SILBAWLTE 3
3
Khutdoh keengbai suhdamna
1Huleh, Peter leh John chu pung kuaahna, haamtei hun laiin, Pathian biahinn ah a chiahtou va. 2Huleh, kua aha pasal khat, a pian chiil apat keengbai ahung zawng va, hu pa chu Pathian biahinn a luutte kawma khutdoh diingin, biahinn kotkhaah “Kilawm” a chih uh bul ah ni chinin a lumsah veu uhi. 3Huchi’n Peter leh John Pathian biahinn a luut diing a mu a, khut ana doh hi. 4Huleh, Peter in John toh amah hah et in a en va, Keiuh hung en in, a chi a. 5Huleh, ama’n amah vapat bang aha muh a kinem a, a en a. 6Hizongleh, Peter in, dangka leh sana bangmah ka nei sih; hizongleh, ka neihsun ka hung pe diing; Nazareth Jesu Khrist min in thou inla keeng in chiah in, a chi a. 7Huin, a khut jiatlama tu in a kaithouta a; huleh, thakhat in a keengte leh a siahguhte ahung haatpahta hi. 8Huchi’n, amah chu a diangdoh a, a ding a, keeng in a chiahta a, huleh keeng a chiah a diangdiang leh, Pathian pahtawi kawm jel in, amahuh toh Pathian biahinn ah a luutta hi. 9Huleh, keeng a a chiah leh Pathian a paahtawi mi zousiah in a mu va; 10Huleh, amahun, biahinn kotkhaah Kilawm bula khutdoh a tou veupa ahi chih a he va; huleh, a tunga sil tung limdang sa mahmahin a buai hial uhi. 11Huleh, keengbai hung dampa in Peter leh John a tuuh laiin, mi zousiah in limdang a sa mahmah va, Solomon innliim a chih vah ahung taikhawm uhi.
Biahinn a Peter thusoi
12Huleh, Peter in hu a muh in, mite a houpih a, Nanguh Israel mite, hikhu bang diinga limdangsa na hi viai? ahihlouhleh, keiuh silbawltheihna leh Pathian ka ngaihsah jiah va amah ka paisah uh bang hiala bang diinga hung en zing na hi viai? 13Abrahamte, Isaakte, leh Jakobte Pathian, i pulepate Pathian in, a tapa Jesu a tawisaangta ahi; Amah na mansah va, Pilat in hah a tup in zong amah na awi sih uhi. 14Misiangthou leh Dihtat chu na deih sih va, tualthatpa chu na kawmva piah na ngen zawta uh; 15Hinna siamtu chu na that va; hizongleh, Pathian in Amah chu misi lah apat a kaithou kiit a; hu heetpihtute ka hi uhi. 16Huleh, Amah min gin jiahin, A min in hipa na muh uleh na heet uh chu a suhaatta ahi; ahi, Amah jiaha ginna hung um in, na bawnva mitmuh in a sudam vilvelta ahi. 17Huleh, tuin unaute, na houtute un zong ana bawl bangun, na heet louh jiahun hi na bawl uh ahi chih ka he hi. 18Hizongleh, Pathian in a zawlnei zousiah kam a, Khrist in a thuaah ngei diing ahi chih ana heetlawhsah chu, huchi bangin a tungsahta ahi. 19Hujiahin, kisiih unla, na sualte uh nawtmang ahih theihna diingin kiheikiit un, huchi'n, Lalpa kawm apat halh hunte ahung tung thei diing a; 20Huleh, Jesu Khrist, nanguh diinga a guatsa chu ahung sawl diing ahi; 21Bangkim siamhoih hun a tun masangsiah Amah chu vaanin a kol tadih diing ahi, hu siamhoih diing chu Pathian in leilung pianchiil apat a zawlnei siangthou zousiah ka min a soi zouta hi. 22Bang jiahin ahiai i chih leh Mosi ngeiin i pulepate kawmah, Lalpa Pathian in keimah ahung siam bangin na unaute lahah zawlnei khat ahung siamsah diing; Ama’n na kawmva thu a soi zousiah chu na ngaihkhiahsah diing uh; 23Huleh, hichi ahung hi diing a, mi kuapouh hu zawlnei thu ngaihsahlou chu, mipi laha kipan suhmangthai ahi diing uh, a chi hi. 24Ahi, Samuel um akipat zawlnei zousiah, huleh a nung vate toh, thu ana soi photmah in huchi bangin, tulai hun tanchin ana soilawh chiat uhi. 25Nanguh, zawlneite leh thuhun tate na hi uh, Pathian in Abraham kawmah, Na haah jalin khovela nam zousiah vangpiah in a um diing uh, chi'n, i pulepate kawmah a chiam hi. 26Pathian in a Tapa Jesu kaithou in, na sualte uh kiheisansah diing leh vang hung pe diingin nanguh kawmah ahung sawl masapen ahi, a chi a.
Currently Selected:
SILBAWLTE 3: SIMTBSI
Highlight
Share
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
