Johan 4

Isu ni Samari nawngmädi

1-3Isu lä Baptismae Johan qawng-a khimipui na bung äkähui-a bälawng kha baptismae py te phüng Pharisai na ma thai ö dy. Tungaila Isu lä khimi ce tea baptismae py tätang te y. Äkähui na ma ni baptismae py te kae. Khimi ce ma aeqa te lo Isu lä thai ea Judae khö üng tho kha Kalile khö-a vawi haile tyng vi dy. 4Isu lä Kalile khö-a ly hethang tähang-a Samari khö cäqeng kha ly he kae te vi.

5Isu lä Samari khö üng Sukha märü-a tyng dy. Hini märü lä kangsi Jaeko ma cäpaw Josefae tähang py saite älawng mityng teng-a awng te vi. 6Honi mityng-a Jaeko üng tuikang awng. Isu lä khölawng tho te üng mäsae phi kha tuikang teng-a aety kha awng. Honi kätü lä käni anghung te kätü tingtang-a vi.

7Samari nawngmädi lä tuidu hethang tuikang-a ly. Isu ma nawngmädi tea “Kai tähang tui py jo e” näkha mäkai pa. 8Äkähui na lä käcakänei na rang hethang märü thung-a ly pa ö vi.

9Samari nawngmädi ma “Kai lä Samari nawngmädi kae vi. Nang lä Judae khimi be. Nang lä äte makäte phüng-a kai te üng tui nei hethang mäkai te mei” näkha düng pa. (Judae na lä Samari khimi na hai aede hethang dang y.)

10Isu ma “Säthaw ma py saite lasawng bung nang mäny y. Nang tea tui nei hethang mäkai te kai lä ämi mei näte nang mäny y. Hini na mäny dylä kai tea mäkai by vi ai. Kai ma nang tähang hing saite tui py ai” näpa.

11Nawngmädi ma “Särae ä, tuikang la thu phi. Nang tea tuidu hethang tuibung la awng te y. Äte ma üng nang lä hing saite tui dang ai mei. 12Nang lä kai ce üng kangsi Jaeko qawng-a lengky vi nang mei. Jaeko ma hini tuikang tea kai ce tähang py te vi. Äma hai äma üng cäpaw cänung na hai beram raebawi na la hini tuikang üng tui nei ö te by” näpa.

13Isu ma “Hini tui nei saite hengtä lä tui aehe haile ö vi ai. 14Tungaila kai ma py saite tui nei te hengtä lä manila tui aehe he y dy. Hini tui lä äni üng äthung-a tui cäpring-a aelawng kha dungtäsa hing saite dang hai ai” näpa.

15Nawngmädi ma Isu tea “Särae ä, kai tähang honi tui py jo. Tukä dylä kai lä manila tui aehe y ai dy. Hini mityng-a tuidu hethang lä ly haile he ngai y ai dy” näpa.

16Isu ma “Nang nawngpaw bung kähyng kha hini mityng-a ly haile” näpa.

17Nawngmädi ma “Kai la nawngpaw awng y” näpa.

Isu ma “Nawngpaw awng y näte la tätang khaw-a thui te vi. 18Nang lä nawngpaw lawng bangtä awng vai dy. Vaihi nang hai mangtä awng saite nawngmäcaw lä nang üng nawngpaw y. Nang lä kai tea mitang khü-a thui te vi” näpa.

19Nawngmädi ma “Särae ä, nang lä buisaw näte kai lä mäny dy. 20Kai ce üng kangsi na lä hini me anghung-a Säthaw tea cäphaw ö vävawi te vi. Tungaila nang ce Judae khimi na lä Jerusalem märü-a Säthaw tea cäphaw hethang kae nä ö te vi be” näkha thui pa.

21Isu ma “Änang nawngmädi ä, kai üng thui te lo yng ba. Khimi ce lä hini anghung hai Jerusalem märü-a ly y käla ma mä-ai üng Pä-ai Säthaw tea cäphaw saite kätü lä tyng ai dy. 22Nang ce Samari khimi na lä nang ma ce cäphaw saite Säthaw bung mäny ö y. Kai ce Judae khimi na lä kai ma ce aesi saite Säthaw bung mäny ö te vi. Ätephüng-a mei nädylä aeqang saite lä Judae khimi na te mang hai ly te vi. 23Tungaila mä-ai üng Pä-ai Säthaw tea tätang khaw-a cäphaw saite khimi na lä mitang khü te hai, Muilaw Käcai hai cäphaw hethang kätü lä tyng vi ai rawng. Honi kätü lä vaihi tyng te vi dy. Hini kätyng äni tea cäphaw hethang Pä-ai üng kängai vi. 24Säthaw lä Muilaw vi. Säthaw tea cäphaw saite na lä Muilaw Käcai hai mitang khü te hai cäphaw hethang kae” näkha thui vi.

25Nawngmädi ma “Mesia ly ai näte kai mäny by. Hini Mesia ly te kätü-a, mä-ai tea äte angxynlyng na phüng thui mäcai pa vi ai” näpa.

26Tukha Isu ma “Vaihi nang hai älo aepe saite Kai lä Khrista dy” näpa.

27Honi kätü-a Isu äkähui na lä märü üng tyng haile ö dy. Äni ce lä Isu ma nawngmädi hai älo aepe te nung ea cangxei ö vi. Tungaila äni tea “Äte ngai te mei. Y dylä ätephüng-a hini nawngmädi hai älo aepe te mei” näte ämi ma la düng vawng pa y.

28Tukha nawngmädi lä awikaw khaisö ea märü thung-a vawi haile dy. 29Äni ma “ly ö kai üng sa saite phüng angxynlyng na thui saite khimi lawngtä tea kheng ö e. Äni lä Mesia vi nang müng” näkha khimi ce tea thui pa. 30Tukha khimi ce lä märü thung üng tho kha Isu tea ly ö dy.

31Hini kätü-a äkähui na lä “Särae ä, käcakänei na ca jo re” näkha näpa.

32Tungaila Isu ma “Nang ce mäny y saite käcakänei kai tea awng” näpa.

33Tukha äkähui na lä “Äni tähang khimi lawngtä ma käcakänei tha pa vi dy mei” näkha äma ce tingtawi aedüng ö dy.

34Isu ma “Kai bung mätaw saite Kung üng aely ngai te kätyng sa kha äni ma kai tea py saite kälu khüng rung khytä sa te lä kai üng käcakänei kae dy. 35‘Vaihi üng hai law bälitä qae ea caw ae te kätü tyng ai dy’ näte nang ce lä thui ö. Nang ce tea kai thui te lä ämi bäli kha lai na tea kheng ö lawi. Lai-a caw ae hethang caw müng vi dy. 36Caw ae saite na lä vaihi kälu vang dang kha dungtäsa hing saite tähang äthai na mätung ö dy. Tu saite hai ae saite khimi na lä mangtä anghawtho ö ai. 37Tukha ‘lawngtä lä tu kha lawngtä lä ae ai’ näkha thui saite lä tätang khaw vi. 38Nang ce ma tu y saite lai üng caw ae hethang kai lä mätaw dy. Äkälang khimi na lä lai kälu mäsae rung khytä sa ö. Nang ce la äni ce üng kälu thung-a sa te jungtä khung kha ae by dylä caw dang ö ai” näkha thui pa.

39Samari nawngmädi ma “Äni lä kai sa saite phüng angxynlyng na thui haile tyng vi” näkha thui te phüng-a honi märü üng khimi kä-awng mang na lä Isu tea yng ö dy. 40Tukha Samari khimi na lä Isu tea tyng ea äma ce hai mangtä awng hethang aesi aebai pa ö. Isu lä äni ce hai käni netä awng pa dy.

41Tukha Isu üng älo phüng-a yng saite na awng mang rae vi dy. 42Äni ce ma Samari nawngmädi tea “Vaihi kai ce Isu tea yng te lä nang üng älo phüng-a la y. Isu üng älo kai ce ma thai khe te phüng-a kae. Hini lawngtä lä älawngpre üng Aeqangkung tätang näte kai ce lä mäny dy” näpa.

Mätawngky üng cäpaw naw saite tea hawi sa pa

43Käni netä pyng-a Isu lä Samari khö üng tho kha Kalile khö-a ly dy. 44Isu ma “Buisaw lä äma awng saite märü-a mimai dang y” näkha thui pa. 45Isu lä Kalile khö-a tyng ea Kalile khimi na ma Isu tea lady pa ö dy. Ätephüng-a mei nädylä äni ce lä Cäqengja te pawi tähang Jerusalem märü-a ly kha Isu ma sa saite na nung ö te phüng-a vi.

46Isu lä tui tea Cäpje tui-a aelawng hai kha Kalile khö Kana märü-a äbaeni ly be haile tyng dy. Honi märü-a mätawngky lawngtä lä awng. Äni üng cäpaw lä Kapernawm märü-a kawngang naw kha awng te vi. 47Honi mätawngky lä Judae khö üng Kalile khö-a Isu tyng te angthang thai dylä dü aetawng saite äma üng cäpaw bung ly kha naw te hawi sa pa hethang äni lä Isu tea aesi aebai pa dy. 48Isu ma “Nang ce lä cangxei te na nung y dylä yng ö y lyng” näpa.

49Mätawngky ma “Särae ä, kai üng cäpaw lä dü y kü ea tyng rung khytä ly pa kü jo re” näpa.

50Isu ma “Vawi lawi, nang üng cäpaw lä naw te hawi vi dy” näkha näpa.

Äni lä Isu üng thui te älo tea yng kha ing-a vawi haile dy. 51Äma lolang-a ly te kätü-a äma üng mawsawng na hai aeting pa dy. Äni tea “Nang üng cäpaw naw te lä hawi vi dy” näkha thui pa.

52Äma lä “Kai cäpaw lä mata kätü-a naw hawi te mei” näkha düng ea lä mawsawng na ma “Jangdüng naeritä-a käbi qa vi” näkha näpa. 53Tukha äpä-ai lä honi kätü-a Isu ma “Nang üng cäpaw naw hawi dy” näkha thui te kätü tea aedawng haile dy. Tukätephüng-a äni hai äni ce ingthung angxynlyng lä Isu tea yng ö vi dy.

54Hini cangxei saite kamarae lä Isu ma Judae khö üng hai Kalile khö-a tyng pyng-a sa saite äbaeni kamarae na vi.

Currently Selected:

Johan 4: cekNT

Highlight

Copy