Senesis 11
11
Mukave selusien keil umai avi houlu
Sen 11:1-9
1En avong mulamu, meatin vasi keil ten out netan aselus en selusien tas. 2Ka navong umai avi houlu vis avi houlu mok, amual en out koa ist. Amual va vio … ales mari out tai koa vi aet koa mul en mari atan koa avise en ‘Saenar.’ Keil amundemi avit tahos keke avato ien. 3Evus, keil aviteni min keil eris avit, “!Almai! Tahos keke rehoumon brikis en tanvili koanik ka rehetan keil en avul tai hemai hekeih.” Sakini, keil amumon eim keil one en brikis keil enek ka akapil vituaini en koltar. 4Amumoni evus, ka aviteni avit, “Almai, rehoumon mari meteimal tai hetal min mari eim tai koa vahina nesa vatokol teilang. Koanek hesakin ir rehertasiltei ka meatin sav keil ilonglong en iser.”
5 Evus, Iahova mita netan ka les mari meteimal ka mari eim koa vina nesa koa keil amumoni. 6Navong lesi viteni vit, “Telmali, meatin keil eke amul amumon marmari tounah. Keil amum out tas ka selusien one tas. Koanek vi vatte ten umen one. Ka hervitei tuetin, keil ilea um vasi asa koa iling rendemien one eni. 7Mukonek, tovahita netan ka tovahilehiles selusien one vasakin keil irlong kileatei keil eris.” 8Sakini, Iahova riti rasilin meatin keil en out netan avaha, ka armum vasitei mari meteimal enek. 9Sakini, avise mari meteimal enek en ‘Babilon’ koa aneite teni vi ‘vilehiles’ veni en out enek, Iahova vilehiles selusien onen meatin vasi keil ka riti rasilin keil vasi en out netan.
Meatin keil arasil aro en out sav keil va vio … meatin tai avasi en vatiamal onen Sem, natin Noah, isen Ebram.
Currently Selected:
Senesis 11: pma
Highlight
Share
Copy
Want to have your highlights saved across all your devices? Sign up or sign in
Copyright © 2011 Wycliffe Bible Translators, Inc.
