Matiu 26

Aɓwana-mǝgule kpapi kunarǝia à nǝ̀ wal Yesu

(Markus 14:1-2; Luka 22:1-2; Yohana 11:45-53)

1Lang Yesu malǝna banggi aɓwana amǝnia yì acau kat ka, pǝlǝa ne alaggana male ama, 2“Wu sǝlǝna ama ueo nongŋo ɓari sǝ Lamsan Yalimuru nǝ̀ tite. Aɓalǝ amǝno yia apwari mala Lamsan ngga sǝ ɓeɓwa nǝ̀ ngga mak Muna mala Ɓwa, a bu aɓimǝbura, sǝ à nǝ̀ ngga gballì a nggun-gangndi.”#26:2 Ɓalli gbal aɓa: Pur 12:1-27.

3A baku mǝno ka agbani pǝris andǝ aɓwana-mǝgule mala amǝ Yahudi yi rambǝa a palta mala pǝris mǝgule mana à tunǝki ama Kayafas ka, 4sǝ à kurkunarǝia ama à nǝ̀ bwal Yesu a sǝmbǝrǝa à nǝ̀ wal-lui. 5Pǝlǝa à nea rǝia ama, “Ɓǝ̀ sǝm ká pak gir man a pwari Lamsan Yalimuru ɗang, ɓǝ̀ sǝm pa anggo ka aɓwana nǝ̀ loasǝ munǝo a la.”

Ɓe mɓwama soapi Yesu muru amuri

(Markus 14:3-9; Yohana 12:1-8)

6Aɓa mǝno anggo ka Yesu na a Betani a ɓala mala mǝdakali man yì Shiman ngga. 7Dumǝna aban lili, pǝlǝa ɓe mɓwama yiu abani nǝ muru mǝ'rǝmɓoarne, mana boale pa bǝti raka, aɓa muna-du mǝnana à ɓè nǝ ɓe kǝ tali mana à tunǝki ama alabasta ka, yi solǝì Yesu a ɓamuri.

8Lang alaggana mala Yesu sǝn mǝnia yì gir ka bumia kiɗiki, à na ama, “Palang sǝ mɓwama man kiɗiki muru man ani? 9Ɓoaro male ka ɓǝa mangŋǝni amur boalo mǝgule, sǝ boale ka à nǝ̀ pe amǝtǝr.”

10Yesu sǝlǝnia cau mǝno kat pǝlǝa nea wia ama:

Palang sǝ wu kǝ zurǝi bum mɓwama man? Yì ka, pangŋǝnam gir mana mǝɓoarne na ka. 11Wu nda atarǝ wun wunǝ amǝtǝr ko a ya pwari ka, sǝ mim ngga pa mǝ nǝ pa ata wun ko a ya pwari ka ɗang.#26:11 Ɓalli gbal aɓa: Nggur 15:11. 12Muru mǝnia mɓwama man soapam a rǝam ngga, soe ace gilǝki tsǝk luem. 13Ɓafo ǝn nggǝ bangga wun, ko a ya ban aɓa ɓanza kat à nǝ̀ hamnǝ Cau Amsǝban man kam ngga, à nǝ̀ bang ce gir mǝnia mɓwama man pe ka, ace ɗenyi nǝi.

Yahuda eare nǝ̀ mak Yesu

(Markus 14:10-11; Luka 22:3-6)

14Pǝlǝa ɓe ɓwa mwashat ata alaggana male mǝnia lum-nong-ɓari, mǝnana à tunǝki ama Yahuda Iskariyoti ka, puro wario aban agbani pǝris 15sǝ ɗia ama, “Mana wu nǝ̀ eare wu nǝ̀ pam mana ɓǝ̀ ǝn pa wun Yesu a bu wun ngga?” Pǝlǝa à ɓal boalo zǝnariya mǝsǝì lumi-tārú sǝ à pe wi. 16Lo àkǝ̀ pwari mǝno ka Yahuda kutia alta njar mana nǝ̀ pana Yesu nǝi a buia ka.

Yesu li girlina Lamsan Yalimuru andǝ alaggana male

(Markus 14:12-21; Luka 22:7-13,21-23; Yohana 13:21-30)

17A pwari mana à tinata pakiɗire mala Bǝredi Mana à Tsǝki Yist raka, alaggana mala Yesu yiu abani sǝ à ɗi ama, “A ya ban sǝ a kǝ earce ɓǝ̀ sǝm gilǝkio girlina Lamsan Yalimuru?”

18Pǝlǝa nea wia ama, “Wu kya ɓa nggeala aban ɓeɓwa na kam, wu ne wi ama, ‘Malǝm ama pwari mana Ɓakuli tsǝki wi ka gbashina, nǝ̀ li girlina Lamsan Yalimuru a ɓala mo andǝ alaggana male.’ ” 19Alaggana mala Yesu o à kya pa kǝla mana banggia wia ka, à kya lam girlina Lamsan Yalimuru.

20Lang adyan pwari kpana ka, yi do aban li andǝ alaggana male lum-nong-ɓari. 21À nda aban li ka, pǝlǝa nea wia ama, “Ɓafo ǝn nggǝ bangga wun, ɓeɓwa aɓalǝ wun nǝ̀ ngga mem.”

22Ɓabumia zuriki kǝrkǝr sǝ ko yana ka tita ɗie ama, “Mǝ nda le Mǝtalabangŋo?”

23Yesu nǝ̀ ear ka na ama, “Ɓwa mana oasǝ bui a kwar atam ngga, ɓwe na nǝ̀ ngga mem ngga.#26:23 Ɓalli gbal aɓa: Ang 41:9. 24Muna mala Ɓwa ka nǝ̀ wú kǝla mǝnana à gilǝì amuri ka. Sǝa ma caukwanban na nǝ ɓwa mana nǝ̀ mak Muna mala Ɓwa ka! Kǝpǝna mǝnia yì ɓwa ka à ɓǝli raka.”

25Pǝlǝa Yahuda, mana nda nǝ̀ ngga me ka ɗi ama, “Malǝm, Mǝ nda le?”

Yesu eari wi ama, “E, a nda.”

26À nda ban li girlina ka, Yesu twal bǝredi, pak yàwá pǝlǝa ɓwani, pe alaggana male sǝ nea wia ama, “Wu ang, wu li; mǝnia ka nggūrǝam na.”

27Pǝlǝa twal kwap mala mur anap, pak yàwá sǝ pea wia, na ama, “Wu nu a ɓalǝi, wun kat. 28Mǝnia ka nda nkilem mala kurcau mǝbǝshe, mǝnana à sukki ace twal ban acauɓikea mala aɓwana pas ka.#26:28 Ɓalli gbal aɓa: Pur 24:8; Ir 31:31-34. 29Ən nggǝ bangga wun, pa mǝ nǝ nu mǝnia yì mur ɓǝlanggun anap ka ɗǝm ɗang she a mǝno yì pwari mǝnana mǝ nǝ nui bǝshe sǝnǝa wun a Domurǝm mala Tárram ka.”

30Lang à tuna nggyal ka, à puro à o a nkono mala anggun Olif.

Yesu bangŋa ama Bitǝrus nǝ̀ tǝmce

(Markus 14:27-31; Luka 22:31-34; Yohana 13:36-38)

31Lang à nda amur nkono Olif ka, Yesu pǝlǝa ne alaggana male ama, “A ɓa dù man yalung ngga, wun kat wu nǝ̀ mǝsǝe, wu nǝ̀ ɗekiam. Mǝnia ka nda acemǝnana aɓa Malǝmce ka Ɓakuli bangŋa ama:

“ ‘Mǝ nǝ wal yalgir,

sǝ anzur mana a

domwan ngga

à nǝ̀ mesǝke.’ # 26:31 Ɓalli gbal aɓa: Zak 13:7 .

32 Sǝ a nzǝm lo mem a ɓembe ka, mǝ nǝ aka wun dǝmbǝa aban ká a Galili.”

33Bitǝrus eari wi ama, “Ko ɓǝ̀ aɓwana kat ɓangŋa à ɗekio ka, mim ngga pà mǝ nǝ ɓang ɗang.”

34Yesu nyesǝi wi ama, “Mǝsǝcau, ǝn nggǝ banggo àkǝ̀ bu dù mǝnia ka, kaniama nggǔ nǝ̀ ɓua ka a wu nǝ tǝmcem kusǝ tārú.”

35Bitǝrus bangŋa ama, “Ko ɓǝ̀ mǝ nǝ wu sǝnǝ we ka, pà mǝ nǝ ɓinǝo ɗang.” Sǝ acili alaggana gbal ka à bangŋa anggo.

Yesu pak hiwi a Gefsemani

(Markus 14:32-42; Luka 22:39-46)

36Pǝlǝa Yesu andǝ alaggana male o a ɓe ban mana à tunǝki ama Gefsemani ka, sǝ nea wia ama, “Wu duk kani, mim ngga mǝ nǝ ká akano mǝ nǝ pak hiwi.” 37Tunǝ Bitǝrus andǝ amuna mala Zabadi ɓari, Yohana andǝ Jemis ate, sǝ tita pak bumkiɗikea, sǝ ɓabumi zuriki. 38Pǝlǝa nea wia ama, “Bumkiɗikea mǝnana a yilǝmem ngga gul kǝrkǝr kǝla nǝ̀ wal luem. Wu duk kani, wu dum nǝ amǝsǝ wun atam.”

39Tùr a dǝmbǝa bǝti ka, kya kumsǝ nǝ ɓamǝsǝi a nzali, pak hiwi ama, “Dâ, ɓǝ̀ a wu nǝ ear ka, twalam mǝnia yì tanni ka. Sǝa ma mani ka gir mǝnana bumo kànì ka nda, mem na ɗang.”

40Nyare yiu aban alaggana male yi kumia ka à nda ntulo. Nê Bitǝrus ama, “Pà wu nǝ̀ gandǝ do atam nǝ mǝsǝ wun bu-pwari mwashat ɗang mbo? 41Wu dum nǝ amǝsǝ wun, sǝ wu pak hiwi, ace mǝnana wu kǝa kuti aɓa karǝkiban raka. Bangŋo ma'wun kǝ earce nǝ̀ pak gir mǝɓoarne sǝ nggūrǝu ka pà nǝ́ rǝcandǝa ɗang.”

42Nyar ɗǝm o kya pak ɓaria hiwi ama, “Dâ, ɓǝ̀ mǝnia yì tanni ka a pà nǝ́ twalami raka, she ɓǝ̀ ǝn nuni ka, kànì mo ɓǝ̀ pa.”

43Nyare yiu abania, yi kumia ɗǝm ngga à nda ntulo; amburmǝsǝia dǝmbǝrikina. 44Pǝlǝa nyia o kya pak tāruia hiwi; ɓǝsǝlǝ kǝ cau mǝ'mwashati.

45Nyare yiu aban alaggana male sǝ banggia wia ama, “Wu nda a ntulo piu aban usǝlǝo? Wu sǝni, bu-pwari yina à ndo à nǝ̀ pà Muna mala Ɓwa a bu amǝ'cauɓikea. 46Wu lo, sǝm nǝ̀ umi! Ɓwa mǝnana mak Muna mala Ɓwa ka ndya kǝ yiu ka!”

À bwal Yesu

(Markus 14:43-50; Luka 22:47-53; Yohana 18:3-12)

47Nda ɓa na cau piu, Yahuda mǝnana nda aɓalǝ alaggana male man lum-nong-ɓari ka, yi tusǝo. Yiu andǝ aɓwana pas nǝ anggea-byau andǝ agara a buia. Agbani pǝris andǝ aɓwana-mǝgule mala amǝ Yahudi nǝ̀ tasǝia. 48Yì ɓwa mǝnana mé ka angŋa dǝmbǝa kanǝnìa wia gir mǝnana nǝ̀ pa sǝ à nǝ̀ surǝì ka ama, “Ɓwa mǝnana mǝ nǝ makki kun, mǝ nǝ kùrrì ka, ɓwe na, wu bwali.” 49Yahuda gya yi kútí kporong aban Yesu, ne wi ama, “Malǝm, ǝn nggǝ makko kun.” Pǝlǝa yi mǝn abui kùr Yesu zǝp.

50Yesu banggi wi ama, “Ɓiam, pak gir mǝnana yinǝ we ka.”

Pǝlǝa aɓwana mǝno yi gbami Yesu, à bwali kàngkàng. 51Anggo ka, ɓeɓwa aɓalǝ aɓwana mǝnana ata Yesu ka, kwetǝ nggeabyau male kwarǝna ɓe guro mala pǝris mǝgule nǝi, kasǝ mburkiri kpat.

52Yesu ne wi ama, “Nyesǝ nggeabyau mo oasǝi a nde, acemǝnana ɓwa kat mana kǝ munǝ nǝ nggeabyau ka, nǝ nggeabyau sǝ à nǝ̀ wali. 53Wu kǝ sǝni kǝla pà mǝ nǝ gandǝ zǝmbǝi Tárram, sǝ nǝ̀ tasǝam amǝturonjar pas àkǝ̀ dyadyan à nǝ̀ yia munǝo acem re? 54Sǝ ɓǝ̀ ǝn pa anggo ka, lang sǝ cau mǝnana Malǝmce mala Ɓakuli bangŋi ama nǝ̀ pa ana ka nǝ̀ lumsǝo?”

55Yesu nê ɓwabunda mǝnana yiua bwale ka ama, “Wu yiu nǝ anggea-byau andǝ agara ace bwalam kǝla mǝ nda mǝyàl-nzongcau? Ko aya pwari ka ǝn nggǝ do aɓa Ndàmǝgule mala Ɓakuli aban kanigir, sǝ wu bwalam ɗang.#26:55 Ɓalli gbal aɓa: Luk 19:47; 21:37. 56Sǝ mǝnia kat ka pâ ace lumsǝ cau mǝnana amǝ'ɓangna mala Ɓakuli gilǝa a Malǝmce male ka.”

Nda alaggana male kat ɓangŋa à ɗeki nǝmurǝì ka.

À wari nǝ Yesu a ɓadǝmbǝ amǝɓashi

(Markus 14:53-65; Luka 22:54-55,63-71; Yohana 18:13-14,19-24)

57Aɓwana mǝno à bwal Yesu ka à um nǝi aban pǝris mǝgule, yì Kayafas. Akano sǝ amǝkani Nggurcau mala Musa andǝ aɓwana-mǝgule yi dapia. 58Bitǝrus ka kpata Yesu a nzǝmo kuko aban ká a ɓala mala Pǝris Mǝgule. Yi kutio sǝ do ata amǝyalban nǝ̀ sǝn gir mana à nǝ̀ pakki Yesu ka.

59Yia agbani pǝris andǝ acili aɓwana-mǝgule ka à ndarǝ alte à nǝ̀ kum cau nyir amur Yesu mǝnana à nǝ̀ kumo à nǝ̀ wal-luí nǝi ka, 60sǝ kat andǝ mani ama aɓwana pas puro à banggi acau nyir amuri ka, à kum ko mwashat ɗang.

A masǝlǝate ka aɓea ɓwana ɓari puro. 61À na ama, “Mǝnia yì ɓwa ka bangŋa ama yì ka, nǝ̀ gandǝ arki Ndàmǝgule mala Ɓakuli sǝ nǝ̀ nyare nǝ̀ ɓè aɓa nongŋo tārú.”#26:61 Ɓalli gbal aɓa: Yoh 2:19.

62Pǝris mǝgule pǝlǝa lo cam nǝ came sǝ ne Yesu ama, “A panǝ cau mǝnana a nǝ bangŋa amur mǝno yì cau ka re? Mana nda ɓa mǝnia yì cau à kǝ ne a muro ka?” 63Yesu duk kuni piu.

Pǝris mǝgule ne wi ama, “Ən nggǝ kpapio wunǝ Ɓakuli Mǝyilǝmuì wu bangga sǝm ko a nda Kǝrǝsti, Muna mala Ɓakuli?”

64Yesu eare ama, “E, kǝ nda a bang ngga, sǝ ǝn nggǝ bangga wun kat,

“ ‘A dǝmbǝa ka wu nǝ̀ sǝn

Muna mala Ɓwa dumǝna

ata bu-mǝli mala

Ɓakuli Mǝtalabangŋo,

aban yiu aɓalǝ apǝrɓang

a bumkuli.’#26:64 Ɓalli gbal aɓa: Dan 7:13.”

65Kara Pǝris mǝgule bwal daura male sanni sǝ na ama, “Nyesǝna ɓamuri kǝla Ɓakuli! Ya cau nani sǝm alkiyite amuri nǝ̀ kuti mǝnia? Wu ongŋǝna cau ɓǝsǝki Ɓakuli mǝnana pur a kuni ka. 66Mana nda ɗenyicau ma'wun?”

À pǝlǝa à eari wi ama, “Karǝna ɓǝa wali ɓǝ̀ wú.”#26:66 Ɓalli gbal aɓa: Pǝris 24:15,16.

67Pǝlǝa à takki ntara a ɓamǝsǝi sǝ à tulki nǝ abuia. Aɓea ɓwana ka à kwaki a takiri#26:67 Ɓalli gbal aɓa: Isha 50:6. 68sǝ à na ama, “Bangga sǝm, we Kǝrǝsti, yana nda ɓwa mǝnana walo ka?”

Bitǝrus bangŋa ama surǝ Yesu ɗang

(Markus 14:66-72; Luka 22:56-62; Yohana 18:15-18,25-27)

69Anggo ka Bitǝrus na nǝ́ nza aban do aɓa palta. Ɓe muna-ɓwama mǝturo-ɓala yiu abani, ne wi ama, “We gbal ka wu nda tarǝ wun wunǝ Yesu, Ɓwa Galili.”

70Sǝ Bitǝrus ka makgir a ɓadǝmbǝ aɓwana kat ama, “Awo, ǝn surǝ gir mǝnana a banggiyi cau amuri ka ɗang.”

71Pǝlǝa puro a kun palta. Ɓe muna-ɓwama ɗàng sǝni pǝlǝa ne aɓwana mǝnana abani ka ama, “Ɓwa man ngga ɗiɗyal ka nda ata Yesu Ɓwa Nazarat.”

72Bitǝrus nyare makgir ɗǝm nǝ kana ama: “Awo, ǝn surǝ ɓwe mǝno ɗang!”

73Zuku ka aɓwana mǝno à nda ban came abanì ka à sungŋo aban Bitǝrus sǝ à ne wi ama, “Mǝsǝcau, we ka a nda aɓalǝia, acemǝnana lasǝo lǝmndǝ ama a nda ɓwa Galili.”

74Pǝlǝa Bitǝrus kángir sǝ na ama, “Ɓǝ̀ Ɓakuli ɓǝ̀ kiɗikiam mǝnana ɓǝa na ama ǝn surǝ mǝnia yì ɓwa ka!”

Anggo ka kara nggù ɓua. 75Nda ɓalǝ Bitǝrus kasǝa arǝ cau mǝnana Yesu banggi wi ka ama, “Kaniama nggǔ nǝ ɓua ka, a nǝ na kusǝ tārú ama a surǝam ɗang.” Pǝlǝa puro a nza kya ɓua, ɓua mǝkwanbanì.

Currently Selected:

Matiu 26: mbu

Highlight

Copy