Matiu 23
23
Yesu ɓǝsǝki amǝkani Nggurcau andǝ amǝ Farisi
(Markus 12:38-39; Luka 11:43,46; 20:45-47)
1Pǝlǝa Yesu ne aɓwabunda andǝ alaggana male cau ama:
2 Amalǝm Nggurcau mala Musa andǝ amǝ Farisi ka à ndà kǝ aɓwana mǝnana à ndanǝ rǝcandǝa mala bǝlki aɓwana ɓa Nggurcau mala Musa ka. 3Ace mani ka wu kpata gir mana à kania wun ngga, ɗǝm ngga wu pak gir mana à bangga wun ama ɓǝ̀ wu pak ka. Sǝa ma wu kǝa kpata aturo malea ɗang, acemǝnana gir mana à kǝ kani ka à kǝ pe ɗang.
4 Pak ka à kǝ yiu nǝ acau mǝkwane sǝ à nǝ̀ tsǝk aɓwana ama ɓǝa pea. Sǝ yia nǝ nggearǝia ka à pà nǝ̀ pak ko mwashat ata mǝno yì agir ka ɗang.
5 Ko man à kǝ pak le ka à kǝ lǝmndǝki ɓǝ̀ aɓwana sǝni. Pak ka amuna-luru malea mala tsǝk amǝ'mbu-malǝmce mala cau mala Ɓakuli ka à kǝ pea ɓǝa tanggî mala acili aɓwana sǝ à nǝ̀ kurkia a kundǝmbǝia andǝ amelbuia. Ankonggur kun adaura malea ka amǝsake na. # 23:5 Ɓalli gbal aɓa:
Ɓal 15:38; Nggur 6:8; Mat 6:1. 6Ɓǝ̀ aɓwana rambǝa aban pakiɗire ka à kǝ earce ɓǝa pea wia aban-do mǝɓoarne. Ɓǝ̀ nda aɓa Ndakpapi ka, à earce abuno mǝnana à tsǝia ace aɓwana-mǝgule ka. 7À earce ɓǝ̀ aɓwana makkiakun nǝ pagulo aɓa limo, sǝ ɓǝa kǝ tunǝia ama, “Malǝm.”
8 Wu kǝa eare ɓǝa tunǝ wun ama “Malǝm” ɗang. Wu ndaka amǝ'eamrǝarǝu kat. Malǝm ma'wun ngga nda mwashat ɓǝrɓǝr. 9Sǝ wu kǝa tunǝ kǝɓwa akani a ɓanza ama “Tarrú” ɗang, acemǝnana kǝ Tar wun na mwashat ɓǝrɓǝr a kuli. 10Sǝ ɓǝa kǝa tunǝ wun gbal ama “Ɓwamǝgule” ɗang acemǝnana kǝ ɓwamǝgule ma'wun nda Kǝrǝsti. 11Ɓwa mǝnana gulo kuti aɓi aɓalǝ wun ngga nda ɓwa mǝnana nǝ̀ duk muna-ɓala ma'wun ngga.#23:11 Ɓalli gbal aɓa: Mat 20:26,27; Mar 9:35; 10:43,44; Luk 22:26. 12Ɓwa mǝnana gusǝlǝ ɓamuri ka à nǝ̀ kyauwiki, sǝ ɓwa mǝnana kyamsǝ ɓamuri ka à nǝ̀ gusǝlǝi.#23:12 Ɓalli gbal aɓa: Luk 14:11; 18:14.
Yesu ɓinǝ ce turo mala amǝ'kunɓarina
(Markus 12:40; Luka 11:39-42,44,52; 20:47)
13 Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu gir kun njar kutio a Domurǝm mala kuli arǝ aɓwana. Wun nǝ ɓamur rǝ wun ngga wu kuti ɗang, sǝ aɓwana mǝnana à earce ama à nǝ̀ kuti ka wu earia wia ɗang. 14[Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu kǝ lǝmndǝ rǝ wun kǝla wu nda ka amǝ'ɓealɓoarne nǝ pakki ahiwi mǝsauwe, sǝ ɓafo ka wu nda mana wu kǝ kumsǝ kun aman-lú wu kǝ liki agirkuma malea arǝ ɓala malea ka. Ace mani ka Ɓakuli nǝ̀ pa wun tanni mana kutibanì ka kǝrkǝr.]
15 Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu kǝ twal gya mǝsauwe arǝ anzali andǝ mur anggeamur ace yinǝ ɓwa mwashat a tanjar ma'wun. Sǝ ɓǝ̀ wu yina nǝi ka pǝlǝa wu nyesǝi duk ɓwa-ká-lubǝsa kuti wun kusǝ ɓari.
16 Caukwanban nǝ wun, wu ndaka ante mana à kǝ bwali ante gara ka! Wu kǝ kani aɓwana ama: “Ɓǝ̀ ɓwa kan nǝ Ndàmǝgule mala Ɓakuli ka kángir nî pà nǝ̀ bwali ɗang; sǝa ma ɓǝ̀ ɓwa kan nǝ zǝnariya mana aɓa Ndàmǝgule ka, kángir nî nǝ bwali.” 17Wun agǝm, ante! Azǝrfa andǝ Ndàmǝgule mǝnana tsǝk azǝrfa sǝ pak mǝfele ka, mǝyani kuti ɓi? 18Nyar ɗǝm ngga wu na ama, “Ɓǝ̀ ɓwa kan nǝ gyangŋan paɓoro ka kángir nî pà nǝ̀ bwali ɗang; sǝ ɓǝ̀ ɓwa kan nǝ ɓoro mana amur gyangŋan ngga nǝ̀ bwali.” 19Wun ante! Mǝyani gulo kuti ɓi: ɓoro mana amur gyangŋan ka le ko gyangŋan mana tsǝk ɓoro sǝ pak mǝfele ka? 20Ɓwa mana kan nǝ gyangŋan ka, kannǝna nǝi andǝ gir mana amuri ka. 21Ɓwa mana kan nǝ Ndàmǝgule mala Ɓakuli ka, kannǝna nǝ nǝi andǝ Ɓakuli mana do a ɓalǝi ka. 22Ɓǝ̀ ɓwa kan nǝ kuli ka kannǝna nǝ bunomurǝm mala Ɓakuli andǝ Ɓakuli mana do amur bunomurǝm ngga.#23:22 Ɓalli gbal aɓa: Isha 66:1; Mat 5:34.
23 Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu kǝ pe Ɓakuli gauwe mwashat aɓalǝ agauwe lum mala agir mǝkeke kǝla ambukagir ɓaban ma'wun, sǝ wu burice agir mǝɓoarne mǝnana nggurcau kànì ka, kǝla bang mǝsǝcau, andǝ ɓwamuru, andǝ pak mǝɓoarne. Amǝnia ka à ndaka gir mǝnana ɓoaro ɓǝ̀ wu kǝ pea a tarǝia andǝ acilia mǝno ka. # 23:23 Ɓalli gbal aɓa:
Pǝris 27:30
. 24Wu ndaka ante mana à kǝ bwali ante gara ka! Wu tsǝk ɓamur rǝ wun wu kǝ kpata amuna nzongcau mala Nggurcau mana a bwal kǝ ban pepe raka, sǝ anzongcau amǝgulke mala Nggurcau ka, wu buricea sǝ wu sǝlǝ ɗang.
25 Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu nda kǝla akwar andǝ atasau mana à lak nzǝmia pepe ka, sǝ ɓalǝ wun ngga lumsǝ nǝ aturo ɓealɓikea andǝ mɓali. 26We ntei ɓwa Farisi! Tsǝk kiro arǝ gilǝki ɓabumo ɓǝ̀ duk nǝ ɓoarnsari, sǝ aɓwana nǝ̀ sǝn aturo ɓoarna mo, à nǝ̀ earnǝia.
27 Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu nda kǝla aɓembe mana à tasǝ nzǝmia nǝ pyanti mǝpwasǝe ka; à ɓoar sǝna nǝ nza, sǝ ɓalǝia ka lumsǝ nǝ amú mala alú andǝ agir ɓyakǝno. # 23:27 Ɓalli gbal aɓa:
Aturo 23:3
. 28Ana gbal, a nza ka aɓwana kǝ sǝn wun kǝla wu ndaka amǝ'ɓealɓoarna, sǝ a ɓabum wun ngga wu lumsǝ nǝ swarkiban andǝ ɓealɓikea.
Yesu na ce tanni mala amǝ'kunɓarina
(Luka 11:47-51)
29 Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu kǝ ɓak aɓembe mala amǝ'ɓangna mana aká wun wal-luia, sǝ wu kǝ gilǝkice mala amǝ'cauɓoarna mana aká wun wal-luia ka. 30Sǝ pak ka wu kǝ na ama, “Ɓǝ̀ sǝm ndanǝ do mala aká sǝm a pwaryan ngga, ɓǝ́ pà sǝm nǝ̀ pu nzǝm gir mǝnana aká sǝm pakkì amǝ'ɓangna, à wal-luia ka ɗang.” 31Bangŋe ma'wun mǝnana ana ka lǝmndǝ ama wu ndaka amǝkau mala aɓwana mǝnana à wal amǝ'ɓangna ka. 32Wu lidǝmbǝa wu masǝlǝ kun cauɓikea mana aká wun tite ka!
33 Wun an'yau, wun amuna baffu! Lang sǝ wu nǝ̀ api ɓashi ká lu-bǝsa? # 23:33 Ɓalli gbal aɓa:
Mat 3:7; 12:34; Luk 3:7. 34Ace mani ka mǝ ndo mǝ nǝ tura wun ban nǝ amǝ'ɓangna, andǝ amǝ'sǝle, andǝ amǝkanigir. Aɓea atea ka wu nǝ̀ walia, wu nǝ̀ gballia a nggun; sǝ acilia ka wu nǝ̀ kwea aɓalǝ andakpapi sǝ wu nǝ̀ pǝrtea arǝ ala, wu nǝ̀ pea wia tanni. 35Ace mani ka tangnakusǝu mǝɓane ace sukki nkila mala amǝ'ɓealɓoarna kat mana à walia a ɓanza ka, nǝ̀ nyare amur wun, tite arǝ Habila yí bwal ban Zakariya, muna mala Berikiya, mana wu wali a nre ban mǝfele andǝ gyangŋan ngga.#23:35 Ɓalli gbal aɓa: Tite 4:8; 2Kpa 24:20-22. 36Mǝsǝcau, amǝnia yì atanni kat ka à nǝ̀ kum aɓwana mana a nza man ngga.
Yesu keban amur amǝ Urǝshalima
(Luka 13:34-35)
37 Oi amǝ Urǝshalima, amǝ Urǝshalima, wun amǝ'wal-lú amǝ'ɓangna mala Ɓakuli, wun amǝ'ɓukki aɓwana mǝnana Ɓakuli turia aban wun ngga. Kusǝ shen Mǝ nda arǝ earce mǝ mǝn abuam amur wun kǝla mǝnana nggu kǝ mǝnggi akpamtari amur amuni ka, sǝ wu ginǝ nkang! 38Adyan ngga, Ndàmǝgule ma'wun ngga à ginǝkina wuni, uena a tarǝì.#23:38 Ɓalli gbal aɓa: Ir 22:5. 39Ən nggǝ na wun, twal a yalung ngga pa wu nǝ̀ sǝn mǝsǝam ɗǝm ɗang, she pwari mǝnana wu nǝ̀ na ama,
“Tsǝkbu mala Ɓakuli na
amur yì ɓwa mǝnana
kǝ yiu aɓa lullǝ
Mǝtalabangŋo ka.” # 23:39 Ɓalli gbal aɓa:
Ang 118:26
.
Currently Selected:
Matiu 23: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
