Yohana 2

Yesu tsǝk mur pǝlǝ murɓǝla-nggun anap

1A tāruia nongŋo ka, à ndanǝ isǝban a Kana a nzali Galili, sǝ nggea Yesu nakam abanì. 2À tunǝ Yesu andǝ alaggana male aban isǝbanì. 3À nda ɓa pakiɗire ka, mùr ɓǝlanggun anap málá a rǝia. Nggea Yesu yi ne wi ama, “Mùr ɓǝlanggun anap malea malǝna.”

4Pǝlǝa Yesu eari wi ama, “Nnâ, palang sǝ a oasǝam aɓa ce? Bu-pwari mala lǝmndǝrǝu mem malaká karǝ peatu ɗang.”

5Nggea Yesu ne amǝ gau girlina ama, “Wu pak gir mǝnana kat bangga wun ngga.”

6Àkǝ̀ banì ka, aganggǝlang mǝnana à kwária aɓa tali ka à ndakam abanì, yia tongno-nong-mwashat; amǝnana amǝ Yahudi kǝ soak mùr aɓalǝia à kǝ lakina rǝia nǝi andǝ agir ace peri a ɓadǝm Ɓakuli ka. Ko mǝ ye ka kǝ twal amunabang-mùr lumi-ɓari ko lumi-tārú.

7Yesu ne amǝ gau girlina ama, “Wu to mùr wu lumsǝki aganggǝlang.” Sǝ à lumsǝkia kat nǝ mur.

8Sǝ nea wia ama, “Adyan ngga wu ɗarǝa wu kya pe ɓwamǝgule mala pakiɗire isǝban.” Pǝlǝa à ɗarǝa à warini wi nǝi. 9Sǝ ɓwamǝgule mala pakiɗire isǝban o mùr mǝnana à nyesǝi pǝlǝna mùr ɓǝlanggun anap ka. Sǝ yì ka, surǝ ban mǝnana à pusǝ mǝnia yì mùr ɓǝlanggun anap kam ngga ɗang (sǝ amǝ gau girlina mǝnana à ɗarǝ mùr nǝi ka à sǝlǝna). Sǝ pǝlǝa tunǝ bura-manfela a giriban. 10Sǝ na ama, “Aɓwana pak ka à kǝ yinǝ mùr ɓǝlanggun anap mǝɓoarne a dǝmbǝa, ɓǝ̀ abǝri nuna karǝnia ka, sǝ à kǝ yiu nǝ mǝnana twal te ka; sǝ mo ka a tsǝk mǝɓoarne a nzǝmo!”

11Gir'ndǝlǝki mǝnia Yesu pe a Kana, a nzali Galili ka, nda mǝdǝmbe mala agir-ndali male mǝnana lǝmndǝ gulo male ka. Sǝ alaggana male sǝni à pa ɓamuria abani.

12Anzǝm man ngga, Yesu andǝ ngge andǝ amǝ'eambǝi andǝ alaggana male o a Kapanahum sǝ à kya nonggi kam zuku.

Yesu pǝr amǝ kurkuro a Ndàmǝgule mala Ɓakuli

(Matiu 21:12-13; Markus 11:15-17; Luka 19:45-46)

13Lang pwari Lamsan Yalimuru mala amǝ Yahudi gbashina ka, Yesu o a Urǝshalima.#2:13 Ɓalli gbal aɓa: Pur 12:1-27. 14Kya kum amǝ makki andá, andǝ anzur andǝ akutu, andǝ aɓwana mǝnana à dumǝna nǝ do aban nggaɗi boalo ka, aɓa Ndàmǝgule mala Ɓakuli. 15Pǝlǝa Yesu peau nkamso nǝ nggur sǝ pǝria kat, andǝ anzur, andǝ andá, ɓǝa puri Ndàmǝgule mala Ɓakuli. Sǝ ndǝlǝkí agir, mesǝki amǝsǝ-boalo mala amǝ nggaɗi boalo. 16Sǝ ne amǝ makki akutu ama, “Wu pusǝ agir mǝnia ka aban man! Wu kǝa nyesǝ Ɓala mala Tárram ɓǝ̀ duk limo ɗang!”

17Sǝ ɓalǝ alaggana male kasǝa arǝ cau mǝnana Malǝmce na ama, “Rǝɓǝla mem arǝ Ɓala mo we Ɓakuli ka, nǝ̀ earke a ɓalǝam kǝla bǝsa.”#2:17 Ɓalli gbal aɓa: Ang 69:9.

18Aɓwana-mǝgule mala amǝ Yahudi ɗi Yesu ama, “Ya gir'ndǝlǝki na ado a wu nǝ pa, mǝnana nǝ̀ lǝmndǝa sǝm ama, Ɓakuli pano rǝcandǝa mala pak mǝnia yì gir ka?”

19Yesu earia wia ama, “Wu arki man yì Ndàmǝgule mala Ɓakuli ka, sǝ aɓa nongŋo tārú ka mǝ nǝ loasǝi ɗǝm.”#2:19 Ɓalli gbal aɓa: Mat 26:61; Mat 27:40; Mar 14:58; Mar 15:29.

20Pǝlǝa amǝ Yahudi ne wi ama, “Ndàmǝgule mala Ɓakuli mǝnana twal amǝɓa pǝlǝa lumi-ine-bwamndǝ tongno-nong-mwashat sǝ à ɓè ka, a na ama a wu nǝ ɓè aɓa nongŋo tārú?”

21Sǝ Ndàmǝgule mala Ɓakuli mǝnana Yesu nakiyi ce ka, nda nggūrǝì. 22Anzǝm mǝnana Yesu longŋǝni ɓembe ka, sǝ ɓalǝ alaggana male kasǝa ama, Yesu nania wia. Pǝlǝa à earnǝ Malǝmce andǝ acau mǝnana Yesu nea wia ka.

Yesu surǝ ɓabum ɓwapǝndǝa

23Mǝnana Yesu na a Urǝshalima a pwari Lamsan Yalimuru ka, aɓwana pas à sǝn agir-ndǝlǝki mǝnana pea ka, pǝlǝa à pà ɓamuria abani. 24Sǝ Yesu ka earnǝia ɗang, acemǝnana surǝna rǝ ɓwapǝndǝa kat. 25Yesu pà aban alte ɓǝ̀ kǝɓwa ɓǝ̀ ne wi cau amur ɓwapǝndǝa ɗang, acemǝnana yì nǝ ɓamuri ka surǝna rǝ ɓabum ɓwapǝndǝa.

Currently Selected:

Yohana 2: mbu

Highlight

Copy