LUK 16
16
Amqukinishi Peithakutsuu
1Jisu no pa khopemi vilo pi: “Ghuthu lakhi kinimi lakhino peithakutsumi lakhi qhipua, peithakutsumino pawu kuakini pepukavetsu ani pikeu sutsa pa tove. 2Pano pa kusaghipeno pi, ‘Oghili chiluakeu hipauye kiu kya? Inhemgha peitha akeu kihikulaikeu kumtsu sughivelo, kughengu hinguno hilauye noye iwu peithakutsuu shipemo ake!’ 3Timi huno pa likhi pa vilo pi, ‘Impiuye ikumla lono ipuwuvenia puzu niye kishinikela? Niye aka-aghashi ghi alu hokide mla eno ino khuchunike kujoe. 4Niye kiu shimasa keno ithivae!Hi shianguno kughou ikumla kuhave namu niye shompami aghi puzu tipaqono pano kilo isasulu nani.’ 5Ikehu khijeno pa mpiu lau api puakeno tipaqo kumtsu pa lau kusu. Atughiu vilo pano pi, ‘Noye impiu pi khije pu ani kya?’ 6Timi huno khochile pi, ‘Teli azubohu 100!’ Peithakautsu-u huno pa vilo pi, ‘Opi yesukeu kaku hilo, iqalo eno lhopungu ipi yesuvelo.’ 7Itaghi milakhiu vilo pano pi, ‘Eno nono api khije ani kya?’ Timi huno khochile pi, ‘Athi abi 1000 anie.’ Peithakutsu-u huno pa vilo pi, ‘Opi yesukutsu kaku hilo, eno 800 yesuvelo.’ 8Amikucho kumou peithakutsuu hipauno amqukini hitoi shikeu ghenguno pa mpiuno pa sheqheke sha? Kughengu ayeghilo kuxu likhi phukichemiye pano kumlapu saje peithani keulo akuvulo auvekemiqo nguno alau amuqukiniue.”
9“Ikehu ino nongu vilo pini, ayeghilo kinikulu ithulukeu pesu nongu sala shompami shi, tishianguno kughouno ti kuhaveni keno, lhokta-kungoa lo nongu sasulu nani kesha? 10Khunono ighono kitila lomu pichebekulu shi nani keno kutomo loghi pichebekulu shi nani. Khunono ighono kitila lomu pichebekumlapu keno kutomo loghi pichebe kumlapu shinani. 11Tishi aye nonguno ayeghilo kini thotsu pichebekulu shi peitha mla aye, khuno kuchou kini pesu nongu pichebetsuni kya? 12Kutami mheghi pesu nongu shou pichebetsu mla aye, khuno nongu mheghi nongu tsuni kya? 13Khunomu ampiu kini quaxe shimlae. Paye lakhi mithino lakhiu gihu nani; momu paye lakhi gho-apulou shi puzu lakhiuye qepusa pughai nani. Nonguye Alhou eno kinikulu kinikujo qemlae.” #Mt 6.24
Jisu no Pikeutsa Hami
(Mt 11.12-13; 5.31-32; Mk 10.11-12)
14Farisimiye akini kupu chekemi kehu, kughono Jisu no hi kumtsu pikeu chilukeno panonguno pa junu. 15Jisu no panongu vilo pi: “Timi zulo nongu likhi nonguno achipiu kepi acheni, ikemu Alhou no nongu mlo ithi anie. Kughengu timino kiu pesu amekuapu kije kepi kumsu cheni keno Alhou zuloye kiumu ame kuhae.#apukumqhupue 16Muse no sughikeu zahkutsu eno tungkupmi no pikeu tsaye Johan Baptist ighike kutolo pepimhe cheke. Tileno huthusu akivi sutsa hi Alhou yehkipe ghili pi ighivea, eno lakhikhino hile ilonike anguka vesu cheni. #Mt 11.12-13 17Ikemu Muse no sughikeu zahkutsu lo chosukeu aghuloumu adou shive nike nguno alau atsutsu eno ayeghi puhavekeuno mlalei keu. #Mt 5.18 18Khuno pa nipu jumuve puzu kutami totimi sasu kulau nikeno salha anie, eno khuno jumuvekeu totimi sasu kulau nikeno pa ghi salha anie.” #Mt 5.32; 1 Kori 7.10-11
Kinimi eno Lazar
19“Ghuthu lakhi kinimi lakhi shishe amekusho phimini pepu eno tsalakipe nibonile keulo xu ache. 20Tilehi kumlhomi lakhi ghi ache, paje Lazar, aphi kumtsu apiyi pususu akiniu hukikhalo saighi che, 21akiniu ghulhu lupa lono munomugho ikiqikeu mu pesu pa mzu vethanishi kutu kehuke; atsuqo thotsu ighino pa piyi mine che. 22Kumlhomi hu thive eno kungumino Abraham phivilo, kungugha ghulhulo xapuwuve. Kinimi ghi thiveno qhove, 23paye Hades lo shishe aghime kije sholua. Pano pagi peqhe ithu jukelo Abraham phivilo Lazar akeu putouno ithulu. 24Tile pano ighamuku, ‘Apu, Abraham! Ikimiye tsulo eno Lazar pelo pa-uloti azulo chosuno imili dikumko tsupelo, kughengu niye ami hipaulo shishe ime ani.’ 25Ikemu Abraham no pi, ‘Kumsuchilejulo, anu, okuxu kupuju akivi nhemgha ithulu ache eno Lazar ye shilukusa kumtsu ithulu ache ikemu hileye paye alokughuno tsu ani eno nono ime ani. 26Tinguno alauno ningu dolo akuthoku thonheike ani kehu khunomu hileno kathasu nongu lau wunikeu shimlae, momu khunomu nono akeu lono hilau kathasu ighimlae.’ 27Kinimi huno pi, ‘Tishiaye, apu Abraham, ipuno kilo Lazar puwu lepi ino oqhuiniju ani. 28Kughengu niye athikuzumi pungu ani, tishianguno pano wuno panongu kutughu keu lono panongu likhimu hipau pitipuzakeu-a lo ighipemo nike.’ 29Ikemu Abraham no pi, ‘Othikuzumi ye Muse kaku eno Tungkupmi kaku ani, panongu pelo tipaqo tsa ini pelo.’ 30Kinimi huno pi, ‘Tiye luzulae, apu Abraham, ikemu khualano akithi lono ithughino panongu lau wu aye, tileno panonguno pano xine lono xaidelu nani.’ 31Abraham no pa vilo pi, ‘Panonguno Muse kaku eno Tungkupmi kaku inimo aye, akithi lono timi ithughi namu panongu mlo ithani chemoe.’ ”
Currently Selected:
LUK 16: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
