Yohana 10
10
Yalgír mǝɓoarne andǝ anzur male
1Yesu na ama:
Mǝ nda ban bangga wun mǝsǝcau, ɓwa mǝnana kuti aɓa domwan mala anzur nǝ kun-nda raka, sǝ kuti nǝ ɓe kǝ njar ɗàng ngga, mǝn'i na sǝ mǝɓǝmbǝriban na. # 10:1 Ɓalli gbal aɓa:
Mar 6:34
. 2Sǝ ɓwa mǝnana kuti nǝ kun-nda ka, nda mǝyal anzur. 3Mǝtsǝkkir kun-nda nǝ̀ mǝnmbi wi kun-nda; anzur nǝ̀ ok gi mǝyalia ɓǝ̀ tunǝia nǝ lullǝia ka, sǝ nǝ̀ kà nǝia a nza.
4 Anzǝm mǝnana pusǝna anzur male kat a nza ka, kǝ upia wia a dǝmbǝa, sǝ anzur kǝ kpate acemǝnana à surǝna rǝ gi. 5Anzur pa nǝ̀ gya ata bǝriɓwa ɗang; à nǝ̀ ɓanggi wi, acemǝnana à surǝ gi ɗàng.
6Yesu nea wia man yì cau aɓa ɓi, sǝ yia ka à bwalta gir mǝnana nakiyi ka ɗang.
7Ace mǝno ka Yesu bǝlia wia ɓālǝi ama:
Mǝ nda ban na wun mǝsǝcau, mǝ nda kun-nda mala anzur. 8Acili aɓwana mǝnana kat à akàm dǝmbǝa à yiu ka, amǝn'i na andǝ amǝ'ɓǝmbǝriban. Anzur mǝ'mǝsǝcau nì okia wia ɗang.#10:8 Ɓalli gbal aɓa: Ir 23:1; Ezǝk 34:2. 9Mǝ ndà kun-nda. Ɓwa mǝnana kat kuti nǝ banam ngga nǝ̀ kum auwa; nǝ̀ kutio sǝ nǝ̀ puro, sǝ nǝ̀ kum girlina.
10 Mǝn'i ka kǝ yiu ace iun'i, ace wal-lú, andǝ kiɗiki gir. Sǝ mim ngga ǝn yiu ace pea aɓwana yilǝmu, andǝ do mǝɓoarne mǝnana lumsǝ a koya njari ka. 11Mǝ nda yalgír mǝɓoarne. Yalgír mǝɓoarne ka kǝ pa yilǝmi, nǝ̀ wu ace anzur male. #10:11 Ɓalli gbal aɓa: Isha 40:11; Ezǝk 34:11; Ib 13:20; 1Bit 5:4; Sǝn 7:17; 1Yoh 3:16; Yoh 15:13. 12Sǝ ɓwa mǝnana à twali à kǝ mbwe, ace tsǝkir anzur, sǝ yì ka, yalgír na ɗang, sǝ anzur ka a male na raka, ɓǝ̀ sǝn nvwa-bondo aban yiu ka, nǝ̀ nying anzur nǝ̀ ɓangŋa, sǝ nvwa-bondo nǝ̀ bwal ata anzur sǝ nǝ̀ mesǝkea. 13Ɓwa mǝnana à twali a turoboalo ace yal agir ka, nǝ̀ ɓangŋa acemǝnana yì ka, turo boalo na pakkiyi ka, kǝgir oasǝi arǝ anzur nì ɗang.
14 Mǝ nda yalgir mǝɓoarne; ǝn surǝ anzur mem, sǝ yia gbal ka à surǝam, 15kǝla mǝnana Tárram surǝam, sǝ ǝn surǝ Tárram ka. Ən pa yilǝmem ace anzur mem.#10:15 Ɓalli gbal aɓa: Mat 11:24. 16Mǝ ndanǝ aɓia anzur mem mǝnana à pà aɓa domwan man raka. Dumǝna púp mǝ nǝ yinǝia gbal. À nǝ̀ kwaki kiria à nǝ̀ ok giem, sǝ domwan ngga nǝ̀ duk mwashat, nǝ yalgir mwashat.#10:16 Ɓalli gbal aɓa: Isha 56:8; Yoh 11:52; 17:20; Afi 2:13-18; 1Bit 2:25.
17 Tárram kǝ earcem acemǝnana ǝn eare mǝ nǝ pà yilǝmem mǝ nǝ wu, ace mana ɓǝn é ɗǝm ɓǝn lo nǝ yilǝmu ka. 18Kǝɓwa pà nǝ̀ twal yilǝmem a rǝam ɗang. Ən nggǝ pa yilǝmem nǝ eare mem. Mǝ ndanǝ rǝcandǝa mǝ nǝ pà yilǝmem, sǝ mǝ ndanǝ rǝcandǝa mǝnana mǝ nǝ é ɗǝm ngga. Mǝnia ka nda nzongcau mǝnana Tárram pam ama ɓǝ̀ ǝn pak ka.
19Lang Yesu banggina acau mǝnia ka, kara ɗenyicau mala amǝ Yahudi a rǝi gakya. 20Aɓea aɓwana pas aɓalǝia à bangŋa ama, “Yì ka, ndanǝ kukwar a rǝì! Pà aɓa ɗenyicau male ɗang! Ace man sǝ wu kǝ kwaki kir wun a rǝì?”
21Sǝ acili aɓwana ka à bangŋa ama, “Ɓwa mǝnana nǝ kukwar a rǝì ka, pà nǝ̀ bang amǝnia yì acau ka ɗang! Lang sǝ kukwar nǝ̀ mǝn mǝsǝ ante?”
Aɓwana-mǝgule mala amǝ Yahudi ginǝki Yesu
22Nda nǝ kunɗwal, sǝ yi karǝ nǝ kuni Hanuka, yì Lamsan ace ɗenyi nǝ baku mǝnana à tàr Ndàmǝgule nǝi ace Ɓakuli, aɓa Urǝshalima ka. 23Ɓe pwari ka, Yesu gya kǝ kutio aɓa ɓe bui mala Ndàmǝgule mala Ɓakuli, mǝnana à tunǝki ama Tara mala Solomon ngga.#10:23 Ɓalli gbal aɓa: Aturo 3:11; 5:12.
24Aɓwana-mǝgule mala amǝ Yahudi yi rambǝa abani, sǝ à ɗi ama, “Lang sǝ a nǝ nying sǝm anggo aɓa pǝndǝa? Ɓǝ̀ a nda Kǝrǝsti ka, Pura sǝm bwāng, bangga sǝm.”
25Yesu nyesǝia wia ama:
Ən angŋa dǝmbǝa ǝn nanà wun, sǝ wun ngga, wu earnǝ mim ɗang. Aturo mǝnana ǝn nggǝ pea aɓa rǝcandǝa mala Tárram ngga, à nda à lǝmndǝ ko yan nda mim ngga. 26Sǝ wun ngga wu earnǝ mim ɗang, acemǝnana wu ndaka nzur mem ɗang. 27Anzur mem kǝ ok giem; ǝn surǝia, sǝ à kǝ kpatam. 28Ən nggǝ pea wia yilǝmu mǝnana málá male pà kàm raka, sǝ à pà nǝ̀ kiɗiki à nǝ̀ ueɓà ɗang. Kǝɓwa pà nǝ̀ fea a buam ɗang. 29Tárram mǝnana pam mia ka kuti koyan ngga nǝ rǝcandǝa. Kǝɓwa pà nǝ̀ gandǝ ea a rǝì ɗang. 30Mim sǝnǝ Tárram ka sǝm nda mwashat.
31Amǝ Yahudi pwan atali ɗǝm ama à nǝ̀ ɓukki. 32Sǝ Yesu nea wia ama, “Ən pakkina agir mǝɓoarne pas, a ɓadǝm wun, mǝnana Tárram turam ama ɓǝn pea ka. Nda ace mǝye mwashat aɓalǝia sǝ wu kǝ earce wu nǝ̀ ɓukkiam?”
33Pǝlǝa à eari wi ama, “Pà ace kǝ agir mǝɓoarne mǝnana à pea, sǝ sǝm earce ama sǝm nǝ̀ ɓukkio ka ɗang. Nda ace cau ɓǝsǝki Ɓakuli mǝnana a na ka. We ka, a nda ɓwamǝpǝnde sǝ a kǝ twal ɓamuro a nda Ɓakuli!”#10:33 Ɓalli gbal aɓa: Pǝris 24:16; Mar 14:64.
34Yesu earia wia ama:
Pà akàm à gilǝe aɓa Malǝmce Nggurcau ma'wun mbo, mǝnana Ɓakuli bangŋa ama, “Wu nda ka aɓakuli” ka re? # 10:34 Ɓalli gbal aɓa:
Yoh 8:17; Ang 82:6. 35Wu sǝlǝna ama cau mǝnana Malǝmce bang ngga makgir pà a rǝì ɗang, camǝna anggo pà nǝ̀ nggaɗi ɗang. Sǝ ɓǝa aɓwana mǝno à ak cau mǝno, à tunǝia ama “aɓakuli” ka, 36ace mana sǝ wu twali ama cau ɓǝsǝki Ɓakuli na ǝn na ka, mǝnana ǝn bang nǝma “Mǝ nda Muna mala Ɓakuli,” yì mim mǝnana Ɓakuli taram sǝ tasǝam a ɓanza ka? 37Wu kǝa earnǝ mim ɗang ɓǝ̀ aturo mǝnana ǝn pakkiyi ka a mala Tárram Ɓakuli na raka. 38Sǝ ɓǝ̀ aturo male na ǝn pakkiyi ka, ɓǝ̀ pà wu nǝ̀ earnǝ mim raka, wu earnǝ agir-ndali mǝnana ǝn pea ka, ace mǝnana ɓǝ̀ wu sǝlǝa, sǝ ɓǝ̀ kpaka wun ama, Tárram ngga nda a ɓalǝam, sǝ mim ngga mǝ nda aɓa Tárram.
39Nyar ɗǝm ngga, à ɓariki ama à nǝ̀ bwal Yesu, kara puri ɓabuia. 40O kya yàl a nkaring Mur mala Jodan, yi pur aban mǝnana Yohana pakkiyi batisǝma kam ata dǝmbe ka. Akano sǝ kya do. 41Aɓwana pas yiu abani, à kǝ bangŋa a rǝarǝia ama, “Yohana pak kǝ gir'ndǝlǝki ɗang, sǝa ma acau mǝnana ne amur man yì ɓwa ka, à yì pur a mǝsǝcau.” 42Pas ata aɓwana mǝnana abanì ka à pà ɓamuria aban Yesu.
Currently Selected:
Yohana 10: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
