Luka 24

Yesu loapi ɓembe

(Matiu 28:1-10; Markus 16:1-8; Yohana 20:1-10)

1A pwari Ladi, pwari mǝdǝmbe anzǝm pwari Sabbat nǝ budǝmbari ɗiɗyal, amamǝna twal muku agir mǝ'rǝmɓoarne mǝnana à gilǝkicea ka, sǝ a o a ɓembe. 2À kya kum tali ka à gǝshini a kun ɓembe. 3Sǝ lang à kuti ka, à kum lú Mǝtalabangŋo Yesu ɗang. 4À ndaban ndali nǝ mǝnia yì gir ka, kara aɓwana ɓari nǝ agir-nggurǝu mǝnana à kǝ tànzama pǝlilip ka, à came abania. 5Nǝ ɓangciu a rǝia amamǝna man timuria a nzali. Sǝ aɓwana mǝno nea wia ama, “Ace mana sǝ wu kǝ alta ɓwa mǝnana nǝ yilǝmu ka aɓalǝ alú? 6#24:6 Ɓalli gbal aɓa: Mat 16:21; 17:22,23; 20:18,19; Mar 8:31; 9:31; 10:33,34; Luk 9:22; 18:31-33. Pa kani ɗang, longŋǝna! Wu ɗenyi nǝ cau mǝnana bangga wun yì mana nda a Galili ka 7ama, ‘À nǝ̀ pà Muna mala Ɓwa a bu amǝ'cauɓikea, à nǝ̀ gballì a nggun, sǝ a tāruia nongŋo ka nǝ̀ lo nǝ yilǝmu.’ ” 8Pǝlǝa ɓalǝ amamǝna man kasǝa arǝ acau male.

9Lang à nyarni ɓembe ɓa-tali ka, à kya ne alaggana mana lum-nong-mwashat ka andǝ acili amǝkpate kat. 10À Maryamu Ɓwa Magdala, andǝ Joana, andǝ Maryamu nggea Jemis, andǝ aɓea amamǝna, à nda à yì banggi amǝ'mishan male ce ka. 11Sǝ yia ka à earnǝ cau mala amamǝne ɗang, abania ka cau mǝɓane na à banggi ka. 12Sǝ Bitǝrus ka lo ɓangŋa aban ká ɓembe; kya kūndǝó sǝ kǝ anggurbyau-mur lú na sǝn aban nongŋo ka. Pǝlǝa nyare aban o kǝ ndali nǝ gir mǝnana kumban ngga.

Yesu lǝmndǝ rǝì amur njargula ká Imawus

(Markus 16:12-13)

13Àkǝ̀ pwari mǝno ka aɓwana ɓari ata amǝkpata Yesu puro aban ká muna-la mǝnana à tunǝki ama Imawus, mana nre andǝ Urǝshalima ka mel tongno nong-ɓari na ka. 14À ndarǝ naki acau amur gir mǝnana kumban ngga. 15Lang à nda aɓa naki acau andǝ ɗiki rǝarǝia amur amǝnia yì agir ka, Yesu nǝ nggearǝì ka yiu bwal tea sǝ kǝ gya andǝia aban ká. 16À sǝni, sǝ ko à gandǝ surǝe ɗang.

17Pǝlǝa Yesu ɗia ama, “Mana gir nì na wu nakiyia, nǝ pǝlǝki ce arǝ wun aban ká ɗe?”

À go kusǝia à cam piu, ɓamǝsǝia kiɗiki. 18Ɓwa mwashat aɓalǝia, lullǝi ama Kǝliyopas, ɗi ama, “A nda kǝ bǝri nǝmurǝo a Urǝshalima mǝnana a sǝlǝce agir mǝnana à kumban aɓalǝ anonggeo mǝnia ka ɗang?”

19Pǝlǝa ɗia ma, “A ya gir nani?”

À eari wi ama, “Agir mǝnana à kum Yesu Ɓwa Nazarat. Yì ka, mǝɓangna mala Ɓakuli na, sǝ ndanǝ rǝcandǝa aɓa cau andǝ turo a ɓadǝm Ɓakuli andǝ ɓwapǝndǝa kat. 20Agbani pǝris andǝ amurǝma ma'sǝm ramte ama ɓǝa kya kasǝi wi ɓashi lú, pǝlǝa à gballì a nggun. 21Sǝm ndanǝ tsǝkɓalǝu ama nda ɓwa mǝnana nǝ̀ yia amsǝ amǝ Isǝrayila ka! Ɗǝm ngga tāruia nongŋo nia yalung mǝnana mǝnia yì agir kumban ngga. 22Nyar ɗǝm ngga, aɓea amamǝna aɓalǝ sǝm yi na sǝm cau ndali. Yalung nǝ dǝmbari ka à wario a ɓembe, 23sǝ à kya kum luí ɗang. À nyare à yì na sǝm ama à sǝn causǝna mala amǝturonjar, mǝnana à bangŋa ama ndanǝ yilǝmu ka. 24Sǝ aɓea aɓwana aɓalǝ sǝm wario a ɓembe à kya kum gir nî anggo kǝla mǝnana amamǝna na ka, sǝ yì ka, à sǝni ɗang.”

25Pǝlǝa Yesu nea wia ama, “Wu gǝmi fat, sǝ ɓamur wun dǝmbǝri arǝ bwalta acau mǝnana kat amǝ'ɓangna mala Ɓakuli na ka! 26Wu sǝlǝ mbo ama dumǝna púp Kǝrǝsti ka nǝ̀ nu tanni nǝ̀ amǝnia yì agir ka, sǝ nǝ̀ kutio aɓa gulo male?” 27Pǝlǝa tite nǝ Nggurcau mala Musa andǝ Kanigir mala amǝ'ɓangna mala Ɓakuli kat, bǝlkia wia ɓalǝ acau mǝnana à gilǝia aɓalǝ Amalǝmce amuri ka.

28Lang à gbashina ban muna-la mǝnana à kǝ ká kam ngga, Yesu pa kǝla nǝ̀ kutio a dǝmbǝa, 29sǝ à ne wi ama, “Nongŋo aban sǝm, pwari kpana, sǝ du mala nǝ̀ pǝndǝa.” Pǝlǝa o atea.

30À yì dumǝna amur girlina ka, yi twal bǝredi, pakki Ɓakuli yàwá, sǝ ɓwani pea wia. 31Anggo ka, kara mǝsǝia mǝnna sǝ à sǝlǝ ama yì na, kara ndǝrmi a rǝia. 32Sǝ à ɗi rǝarǝia ama, “Ashe pa ɓa sǝ ɓabum sǝm kǝ pi mǝnana nda ban na sǝm acau a tanjargula, sǝ kǝ bǝlkia sǝm ɓalǝ Amalǝmce mala Ɓakuli ka ɗang.”

33Pǝlǝa à lo à nyare a kusǝia aban ká Urǝshalima. À kya kum alaggana male mana lum nong-mwashat ka andǝ acilia à dapina abanɓwáná, 34aban na ama, “Mǝsǝcau na! Mǝtalabangŋo longŋǝni ɓembe nǝ yilǝmu, yi pusǝrǝi aban Shiman Bitǝrus!” 35Amǝnia ɓari ka à na ce gir mǝnana kumia a njargula Imawus ka, andǝ surǝo mǝnana à yì surǝ Yesu anzǝm mana ɓwanǝna bǝredi ka.

Yesu pusǝrǝi aban alaggana male

(Matiu 28:16-20; Markus 16:14-18; Yohana 20:19-23; Amǝ Mishan 1:6-8)

36Kunia malaká pwal arǝ acau mǝnana à nakiyi ka ɗang, kara Yesu pusǝrǝi aɓalǝia, sǝ nea wia ama, “Ɓǝ̀ rǝ wun pwalo!”

37À ndali, ɓangciu pakkia wia, à twali kǝla lú na à sǝn ngga. 38Pǝlǝa nea wia ama, “Palang sǝ ɓangciu bwal wun anggo, sǝ wu do nǝ tuti a ɗenyicau ma'wun? 39Wu sǝn abuam andǝ akusǝam, mǝ nda nǝ ɓamuram! Wu jem, sǝ wu sǝni, acemǝnana lú pà nǝ́ nyama andǝ amú kǝla mǝnana wu sǝni mǝ ndanǝia ka ɗang.”

40Lang nania wia anggo ka, pǝlǝa lǝmndǝia wia abui andǝ akusǝi. 41Sǝ à nda piu aɓa ɗwanyi earnǝ cau a ɓabumia, ata cau mala bumpwasǝa andǝ ndali ka, Yesu pǝlǝa ɗia ama, “Wu ndanǝ kǝ girlina kani le?” 42À twal nji mǝtwane à pe wi. 43Pǝlǝa é sǝ she, àkǝ̀ mǝsǝia.

44Pǝlǝa nea wia ama, “Mǝnia ka nda cau mǝnana ǝn bangga wun, mana sǝm nda a tarǝ sǝm ngga. Koya gir mǝnana à gilǝì a muram aɓa Nggurcau mala Musa andǝ amalǝmce mala Amǝ'ɓangna mala Ɓakuli andǝ Anggyal ka, dumǝna púp à nǝ̀ lumsǝo.”

45Pǝlǝa mǝn ɗenyicau malea ace mǝnana ɓǝa surǝ Amalǝmce mala Ɓakuli. 46Nyare nea wia ama, “Mǝnia ka nda gir mǝnana à gilǝ ka: Kǝrǝsti Mǝ'amsǝban, nǝ̀ nu tanni, nǝ̀ wu, sǝ nǝ̀ loapi ɓembe nǝ yilǝmu, a tāruia pwari. 47Sǝ cau mala pwanzali a mala vwaki bu arǝ cauɓikea, andǝ twalban cauɓikea ka, à nǝ̀ hamnǝi aɓa lullǝi, arǝ anzali kat, à nǝ̀ tite a Urǝshalima. 48Wu nda ka amǝnakun mala mǝnia yì agir ka aban aɓwana. 49Ado ka, mǝ nǝ tasǝa wun Bangŋo Mǝfele mǝnana Tárram bangŋa ama nǝ̀ pa wun ngga. Sǝa ma wu nǝ̀ kundǝo a Urǝshalima, she ɓǝ̀ rǝcandǝa mǝnana pur nǝ kuli sulǝna amur wun ngga.”#24:49 Ɓalli gbal aɓa: Aturo 1:4.

À twal Yesu aban ká kuli

(Markus 16:19-20; Amǝ Mishan 1:9-11)

50Pǝlǝa puro andǝia à kya bwal Betani. Loasǝ bui a kuli sǝ tsǝkia wia bu. 51Nda rǝ tsǝkia wia bu ka, kara nyia, pǝlǝa à twali aban ká a kuli.#24:51 Ɓalli gbal aɓa: Aturo 1:9-11. 52À peri abani, sǝ à nyare aban ká a Urǝshalima nǝ bumpwasǝa kǝrkǝr. 53Ko ya pwari ka à kǝ wario aɓa Ndàmǝgule mala Ɓakuli, à kǝ mal pwari malea kam aban ɓwangsǝki Ɓakuli.

Currently Selected:

Luka 24: mbu

Highlight

Copy