KUITIR 18

Korinth Khuana Thang Ahui Anril

1Hava suale Paul Atheni ata asena Korinth a ahong. 2Hatuka aman Akuila atia Juda mi khat amu ama hi Pontia nam hava nikhua man beta han a nungak Priskilla bila Itali ata ahong u asik chu Klaudi han Juda dora ha Rom ata a nota, Paul ha amani kom ase. 3Hatuka Paul asin tho anrual pui ei ni sika amani bila a oma lokona sin atho u. Amani ha puanin asin ei ni u na ei zuar u. 4Pongansana nikhua tina anchunna ina chong ei rila Juda le Grik ngai ha ei mathema ei man iamna rang.

5Sila le Timothi ha Makedonia ata ahong u lehan, hava han Paul achonga a malung alut lai tak, Isua hi Krista hava ha Juda ngai kom adika ei manthei. 6Tenchu amanin ei duia ei dem u sika Paulin apuan athinga ei ti, “Na thisen u na lu chung u na chul rase! Koi chu kan thiang atun ata Jentail ngai kom ka se,” ati. 7Hava suale ama ha havan ata asena Tita Justa ati na Pathian andon mi khat ina ava lut a in ha anchunna in kola ei om. 8Hatuka anchunna ruaipu Krispa a in kote le Puma a iam u. Hanuk Korinth ngai bila mi tamin ariat u na a iam u na baptisma a chang u.

9Hatuka Puma zana anrala Paul a rang, “Achi no ro hanekten chong ril ro, dai rek no ro. 10Asik chu na bibila ka om a nan mumaka tuten na masiat no ni asik chu hiva khuana ka mi atampa a om,” atia. 11Hava han Paul kum khat atan a oma amani bila Pathian chong a manchu.

12Hatuka Gallio ha ram a rungpu a chang lai tak hanke Juda ngai anrual u na munkhata Paul andui pui u. Hanuk ama ha rui anrilna makunga a tuang u na. 13“Hiva mi hi Dan aduia aleta Pathian anmok ranga mi a manchang,” ati u.

14Tenchu Paul abai anlong rang ansin lehan Gallio Juda ngai rang ha ei ti, “O Juda ngai, hiva min sin dik lui chong mo sin asia mo lua chu ei tho nisela nangni kei na huai u hi adik ei ni rang. 15Tenchu chong mo, raming mo, na dan u ruia mo ankelna aniten nangni na ninga tho u ro. Koi hantina ruia arilpu chang rang zong making!” 16Hanke aman hangai ha ruiril mun ata ei rahok ani zei. 17Hava han ankhom a ruaipu Sosthene ha lokon asura ruirilna mun makunga a zem u na hatuka Gallio han hava ngai ha ite a malung pe mak.

Antiokei a Akir U

18Paul nikhua a sotpa a om suale unai ngai kom anthanna azonga tipuilian lampui tiang Suria rama ase, hanuk abila Priskilla le Akuillam ase Kinkriana alu mankol asik chu ei anchakna khat a om. #Mip 6.18 19Hava suale amani ha Ephesi na ava suak u hatuka aman ha anni ngai ha hava han amak. Tenchu aninga anchunna ina aluta Juda ngai kom chong aril. 20Hatuka amanin abil u na hanuk om tot sa ro ati u na a mathem u nam zot lai mak. 21Tenchu amani kom anthanna alaka ei ti, “Pathian azot ten na kom u na hong ret ka ti,” atia ti lampuia Ephesi ata ase.

22Hatuka Kaisari na ava suaka Jerusalem a ase hanuk kuibing ha phamna chong arila havan ata Antiokeia ase.

23Hava han nikhua a manse oka ama ha ase hanuk Galatia ram le Phrugia na a chei tira ruaisi ngai dora ha a man det.

Apolo Rui

24Apolo tia Juda mi khat Ephesi na a hong ama hi a nam Aleksandria chong athei hanuk Pathian Lekhabu ariat athei ei ni. 25Ama hi Puma lampui rui anchu hanke rathana ei luma Isua rui asadima ei ril ei manchu chachak. Tenchu Johon a baptisma rong ei riat. 26Ama ha anchuna ina angam sabaka chong aril ei phuta hava ha Priskilla le Akuilan a chong ril a rangai u na akom ahong tuang u hanuk Pathian lampui asadima a manchu sa u. 27Nuka ama Akaia ase rang avala unai ngaiin lungngam asak u na. Hatuka ama ha ei pom u na ranga ruaisi ngai ha lekha a mathuan u hanke ama ha havan ava suaka lungkhamna lehan a iam ngai ha amani ha achan ei san. 28Asik chu Isua hi Krista hava ha Pathian Lekha chong lehan ei man riata mipui vantang makunga Juda ngai han ankhal chang re u mak.

Currently Selected:

KUITIR 18: RANGBSI

Highlight

Copy