Luk 9
9
Yisa poorpoweiteeb piik nan bannlee tumu labaar
(Matiu 10.5-15; Mak 6.7-13)
1Li poorpo ki Yisa din tan yiin u poorpoweiteeb piik nan bannlee na ki lakimm, ki turib yent nan paŋ nba ki bi sii nyint narinbiit nba kur be niib ni, ki bia te ki baatib paak, 2ki ji din te ki bi yat a bii lin kii mɔɔntir Yennu naan po, ki bia te ki baatib paak; 3ŋaan betib a “I daa jikit siar ki saa nanni; i daa dia patii, amii miat-ŋmanii, amii jeet, amii likirii, amii liata ŋannlelee. 4Ŋaak nba ki i sa kɔɔ, yin biar leŋ nan ya tan sa nyi doo maŋ ni. 5Siaminba kur ki niib ki tooki nan parpeenni, yoo nba ki i nyi doo maŋ ni, yin pit i taapant ni tant bir li doo ni, ki lin wannib nan bi mɔk biite.”
6Ŋanne ki u poorpoweiteeb na din nyii ki lin digbanbis kur ki mɔɔntir Yennu barŋanii, ki bia te ki baatib paak siar kur po.
Herod yanŋmatu
(Matiu 14.1-12; Mak 6.14-29)
7Ki Galilee batsaakɔɔ Herod din tan gbat labaar nba din tun na kur, ki li ŋmat u yan ni, kimaan yemm din yaa a Jɔɔnn daan fiir kuun ni, 8ki siab yaa a yaayoo ni sɔkinii Elaijae dɔkit, ki leeb mun yaa a yaayoo ni sɔkiniinba yenɔe fiir kuun ni; 9ki Herod yet a “N daan te ki bi pot Jɔɔnn yura, ŋaan ŋmee ki n jin gbia u po na muni?” Ki u ji din koor li yoo na a wun la Yisa.
Yisa nba dinn jab tusa ŋaŋŋmu biaŋinba
(Matiu 14.13-21; Mak 6.30-44; Jɔɔnn 6.1-14)
10Li poorpoe ki toomiinba maŋ din tan jen ki bet Yisa linba ki bi daan saan saa tun. Ki u ji din jiib ki bi saan dosau nba ki bi yi Betsaida, bi kuukɔɔ. 11Ki nibur na nba din gbat nna maŋ, ki bi wei Yisa ki saan. Wa din tan lab ki bi baat yoonba ki u tookib nan parpeenn, ki wannib Yennu naan po, ki bia te ki binba loon paaku na paak.
12Yoo nba ki yennu din tan maakit na, ki u poorpoweiteeb piik nan bannlee na baar u boor ki tan yetɔ a “Ŋaant ki nibur na-n saan doi nan digbanbis nba kpia na ni ki la jeet nan dɔɔnboor, kimaan nna na tee muuk nie.” 13Ki u jiin betib a “I mɔŋ-n turib jeet ki bin di.” Ki bi yetɔ a “Ti ki mɔk siar ki pukin boroboro kuna ŋaŋŋmu nan janii ŋannlee na po, nɔkira ki ti saan saa daa jeet ki tan dinn nibur na kur.” 14(Jab nba din be leŋ na din tee kaman nan tusa ŋaŋŋmu.)
Ki u bet u poorpoweiteeb a “Ŋaant ki niib na-n bɔkit kar piiŋŋmuŋmu.”
15Ki u poorpoweiteeb ŋaan ki bi kur bɔkit kar kar. 16Ki u jii boroboro kuna ŋaŋŋmu nan janii ŋannlee na, ŋaan yaat got sanpaapo, ki tur Yennu niipoouk jeet na paak, ki ji din ŋmit ŋmit ki teen u poorpoweiteeb na a bii toor nibur na. 17Ki bi kur dii ki gboo. Ki u poorpoweiteeb lakin jeet nba ki niib na dii ki tan tenn na, ki li gbee kpanchubit piik nan ŋannlee.
Piita nba din pak barjaann biaŋinba
(Matiu 16.13-19; Mak 8.27-29)
18Sianyoo ki Yisa din mei Yennu u kuukɔɔ, ki u poorpoweiteeb mun din be u boor ni li yoo na; ki u boib a “Nibur na yaa a n tee ŋmee?”
19Ki bi jiin ki yetɔ a “Yemm yaa a tee Jɔɔnn wunba din wuur niib Yennu nyunwuru nae, ki leeb mun yaa a tee Elaija, ki siab mun yaa a yaayoo ni sɔkiniinba yenɔe tan fiir kuun ni.” 20Ki u boib a “Ki yimm ŋanin yaa a n tee ŋmee?”
Ki Piita jiin ki yetɔ a “Fine tee Masia wunba ki Yennu gannɔ na.”
Yisa nba pak u fardinu po biaŋinba
(Matiu 16.20-28; Mak 8.30–9.1)
21Ŋanne ki Yisa kpaamm nan ninmɔnn a bi daa beer sɔɔ labaar maŋi, 22ki bia yetib a “Li kpaa talas nan min nisaarik Bik-n di fara bonchiann; ki ti tiŋ ni saakab nan Yennu jiantu yudamm nan sennu wannteeb sa yêtin, ki bia kpima, ŋaan li daa ŋanntaa daar ki Yennu sa fiinin kuun ni.”
23Ŋanne ki u yet bi kur a “Wunba-i loon wun wein, see ki u likin u saaŋmaŋ ki jii u kuun dapunpunn daar kur kii waan, 24ŋaan wunba ki saak wun jii u manfoor ki turin, ŋɔɔe tan sa kɔŋ u manfoor, ŋaan wunba likin u saaŋmaŋ n paak, ŋɔɔe tan sa la u manfoor nan barmɔnii. 25Nirɔ-i la tingbouŋ na mɔkint kur, ŋaan biir u mɔŋ binbeŋ ki kɔŋ u manfoor, nyɔlantpoe ki u sa la? 26Wunba tiin fei ki jîin min nan n wannu na po, min nisaarik Bik-i taŋŋi jen nan n paŋ, nan n Baa Yennu paŋ, nan u malakanba paŋ, li yoo maŋ n tan sa tin fei nan man jii li daanɔ ki pukinɔ n niib niwa. 27Barmɔniie ki n yaa n beti na, siab be nna ki daa kan kpo see ki bi tan la Yennu naan baaru yoo sinsinn.”
Yisa gbanant lebitu labaar
(Matiu 17.1-8; Mak 9.2-8)
28Wa din pak nna ki gbenn maŋ, li poorpoe ki li teen kaman nan daa ŋanniin na, ki u jii Piita nan Jɔɔnn nan Jems, ki doo namm kunkonn paak a wun saa miar Yennu. 29Wa din mei Yennu na ki u numm po tan kpint, ki u tiat penn ki nyirik. 30Li yoo na ki jab bannlee nna lekit leŋ ki nyirii nan tiat nan gbanannyinyira. Jab maŋ din tee Moses nan Elaijae; 31ki bi din piak nan Yisa ki jikit saa u kuun po, nan biaŋinba ki u sa kpo Jerusalem ki tun Yennu loomm ki gbenn. 32Ŋaan gɔɔn din soor Piita nan u leeb bonchiann, ki bi gɔɔn ki tan kpir yerik ki fiir, ki la ki yentsaakar yent ki lint Yisa, ki bi bia la jab bannlee nba din see u boor nna. 33Jab maŋ nba din tan nyikit Yisa na, ki Piita yetɔ a “Chanbaa, li ŋan nan ta be nna na. Ti sa faa lanbont ŋanntaae, ki yenn-ii tee a yar, ki leer-ii tee Moses yar, ki leer mun-ii tee Elaija yar.” Piita nba din piak linba maŋ, u din gbia a u piake.
34Wa din daa piak nna maŋ, ki sanpagbann dɔkit ki tan piimm, ki jaŋmaanii din soor u poorpoweiteeb na nan sanpagbann nba dɔkit ki piimm na. 35Ki bi din gbat kunkɔr sanpagbann na ni, ki li yet a “N Bija wunba ki n gannɔ na. Gbiintir u mɔb man.” 36Kunkɔr na nba din pak gbenn yoonba, ki bi ji la ki Yisa kɔɔe biar see. Li poorpoe ki bi ji din biar ŋmin ki jikit saa linba ki bi la na po, ŋaan ki ki kumii sɔɔ labaar maŋ, ki li yoo tan gar.
Yisa nba nyinn narinbiiuk naasinbik ni biaŋinba
(Matiu 17.14-18; Mak 9.14-27)
37Li din tan yent ki Yisa nan u poorpoweiteeb nyii kunkonn na paak ki sik, ki niburchiauŋ din tookɔ. 38Ki jasɔɔ din be nibur na ni, ki din tan tian yiin Yisa a “Wanntɔɔ, n barimae, tan gotir n bija na; kimaan ŋɔɔe kpan tee n biyemmir, 39ki narinbiiuk tuu fiirɔ ki wun kpir yikin ki luu, ki u tabit, ki mɔsankunkouŋ nyi u mɔb ni, ki li ŋammit fiu ki gbiɔu ki tuu tan barikɔ waaminna, ŋaan ki ki nyikitɔ. 40Ŋaan ki n barin a poorpoweiteeb a bin nyinnɔ, ki bi gbar.”
41Ki Yisa gat yetib a “Yimm mɔtana niib nba kaa yada, ki bia ki waa Yennu fanu na, n sa yukir nani nlee ki di sukuru nani mantiki?” Ki u bia bet jɔɔ maŋ a “Baat nan a bija na.”
42Ki bik na nba din baat Yisa boor ni yoonba ki narinbiiuk na libirɔ nan tiŋ gbakit, ki u baa dɔɔ ki tabit. Li yoo maŋe ki Yisa tian narinbiiuk na paak, ki te ki bik na paak, ki jiiu ki tur u baa. 43Ŋanne ki li yaar lit niib na kur nan Yennu nba mɔk paŋ biaŋinba na.
Yisa nba ŋamm pak u kuun po biaŋinba
(Matiu 17.22-23; Mak 9.30-32)
Li daa din bakit nibur na nan wa tuun biaŋinba kur na paak, ki Yisa ŋmat bet u poorpoweiteeb na a 44“Lootir i tuba man ki gbat fanu linba ki n yaa n pak ki turi na; bi tan sa jii min nisaarik Bik ki kubinin niib nuu ni.” 45Ŋaan bi lek din ki bann li paaki, kimaan Yennu din dɔkin bi yame a bi daa banti; ki bi bia tiin jaŋmaanii nan bin boiɔ li maan paak.
Ŋmee tee nijaanni?
(Matiu 18.1-5; Mak 9.33-37)
46Li poorpoe ki mɔniɔk din tan baar u poorpoweiteeb na sinsuuk ni, ki bi nɔi ki yaa a “Ŋmee tee saakɔɔ?” 47Ki Yisa bann ba dukii biaŋinba. Li paak ki u jii bik nna ki sennɔ u numm ni, 48ŋaan betib a “Wunba gaar bik nba na n sann paak, u gaar mine; ki wunba mun sak ki gaar min, u gaar wunba tumin nee mun biak; ŋaan wunba mun tee tarik i ni, ŋɔɔe tee nijaann ki gar i kura.”
Wunba ki kɔn naniini, u see i poore
(Mak 9.38-40)
49Ŋanne ki Jɔɔnn din betɔ a “Chanbaa, ti daan la ki jasɔɔ mun taan a sann ki nyint narinbiit niib ni, ki ti betɔ a wun nyik, kimaan u ki tee ti ni yenɔ.”
50Ki Yisa betɔ, “I daa beerɔ mani, kimaan wunba kur ki kɔn naniini, u see i poore.”
Samaria digbanbik niib nba yêt Yisa biaŋinba
51Tɔn, yoo nba ki li din tan per nan Yisa-n do Yendɔuŋ ni, ki u din tan faa par ki soor sɔnu a wun saan Jerusalem, 52ŋaan tur mɔb ki gaan a bin gar ki saa yet a u be sɔnu, ki bin teen siir ki sɔɔ ki u baar, ki bi dɔŋ gar ki saan ki saa baar Samaria niib digbanbik nna ni; 53ki leŋ niib na din ki sak u baaru maŋi, kimaan bi din mi nan u saa Jerusaleme. 54Ki u poorpoweiteeb Jems nan Jɔɔnn nba gbat nna maŋ ki bi boiɔ a “Ti Yomdaanɔ, a loon ki ti te ki muu-n nyi sanpaapo ki sik di biiribii?”
55Ki Yisa jiant gaar jat bi paak a bin nyika. 56Ki bi nyik, ŋaan saan digbanleer po.
Binba loon Yisa weiu labaar
(Matiu 8.19-22)
57Yoo nba ki bi din saa maŋ ki jasɔɔ tan yet Yisa a “N sa weia siaminba kur po ki a saa.”
58Ki Yisa yetɔ a “Lunlona mɔk fɔrii, ki nɔɔnii mun bia mɔk tiat, ŋaan min nisaarik Bik ki mɔk dundɔɔnboori.”
59Ki u bia tan yet jalɔɔ a “I waan.” Ki jɔɔ maŋ betɔ a “N Yomdaanɔ, ŋaant ki n saan ki saa pii n baa sinsinna.”
60Ki Yisa jiin betɔ a “Ŋaant ki kpeemm-ii pii bi kpeenleeb. Fin, i saawa kii sai mɔɔntir niib Yennu naan po.”
61Ki lɔɔ mun yetɔ a “N Yomdaanɔ, n sa weiawa, ŋaan ŋaant ki n kun ki saa chab n ŋaateeb sinsinna ki fit lian weia.”
62Ki Yisa betɔ a “Sɔɔ kan fit dia naasɔk ki ko ŋaan gorii poor po. Li-i tee wunba gorii nna maŋ, u ki ŋan nan Yennu naan toontumu.”
Currently Selected:
Luk 9: BIM
Highlight
Share
Copy
Want to have your highlights saved across all your devices? Sign up or sign in
Luk 9
9
Yisa poorpoweiteeb piik nan bannlee tumu labaar
(Matiu 10.5-15; Mak 6.7-13)
1Li poorpo ki Yisa din tan yiin u poorpoweiteeb piik nan bannlee na ki lakimm, ki turib yent nan paŋ nba ki bi sii nyint narinbiit nba kur be niib ni, ki bia te ki baatib paak, 2ki ji din te ki bi yat a bii lin kii mɔɔntir Yennu naan po, ki bia te ki baatib paak; 3ŋaan betib a “I daa jikit siar ki saa nanni; i daa dia patii, amii miat-ŋmanii, amii jeet, amii likirii, amii liata ŋannlelee. 4Ŋaak nba ki i sa kɔɔ, yin biar leŋ nan ya tan sa nyi doo maŋ ni. 5Siaminba kur ki niib ki tooki nan parpeenni, yoo nba ki i nyi doo maŋ ni, yin pit i taapant ni tant bir li doo ni, ki lin wannib nan bi mɔk biite.”
6Ŋanne ki u poorpoweiteeb na din nyii ki lin digbanbis kur ki mɔɔntir Yennu barŋanii, ki bia te ki baatib paak siar kur po.
Herod yanŋmatu
(Matiu 14.1-12; Mak 6.14-29)
7Ki Galilee batsaakɔɔ Herod din tan gbat labaar nba din tun na kur, ki li ŋmat u yan ni, kimaan yemm din yaa a Jɔɔnn daan fiir kuun ni, 8ki siab yaa a yaayoo ni sɔkinii Elaijae dɔkit, ki leeb mun yaa a yaayoo ni sɔkiniinba yenɔe fiir kuun ni; 9ki Herod yet a “N daan te ki bi pot Jɔɔnn yura, ŋaan ŋmee ki n jin gbia u po na muni?” Ki u ji din koor li yoo na a wun la Yisa.
Yisa nba dinn jab tusa ŋaŋŋmu biaŋinba
(Matiu 14.13-21; Mak 6.30-44; Jɔɔnn 6.1-14)
10Li poorpoe ki toomiinba maŋ din tan jen ki bet Yisa linba ki bi daan saan saa tun. Ki u ji din jiib ki bi saan dosau nba ki bi yi Betsaida, bi kuukɔɔ. 11Ki nibur na nba din gbat nna maŋ, ki bi wei Yisa ki saan. Wa din tan lab ki bi baat yoonba ki u tookib nan parpeenn, ki wannib Yennu naan po, ki bia te ki binba loon paaku na paak.
12Yoo nba ki yennu din tan maakit na, ki u poorpoweiteeb piik nan bannlee na baar u boor ki tan yetɔ a “Ŋaant ki nibur na-n saan doi nan digbanbis nba kpia na ni ki la jeet nan dɔɔnboor, kimaan nna na tee muuk nie.” 13Ki u jiin betib a “I mɔŋ-n turib jeet ki bin di.” Ki bi yetɔ a “Ti ki mɔk siar ki pukin boroboro kuna ŋaŋŋmu nan janii ŋannlee na po, nɔkira ki ti saan saa daa jeet ki tan dinn nibur na kur.” 14(Jab nba din be leŋ na din tee kaman nan tusa ŋaŋŋmu.)
Ki u bet u poorpoweiteeb a “Ŋaant ki niib na-n bɔkit kar piiŋŋmuŋmu.”
15Ki u poorpoweiteeb ŋaan ki bi kur bɔkit kar kar. 16Ki u jii boroboro kuna ŋaŋŋmu nan janii ŋannlee na, ŋaan yaat got sanpaapo, ki tur Yennu niipoouk jeet na paak, ki ji din ŋmit ŋmit ki teen u poorpoweiteeb na a bii toor nibur na. 17Ki bi kur dii ki gboo. Ki u poorpoweiteeb lakin jeet nba ki niib na dii ki tan tenn na, ki li gbee kpanchubit piik nan ŋannlee.
Piita nba din pak barjaann biaŋinba
(Matiu 16.13-19; Mak 8.27-29)
18Sianyoo ki Yisa din mei Yennu u kuukɔɔ, ki u poorpoweiteeb mun din be u boor ni li yoo na; ki u boib a “Nibur na yaa a n tee ŋmee?”
19Ki bi jiin ki yetɔ a “Yemm yaa a tee Jɔɔnn wunba din wuur niib Yennu nyunwuru nae, ki leeb mun yaa a tee Elaija, ki siab mun yaa a yaayoo ni sɔkiniinba yenɔe tan fiir kuun ni.” 20Ki u boib a “Ki yimm ŋanin yaa a n tee ŋmee?”
Ki Piita jiin ki yetɔ a “Fine tee Masia wunba ki Yennu gannɔ na.”
Yisa nba pak u fardinu po biaŋinba
(Matiu 16.20-28; Mak 8.30–9.1)
21Ŋanne ki Yisa kpaamm nan ninmɔnn a bi daa beer sɔɔ labaar maŋi, 22ki bia yetib a “Li kpaa talas nan min nisaarik Bik-n di fara bonchiann; ki ti tiŋ ni saakab nan Yennu jiantu yudamm nan sennu wannteeb sa yêtin, ki bia kpima, ŋaan li daa ŋanntaa daar ki Yennu sa fiinin kuun ni.”
23Ŋanne ki u yet bi kur a “Wunba-i loon wun wein, see ki u likin u saaŋmaŋ ki jii u kuun dapunpunn daar kur kii waan, 24ŋaan wunba ki saak wun jii u manfoor ki turin, ŋɔɔe tan sa kɔŋ u manfoor, ŋaan wunba likin u saaŋmaŋ n paak, ŋɔɔe tan sa la u manfoor nan barmɔnii. 25Nirɔ-i la tingbouŋ na mɔkint kur, ŋaan biir u mɔŋ binbeŋ ki kɔŋ u manfoor, nyɔlantpoe ki u sa la? 26Wunba tiin fei ki jîin min nan n wannu na po, min nisaarik Bik-i taŋŋi jen nan n paŋ, nan n Baa Yennu paŋ, nan u malakanba paŋ, li yoo maŋ n tan sa tin fei nan man jii li daanɔ ki pukinɔ n niib niwa. 27Barmɔniie ki n yaa n beti na, siab be nna ki daa kan kpo see ki bi tan la Yennu naan baaru yoo sinsinn.”
Yisa gbanant lebitu labaar
(Matiu 17.1-8; Mak 9.2-8)
28Wa din pak nna ki gbenn maŋ, li poorpoe ki li teen kaman nan daa ŋanniin na, ki u jii Piita nan Jɔɔnn nan Jems, ki doo namm kunkonn paak a wun saa miar Yennu. 29Wa din mei Yennu na ki u numm po tan kpint, ki u tiat penn ki nyirik. 30Li yoo na ki jab bannlee nna lekit leŋ ki nyirii nan tiat nan gbanannyinyira. Jab maŋ din tee Moses nan Elaijae; 31ki bi din piak nan Yisa ki jikit saa u kuun po, nan biaŋinba ki u sa kpo Jerusalem ki tun Yennu loomm ki gbenn. 32Ŋaan gɔɔn din soor Piita nan u leeb bonchiann, ki bi gɔɔn ki tan kpir yerik ki fiir, ki la ki yentsaakar yent ki lint Yisa, ki bi bia la jab bannlee nba din see u boor nna. 33Jab maŋ nba din tan nyikit Yisa na, ki Piita yetɔ a “Chanbaa, li ŋan nan ta be nna na. Ti sa faa lanbont ŋanntaae, ki yenn-ii tee a yar, ki leer-ii tee Moses yar, ki leer mun-ii tee Elaija yar.” Piita nba din piak linba maŋ, u din gbia a u piake.
34Wa din daa piak nna maŋ, ki sanpagbann dɔkit ki tan piimm, ki jaŋmaanii din soor u poorpoweiteeb na nan sanpagbann nba dɔkit ki piimm na. 35Ki bi din gbat kunkɔr sanpagbann na ni, ki li yet a “N Bija wunba ki n gannɔ na. Gbiintir u mɔb man.” 36Kunkɔr na nba din pak gbenn yoonba, ki bi ji la ki Yisa kɔɔe biar see. Li poorpoe ki bi ji din biar ŋmin ki jikit saa linba ki bi la na po, ŋaan ki ki kumii sɔɔ labaar maŋ, ki li yoo tan gar.
Yisa nba nyinn narinbiiuk naasinbik ni biaŋinba
(Matiu 17.14-18; Mak 9.14-27)
37Li din tan yent ki Yisa nan u poorpoweiteeb nyii kunkonn na paak ki sik, ki niburchiauŋ din tookɔ. 38Ki jasɔɔ din be nibur na ni, ki din tan tian yiin Yisa a “Wanntɔɔ, n barimae, tan gotir n bija na; kimaan ŋɔɔe kpan tee n biyemmir, 39ki narinbiiuk tuu fiirɔ ki wun kpir yikin ki luu, ki u tabit, ki mɔsankunkouŋ nyi u mɔb ni, ki li ŋammit fiu ki gbiɔu ki tuu tan barikɔ waaminna, ŋaan ki ki nyikitɔ. 40Ŋaan ki n barin a poorpoweiteeb a bin nyinnɔ, ki bi gbar.”
41Ki Yisa gat yetib a “Yimm mɔtana niib nba kaa yada, ki bia ki waa Yennu fanu na, n sa yukir nani nlee ki di sukuru nani mantiki?” Ki u bia bet jɔɔ maŋ a “Baat nan a bija na.”
42Ki bik na nba din baat Yisa boor ni yoonba ki narinbiiuk na libirɔ nan tiŋ gbakit, ki u baa dɔɔ ki tabit. Li yoo maŋe ki Yisa tian narinbiiuk na paak, ki te ki bik na paak, ki jiiu ki tur u baa. 43Ŋanne ki li yaar lit niib na kur nan Yennu nba mɔk paŋ biaŋinba na.
Yisa nba ŋamm pak u kuun po biaŋinba
(Matiu 17.22-23; Mak 9.30-32)
Li daa din bakit nibur na nan wa tuun biaŋinba kur na paak, ki Yisa ŋmat bet u poorpoweiteeb na a 44“Lootir i tuba man ki gbat fanu linba ki n yaa n pak ki turi na; bi tan sa jii min nisaarik Bik ki kubinin niib nuu ni.” 45Ŋaan bi lek din ki bann li paaki, kimaan Yennu din dɔkin bi yame a bi daa banti; ki bi bia tiin jaŋmaanii nan bin boiɔ li maan paak.
Ŋmee tee nijaanni?
(Matiu 18.1-5; Mak 9.33-37)
46Li poorpoe ki mɔniɔk din tan baar u poorpoweiteeb na sinsuuk ni, ki bi nɔi ki yaa a “Ŋmee tee saakɔɔ?” 47Ki Yisa bann ba dukii biaŋinba. Li paak ki u jii bik nna ki sennɔ u numm ni, 48ŋaan betib a “Wunba gaar bik nba na n sann paak, u gaar mine; ki wunba mun sak ki gaar min, u gaar wunba tumin nee mun biak; ŋaan wunba mun tee tarik i ni, ŋɔɔe tee nijaann ki gar i kura.”
Wunba ki kɔn naniini, u see i poore
(Mak 9.38-40)
49Ŋanne ki Jɔɔnn din betɔ a “Chanbaa, ti daan la ki jasɔɔ mun taan a sann ki nyint narinbiit niib ni, ki ti betɔ a wun nyik, kimaan u ki tee ti ni yenɔ.”
50Ki Yisa betɔ, “I daa beerɔ mani, kimaan wunba kur ki kɔn naniini, u see i poore.”
Samaria digbanbik niib nba yêt Yisa biaŋinba
51Tɔn, yoo nba ki li din tan per nan Yisa-n do Yendɔuŋ ni, ki u din tan faa par ki soor sɔnu a wun saan Jerusalem, 52ŋaan tur mɔb ki gaan a bin gar ki saa yet a u be sɔnu, ki bin teen siir ki sɔɔ ki u baar, ki bi dɔŋ gar ki saan ki saa baar Samaria niib digbanbik nna ni; 53ki leŋ niib na din ki sak u baaru maŋi, kimaan bi din mi nan u saa Jerusaleme. 54Ki u poorpoweiteeb Jems nan Jɔɔnn nba gbat nna maŋ ki bi boiɔ a “Ti Yomdaanɔ, a loon ki ti te ki muu-n nyi sanpaapo ki sik di biiribii?”
55Ki Yisa jiant gaar jat bi paak a bin nyika. 56Ki bi nyik, ŋaan saan digbanleer po.
Binba loon Yisa weiu labaar
(Matiu 8.19-22)
57Yoo nba ki bi din saa maŋ ki jasɔɔ tan yet Yisa a “N sa weia siaminba kur po ki a saa.”
58Ki Yisa yetɔ a “Lunlona mɔk fɔrii, ki nɔɔnii mun bia mɔk tiat, ŋaan min nisaarik Bik ki mɔk dundɔɔnboori.”
59Ki u bia tan yet jalɔɔ a “I waan.” Ki jɔɔ maŋ betɔ a “N Yomdaanɔ, ŋaant ki n saan ki saa pii n baa sinsinna.”
60Ki Yisa jiin betɔ a “Ŋaant ki kpeemm-ii pii bi kpeenleeb. Fin, i saawa kii sai mɔɔntir niib Yennu naan po.”
61Ki lɔɔ mun yetɔ a “N Yomdaanɔ, n sa weiawa, ŋaan ŋaant ki n kun ki saa chab n ŋaateeb sinsinna ki fit lian weia.”
62Ki Yisa betɔ a “Sɔɔ kan fit dia naasɔk ki ko ŋaan gorii poor po. Li-i tee wunba gorii nna maŋ, u ki ŋan nan Yennu naan toontumu.”
Currently Selected:
:
Highlight
Share
Copy
Want to have your highlights saved across all your devices? Sign up or sign in