Johan 10
10
Beram rui saite Kung üng mätae te
1Isu ma “Tängai ö. Khimi lawngtä lä beram awng nae thung-a hawngkhae mang kung y käla mityng kälang mang kung dylä äni lä theru y dylä damarae kae. 2Hawngkhae mang kung saite khimi lä beram rui saite kung dy. 3Hawngkhae ty saite ma beram kärui kung na tähang hawngkhae pä-awng pa vi. Tukha beram na lä äni üng ätüng tängai ö vi. Äni lä äma üng beram na bung ämüng kähyng kha awng nae thung üng ärang-a mätho te vi. 4Ärang-a mätho pyng-a äma lä beram na ämaw-a mang ea beram na lä äni üng ätüng thai kha äni leithung hui ö te vi. 5Beram na lä khimi kälang leithung hui vai y. Ätephüng-a mei nädylä khimi kälang üng ätüng mäny y te phüng-a äni te üng aehui ö king vi ai” näpa.
6Isu ma hini mätae te hai äni ce tea thui ngaila äni ce lä thaikaw pa ö y.
Beram rui te Kung kähawiky Isu
7Tukha Isu ma “Tängai ö, Kai lä beram na kung saite hawngkhae vi. 8Kai üng ämaw-a tyng saite na lä theru hai damarae na kae vi. Beram na lä äni üng älo tängai y lyng. 9Kai lä hawngkhae vi. Honi hawngkhae mang kung saite na lä awng derui te dang ai. Äni ce lä kung hai tho hai ea, ca nei hethang käcakänei kähawi na dang ö vi ai” näpa. 10Theru lä bäru hethang bädü hethang hai täphra hethang ni ly te vi. Kai lä khimi ce hing hethang qaitä cang y, hing hai saite aequng bawi te dang hethang tähang ly te kae.
11Kai lä beram rui saite Kung kähawi vi. Beram rui saite Kung kähawi lä beram na tähang dü hethang awng rüng te vi. 12Vanglang saite khimi lä beram rui saite Kung y. Äni lä beram na bung pyng te y. Tukätephüng-a äni lä käsui tyng te nung ea beram na bung khaisö kha aehuija vi ai. Tukha käsui ma beram bung kei kha beram na lä aehui xhixae vi ai. 13Vanglang saite khimi lä phawisae ngai kha sa te phüng-a, beram na bung dawngcang y käla aehuija te vi. 14-15Kai lä beram rui saite Kung kähawi vi. Pä-ai lä Kai bung mäny kha Kai la Pä-ai bung mäny te kätyng Kai hai beram na la aemäny ö te vi. Kai lä beram na tähang dü hethang awng rüng te vi. 16Hini beram awng nae thung-a awng y saite beram na lä Kai pyng te vi rawng. Honi beram na lä Kai ma nähai vi ai. Äni ce la kai üng ätüng tängai ö vi ai. Tukha beram kanghö haetä hai rui te Kung lawngtä awng ai.
17“Kai lä hing saite dang haile hethang tähang-a kai lä dü hethang awng rüng te phüng-a Pä-ai lä Kai tea bälung aevaw vi. 18Kai ma üng aely hai y dylä ämi la Kai bung bädü haw y. Kai ma üng aely hai ea ni Kai bung bädü haw te kae. Kai lä Kai ma üng hing saite aepy he aenae awng te vi. Kai ma tea hing haile hethang aenae la awng. Hini kätyng sa hethang Pä-ai ma Kai tea py te vi dy” näkha näpa.
19Hini älo phüng-a Judae na lä bälung aedü ö y haile pa dy. 20Khimi phütä na ma “Äni lä angra kung kha kangthö vi. Ätephüng-a äni lo tea tängai ö te mei” näkha näpa.
21Tungaila khimi äkälang na ma “Angra kung saite lä hini kätyng thui haw y lyng. Angra kung saite lä ämi kangjö bung ämi aevang hai vi ai mei” näkha näpa.
Judae na lä Isu tea yng ö pa y
22Jerusalem märü-a Säthaw üng Ingkäcai ae-a te pawi lä tyng dy. Honi lä säding thüng-a vi. 23Isu lä Säthaw üng Ingkäcai baesung thung-a awng saite Solomon bakhung-a aeke kha awng dy. 24Tukha Judae khimi na lä Isu tea säveng ea “Nang lä kai ce tea kätüng khaw-a thui hethang majetä aering ai rawng mei. Nang lä Mesia dylä, kai ce tea cüngpra-a thui by ä,” näkha näpa.
25Isu ma “Nang ce tea kai thui pyng te vi dy. Tungaila nang ce lä yng ö y. Pä-ai üng ämüng hai Kai ätete sa saite kamarae na lä Kai tähang sasi na vi dy. 26Nang ce lä Kai üng beram na y te phüng-a Kai tea yng ö y. 27Kai üng beram na lä Kai üng ätüng tängai vi. Kai lä äni ce bung mäny kha äni ce la Kai leithung hui ö te vi. 28Kai ma äni ce tähang dungtäsa hing te py dy. Manila äni ce la dü y dy. Ämi la Kai kö thung üng äni ce bung lawng haw y lyng. 29Äni ce bung Kai tea a saite Pä-ai lä äte angxynlyng na qawng-a lengky. Ämi ma la beram na bung Pä-ai kö thung üng lawng haw y lyng. 30Pä-ai hai Kai lä bungtä kae vi” näkha näpa.
31Tukha Judae khimi na ma Isu tea käde hethang kälung aekhü haile ö dy. 32Isu ma “Pä-ai lä Kai tea kälu kähawi na awng mang-a sa hai te vi. Äte makäti na sa te phüng-a, nang ce lä Kai tea kälung hai käde hethang sa ö te mei” näkha düng pa.
33Äni ce ma “Nang kälu kähawi na sa te phüng-a, kälung hai käde hethang sa te y. Nang lä khimi by kae ea ma Säthaw müng aemäthi vi. Säthaw üng ämüng aengang te phüng-a kälung hai käde hethang sa te kae” näkha mäthang pa.
34Tukha Isu ma äni ce tea “Caekäcai thung-a ‘Säthaw ma thui te nang ce lä säthaw na vi’ näkha tärü te vi. 35Caekäcai-a thui te phüng na, tätang vi näte kai ce lä mäny vi. Säthaw ma äma üng lo angthang thai saite na tea säthaw na” näkha thui te vi. 36“Üngai ma Kai bung re kha älawngpre-a mätaw te vi. Tudylä kai lä Säthaw üng Cäpaw näkha thui te phüng-a, Kai lä Säthaw müng aengang te näkha nang ce lä ätephüng-a käsi prawng ö te mei. 37Kai lä Pä-ai üng kälu sa te y dylä yng ö y ma. 38Pä-ai üng kälu sa ö dylä Kai tea yng y ngaila Kai üng sa te kälu tea yng ö. Pä-ai lä Kai tea awng kha Kai la Pä-ai tea awng näte nang ce mäny ö ai mang” näkha mäthang pa.
39Tukha äni ce lä Isu bung ne hethang aethaw aesa ö haile dy. Tungaila Isu lä äni ce thung üng kangru-a ly ja pa vi.
40Tukha Isu lä angcü-a Baptismae Johan ma baptismae py saite Jordan tävaw rei mang-a ly kha honi mityng-a awng pa dy. 41Khimipui na Äni tea ly ö. Äni ce ma “Baptismae Johan lä äte cangxei te na sa vai te y. Tungaila hini Khimi üng phüng Johan ma thui saite angxynlyng lä tätang vi” näkha näpa. 42Tukha honi mityng-a khimipui na lä Isu tea yng ö vi dy.
Currently Selected:
Johan 10: cekNT
Highlight
Share
Copy
Want to have your highlights saved across all your devices? Sign up or sign in
© 2017, Bible Society of Myanmar and Wycliffe Bible Translators, Inc
