Matiu 28

Ɓakuli loasǝ Yesu nǝ yilǝmu

(Markus 16:1-8; Luka 24:1-12; Yohana 20:1-10)

1A nzǝm pwari Sabbat, nǝ dǝmbari ɗiɗyal a pwari Ladi ka, Maryamu Ɓwa Magdala andǝ ɓe Maryamu waria sǝn ɓembe.

2Lang ngga, kara nzali dǝurǝo kǝrkǝr. Mǝturonjar mala Mǝtalabangŋo pur a kuli yi sulǝo, ramta tali mana à girna kun ɓembe nǝi ka, pǝlǝa do amuri. 3Rǝi kǝ ta gbǝang kǝla linzama mala mbulo; anggurbyau male pwasǝ pwapwat kǝla buke. 4Amǝyal ɓembe sǝni ka, rǝia ɓǝla nǝ nggea ɓangciu, sǝ à kya kpa nzali kǝla aɓwana mana à wuna ka.

5Mǝturonjar ne amamǝne ama, “Ɓangciu ɓǝ̀ kǝa pakka wun ɗang. Ən sǝlǝna ama wu nda ban alta Yesu mana à gballì a nggun ka. 6Pa akani ɗang; Ɓakuli loasǝni nǝ yilǝmu, kǝla mǝnana bangga wun ngga. Wu yiu wu yi sǝn ban mana nong kam ngga. 7Sǝ wu nyare a kaurǝa wu kya ne alaggana male ama, ‘Longŋǝna nǝ yilǝmu, ɗǝm ngga nda aka wun dǝmbǝa kǝ ká a Galili ka. Wu nǝ̀ ngga sǝni akano.’ Ɓalǝ wun ɓǝ̀ kasǝa ama ǝn bangŋǝna wun ngga.”

8Amamǝna man nying ɓembe tsuk-tsuk. Ɓangciu pakkia wia sǝ bumia pwasǝ kǝrkǝr. À ɓangŋa à nǝ̀ ngga banggi alaggana male ce. 9À nda njar aban ká ka, kara Yesu yi kasǝa a dǝmbǝia, nea wia ama, “Ən nggǝ makka wun kun.” À pǝlǝa à yiu abani tu, à yì kurrì zǝp arǝ akusǝi, sǝ à peri. 10Yesu pǝlǝa nea wia ama, “Ɓangciu ɓǝ̀ kǝa pakka wun ɗang. Wu kyane wu kya ne amǝ'eambǝam ɓǝa o a Galili, à nǝ̀ ngga sǝnam nggam.”

Cau mana amǝyal ɓembe bang ngga

11Lang amamǝna man na ban o ka, aɓea amǝyalban mǝnana à tsǝia yal ɓembe ka, à o aɓa nggeala à kya banggi agbani pǝris ce gir man pak kat ka. 12Agbani pǝris andǝ aɓwana-mǝgule rambǝa à kurkunarǝia. À twal nggea boalo mǝgule à pea soje. 13À nea wia ama, “Wu bangŋa ama wu nda ntulo nǝ du sǝ alaggana male yiu à yì iuwi à um nǝi. 14Ko ɓǝ̀ nggwamna#28:14 nggwamna: Buntu Bilatus ok ce ka, sǝm nǝ̀ ngga oasǝkì cau a rǝì pà nǝ̀ pakka wun kǝgir ɗang.” 15Pǝlǝa asoje ak boalo sǝ à kpata cau man gbal à banggia wia ka. Mǝnia yì cau ka aki kun amǝ Yahudi yi pur a yalung.

Turo mǝgule mana Yesu pe alaggana male ka

(Markus 16:14-16; Luka 24:36-49; Yohana 20:19-23; Amǝ Mishan 1:6-8)

16Alaggana man lum-nong-mwashat ka à kutio à o a Galili, amur nkono mana Yesu banggia wia ama ɓǝa kyan kam ngga.#28:16 Ɓalli gbal aɓa: Mat 26:32; Mar 14:28. 17Lang à sǝni ka, à ɓun a ɓadǝmbǝi à peri; sǝa ma aɓea aɓwana atea ka à ear ama Yesu na ɗang. 18Yesu pǝlǝa yiu abania sǝ na ama:

“Rǝcandǝa mǝnana a kuli andǝ mana a ɓanza kat ka Ɓakuli panami! 19Ace mǝno ka, wu kyane aban ɓwapǝndǝa arǝ anzali kat, wu yinǝia ɓǝa pǝlǝ amǝkpatam. Wu pakkia wia batisǝma aɓa lullǝ Ɓakuli Tarrû, andǝ mala Muni, andǝ mala Bangŋo Mǝfele.#28:19 Ɓalli gbal aɓa: Aturo 1:8. 20Wu kania wia ɓǝa kpata agir mana kat ǝn bangga wun ngga. Mǝ nda ata wun kàngkàng a ko ya pwari ka, ba masǝlǝata ɓanza.”

Currently Selected:

Matiu 28: mbu

Highlight

Copy