JOHN 18

1Jesuh nih cu bia cu a chim dih in a lamkaltu hna he an chuak, Kidron hawrkuang an tan, cuka ah dûm a um i Amah le a lamkaltu hna he an lut. 2A rawitu Judas zong nih cu hmun cu a hngalh. Jesuh le a zultu hna cu cu hmun ah an lengṭi tawn. 3Cuticun Judas nih ralkap hna le, tlângbawi hna le, Farasih nih an thlahmi kilvengtu hna he a ratpi hna i meiin le meifar le hriamnam hna i put in cuka ah cun an ra. 4Jesuh nih a cung i thil a tlung dingmi vialte hna kha a hngalhchung dih hna i hmai ah tlawmpal ava kal i an sinah, “Ahodah nan kawl?” tiah a ti hna. 5Annih nih, “Nazaret Jesuh” tiah an leh. Jesuh nih, “Amah cu ka si,” tiah a ti. A rawitu Judas zong an sinah a dir. 6“Amah cu ka si,” A ti le cângkâ hnu lei ah tawlh in vawlei ah an tlu. 7Anih nih, “Ahodah nan kawl?” tiah a hal ṭhân hna. Annih nih, “Nazaret Jesuh,” tiah an ti. 8Jesuh nih, “Amah cu ka si tiah kan chimh ko hna cu ta. Keimah nanka kawl ahcun hi hna hi kalter hna u,” tiah a ti hna. 9A rak chim cangmi, “Nangmah nih naka pêkmi pakhat te hmanh ka thlau hna lo,” a timi a tlin nâkhnga. 10Simon Peter nih a vainam a zuh i tlângbawi nganbik sinum orhlei hna pet lak in a tuk. Sinum cu Malka a si. 11Jesuh nih, “Vainam kha a kawngah sanh. Pa nih aka pêkmi hrai hi ding loin maw ka um lai?” tiah a ti. 12Cuticun ralkap bu le an hotu le Judah mi ṭempal kilvengtu ralkap hna nih Jesuh kha an tlaih i an ṭêm. 13A hmaisa bikah Anna sinah an kalpi, zeitintiah amah cu cu kum i tlângbawi nganbik Kaifas nupi pa a si caah a si. 14Kaifas cu, “Mivialte caah mi pakhat thih a ṭha deuh,” tiah Judah mi ruahnâk cheutu kha a si. 15Simon Peter nih Jesuh a zulh i a lamkaltu dang pakhat zong nih a zulh ve. Cu lamkaltu cu tlângbawi nganbik theih-hngalhmi a si. Tlângbawi nganbik inntual tiangin Jesuh kha an zulh. 16Asinain Peter cu lêngah kutkâ hramah a dir, cuticun lamkaltu dang tlângbawi nganbik theih-hngalhmi pa cu a va chuak i kutkâ cawngtu a va chimh i Peter cu a luhpi. 17Cuticun kutkâ congtu ngaknu nih Peter sinah, “Nang zong hi pa zultu lak i â tel vemi na si lo maw?” tiah a ti. Anih nih, “Ka si lo,” tiah a ti. 18Cun sinum le vengtu kha cuka ah an dir i a kih caah meihol in mei an kau i an to. Peter zong â tel ve i dirbu in mei a to ve. 19Tlângbawi nganbik nih Jesuh cu a lamkaltu kong le a cawnpiakmi kong a hal. 20Jesuh nih, “Vawlei theih in langhngan in ka cawnpiak tawn; Sinagog le ṭempal zongah, Judah mi an i butnâk hmunah ka cawnpiak tawn. A thlithup in zeihmanh ka chim lo. 21Zeiruangahdah naka hal? Ka bia a ngaitu hal hna ngat. Cuhna nih ka chimmi an theih ko cu ta,” tiah a ti. 22Cubia a chim tikah a pawng i a dirmi kilvengtu pakhat nih Jesuh kha a bengh, “Khabantuk khan tlângbawi nganbik na let lai maw?” tiah a ti. 23Jesuh nih, “Thilṭha lo ka chim ahcun ka sualnâk ka hngalhter, asinain bia ṭha ka chim ko nain zeicadah naka bengh? tiah a ti. 24Cuticun Anna nih `êmbu in tlângbawi nganbik Kaiafas sinah a kalter. 25Simon Peter cu dirin mei a to i a sinah, “Nang zong hi a lamkaltu lak ah â telmi na si lo maw?” tiah an ti. Anih nih, “Ka si lo” tiah a hlawt. 26Tlângbawi nganbik sinum Peter nih a hna a tukmi rualchan nih, “Dum chungah a pawng i ummi ka hmuhmi kha na si ko lo maw?” tiah a ti. 27Peter nih a hlawt ṭhân i ar a khuang cawlh. 28Jesuh cu Kaiafas in in bawi inntual rawnah an kalpi ṭhân, cucu zingka te a si. Annih cu bawi inah an lut lo, an luh ahcun an thur lai i Lanhtâk Thô rawl an ei kho lai lo. 29Pailat cu a va chuak i an sinah, “Hi pa ralchanhnâk ah zeibantuk sual puhnâk he dah nan rat?” tiah a ti hna. 30Annih nih, “Hipa nih sualnâk tuah hlah sehlaw na sinah kan ratpi hnga lo,” tiah an ti. 31Pailat nih, “I kalpi ulaw, nan phung ningin bia cu va ceih ko ngat u,” tiah a ti. Judah mi nih, “Kan phungningah ahohmanh thah khawh an si lo,” tiah an ti. 32Cucu zeibantuk set in dah a thih lai tiah Amah Jesuh nih a rak chimning te i a tlin khawh nâkhnga caah a si. 33Pailat cu tualrawn ah a va kal ṭhân, Jesuh cu a kawh i, “Judah Siangpahrang na si maw?” tiah a ti. 34Jesuh nih, “Hihi nangmah lungchuak chimmi maw a si? mi nih ka kong an in chimhmi ruang i na chimmi dah?” tiah a ti. 35Pailat nih, “Kei hi Judah mi ka si maw? Na miphun le tlângbawi hna nih ka sinah an in chanhmi na si. Zeithil dah na tuah?” tiah a ti. 36Jesuh nih, “Ka pennâk cu hi vawlei pennâk hi a si lo. Ka pennâk cu hi vawlei pennâk hi sisehlaw, Judah mi hna kut i ka phâk nâkhnga lo ka sinum hna nih an doh ve hnga. Asinain ka pennâk cu hika ah a si lo,” tiah a ti. 37Pailat nih, “Cuti a si ahcun, Siangpahrang na si ko lo maw? tiah a ti. Jesuh nih, “A dikmi na chim. Siangpahrang ka si,” Biatak chim le hngalhter hi vawlei ka chuahchan le ka rat chan a si. Biatak i a ummi pauh nih ka aw hi a ngaih tawn” tiah a ti. 38Pailat nih, “Biatak cu zeidah a si?” tiah a ti. Cu bia a chim dih in, Judah mi sinah a va chuak ṭhân i “A sualnâk zeihmanh ka hmu lo,” tiah a va chim. 39Lanhtâk Thô ah thongtla kan chuah piak hna nâkhnga phung nan ngei. Judah Siangpahrang hi in chuah piak hna ninglaw nan duhmaw? tiah a ti. 40An dihlak in an au ṭhân i, “Hi pa cu sihlahseh, Barabbas tu si deuh seh,” tiah an ti. Barbbas cu damiah a si.

Currently Selected:

JOHN 18: HAKABSI

Highlight

Copy