Johan 1

Hing saite älo

1Angcü-a ma älo awng. Honi älo lä Säthaw hai mangtä awng te vi. Honi älo la Säthaw äma vi dy. 2Älo lä angcü-a Säthaw hai mangtä awng vi. 3Pä-ai lä älo hai-a äte angxynlyng na bung sa. Pä-ai lä äni hai y käla äte haetä lä sa te awng y. 4Sa saite angxynlyng na lä älo hai-a hing te dang. Honi hing saite lä khimi ce tähang kaevang vi. 5Honi kaevang lä käving thung-a aevang ea käving ma lä honi kaevang bung manila bädü haw y vi.

6Säthaw lä Baptismae Johan näsaite bung mätaw pa dy. 7Äni lä khimi ce tea kaevang phüng ätete lo thui hethang ly te vi. Khimi angxynlyng na thai kha yng hethang tähang ly te vi. 8Johan lä kaevang y. Kaevang phüng ätete lo thui hethang ly te kae. 9Kaevang tätang lä älawngpre-a ly kha khimi angxynlyng na qawng-a aevang dy.

10Äni lä älawng-a awng kha Pä-ai lä älawng bung äni hai-a sa te vi. Tungaila älawng khimi na lä äni bung mäny y. 11Äni lä äma üng khö-a ly ea la äma khö üng khimi na ma lä mäkung pa y. 12Tungaila khimi phütä na lä äni bung mäkung kha äni tea yng ö dy. Äni ce bung Säthaw üng caw nade na-a aelawng hai pa dy. 13Honi nade na lä äthi ängang üng kängai-a aepeng te y. Khimi nawngmäcaw üng aely kängai kätyng aepeng te na y. Tukha Säthaw üng kängai-a aepeng te na vi.

14Älo lä khimi-a aelawng kha kai ce tea bälung aevaw te hai Säthaw üng bälung kähawi mitang khü-a mätü ea mä-ai hai mangtä awng. Kai ce lä äni üng phung-ang nung ö dy. Hini phung-ang lä Pä-ai Säthaw ma Cäpaw lawngtä xyng tea py saite phung-ang vi.

15Baptismae Johan ma äni üng phüng thui te la “Äni lä kai aepeng y te kälang-a awng pyng te phüng-a kai qawng-a lengky vi näkha thui rüng pa saite lä äni dy” näkha ätüng käleng hai-a a pa te vi dy.

16Äni mä-ai angxynlyng na tea bälung aevaw kha tähang kähawi py jawjaw vi dy. 17Säthaw lä Mosi te mang hai-a Ubädi lo py kha Säthaw üng bälung kähawi hai mitang khü lä Isu Khrista hai-a tyng dy. 18Ämi la Säthaw bung nung vai te y. Tungaila Pä-ai üng äteng-a awng saite Äcäpaw lawngtä xyng ma Säthaw bung khimi ce tea mäny hai pa te vi.

Baptismae Johan ma thui saite Isu üng phüng

Mat 3:1-12; Mar 1:1-8; Luk 3:1-18

19Jerusalem märü-a awng saite Judae mätawngky na ma lä mäthykung hai Levi na bung Baptismae Johan tea mätaw kha “Nang lä ämi mei” näkha düng hai pa.#1:19 Levi na lä Isrelae khi thung üng levi ceng haetä vi. Äni ce lä Säthaw Ingkäcai kälu säbawng saite na vi.

20Tukha Johan ma “Kai lä Mesia y lyng” näkha cüngpra-a thui pa.

21Äni ce ma “Nang lä ämi mei. Elijae mei” näkha düng pa be dy.

Tukha Johan ma “Kai lä Elijae y lyng” näkha näpa.

Äni ce ma tudylä “Nang lä buisaw mei” näkha düng pa ea,

“Kai lä buisaw la y lyng” näkha mäthang pa dy.

22Tukha äni ce ma “Nang lä ämi mei.” Kai ce bung mätaw saite tea thui haile hethang ngai vi. Nang ma üng phüng ätemakä thui te mei näkha düng pa.

23Johan ma lä buisaw Isaia thui te kätyng mäthang pa.

Kai lä daithung kärang-a a saite lawngtä üng ätüng vi.

“Areng üng lolang mäcai pa ö” näkha thui te kung lä kai dy.

24Johan tea mätaw saite phütä Pharisai na ma lä, 25“Nang lä Mesia la y vi, Elijae la y vi, buisaw la y vi nädylä ätephüng-a baptismae py te mei” näkha düng pa.

26Baptismae Johan ma “Kai lä tui hai baptismae py dy. Nang ce thung-a nang ma ce mäny y saite lawngtä awng vi. 27Honi lawngtä lä kai üng leithung-a tyng kha kai lä äni üng kho painai rui sö hethang mäteng ma aeteng y” näpa.

28Baptismae Johan ma baptismae py saite Jordan tävaw käni käse mang-a awng saite Bethani vang-a hini kätyng pharisai na Johan tea düng pa te vi.

Säthaw üng beram caw

29Khawngdang mang üng käni-a Isu lä äni te mang-a ly te nung kha Johan ma “Älawng khimi ce üng hunghö la pa saite Säthaw üng beram caw tea kheng ö e. 30‘Kai aepeng y te kälang-a ma awng pyng te phüng-a kai qawng-a lengky saite lä kai üng leithung-a tyng vi ai rawng’ näkha jangni-a thui rüng pa saite lä äni dy” näpa. 31Kai äni bung mae y. Tungaila Isrelae khimi na äni bung mäny hethang tähang-a kai lä khimi ce tea tui hai baptismae py pa hethang ly te vi näpa.

32Tupyng-a Baptismae Johan ma “Känipre mang üng Muilaw Käcai lä bähö kätyng aeja käthu ea äni qawng-a cu te kai lä nung vi dy. 33Kai la äni bung mae y. Tungaila tui hai baptismae py he mätaw saite Säthaw lä kai tea Muilaw Käcai aeja käthu kha khimi lawngtä üng qawng-a cu te lä nung ai mang. Äni lä Muilaw Käcai hai baptismae py ai” näkha thui pa. 34Hokä thui te kätyng kai lä nung te vi. Äni lä Säthaw üng Cäpaw vi näte kai lä thui te vi.

Angcü üng Isu üng äkähui na

35Khawngdang mang üng käni-a Baptismae Johan lä äkähui lawng netä hai mangtä honi mityng-a aedaw kha awng dy. 36Tukha Isu aeke te nung ea “Kheng kae-e, Säthaw üng beram caw ho” näkha näpa.

37Äkähui lawng netä la honi lo thai ea Isu leithung hui pa hawi dy.

38Tukha Isu lä aehawi kha änini hui hawi te nung ea “Nang ni lä äte ngai hawi te mei” näkha düng pa. Änini ma “Rabi ä, nang lä äte ma-a awng te vi mei” näkha düng hawi pa dy. Rabi näsaite älo lä särae näte vi.

39Isu ma “Ly kha kheng hawi e” näpa. Honi kätü lä kädüng naeri bälitä-a vi. Änini lä hui kha Isu awng saite mityng nung ea äni hai mangtä khöving te khytä awng hawi dy.

40Baptismae Johan üng älo thai ea Isu leithung hui saite lawng netä thung-a lawngtä lä Simon Peterae üng kangby Andru vi.

41Äni la äjä-ai Simon bung mäqang mang kha “Mesia hai kai ni aeting vi dy” näkha näpa. (Mesia näsaite älo lä “Khrista” näte vi.) 42Tupyng-a äni lä Simon bung Isu tea nähai pa.

Isu lä Simon tea kheng ea “Nang ämüng lä Johan üng cäpaw Simon. Tungaila ‘Kepha’ näkha ämüng mäthi vi ai” näpa. (Kepha lä Peterae näte dy.)#1:42 Kepha lä “Peterae” näte vi. Peterae näsaite älo lä kälung käleng näte vi.

Isu Philip ni Nathanela bung kähyng pa

43Kädang mang üng känitä-a lä Isu lä Kalile khö-a ly hethang bälung aedawng te vi. Philip hai aeting ea “Kai leithung hui” näpa. 44Philip la Andru ni Peterae kätyng Besaida märü üng khimi by vi. 45Philip la Nathanela hai aeting ea “Mosi üng Ubädi cae-u thung-a hai buisaw na ma la tärü kha thui rüng saite lawngtä bung kai ce lä aeting vi dy. Äni lä Nazare märü üng ly saite Josefae üng cäpaw Isu vi” näpa.

46Nathanela ma “Nazare märü üng ätete kähawi tho haw ai ae” näkha düng pa. Philip ma “Ly kha kheng by” näpa.

47Isu lä Nathanela ly te nung ea “Kaeling sa vai y saite Isrelae khimi mitang vi” näpa.

48Nathanela ma “Makä sa kha nang lä kai bung mäny te vi mei” näkha düng pa.

Isu ma “Philip nang bung ka y te kälang-a thaidö kung täkui-a awng ea ma kai lä nang bung nung te vi dy” näpa.

49Nathanela ma “Rabi ä, nang lä Säthaw üng Cäpaw, Isrelae na üng Sanphrang vi” näkha näpa.

50Isu ma “Thaidö kung täkui-a awng ea nang bung kai nung vi näte thui te phüng-a nang lä yng te mei. Hini qawng-a cang y cangxei saite na nang lä nung vi ai rawng” näpa. 51Isu ma äni ce tea “Tängai ba. Känipre aepä-awng kha Kai, Khimi üng Cäpaw qawng-a Säthaw üng angtawtha ma aerung paw te nung ö vi ai” näpa.

Currently Selected:

Johan 1: cekNT

Highlight

Copy