Markus 12
12
Kanicau arǝ amǝ'rya mǝɓealɓike
(Matiu 21:33-46; Luka 20:9-19)
1Yesu tita kania wia gir nǝ kanicau ama:
Ɓe ɓwa tsǝk ɓaban nggun anap. Kàrǝì nǝ nkandan, sǝ tǝm tūli aɓa tali ace kambǝ mur ɓǝlanggun anap. Ɓak ban mǝdāre mǝnana à nǝ̀ nggǝ cam amuri aban yal ɓaban ngga. Pǝlǝa nyesǝ ɓaban nì pana haya nǝi a bu amǝ'rya, sǝ kutio o a bǝri a ɓe nzali. # 12:1 Ɓalli gbal aɓa:
Isha 5:1,2.
2 Kunɓǝla mala anap karna ka, pǝlǝa tasǝ ɓe mǝturo ɓala male aban amǝ'rya ɓǝa kya aki wi ɓǝla anap a ɓaban. 3Sǝ amǝ'rya bwal mǝturo ɓala man, à walki, sǝ a tasǝ takwari o nǝ ɓabui.
4 Nyare mǝtala ɓaban tasǝ ɓe mǝturo ɓala abania. À yì wali à tsǝki pengye a ɓamuri, à pe kǝsǝkya kǝrkǝr. 5Nyar ɗǝm tu tasǝ ɓe mǝturo ɓala. Mǝnia ka à yì wal-lui. Pǝlǝa tasǝ aɓea amǝturo ɓala pas, aman ngga à kwea, acilia ka à wal-luia.
6 Kǝ ɓwa mwashat mǝnana ueo mǝtala ɓaban nǝ̀ tur ka, muna male mana earkiyi ace raka nda. Turi a nggea tankwang kat, ne ɓamuri ama, “À nǝ̀ pe munem gulo.” 7Kara amǝ'rya ne a rǝia ama, “Muna mala mǝtala ɓaban, mǝnana nǝ̀ liɓala ka nda man. Wu ɗeki ɓǝ̀ yiu, sǝm nǝ̀ yia wal-lui, sǝ mǝnia yì ɓaban ngga nǝ̀ duk ma'sǝm!” 8Pǝlǝa à bwali à wali wú, à twali à turi anzǝm ɓaban.
9 Sǝ mana ado mǝtala ɓaban nǝ̀ pa? Nǝ̀ yiu nǝ̀ yia wal lú ka amǝ'rya mǝno ka, sǝ nǝ̀ nyesǝ ɓaban nǝ̀ pea aɓea aɓwana. 10Wun ngga wu ɓal mǝnia yì ban ngga mbo aɓa Malǝmce, mǝnana ama:
“Tali mǝnana amǝɓa ginǝi ka,
nda ɗǝm yi bwal kusǝɓa
kàngkàng ngga.
11 Mǝnia yì gir ka
Mǝtalabangŋo na pe ka,
sǝ gir ndali na aban sǝm? # 12:11 Ɓalli gbal aɓa:
Ang 118:22,23.”
12Pǝlǝa aɓwana-mǝgule mala amǝ Yahudi alta njargula mǝnana à nǝ̀ bwali nǝi ka, acemǝnana à sǝlǝna ama bang mǝnia yì kanicau ka a rǝia. Sǝa ma acemǝnana àkǝ̀ ɓanggi ɓwabunda ka, à ɗeki à pǝlǝ rǝia, à o.
Mbwe boalo-cemi aban Kaisar
(Matiu 22:15-22; Luka 20:20-25)
13Anzǝm man ngga, à tasǝî Yesu aɓea amǝ Farisi andǝ aɓwana mala Hirǝdus ace mǝnana ɓǝa bwali aɓa nacau male ka. 14À yiu abani à yì na ama, “Malǝm, sǝm sǝlǝna ama we ka a kǝ came amur mǝsǝcau. Kǝɓwa pà kàm nǝ̀ pūrǝo ata bui male ka ɗang, acemǝnana ɓwapǝndǝa kat abano ka à twalia à nda mwashat. A kǝ kani njargula mala Ɓakuli nǝ mǝsǝcau. Sǝm ngge earce wu bangga sǝm; nggurcau eare ama ɓǝ̀ sǝm mbwe boalo-cemi aban Kaisar, yì murǝm mǝgule mala amǝ Roma le, ko pa a njari ɗang? 15Ɓǝ̀ sǝm mbwe le ko ɓǝ̀ sǝm ngga mbwe ɗang?”
Yesu ka sǝlǝna kutan malea, pǝlǝa ɗia ama, “Palang sǝ wu kǝ earce tambam? Wu yinǝam nǝ mǝsǝboalo ma'wun mǝ sǝni!”
16À pǝlǝa à yinǝi wi nǝ mǝsǝboalo, sǝ ɗia ama, “Foto ɓamǝsǝ yana mǝnia, sǝ parbu mala yana mana amuri ka?” À eari wi ama, “Mala Kaisar na.”
17Pǝlǝa Yesu nea wia ama, “Wu pe Kaisar gir mǝnana mala Kaisar na ka, sǝ wu pe Ɓakuli gir mǝnana mala Ɓakuli na ka.”
Kara yia ka à ndali kǝrkǝr nǝ nyesǝcau male.
Ɗiban amur doɓala andǝ loapi ɓembe nǝ yilǝmu
(Matiu 22:23-33; Luka 20:27-40)
18Pǝlǝa amǝ Saduki, mǝnana à bangŋa ama loapi ɓembe pa kàm raka, à yiu abani nǝ ɗiban.#12:18 Ɓalli gbal aɓa: Aturo 23:8. 19À na ama, “Malǝm, Musa gilǝa sǝm ama ɓǝ̀ mǝ'eam ɓwa wu sǝ ɗeki mami amuna pa abui raka, ɓwa mǝno ka dupi wi púp ɓǝ̀ twal mala lú, ɓǝ̀ ɓǝli mǝ'eambǝi amuna.#12:19 Ɓalli gbal aɓa: Nggur 25:5,6. 20Aɓea amǝ'eambu nakam tongno-nong-ɓari. Mǝdǝmbe al mɓwama, sǝ wu, ɗeki kǝ muna ɗang. 21Ɓwa mǝnana kpa nzǝmi ka twal mala lú, a do andǝ yi. Yì gbal ka yi wú, ɗeki kǝ muna ɗang. Anggo gbal nǝ tāruia. 22Yi mal muria kat, yia mǝnia tongno-nong-ɓari ka, ko kǝɓwa kum muna ɗang. A masǝlǝate ka mɓwame yi wu gbal. 23Ado ka, à pwari mǝnana aɓwana nǝ̀ loapi ɓembe nǝi ka, mɓwame ka nǝ̀ duk mala yana aɓalǝia, yi mǝnana yia kat à dum nǝi ka?”
24Yesu earia wia ama:
Ɓwarkio ma'wun ngga nda mǝnana ama wu surǝ Malǝmce andǝ rǝcandǝa mala Ɓakuli ɗang. 25A pwari lo mala alú a ɓembe ka, alban pà kàm ɗang. Aɓwana nǝ̀ do kǝla amǝturonjar a kuli. 26Sǝ amur cau mala lo mala alú ka, wu ɓal mbo aɓa malǝmce mala Musa, amur mǝ'ndanggun mǝnana kǝ earki bǝsa ka? Nda anzǝm mǝnana a Ibǝrayim andǝ Ishaku andǝ Yakupu wukina, sǝ apǝlǝkia pas yi kutikina ka, sǝ Ɓakuli yi bangcau nǝ Musa ama, “Mǝ nda Ɓakuli mala Ibǝrayim, andǝ Ɓakuli mala Ishaku, andǝ Ɓakuli mala Yakupu.”#12:26 Ɓalli gbal aɓa: Pur 3:6. 27Mǝnia ka lǝmndǝ ama yì ka, Ɓakuli mala alú na ɗang; mala aɓwana mǝnana nǝ yilǝmu ka nda. Wun ngga, wu ɓwarki kǝrkǝr!
Nzongcau mǝgule kat
(Matiu 22:34-40; Luka 10:25-28)
28 # 12:28 Ɓalli gbal aɓa:
Luk 10:25-28
.Ɓe malǝm Nggurcau mala Musa na aban came abani kǝ ok cau mǝno amǝ Saduki kǝ makgir amuri andǝ Yesu ka. Lang sǝni Yesu nyesǝnia wia cau pepe ka, pǝlǝa ɗi Yesu ama, “Aɓalǝ anzongcau kat ka, mǝyani na kuti aɓea kat?”
29Yesu eare ama, “Mǝgule mǝnana kutiban kat ka nda mǝnia ka: ‘Wu kwaki kir wun, wun amǝ Isǝrayila, Mǝtalabangŋo Ɓakuli ma'sǝm ngga, nda mwashat. 30Earce Mǝtalabangŋo Ɓakuli mo nǝ ɓabumo kat, andǝ yilǝmo kat, andǝ ɗenyicau mo kat, andǝ rǝcandǝa mo kat.’#12:30 Ɓalli gbal aɓa: Nggur 6:4,5. 31Ɓaria nda mǝnia: ‘Earce ɓeo mǝ'murkala kǝla mǝnana a earce ɓamuro ka.’ Kǝ ɓe nzongcau pà kàm kuti amǝnia ka ɗang.”#12:31 Ɓalli gbal aɓa: Pǝris 19:18.
32Malǝm Nggurcau mala Musa eari Yesu ama, “Kǝ ndo a bangŋi ka, Malǝm! A ɓwarki ɗang, yi mana a na ama, Ɓakuli ka nda mwashat, kǝ ɓe pà kàm ɗang. Kǝ Yì na nǝmurǝì.#12:32 Ɓalli gbal aɓa: Nggur 4:35,36. 33Ɓǝ̀ ǝn earce nǝ ɓabumam kat, nǝ sǝlǝe mem kat, nǝ rǝcandǝa mem kat, sǝ ɓǝ̀ ǝn earce ɓiam mǝ'murkala kǝla mǝnana ǝn earce ɓamuram ngga. Mǝnia ka kǝ pwasǝ bum Ɓakuli kuti pāki aɓoro mala pisǝki agir andǝ pa agir nkila.”#12:33 Ɓalli gbal aɓa: Hos 6:6.
34Lang Yesu sǝni ɓwabure nyesǝna cau aɓa sǝlǝe ka, pǝlǝa ne wi ama, “We ka, a pa kuko nǝ ban domurǝm mala Ɓakuli ɗang.”
Anzǝm mǝno ka, kǝɓwa nyare ɗi ɓe kǝ cau ɗang.
Yesu Kǝrǝsti ka muna mala yana?
(Matiu 22:41-46; Luka 20:41-44)
35Lang Yesu na aban kanigir a Ndàmǝgule mala Ɓakuli ka, ɗiban ama, “Palang sǝ amalǝm Nggurcau mala Musa kǝ bangŋa ama Kǝrǝsti ka muna mala Dauda#12:35 muna mala Dauda: Ko “Mǝkà Dauda.” na? 36Dauda nǝ nggearǝì ka, na cau aɓa Bangŋo Mǝfele ama:
“Mǝtalabangŋo ne
Mǝtalem ama,
‘Do a buno gulo,
ata buam mǝli
she ɓǝ̀ ǝn nyesǝna aɓeo
amǝbura a ɓakusǝo ka.’ # 12:36 Ɓalli gbal aɓa:
Ang 110:1
.
37 Yi mǝnana Dauda nǝ ɓamuri tunǝ Kǝrǝsti ama, ‘Mǝtalabangŋo’ ka, lang sǝ Kǝrǝsti nǝ̀ duk muni?”
Ɓwabunda kwaki kiria a rǝì nǝ banɓoarnado.
Yesu pusǝta amǝkani Nggurcau mala Musa
(Matiu 23:1-36; Luka 11:37-54; Luka 20:45-47)
38Yesu aɓa kanigir male ka, nea wia ama:
Wu parkir wun arǝ amǝkani Nggurcau mala Musa! Acemǝnana yia ka, à earce gya aɓalǝ anggea daura aban ak makkun aɓa limo. 39Yia ka, à kǝ earce ban-do mǝɓoarne aɓalǝ andakpapi andǝ aban-pakiɗire. 40Yia na à kǝ ɓǝmbǝri aman-lú arǝ agirkuma malea, sǝ à nǝ̀ ɓosǝki aɓwana nǝ pakki ahiwi mǝsauwe mala lǝmndǝ ɓamuria ama yia ka amǝ fele na. Ace mǝno ka ɓashi malea nǝ̀ gul kǝrkǝr.
Pa ɓoro mala ɓe man-lú
(Luka 21:1-4)
41Yesu na aɓa Ndàmǝgule mala Ɓakuli, do nǝ ban mana à kǝ turki boalo kam ngga. Mǝsǝì ueo arǝ ɓwapǝndǝa mǝnana kǝ turki boalo aɓa kwar ak boalo ka. Amǝkume pas turki aboalo kpǝm. 42Ɓe mǝtǝr man-lú yiu yi tsǝk anini ɓari, mǝnana bwalta kwapo mwashat raka. 43Yesu tunǝ alaggana male abani, sǝ nea wia ama, “Ən nggǝ na wun ɓafo, mǝnia yì man-lú mǝtǝr man ngga, nda tur gir mana kuti ban kat aɓa kwar ak boalo ka. 44Acemǝnana acili aɓwana kat ka, à tù nǝ tú aɓa kume malea, sǝ yì ka, kǝgir mana ueo nǝ̀ linali nǝi ka, nda yi turi kat ka.”
Currently Selected:
Markus 12: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
