Sdaɗi Apostelai 4
4
Peter gaini Yohana, wuzaɗi ɗai zi kiti seŋ
1Won hlai n'e ɗa miɗi gaiɗi ɗai ɗa, paakai zi ɓaka gaini abaiɗi ɗai zi giɗimi tempel gaiɗi Sadusekai lai e liɓisi midiɗi, 2masuwarai kaŋ buri e tiliɗi e ɗa hitriɗi ɗai, e ɗa e miɗiɗi miɗini ɵiyi n'amai n'arbaɗi ɗai zi mri na war Yesu. 3E yimiɗi, e pûkûɗi haa e fini amlai buri hlai a za kuskoi ta. 4Amma, ɗai viya arbaɗi nagai n'e ɵini seŋ ɗa, e yimi. Pɵaɗi a za gobi ɗai na maɵagai dubu ɵim.
5Dawaini ɗa, abakaiɗi gaiɗi abakai n'arbaɗi ɗai, gaiɗi ɗai n'e ɗû wazagai ɗa lai e tipi a Yeruzalem. 6Pai n'abai zi ɓaka Anna gaini Kaifas, gaini Yohana, gaini Alekzandre, gaiɗi nagai na war pinzibaɗi paakai n'abakai zi ɓaka lai, 7e miliɗisi, e ɗiyiɗi arbaɗi e zilbiɗi miɗi, e miɗi: Ki zi hanɗa gaini spak na maɵa ɗa? War yikini a siya ɗa? 8Nɵa Peter na gaini vi gaini Seze-sɗik a miɗiɗi: Tiki abakai na wiiɗi ɗai gaiɗi n'abakai n'arbaɗi ɗai, 9tiyana ɗa, ki zilbiyi miyi girna na ɗa burini pɗem na mi ziŋ sini ɗif n'e zini gaini mri, gaini zûûli na a zuula gaini lai. 10Yimi midiki pɗem, gaiki tiki ɗai na Izrayel paŋ lai ɓa: A za na ɗa war yikini Yesu Kristu na Nazaret par, na tiki ki tûkûŋ amai, na Alaw a ɵiyaŋ amai arbaɗi ɗai zi mri, ɗif hanɗa a ɗiya wuzaki nga na ɗa gaini Ni. 11Ni ɗa a ahi-fuŋ na tiki ɗai zi rgi dalam ki tiliŋ aŋ wala kadai, tiyana a bunda aŋ ahi-fuŋ n'a tika war koŋni dalam. 12Kûri aŋ warni ɗif zamai kai, buri ɓa azumai midiɗi yai ɗa, yiki ktai na a sasi arbaɗi ɗai na mu kuɗumu mu nuvumu kûri warni aŋ kai.
13Won hlai n'e tili ɗiyi na Peter gaini Yohana e ɗiyi pini seŋɗi ɗa, e bindi hiyak gara buri e siɗi ya ɓa e ɗi ɗai na won ɵa, na siɗi miɗiɗi gara kaalai, pra e siɗi ɓa e ɗi ɗai n'e ɗi ka pini Yesu. 14Amma won hlai n'e tili ɗif na a zuula a na gaiɗi gaini ɗiyi zaw ɗa, e siɗi seŋ n'e wiyiŋɗi karɗi kir kai. 15E miɗiɗi buri e niyisi anene arbaɗi par, e hini e kiti seŋ arbaɗi. 16E miɗi: Aga mu zumu siɗi ɗai hanɗa a maɗa? A na edi gaglai arɗi ɗai na Yeruzalem paŋ ɓa, siŋki ktai a za gaiɗi ɗai hanɗa ta, na tumu mu kuɗumu aŋ pumu mumu miɗini kai. 17Amma kapai hanɗa a suma hlai wuzani sek arbaɗi ɗai kai ɗa, ɗuluɗumu gaini gdaŋ buri e miɗi wiini ɗif war yiki hanɗa kir kai.
18Nɵa e yikiɗi e gidiɗi miɗi buri e miɗi, e hitri war yikini Yesu kir kai. 19Peter gaini Yohana e wiyi seŋ e miɗi: Wuzani arni Alaw ɗa, mi ɵini piki tiki a suwa na pini Alaw ɗa war futini ɗi? Tiki ki tili hanɗa haw! 20Buri tiyi ɗa, mi kiɗi mi bi miyi ba, wala na mi tiliŋ, na mi ɵiniŋ lai mi miɗi miɗini kai ɗa a sɗa aŋ za kai. 21E hiiɗi miɗi pra, asakal par e pûkûɗi, e nivi wala ktai n'e ziɗi gir pini kai, buriɗi ɗai ɗa, buri ɓa ɗai paŋ e si kol sini Alaw burini wala na a za ɗa. 22Buri ɗif na wala zi siŋki hanɗa a za sini a zuula ɗa, buzani doogo doogo puɗu.
Siiwa na wiiɗi ɗai zi yimi n'e ɗa war gir
23Won hlai n'e pûkûɗisi puk ɗa, Peter gaini Yohana e wiyisi e miɗiɗi seŋ na paakai n'abakai zi ɓaka gaiɗi n'abakai n'arbaɗi ɗai e miɗiŋɗi ɗa wiiɗi marɗi. 24Won hlai na marɗi ɗa e ɵini hanɗa, gaini hlaiɗi paŋ war hiini na ktai e wi wulaɗi amai e miɗi: Epin-gezayi, tuku na ku za hlai n'amai gaiɗi yai, gaini yem-ra n'abai, gaini wazagai na warni paŋ lai, 25tuku na ku muɗa war Seze-sɗik war mini epiyi David na ɵeŋku ɓa:
pinzibaɗi ɗai na zamai ɗa, e migizi nɵa ɗa buri maɗa?
ɗai ɗa e hiini hiini na gomoŋ nɵa buri maɗa?
26Paakai na midiɗi yai e hilisi e diŋgi,
n'abakai e tipi miɗi ktai midini Epiɗ-ɗai,
midini ɗif na emel n'e tiki ɗai war sda gaini midini lai buri maɗa?
27Buri ɓa, jre kai tiɓ ɗa, Herod gaini Pontus Pilatus e tipi miɗi war fuŋ n'abai hanɗa gaini pinziba na zamai, gaiɗi ɗai na Izrayel ɗa lai, miɗini ɵeŋku na sɗik Yesu, na ku zaŋ aŋ Kristu. 28Aŋ za wala paŋ na ku hiinaŋ, na ku ɗiyaŋ wuzani hlai par lai. 29Tiyana ɗa, Epiɗ-ɗai, tika hangalku sini gir n'e firiyi e ziŋyi ta, siɗi gdaŋ wiiɗi bagakaiku aŋ miɗi seŋ ɗa edi gaini hunai warɗi kai. 30Siŋka spakku edi kapai zûûli gaini wazagai zi siŋki, wazagai zi hiila lai a za war yikini ɵeŋku na Sɗik ɗa. 31Won hlai n'e vidi gaini siiwiɗi li, hlai na e ɗi woni ɗa a ziriya, nagai paŋ e vi gaini Seze-sɗik, e miɗi seŋni Alaw edi gaini hunai piɗi kai.
Ɗai zi yimi e ɓûrwi wazagaiɗi arbaɗi marɗi
32Firiɗi ɗai n'e yimi ɗa, hiiniɗi ktai, sezeɗi ktai lai, ktai na a muɗa ɓa wazagai a wiini kiini aŋ kai, wazagaiɗi paŋ a na fu arbaɗi aŋ bonu. 33Apostelai e zi zaida miɗini ɵiyi n'amai na wiini Epiɗ-ɗai Yesu gaini spak n'abai gara, ɓiki n'abai a na fu midiɗi paŋ. 34Buri arbaɗi ɗa, ktai na walani aŋ kai ɗa aŋ kai, buri nagai na vowaiɗi a na, na dalamɗi a na lai ɗa, e wûriŋ edi, e kisi farai na a sumaŋ ɗa, 35e tikiŋ azumai wuzaɗi Apostelai, Apostelai e ɓûrwiŋ, e si sini a siya ɗi paŋ pini hajani hajani.
36Nɵa, Yosef na Apostelai e ɵini zna ɓa Barnabas, a dara a muɗa: Ɗif na a sa arai-zi-pi, ɗif na Levi na war Kiprus par, 37a wura vowaini edi, a kasi faraini ɗa, a tikaŋ wuzaɗi Apostelai.
Currently Selected:
Sdaɗi Apostelai 4: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
Sdaɗi Apostelai 4
4
Peter gaini Yohana, wuzaɗi ɗai zi kiti seŋ
1Won hlai n'e ɗa miɗi gaiɗi ɗai ɗa, paakai zi ɓaka gaini abaiɗi ɗai zi giɗimi tempel gaiɗi Sadusekai lai e liɓisi midiɗi, 2masuwarai kaŋ buri e tiliɗi e ɗa hitriɗi ɗai, e ɗa e miɗiɗi miɗini ɵiyi n'amai n'arbaɗi ɗai zi mri na war Yesu. 3E yimiɗi, e pûkûɗi haa e fini amlai buri hlai a za kuskoi ta. 4Amma, ɗai viya arbaɗi nagai n'e ɵini seŋ ɗa, e yimi. Pɵaɗi a za gobi ɗai na maɵagai dubu ɵim.
5Dawaini ɗa, abakaiɗi gaiɗi abakai n'arbaɗi ɗai, gaiɗi ɗai n'e ɗû wazagai ɗa lai e tipi a Yeruzalem. 6Pai n'abai zi ɓaka Anna gaini Kaifas, gaini Yohana, gaini Alekzandre, gaiɗi nagai na war pinzibaɗi paakai n'abakai zi ɓaka lai, 7e miliɗisi, e ɗiyiɗi arbaɗi e zilbiɗi miɗi, e miɗi: Ki zi hanɗa gaini spak na maɵa ɗa? War yikini a siya ɗa? 8Nɵa Peter na gaini vi gaini Seze-sɗik a miɗiɗi: Tiki abakai na wiiɗi ɗai gaiɗi n'abakai n'arbaɗi ɗai, 9tiyana ɗa, ki zilbiyi miyi girna na ɗa burini pɗem na mi ziŋ sini ɗif n'e zini gaini mri, gaini zûûli na a zuula gaini lai. 10Yimi midiki pɗem, gaiki tiki ɗai na Izrayel paŋ lai ɓa: A za na ɗa war yikini Yesu Kristu na Nazaret par, na tiki ki tûkûŋ amai, na Alaw a ɵiyaŋ amai arbaɗi ɗai zi mri, ɗif hanɗa a ɗiya wuzaki nga na ɗa gaini Ni. 11Ni ɗa a ahi-fuŋ na tiki ɗai zi rgi dalam ki tiliŋ aŋ wala kadai, tiyana a bunda aŋ ahi-fuŋ n'a tika war koŋni dalam. 12Kûri aŋ warni ɗif zamai kai, buri ɓa azumai midiɗi yai ɗa, yiki ktai na a sasi arbaɗi ɗai na mu kuɗumu mu nuvumu kûri warni aŋ kai.
13Won hlai n'e tili ɗiyi na Peter gaini Yohana e ɗiyi pini seŋɗi ɗa, e bindi hiyak gara buri e siɗi ya ɓa e ɗi ɗai na won ɵa, na siɗi miɗiɗi gara kaalai, pra e siɗi ɓa e ɗi ɗai n'e ɗi ka pini Yesu. 14Amma won hlai n'e tili ɗif na a zuula a na gaiɗi gaini ɗiyi zaw ɗa, e siɗi seŋ n'e wiyiŋɗi karɗi kir kai. 15E miɗiɗi buri e niyisi anene arbaɗi par, e hini e kiti seŋ arbaɗi. 16E miɗi: Aga mu zumu siɗi ɗai hanɗa a maɗa? A na edi gaglai arɗi ɗai na Yeruzalem paŋ ɓa, siŋki ktai a za gaiɗi ɗai hanɗa ta, na tumu mu kuɗumu aŋ pumu mumu miɗini kai. 17Amma kapai hanɗa a suma hlai wuzani sek arbaɗi ɗai kai ɗa, ɗuluɗumu gaini gdaŋ buri e miɗi wiini ɗif war yiki hanɗa kir kai.
18Nɵa e yikiɗi e gidiɗi miɗi buri e miɗi, e hitri war yikini Yesu kir kai. 19Peter gaini Yohana e wiyi seŋ e miɗi: Wuzani arni Alaw ɗa, mi ɵini piki tiki a suwa na pini Alaw ɗa war futini ɗi? Tiki ki tili hanɗa haw! 20Buri tiyi ɗa, mi kiɗi mi bi miyi ba, wala na mi tiliŋ, na mi ɵiniŋ lai mi miɗi miɗini kai ɗa a sɗa aŋ za kai. 21E hiiɗi miɗi pra, asakal par e pûkûɗi, e nivi wala ktai n'e ziɗi gir pini kai, buriɗi ɗai ɗa, buri ɓa ɗai paŋ e si kol sini Alaw burini wala na a za ɗa. 22Buri ɗif na wala zi siŋki hanɗa a za sini a zuula ɗa, buzani doogo doogo puɗu.
Siiwa na wiiɗi ɗai zi yimi n'e ɗa war gir
23Won hlai n'e pûkûɗisi puk ɗa, Peter gaini Yohana e wiyisi e miɗiɗi seŋ na paakai n'abakai zi ɓaka gaiɗi n'abakai n'arbaɗi ɗai e miɗiŋɗi ɗa wiiɗi marɗi. 24Won hlai na marɗi ɗa e ɵini hanɗa, gaini hlaiɗi paŋ war hiini na ktai e wi wulaɗi amai e miɗi: Epin-gezayi, tuku na ku za hlai n'amai gaiɗi yai, gaini yem-ra n'abai, gaini wazagai na warni paŋ lai, 25tuku na ku muɗa war Seze-sɗik war mini epiyi David na ɵeŋku ɓa:
pinzibaɗi ɗai na zamai ɗa, e migizi nɵa ɗa buri maɗa?
ɗai ɗa e hiini hiini na gomoŋ nɵa buri maɗa?
26Paakai na midiɗi yai e hilisi e diŋgi,
n'abakai e tipi miɗi ktai midini Epiɗ-ɗai,
midini ɗif na emel n'e tiki ɗai war sda gaini midini lai buri maɗa?
27Buri ɓa, jre kai tiɓ ɗa, Herod gaini Pontus Pilatus e tipi miɗi war fuŋ n'abai hanɗa gaini pinziba na zamai, gaiɗi ɗai na Izrayel ɗa lai, miɗini ɵeŋku na sɗik Yesu, na ku zaŋ aŋ Kristu. 28Aŋ za wala paŋ na ku hiinaŋ, na ku ɗiyaŋ wuzani hlai par lai. 29Tiyana ɗa, Epiɗ-ɗai, tika hangalku sini gir n'e firiyi e ziŋyi ta, siɗi gdaŋ wiiɗi bagakaiku aŋ miɗi seŋ ɗa edi gaini hunai warɗi kai. 30Siŋka spakku edi kapai zûûli gaini wazagai zi siŋki, wazagai zi hiila lai a za war yikini ɵeŋku na Sɗik ɗa. 31Won hlai n'e vidi gaini siiwiɗi li, hlai na e ɗi woni ɗa a ziriya, nagai paŋ e vi gaini Seze-sɗik, e miɗi seŋni Alaw edi gaini hunai piɗi kai.
Ɗai zi yimi e ɓûrwi wazagaiɗi arbaɗi marɗi
32Firiɗi ɗai n'e yimi ɗa, hiiniɗi ktai, sezeɗi ktai lai, ktai na a muɗa ɓa wazagai a wiini kiini aŋ kai, wazagaiɗi paŋ a na fu arbaɗi aŋ bonu. 33Apostelai e zi zaida miɗini ɵiyi n'amai na wiini Epiɗ-ɗai Yesu gaini spak n'abai gara, ɓiki n'abai a na fu midiɗi paŋ. 34Buri arbaɗi ɗa, ktai na walani aŋ kai ɗa aŋ kai, buri nagai na vowaiɗi a na, na dalamɗi a na lai ɗa, e wûriŋ edi, e kisi farai na a sumaŋ ɗa, 35e tikiŋ azumai wuzaɗi Apostelai, Apostelai e ɓûrwiŋ, e si sini a siya ɗi paŋ pini hajani hajani.
36Nɵa, Yosef na Apostelai e ɵini zna ɓa Barnabas, a dara a muɗa: Ɗif na a sa arai-zi-pi, ɗif na Levi na war Kiprus par, 37a wura vowaini edi, a kasi faraini ɗa, a tikaŋ wuzaɗi Apostelai.
Currently Selected:
:
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964