Matiu 28

Jiszs Tulz-mop Mz Nzbzngr

Mak 16:1-10; Luk 24:1-12; Jon 20:1-10

1Mz nibr Sabat kc, mz nourla kxtopwz mz Sade, Mxri kc Makdala x kzdq kz Mxri nzvzng mz nzoklati-krdr butqbr kc tzyrtzmqngr Jiszs. 2Zbz kzdq enjrl ne Gct vzom Heven, vzmim nengq kxetu. Vztr mz butqbr kc, x sc tqalqlipxpele rplz kc etu tzapqbrtrngr naonrx kc, x sc tqwxbuopem elr. 3Nzpnapr-krde apule bzlrpc, x lrpz scde prkitxpx apule nqbya ngr nrc. 4Ncblo kcng tzaukzng nzmwxlrng x nzrnrcti-lzbqng x nztaong mz drtc' nzapulr ncblo kxnzbzpeng.

5Enjrl kc rpibzle mz olvz kcng kx, “Bzkq mwxlramu. Krlzpebo kx rtangrtiamu Jiszs kc tztqlvztr mz kros. 6Tryrbqpeu mrka, murde lupe mou, da kc tqwai nzpi-krbzlele bamu. Vzmamu x mc-zpwxamu mrkc tzayrbqngr namz ngrde. 7A' yzlu-aniamu x pibzmu mz ncblo nedeng kx, ‘Jiszs tulzpe-mop mz nzbzngr, x sa nartwayzpe kai Gzlili. Sa narmctiamu nide elr.’ Nrpa kx napibo bamu delape.” 8Zbz olvz kcng sc tzngrlr-anipeng mz nzpi-krmlrle bagr. Kxmule-esz' nzmwxlrbeng, a' drtwrdr elalz-zlwz-kzp.

9A' mz nzvz-krdr, nzpwrkilvc-ngrdr nzadcpx-lzbq-krbz Jiszs badr. X sc tqrpipebzle badr kx, “Nimu la!” Nzvzmqng x nzyrngzobzng bade, x nzmaletrpzlr nanycde, mz nzangio-krdr nide. 10Zbz rpibzle badr kx, “Bzkq mwxlramu. A' vznamu x pibzmu mz mzlengeng kx navzng Gzlili x sa narmctilr ninge elr.”

Nzrlwakr Ncblo Kcng Tzaukzng

11Mzli kc tzvzngr olvz kcng, ncblo kcng tzaukzng nztulzmqng, x kzdung nidr nzvzng Jerusalem, sc tzrlwape-ngrbzlr mz kxnzetu rdr pris da amrlx kcng tqprtz. 12Zbz kxnzetu rdr pris nzyrlwr-lxblrng badr lrtzlvzng x sc tzryrlqpeng drtwr. Mz drtwr lc, nzrkabzng trau kxkqlu mz ncblo ngr vea kcng. 13X nzrpibzlr badr kx, “Mz da kc tqprtz, napibzmu mz leplz kx, ‘Ncblo nedeng nzvzmqng mz nrlckxbq mzli kc tqmwi-ngrgr x nzpnatilr nrkrdrtqde.’ 14X nzmu Paelzt, kxetu rmu kc tqngi Gavzna naxlrle da lc, sa naycmnebzkr bade ma tzayrplapxlr nimu.” #28:14 Gavzna nide kxetu r gzpman ngr Rom kx myapxbz mrkc Israel. Ncblo ngr vea lcng trnzyatrpwzung mz da kc tqale enjrl. A' nzmu napibzlr mz leplz kx krlc enjrl, rblx nzlxngiti-krdrle. A' nzmu napibzlr kx nzmwing, rblx kz nzlxngiti-krdrle, murde ncblo ngr vea ne Rom bzkq nzmwing mz mzli r nzwzngr. X nzmu kxnzetu rdrng naxlrlrle, na-adwatrlr nidr mz presin. Kxmule-esz', a' nzmu nzpxtxpx-ngrdr nzpipx-krdr kx nzmwing, kxnzetu r lr Jiu lcng ma na-adwatr-kzlr nidr mz presin, murde trnzalelru nzwz-krdr.

15Mz nzmu-krde lcde, ncblo ngr vea lcng nztwzlr trau kcng x nzvz-nqblqlr natq pris kcng. X krlc be kx nzyapwxtine zvz mz mzlir lr Jiu, vz-krlzmle mzli ka tqyr-ngrne buk lc.

Nzwzngr Kx Myapx Kx Kapx Jiszs

Mak 16:14-18; Luk 24:36-49; Jon 20:19-23; Aposol 1:6-8

16Nigr kcng nzpnu-esz'-nrade-esz' (11) vzkr Gzlili mz newz kc tqpim Jiszs navzdz-ngrgr. 17Mzli kc tqmc-ngrgr nide, angiokr nide, kxmule-esz' kzdung nigr drtwrdr litrbepz bade. 18Jiszs vzm bagr x rpimle kx, “Gct aprcpemle bange zmatq mz doa x da amrlx Heven x mz nrlc ka. 19Mz nzmu-krde lcde, vznamu mz zmatq rnge. X okatramu leplz ngr mrkcng kqlu x natq amrlx mz nrlc tulvzo mz nzvz-nqblq-krdr ninge. X awrkxtramu nidr mz drtq Gct mz nzngini-krde Trte, Mrlx, x Mqngrkxtr. 20X alvztramu nidr mz nzvz-nqblq-krdr natq amrlx kcng tqkabo bamu. X sa namnc-zvzbo bamu mz nzokatr-krnge nimu, navz nakrlzbzle mzli kc tqmcpx Trte nayzlu-ngr-mopc'.” #28:20 Drtq Gct lc esz', murde Gct esz'txu, a' leplz ngrde tq, kc tzrpibz Tqtrbz. Delc nzycmnengr lc trvz-nqblqleu nzycmnengr kc tqxlr-zvzku mz nzrpingr kx, ‘Mz drtq Gct Trte, Mrlxde, x Mqngrkxtr.’ O ‘mz drtq Gct Trte, Gct Mrlxde, x Gct Mqngrkxtr.’ Murde nzxlrngr opxm kx drtq tq o tropxu, a' nangi drtq kxesz'. Mz Nzryrngrkxtr, ngalrde lc txpwz kx pi-zpwxle leplz kcng tq mz Gct kc esz' mz mzli kcpwz. A' mcku Tqtrbz kz mz nzwrkxtrkr Jiszs mz Matiu 3:16-17, Mak 1:10-11, x Luk 3:22. Mc kz natq kxtopwz elr vzmi Aposol 1:8; 2:38, x 8:16. Leplz nzkqlung nzlxngitilr kx aposol kcng nzrngiscng zmatq kx myapxbz mz nigu kcng tzrlxngiti-belqng. A' Jiszs pibzle badr kx nzalvztr-krdr leplz navz-nqblqlr natq kcng amrlx tqkabzle badr, vzmi nzamrlzngr nrkrdrtq kx nzyagoxng, nzalu-mou-ngrm kxnzbzng, nzrmaszlrpxngr drka', x kzdung kz da kxnzmulr lcng. Mz nzmu-krde lcde, me pnzm drtwr Jiszs bagu, nigu kxnzrlxngiting amrlx navz-nqblq-kzku natq kcng tqkabzle mz aposol. Murde rngiscgu zmatq kcpwz tqkabzle badr, krlc zmatq ngr Mqngrkxtr.

Currently Selected:

Matiu 28: ntu

Highlight

Copy