cam nǝ came andǝ acilia amǝ'mishan mala Yesu lum-nong-mwashat gbal ate, loasǝ gi a kuli bangcau nǝ ɓwabunda ama:

Wun aɓwana ma'sǝm, amǝ Yahudi andǝ aɓwana mǝnana kat à ndanǝ do kani aɓa Urǝshalima ka! Wu kwaki kir wun pale wu o, wun kat, ɓǝ̀ ǝn bǝla wun ɓa mǝnia yì gir ka. 15Aɓalǝ wun ngga, aɓea aɓwana na ban bangŋa ama, aɓwana mǝnia ka mùr-ɓǝlanggun anap na à nu, kǝ walia ka. Ən nggǝ bangga wun, anggo sǝ pak ɗang. Wu sǝlǝ ama, ado ka dǝmbari na. Mùr-ɓǝlanggun anap pà nǝ̀ wal aɓwana a bu-pwari tongno-nong-ine mala dǝmbari ɗang. 16Awo, gir mǝnana ado wu sǝni ka, à angŋa dǝmbǝa à naná ce, a pwaryan, a kun mǝɓangna mala Ɓakuli kǝla Joyel, ama:

17“Ɓakuli bangŋa ama,

a masǝlǝata apwari ka,

Mǝ nǝ sulǝ Bangŋo mem

amur ɓwapǝndǝa kat.

Amuna-burana andǝ amuna-

mamǝna ma'wun,

à nǝ̀ na gì Ɓakuli.

Alaggana ma'wun nǝ̀

sǝn sǝna aɓa bangŋo,

sǝ aɓwana-mǝgule nǝ̀

lorǝ alorǝo.

18Arǝ apwari mǝno ka,

mǝ nǝ sulǝ Bangŋo mem

amur aguro mem,

aburana andǝ amamǝna,

sǝ à nǝ̀ na gì Ɓakuli.

19Mǝ nǝ pakki agir-

gyambǝliban a kuli

andǝ agir-ndali a nzali.

À nǝ̀ sǝn nkila, andǝ bǝsa,

andǝ apǝrɓang-yelebǝsa.

20Pwari nǝ̀ pǝlǝ pǝndǝa,

sǝ zongŋo nǝ̀ pǝlǝ mǝbangŋe

kǝla nkila,

sǝ Pwari Mǝgule

andǝ Mǝɓoarɓwe

mala Mǝtalabangŋo

nǝ̀ yia tusǝo.

21Sǝ ɓwa mǝnana kat ɓua

aban Mǝtalabangŋo ka,

nǝ̀ kum auwa.”#2:21 Ɓalli gbal aɓa: Jol 2:28-32.

22Wun amǝ Isǝrayila, wu kwaki kir wun, wu ok acau man. Yesu ɓwa Nazarat ka, ɓwa na mǝnana Ɓakuli earnǝi, sǝ lǝmndǝ ama yì nǝ̀ turi ka, sǝ pe wi rǝcandǝa mala pakki agir-ndǝlǝki andǝ agir-gyambǝliban, andǝ agir-lǝmndǝa amǝgulke. Wun nǝ ɓamur rǝ wun ngga, wu sǝlǝna, acemǝnana akani aɓalǝ wun, àkǝ̀ mǝsǝ wun sǝ pea. 23Ɓakuli surǝna rǝ gir mǝnana nǝ̀ kumban ngga, sǝ nǝ kani male, sǝ wu mak Yesu aban aɓwana mǝnana amǝ Yahudi na raka, amǝ ɗwanyi kpata Nggurcau, mǝnana à yì gballì amur nggun-gangndi, à wal-lui ka. 24Sǝa ma Ɓakuli panzǝi aɓa bu rǝcandǝa mala lú, pǝlǝa loasǝi a ɓembe, acemǝnana lú kārǝa nǝ̀ bwali a ɓembe ɗang. 25Dauda bangcau amuri ama:

“Ən nggǝ sǝn

Mǝtalabangŋo

a koya pwari ka abanam;

ɓangciu pà nǝ̀

pakkam ɗang,

acemǝnana nda a girem.

26Ace mani ka,

ɓabumam nǝ̀ pakiɗire,

sǝ lasǝam ngga lumsǝ

nǝ bumpwasǝa;

sǝ amur mǝno ka,

nggūrǝam nǝ̀ usǝlǝo

aɓa tsǝkɓalǝu.

27We ka, a pà nǝ nying

yilǝmem ɓǝ̀ ueo

aɓalǝ alú#2:27 aɓalǝ alú: Ko “a Hades, yì ɓanza mala alú.” ɗang,

sǝ a pà wu nǝ nying

guro mo Mǝfele ɓǝ̀

rǝmbǝo a ɓembe ɗang.

28A lǝmndǝnam anjar

mala yilǝmu,

sǝ do mo abanam ngga

ndá nǝ̀ lumsǝam nǝ

banɓoarnado ka.”#2:28 Ɓalli gbal aɓa: Ang 16:8-11.

29Wun amǝ'eambǝam, mǝ nǝ gandǝ na wun nǝ rǝcandǝa ama, kà-sǝm Dauda ka wú, sǝ à cì a ɓembe, sǝ ba yalung, ɓembe male nia aban sǝm ngga. 30Sǝ acemǝnana yì ka, mǝɓangna mala Ɓakuli na ka, surǝna rǝ cau mǝnana Ɓakuli banggi wi nǝ kángir ama, nǝ̀ tsǝk mwashat ata amǝkè ɓǝ̀ do a bunomurǝm male ka.

31Dauda ka sǝnǝna gir mǝnana Ɓakuli nǝ̀ ngga pa a dǝmbǝa ka, nda gir mǝnana tsǝa sǝ na cau amur loapi ɓembe mala Kǝrǝsti ka. Yi mǝnana bangŋa ama, Ɓakuli nyi a ɓembe ɗang, sǝ nggūrǝi gbal ka rǝm raka. 32Ɓakuli loasǝ Yesu a ɓembe, sǝm kat ka, sǝm sǝni nǝ mǝsǝ sǝm anzǝm lo male.

33Ado ka à loasǝni, à tsǝngŋǝni a buno-gulo a bu-mǝli mala Ɓakuli Tarrí. Sǝ Ɓakuli pani wi Bangŋo Mǝfele, kǝla mǝnana bangŋa ama nǝ̀ pà ka. Gir mǝnana ado wu sǝna sǝ wu ok ka, nda ɓoro male mǝnana yi soapa sǝm amur ngga.

34Dauda ka eauwe wari a kuli ɗang, ace mani ka pà aban na cau amur ɓamuri ɗang mǝnana yi na ama:

“Mǝtalabangŋo banggi

Mǝtalem ama:

‘Do akani a buam mǝli,

35she ɓǝn tsǝngŋǝna

aɓeo amǝbura à pǝlǝna

abuno tsǝk kusǝu

a ɓakusǝo ka.’ ”#2:35 Ɓalli gbal aɓa: Ang 110:1.

36Ace mani ka, aɓwana mala amǝ Isǝrayila kat, ɓǝa sǝlǝa nǝ mǝsǝcau ama, Yesu mǝnana wu gballì amur nggun-gangndi ka, nda ɓwa mǝnana Ɓakuli ci ɓǝ̀ do nda Mǝtalabangŋo, sǝ nda Kǝrǝsti, Mǝ'amsǝban ngga!

37Lang amǝnia yia aɓwana ok anggo ka, cau tǝmia a ɓabumia kǝrkǝr, sǝ à ne Bitǝrus andǝ acilia amǝ'mishan ama, “Amǝ'eam sǝm, mana ɓoaro ɓǝ̀ sǝm pa?”

38Pǝlǝa Bitǝrus earia wia ama, “Koyan aɓalǝ wun ngga, ɓǝ̀ pwanzali ɓǝ̀ vwaki bui arǝ cauɓikea. Ɓǝa pakki wi batisǝma aɓa lullǝ Yesu Kǝrǝsti, ace mǝnana ɓǝ̀ Ɓakuli twala wun ban acauɓikea ma'wun, sǝ wu nǝ̀ kum ɓoro mala Bangŋo Mǝfele. 39Mǝnia yì ɓwamuru Ɓakuli bangce ka, nda ace wun andǝ amuna ma'wun, andǝ aɓwana mǝnana amǝ Yahudi na raka, andǝa mǝnana Mǝtalabangŋo Ɓakuli ma'sǝm nǝ̀ ngga tunǝia ka.”

40Pǝlǝa Bitǝrus banggia wia aɓea acau pas sǝ nunkiria ama, “Wu amsǝ ɓamur rǝ wun aɓa nza mǝɓike mǝnia ka!” 41Aɓwana mǝnana à akcau mala Ɓakuli ka, à pakkia wia batisǝma. Laki mala mǝnia yì aɓwana, à tsǝa amur lakki mala amǝkpata Yesu a pwari mǝno ka à nda á-tārú. 42Pǝlǝa yia ka à paɓamuria aban ak kanigir aban amǝ'mishan, andǝ do a tarǝia, andǝ ligirlina a tarǝia, andǝ pakki ahiwi.

Dotarǝu mala amǝkpata Yesu

43Ɓwapǝndǝa kat ka do nǝ ɓanggi Ɓakuli, acemǝnana Ɓakuli kǝ pakki agir-ndǝlǝki, andǝ agir-gyambǝliban nǝ abu amǝ'mishan. 44Sǝ amǝkpata Yesu kat ka, à kpapi ɓamuria, a do a tarǝia, à kǝ gau agirbunda malea a tarǝia.#2:44 Ɓalli gbal aɓa: Aturo 4:32-35. 45À makki agirkuma andǝ agǝna malea, sǝ à pe koya ɓwa nani ka gir mǝnana karǝ arǝ tǝle male ka. 46Koya pwari ka, à kǝ yiu a kpapi a tarǝia, aban peri aɓa Ndàmǝgule mala Ɓakuli. À kǝ kpapiki arǝ aɓala malea aban li girlina. À kǝ li girlina a tarǝia nǝ banɓoarnado, nǝ ɓabumia mwashat. 47À camarǝ ɓwangsǝki Ɓakuli, sǝ aɓwana kat ka banɓoaria wia a rǝia. Sǝ koya pwari ka, Ɓakuli kǝ tsǝa amur lakki malea nǝ aɓwana mǝnana à kǝ kum amsǝban ngga.

Currently Selected:

Amǝ Mishan 2: mbu

Highlight

Copy