Matiu 16
16
Aɓwana alta gir'lǝmndǝa aban Yesu
(Markus 8:11-13; Luka 12:54-56)
1Amǝ Farisi andǝ amǝ Saduki yiu aban Yesu à nǝ̀ karǝki. À zǝmbǝi wi ama ɓǝ̀ lǝmndǝia wia ɓe kǝ gir'ndali mana nǝ̀ lǝmndǝ ama yì ka, pur nǝban Ɓakuli.#16:1 Ɓalli gbal aɓa: Mat 12:38; Luk 11:16.
2Yesu pǝlǝia wia ama:
Nǝ pwarikpǝra ka ɓǝ̀ wu sǝn kuli bang ngga wu kǝ na ama, “Ban no nǝ̀ ɓoaro.” 3Sǝ nǝ budǝmbari ɓǝ̀ wu sǝn kuli bangŋa sǝ ban pǝndǝ ka, wu na ama, “Mbulo no nǝ̀ nya yalung.” Wu kǝ gandǝ bang ɓa pa mala bumkuli, sǝ agir mana à kǝ lǝmndǝ pa mala nza man ngga wu bwaltea ɗang. 4Nza mala amǝ'ɓealɓikea andǝ amǝ'ɗwanyi ɓanggi Ɓakuli na à alkiyita gir mana à nǝ̀ sǝn ngga. Sǝ à pà nǝ̀ lǝmndǝia ɓe kǝ gir'lǝmndǝa ɗang, she kǝ mala Yunana.#16:4 Ɓalli gbal aɓa: Mat 12:39; Luk 11:29.
Yesu pǝlǝa nyia o.
Yist mala amǝ Farisi andǝ amǝ Saduki
(Markus 8:14-21)
5Lang alaggana mala Yesu eauwe a ɓe nkaring nggeamur ka, à sǝni ka ɓalǝia lorǝo à twal bǝredi a buia ɗang. 6Yesu nea wia ama, “Wu par kir wun, wu yal ɓamur rǝ wun arǝ yist mala amǝ Farisi andǝ amǝ Saduki.”#16:6 Ɓalli gbal aɓa: Luk 12:1.
7Pǝlǝa alaggana male kutia na cau a rǝarǝia ama, “Bang anggo acemǝnana sǝm yinǝ bǝredi raka.”
8Yesu yi sǝlǝia wia nǝ cau mǝno à nakiyi ka sǝ ɗia ama, “Palang sǝ wu kǝ na cau arǝarǝ wun amur ɗwanyi bǝredi? Paɓamuru ma'wun kyau fat! 9Wun ado ka wu kǝ gandǝ bwalta cau mbo? Ɓalǝ wun lorǝna ce abǝredi tongno mǝnana ǝn linǝ aɓwana á-tongno nǝi ka? Azace shen sǝ wu lumsǝia nǝ aɓwanggine?#16:9 Ɓalli gbal aɓa: Mat 14:17-21. 10Sǝ lang arǝ abǝredi tongno-nong-ɓari mǝnana ǝn linǝ aɓwana á-ine nǝi ka? Azace shen sǝ wu lumsǝia nǝ aɓwanggine mǝnana a ueo ka?#16:10 Ɓalli gbal aɓa: Mat 15:34-38. 11Palang sǝ wu gandǝ sǝlǝ ama ǝn pa arǝ na cau amur bǝredi raka? Mǝ nda arǝ na ama wu par kir wun ce wu earnǝ yist mala amǝ Farisi andǝ amǝ Saduki ɗang.”
12Nda sǝ ce kpania wia ama pa arǝ nunkiria amur yist mana à tsǝkiyi arǝ bǝredi ka ɗang. Nda arǝ na cau amur kanigir nyir mala amǝ Farisi andǝ amǝ Saduki.
Bitǝrus bangŋa ama Yesu nda Kǝrǝsti
(Markus 8:27-30; Luka 9:18-21)
13Lang Yesu yina a nzali Kaisariya Filipi ka, ɗi alaggana male ama, “Yana ɗe aɓwana kǝ na ama nda mim Muna mala Ɓwa?”
14Sǝ à pa eare ama, “Aɓea aɓwana kǝ na ama a nda Yohana Mǝbatisǝma; aɓea ka à kǝ na ama, Iliya; sǝ aɓea gbal ka ama Irmya ko mwashat aɓalǝ amǝ'ɓangna mala Ɓakuli.”#16:14 Ɓalli gbal aɓa: Mat 14:1,2; Mar 6:14,15; Luk 9:7,8.
15Pǝlǝa Yesu ɗia ma, “Sǝ wun ngga, wu kǝ na ama mǝ nda yan?”
16Shiman Bitǝrus pa eare ama, “A nda Kǝrǝsti, Muna mala Ɓakuli mǝyilǝmuì.”#16:16 Ɓalli gbal aɓa: Yoh 6:68,69.
17Yesu ne wi ama:
Tsǝkbu na muro, we Shiman muna mala Yunana, acemǝnana sure mala ɓwapǝndǝa na lǝmndǝo mǝnia yì gir ka ɗang. Tárram mǝnana a kuli ka nda. 18Sǝ we Bitǝrus ka a nda tali, sǝ amur tali mǝnia ka mǝ nǝ ɓak Ikǝlisiya mem, sǝ rǝcandǝa mala Lú pa nǝ̀ gandǝi ɗang. 19Mǝ nǝ po akyî mala Domurǝm mǝnana a kuli ka; gir kat mǝnana à kùrrì a ɓanza ka anggo sǝ à nǝ̀ kùrrì a kuli, sǝ gir kat mǝnana a panzǝi a ɓanza ka anggo sǝ à nǝ̀ panzǝi a kuli.#16:19 Ɓalli gbal aɓa: Mat 18:18; Yoh 20:23.
20Pǝlǝa nunkir alaggana male ama ɓǝa kǝa ne kǝɓwa ama yì nda Kǝrǝsti ɗang.
Yesu bang cau amur lú male
(Markus 8:31–9:1; Luka 9:22-27)
21Twal a pwari mǝno ka Yesu tita mǝnggi alaggana male ɓa cau ama, “Dumǝna púp mǝ nǝ ká a Urǝshalima, mǝ nǝ ká nu tanni kǝrkǝr a bu aɓwana-mǝgule, agbani pǝris andǝ amǝkani nggurcau. À nǝ̀ wal-luem, sǝa ma a tāruia nongŋo ka mǝ nǝ loapi ɓembe nǝ yilǝmu.”
22Bitǝrus pǝlǝa tunǝi zak sǝ pǝrki nǝ ce a kuni ama, “Pà nǝ̀ pak ɗang, Mǝtalabangŋo. Kǝgir pà nǝ̀ kumo anggo ɗang!”
23Yesu pǝlǝa arǝ Bitǝrus sǝ ne wi ama, “Nyaram anggo, Shetan! A kǝ earce tsǝem mǝ annda, acemǝnana ɗenyicau mo ka mala Ɓakuli na ɗang, mala ɓwapǝndǝa na.”
24Pǝlǝa Yesu banggi alaggana male ama:
Ɓwa mǝnana kat earce ama nǝ̀ yiu atam nǝ̀ duk mǝkpatam ngga, dumǝna púp nǝ̀ nying ɗenyicau ɓamuri, nǝ̀ twal nggun-gangndi male sǝ nǝ̀ kpatam. # 16:24 Ɓalli gbal aɓa:
Mat 10:38; Luk 14:27. 25Ɓwa mana kat kǝ sǝni nǝ̀ amsǝ yilǝmi ka nǝ̀ ngga ɗwanyi banì, sǝ ɓwa mǝnana kǝ turta yilǝmi acem ngga, nǝ̀ ngga kumi.#16:25 Ɓalli gbal aɓa: Mat 10:39; Luk 17:33; Yoh 12:25. 26Ɓǝ̀ ɓwa kum koya gir a ɓanza man kat, sǝ ɗwanyi yilǝmu mǝnana málá male pà kàm raka, lǝmndǝ ama pà nǝ́ kǝgir ɗang. Sǝ ɓǝ̀ ɗwanyini yilǝmu mǝnana málá male pà kàm raka, pà nǝ́ kǝgir mǝnana nǝ̀ pa sǝ nǝ̀ kumi ɗǝm ngga ɗang. 27Acemǝnana Muna mala Ɓwa ka nǝ̀ ngga yiu aɓa gulo mala Tarrí, andǝ amǝturonjar male ate, sǝ nǝ̀ yia pe koyan ngga tangnakusǝi, ace gir mǝnana pak ka.#16:27 Ɓalli gbal aɓa: Mat 25:31; Ang 62:12; Rom 2:6. 28Ən nggǝ na wun aɓa mǝsǝcau ama, aɓea ɓwana na akani aban came mǝnana à pà nǝ̀ wu ɗang she ɓǝa sǝna yiu mala Muna mala Ɓwa a Domurǝm male ka.
Currently Selected:
Matiu 16: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
