LUKE 18

Trulmeinu leh Pichaar Aktlohvaa Pandam

1 # Luk 11:5–8 Anmah in lai amrel anngennatu mahche anril inlengnoh natu ta ankuunga pandam khat malanna asonei. 2“Khuuboom inkhat a Ringpu ta trihnohluung mahche miita injahnohluung pichaartloh mii khat am; 3che mah khuuboom chunna trulmeinu inkhatkho am, amah in pichaartloh akuunga injomma thlenga ason, ‘Keita jekna mii i achunga akchim pichaar tlohro.’ 4Mahchu kakva amah in indahmang; chuta aknua arilsuunga akroua insonsa, ‘Keiin Ringpu ta trihnoh sanglakho mahche miita injahnoh sanglakho, 5trulmeinu in keita keichut keichut a amtaningva, keiin amahturel akchim pichaar tlohtasang, chunohleva inleng inlenga keita keivot usang.’ ” 6#Luk 7:13Akpu in ason, “Akchimlamseh noh pichaar aktlohmii in jangta asonme rungaive. 7#Mad 6:10; Met 24:22; Rom 8:33; Kol 3:12; 2 Tim 2:10Chunna amahkuunga juktiing khulouh trap a ason, Ringpu in amah turella acharche mii turelva pichaar tlohnoh ume? Anmah in trap a ansonta rungainoh a amthil ume? 8Keiin nannihta kitihchou, anmah turel inthademma amah in pichaar atlohtuei. Chulata, miivaa Asa kupa in athlenglai, amah in thaleichunga malot mii aktuuk ume?”

Pharisi leh Roithrai Miivaa Pandam

9Antak anrouta akchimlamseh ungta malot aksih mahche aktleita usitnoh a madon ankuunga amah in pandam ita asonei. 10“Mii innih in anngennatu mathruunna thlaamma hangei, inkhatva Pharisi che aktlei khatva roithrai mii. 11#Met 6:5; Mak 11:25Pharisi in ngirra anroua nga tloh a angen, ‘Ringpu, kampaakche keiva mii aktlei nangnoh ang, mii masimna, karaam, chimnoh aktloh, miimei miisa laal aktloh miinoh ang nohle roithrai anmah nangnoh ang. 12#Luk 5:33; 11:42Keiva kouh inkhat suunga buh veinih kihel, keiin kphahpot somsuunga inkhat kamlan.’ 13Chuta roithrai miikhan klahbeb a ngirra, ringramtinga amit meenga han anluung cheknoh, chuta alukhe beenga, angen, ‘Ringpu, alehchel keita niril kamvolro!’ 14#Met 18:4; 23:12; Luk 14:11; 1 Pit 5:6Keiin nannihta kitihchou, mah chuvah mahmii in aktleichungle atakta machimma inna inlengsa; alamva tunangkhat in anroua atakta amliinjale inruruh kamveitu, chuta tunangkhat in anroua atakta inruruh veile amahta kamliintu.”

Jisu in Naoeita Doi Amlan

(Met 19:13–15; Mak 10:13–16)

15 # Met 19:13–15; 18:3; Mak 10:13–16 Anmah in andih naoeita Jisu in apalnatu akuunga anthlen; mahchuta aroi in anmuhlai nao anthlenta ansaal. 16Chuta Jisu in anmahta akuunga onga, asonei, “Andih naoei in keikuunga thlengeiso, anmahta khaamnohve; alamva Ringpu kurung huunnavah andihnao nangjim antasa. 17Atak a nannihta kisonchou, andihnao inkhatnanga Ringpu kurung huunnata aklounoh amah khanna tiknikho luutnohtu.”

Kdoon Mii

(Met 19:16–30; Mak 10:17–31)

18 # Met 19:16–22; Mak 10:17–22; Luk 10:25 Rampuui inkhat in amahta arui, “Akthra Lulok, ache amnoh chaan phahnatu keiin jangkitlohtu tlame?” 19Mahchunna Jisu in akuunga ason, “Jarelna keita akthrata nak ong angme? Ringpu noh a tukhatkho akthra amno. 20#Rom 13:9; Jem 2:11Nangin trongthuun nirompei: ‘Miimei miimasal laalnohve, mii thatnohve, inrunohve, chimnoh a sakhi malannohve, nannu nanpata injahve.’ ” 21Che amah in ason, “Anaamte ivah nao kiveilainata majuih a thlengsang.” 22#Luk 12:33; Noon 2:45; 4:32Mahchuta Jisu in atheih in, amahkuunga ason, “Nangin nitlohtu inkhat vaatmang. Nangin nidoon naamte juura inranriingta malaneiro, mahche ringramma nang nilal amtu; che thlenga kiknu keijuihro.” 23Chuta mahchuta atheih in aril lahsa, alamva amahvah khalmo kdoon mii. 24#Met 19:23–26; Mak 10:23–27Jisu in amahta anna ason, “Akdoon mii in ringram huunna a anluut tupot i khalmo luua suuk! 25Alamva akdoon mii in ringram kurung huunna aluutchungva uuksa inkhat in kukthrimpoa phaova anthruh in ralla aklai.” 26Mahchuta aktheih ei in anson, “Chuleva tunang in inkal aphahchek ume?” 27#Luk 1:37Chuta amah in ason, “Miikuungva veinohtupot thloukha Ringpu kuungva veitu seengning.” 28#Met 19:27–30; Mak 10:28–31; Luk 5:1–11Pitar in ason, “Anro, kannih in kan inn kanlou mathlah a niknu kanjuih peiche.” 29“Atatak a keiin kisonchou, tunangkhat in ringram huunna rella a inn nohle akmei nohle auh anao nohle anu apa nohle asaeita mathlah a, 30ipek lai in khalmo ralla mahche akthlengsam chup a ache amnoh ringna akphahnohtu tukhatkho amnoh.”

Jisu in Athihsam Relna Veithum tihpi Trong Ason

(Met 20:17–19; Mak 10:32–34)

31 # Met 20:17–19; Mak 10:32–34; Luk 9:22,44–45; 17:25 Mahcheva aroi somleinihta ajea asehpiche ankuunga asonei, “Anve, inih in Jerusalem a hangme, ringraanei in miivaa Asa kupa rella amijihkha tlungusa. 32Alamva amahta Jental jaat ankuunga amilantu, mahche aminuihtu khatkho injakna veia aminangche atakchunga amichiltu, 33amahta sunga amirattu, anthattu, che nithum tihpia amah in veikhat ringtu.” 34Mahtrong chuta anmah in rom cheknohsei; mahchu ankuungnata mathup a asih, anmah in lou theihnohsei.

Doh a Aksaa Mitcho Inkhatta Jisu in Amthrat

(Met 20:29–34; Mak 10:46–52)

35 # Met 20:29–34; Mak 10:46–52; Met 9:27–31; Mak 8:22; Jon 9:1–7 Amah in Jerikho annai in, mitcho inkhat in lamkomma inbok a dohnih a am; 36miitam in ansehhou chuta atheih in, mahchu jangthlou meta aruiei. 37Anmah in akuunga antih, “Najareth na Jisu in lamma seh.” 38Chunna amah in ongsa, “Devit vaa Asa kupa Jisu, keita niril kamvolro.” 39Amah amaa a akseh in rim amrota ansaal; chuta “Devitva Asa kupa, keita niril kamvolro!” ta amah in ral ralla ongsa. 40Cheva Jisu in ngirra miichuta amahkuunga anthlennatu jathang amlanei, akuunga annai in, amahta arui, 41“Nang turella jangnamtlohja angme?” Amah in ason, “Akpu, kei kimit i kimuhjahang.” 42#Met 9:22; Mak 5:34; 10:52; Luk 7:50; 8:48; 17:19Chunna Jisu in akuunga ason, “Nimitchu muhrosa; nangin namlot kharella nangta namthratpei.” 43Cheva kak hang amitchu muh achekpei mahche amah aknuta juih a Ringpu ta paar amthratpei; mii naamtein mahkhata anmuh in, Ringpu ta amipaakpei.

Currently Selected:

LUKE 18: TARAOBSI

Highlight

Copy