Johan 11

Lazarae dü te

1Lazarae näsaite khimi lawngtä lä naw kha awng. Äni hai äticaw Maeri ni Matha lä Bethani vang-a awng. 2Maeri lä Areng üng äkho-a, rimui tui kälo kha äsang hai mai pa saite nawngmädi vi. Naw saite Lazarae lä äni üng kangpraw vi. 3Tukha äticaw ni ma Isu tea “Areng ä, nang bälung aevaw saite Lazarae lä naw kha awng vi” näkha angthang thui pa.

4Isu lä honi angthang thai pyng-a “Honi känaw lä dü saite hai teng hethang y rawng. Säthaw üng phung-ang aetüng hai hethang naw te kae. Hokä naw saite hai-a, Säthaw lä Äcäpaw üng phung-ang mätü vi ai” näkha näpa.

5Isu lä Matha, Maeri ni Lazarae ce tea bälung aevaw te vi. 6Tungaila Lazarae naw te phüng thai ea, Isu lä honi mityng-a, käni netä awng pa te vi rawng. 7Tupyng-a lä Isu ma äma üng äkähui na tea “Judae khö-a ly ö si” näkha näpa.

8Äkähui na ma “Särae ä, Judae khimi na lä nang tea kälung hai käde hethang sa ö te lä qae y vi rawng. Honi mityng-a nang ly haile be vi ai rawng mei” näkha düng pa.

9Isu ma “Känitä-a naeri hawlai netä awng. Käni üng kaevang awng tea aeke saite khimi na lä äkho mäthui pha te awng y. Ätephüng-a mei nädylä, äni ce lä älawng üng khimi na tea kaevang py saite tea nung ö vi. 10Kärung thung-a aeke saite khimi na lä kaevang awng y te phüng-a, äkho mäthui pha ö vi ai” näkha näpa. 11Isu ma hini kätyng thui pyng ea “Mä-ai üng rawijae Lazarae lä i te vi. Äni bung i bälaw hethang, Kai ly ai rawng ba” näkha näpa.

12Äkähui na ma “Areng ä, äni lä i te kae dylä, naw te hawi haile vi ai mang” näpa.

13Isu ma Lazarae dü te phüng hini kätyng thui pa ea äkähui na lä Lazarae i tätang te phüng thui te käthi ö te vi. 14Tupyng-a Isu ma äni ce tea cüngpra-a “Lazarae lä dü vi dy. 15Tungaila honi mityng-a Kai awng y te lä nang ce tähang Kai lä anghawtho te vi. Ätephüng-a mei nädylä vaihi nang ce lä Kai tea yng tätang ö vi ai. Co, äni tea ly ö bawi si” näpa.

16Didamu näsaite Thawmae ma äkähui na tea “Mä-ai angxynlyng Särae hai mangtä ly ö si. Äni hai mangtä dü ö si” näkha näpa.

Isu lä Matha ni Maeri hai älo aepe

17Isu tyng saite kätü-a, Lazarae bung aevui khüng te lä käni bälitä awng pa vi dy. 18Bethani vang lä Jerusalem märü hai meng netä rytä hanglaw te vi. 19Judae khimi kä-awng mang na lä, Matha ni Maeri tea ly kha kangpraw dü te phüng-a bälung bädang pa ö dy.

20Matha lä Isu ly te thai kha lady hethang tho pa dy. Maeri lä ing-a aety kha awng pa te vi. 21Matha ma Isu tea “Areng ä, hini mityng-a nang awng kha lä kai üng kangpraw lä dü he y. 22Tungaila vaihi nang üng mäkai saite na lä Säthaw ma sa vi ai näte kai lä mäny vi” näpa.

23Isu ma äni tea “Nang üng kangpraw lä hing haile tyng vi ai mang” näkha näpa.

24Matha ma “Kangkhüng üng käni-a lä, khimi kädü na aetha tyng te kätü-a, äni la aetha haile tyng by ai näte kai mäny” näpa.

25Isu ma “Kai lä khimi ce bung hing hai kha mätha haile tyng saite Kung vi. Kai tea yng saite khimi na lä dü ngaila, hing haile tyng vi ai. 26Kai tea awng kha yng saite khimi na lä hing kha manila dü y ai dy. Kai üng lo nang lä yng cäkae mei” näkha düng pa.

27Matha ma “Üng, Areng ä, nang lä älawngpre-a cäqa saite Säthaw üng Cäpaw Mesia näte kai lä yng” näkha thui pa.

Isu ma minaw tui qa hai pa

28Matha lä hikä thui pyng-a, ing-a vawi kha äkangby Maeri bung kähyng ea “Särae ly dy. Nang bung la kähyng by” näkha thui pa. 29Hini lo thai kha Maeri lä aetha ea Isu tea ly dawde pa dy. 30Isu lä vang thung-a kung y käla ma, Matha hai aeting saite mityng-a, awng jaw pa vi rawng. 31Maeri tea bälung bädang pa hethang ing-a awng saite Judae khimi na ma, Maeri aetha dawde te nung ea lä, raw hethang täprawng-a ly te käthi ö vi. Tukha äni ce lä Maeri üng leithung hui ö dy.

32Maeri lä Isu awng saite mityng-a tyng pa dy. Äni lä Isu bung nung ea khokung-a bü kha “Areng ä, nang hini mityng-a awng ea kha lä kai üng kangpraw lä dü hethang y” näkha näpa.

33Isu lä Maeri hai mangtä ly saite Judae khimi na ma raw sung te nung ea lä bälung hawi pa y by vi dy. 34Äni ma “Äni üng äro bung nang ce ma-a aevui ö mei” näkha düng pa. Äni ce ma “Areng ly kha kheng kae-e” näpa.

35Isu lä minaw tui qa pa dy. 36Tukha Judae na ma “Kheng e, Isu lä Lazarae tea matangtä bälung aevaw te vi mei” näkha näpa.

37Tukha Judae khimi phütä na ma “Ämi kangjö khimi bung aevang hai pa saite hini Särae lä Lazarae tea äni dü y ea naw saite hawi rung khytä sa haw y vi mei” näpa ö.

Isu ma Lazarae bung mäning haile tyng pa

38Isu lä bälung hawi y haile te hai täprawng-a ly dy. Honi täprawng täpu khaw tea kälung hai qengtang pa vi. 39Isu ma “Kälung bung nui ö ja la” näpa.

Dü saite üng äticaw Matha ma “Areng ä, vaihi lä äro rawng te mui vi ai dy. Lazarae dü te lä käni bälitä awng te vi dy” näpa.

40Tukha Isu ma “Nang yng dylä, Säthaw üng phung-ang bung nung ai näte kai thui pyng te y mei” näkha näpa. 41Tukha khimi ce lä täprawng üng kälung mäthuija ö pa dy. Tupyng-a Isu lä käni mang-a dy kha “Pä-ai ä, kai üng älo nang tängai te phüng-a kawng bärai ba. 42Nang lä kai üng älo tängai jawjaw te kai mäny vi. Tungaila kai bung nang ma mätaw näte hini mityng-a, awng saite khimi na mäny hethang tähang-a, hini kätyng kai mäkai te vi” näpa. 43Tupyng-a Isu ma Lazarae tho lawi näkha ätüng käleng hai thui pa dy. 44Dü saite khimi lä äkö äkho-a, libyng aemeng bung te hai ämikhüng-a sipry aesäbang kha thopu pa dy. Isu ma khimi ce tea “Äni üng aemeng bung saite libyng na lang pa ö lawi, ing-a vawi lawi sy” näkha näpa.

Isu bung bädü hethang aeceng pa

Mat 26:1-5; Mar 14:1-2; Luk 22:1-2

45Maeri tea ly saite Judae khimi kä-awng mang na lä Isu sa saite nung kha äni tea yng ö dy. 46Tungaila Judae khimi phütä na ma, Pharisai na tea ly kha Isu sa saite phüng thui pa ö dy. 47Tupyng-a mäthykung käleng hai Pharisai na lä Sanhendrin kawngci-a aekäcö kha aedüng aethui ö dy. Äni ce ma “Hini khimi lä hi-a, cangxei saite kamarae na sa mang vi. Mä-ai lä ätemakä sa ö ai dy mei. 48Äni lä kamarae sa te mä-ai mäkhang y dylä khimi angxynlyng na lä, äni tea yng ö vi ai. Tupyng-a Rom aecörae mätawngky na ly kha Säthaw üng Ingkäcai hai, mä-ai ceng bung täphra vi ai to” näkha thui pa ö dy.

49Honi säning-a mäthykung kälengky Kaiafa näsaite khimi lawngtä lä awng vi. Äni ma “Nang ce lä äte la mäny ö y. 50Mä-ai ceng angxynlyng na dü te qawng-a lä, khimi ce tähang khimi lawngtä dü te lä hawiky näte nang ce lä mäny ö y mei” näkha näpa. 51Honi kätyng thui te lä äma üng kaw saite hai-a thui te y. Honi säning-a äni lä mäthykung kälengky vi. Tukha Isu lä Judae khimi na tähang-a dü pa ai mang näkha buisaw lo hai thui rüng pa te vi. 52Isu lä Judae khimi na qaitä tähang dü te y. Äni lä älawngpre-a awng xhixae saite Säthaw üng caw na angxynlyng na tähang dü pa vi ai. Tukä sa te hai-a äni bung kangkawng haetä-a awng hai vi ai.

53Honi käni üng hai aetawng kha äni ce lä Isu bung bädü hethang aeceng ö pa vi dy. 54Tukätephüng-a Isu lä Judae khö-a cüngpra-a ly pa y vi dy. Daithung kärang teng üng Epharim näsaite vang-a ly ea äkähui na hai mangtä awng.

55Judae khimi na üng Cäqengja saite pawi lä aenai pa dy. Tukätephüng-a vang-a awng saite khimi na lä reitae kätyng aemäcai ping hethang tähang pawi tyng y te kälang-a Jerusalem märü-a ly ö dy. 56Äni ce lä Isu bung mäqang ö dy. Äni ce lä Säthaw üng Ingkäcai baesung thung-a aedaw kha “Äni lä hini pawi-a ly ai mei. Nang ce lä makä aedawng ö mei” näkha äma ce tingtawi aedüng aethui ö dy. 57Mäthykung käleng na hai Pharisai na lä khimi lawng lawngtä ma Isu awng saite mityng mäny dylä äni bung ne haw hethang angthang aethai hai he kae näkha täru khi pa dy.

Currently Selected:

Johan 11: cekNT

Highlight

Copy