ꠔꠃꠞꠣꠔ ১: ꠙꠄꠖꠣ ꠘꠣꠝꠣ 10
10
ꠢꠎꠞꠔ ꠘꠥꠢ (ꠀ꠩) ꠅꠞ ꠈꠣꠘ꠆ꠖꠣꠘ-ꠘꠣꠝꠣ
1ꠘꠥꠢꠞ ꠙꠥꠀꠂꠘ ꠡꠣꠝ, ꠢꠣꠝ, ꠀꠞ ꠁꠀꠚꠦꠔꠞ ꠈꠣꠘ꠆ꠖꠣꠘꠞ ꠛꠄꠀꠘ। ꠛꠣꠘꠞ ꠛꠣꠖꠦ ꠔꠣꠞꠣꠞ ꠙꠥꠀ-ꠙꠥꠠꠤ ꠅꠁꠍꠟꠣ।
2ꠁꠀꠚꠦꠔꠞ ꠙꠥꠀꠂꠘ꠆ꠔꠞ ꠘꠣꠝ: ꠉꠥꠝꠞ, ꠝꠣꠎꠥꠎ, ꠝꠣꠖꠄ, ꠁꠀꠛꠣꠘ, ꠔꠥꠛꠟ, ꠝꠦꠡꠇ ꠀꠞ ꠔꠤꠞꠡ। 3ꠉꠥꠝꠞꠞ ꠙꠥꠀꠂꠘ: ꠅꠡ꠆ꠇꠤꠘꠡ, ꠞꠤꠚꠔ ꠀꠞ ꠔꠥꠉꠞ꠆ꠝ। 4ꠁꠀꠛꠣꠘꠞ ꠙꠥꠀꠂꠘ ꠅꠁꠟꠣ: ꠁꠟꠤꠡꠣꠢ, ꠔꠞ꠆ꠡꠤꠡ, ꠇꠤꠔ꠆ꠔꠤꠝ ꠀꠞ ꠞꠥꠖꠣꠘꠤꠝ। 5ꠄꠞꠣꠞ ꠛꠋꠡꠞ ꠝꠣꠘꠡꠦ ꠘꠣꠘꠣꠘ ꠎꠣꠔꠞ ꠝꠣꠔ-ꠇꠕꠣ, ꠙꠞꠤꠛꠣꠞ ꠀꠞ ꠎꠣꠔ ꠢꠤꠡꠣꠛꠦ ꠖꠞꠤꠀꠞ ꠙꠣꠞꠞ ꠘꠣꠘꠣꠘ ꠖꠦꠡꠅ ꠍꠤꠔ꠆ꠞꠤ ꠉꠦꠟꠣ।
6ꠢꠣꠝꠞ ꠙꠥꠀꠂꠘ꠆ꠔꠞ ꠘꠣꠝ: ꠇꠥꠡ, ꠝꠤꠡꠞ, ꠙꠥꠐ ꠀꠞ ꠇꠦꠘꠣꠘ। 7ꠇꠥꠡꠞ ꠙꠥꠀꠂꠘ: ꠍꠛꠣ, ꠢꠛꠤꠟꠣ, ꠍꠙ꠆ꠔꠣ, ꠞꠄꠝꠣ ꠀꠞ ꠍꠙ꠆ꠔꠇꠣ। ꠞꠄꠝꠣꠞ ꠙꠥꠀꠂꠘ ꠅꠁꠟꠣ: ꠡꠣꠛꠣ ꠀꠞ ꠖꠖꠣꠘ। 8ꠇꠥꠡꠞ ꠄꠇ ꠙꠥꠀꠞ ꠘꠣꠝ ꠀꠍꠤꠟ ꠘꠝꠞꠥꠖ। ꠅꠃ ꠘꠝꠞꠥꠖ ꠖꠥꠘꠤꠀꠁꠔ ꠙꠄꠟꠥꠀꠘ ꠅꠁꠀ ꠃꠑꠍꠤꠟ। 9ꠝꠣꠛꠥꠖꠞ ꠉꠦꠍꠦ ꠢꠦ ꠀꠍꠤꠟ ꠙꠄꠟꠥꠀꠘ ꠡꠤꠇꠣꠞꠤ। ꠄꠞꠟꠣꠉꠤ ꠒꠣꠇꠞ ꠇꠕꠣ ꠀꠍꠦ, ꠝꠣꠘꠥꠡꠐꠣ ꠎꠦꠘ ꠝꠣꠛꠥꠖꠞ ꠍꠣꠝꠘꠦ ꠘꠝꠞꠥꠖꠞ ꠟꠣꠈꠣꠘ ꠙꠄꠟꠥꠀꠘ ꠡꠤꠇꠣꠞꠤ। 10ꠡꠤꠘꠣꠞ ꠖꠦꠡꠞ ꠛꠣꠛꠤꠟ, ꠄꠞꠇ, ꠅꠇ꠆ꠇꠖ ꠀꠞ ꠇꠟꠘꠤ ꠘꠣꠝꠞ ꠐꠣꠃꠘ ꠅꠇꠟ ꠟꠁꠀ ꠢꠦ ꠛꠣꠖꠡꠣꠁ ꠡꠥꠞꠥ ꠇꠞꠟ। 11ꠅꠘ ꠕꠣꠇꠤ ꠔꠣꠞ ꠞꠣꠁꠎ꠆ꠎ ꠛꠣꠠꠤꠀ ꠀꠡꠤꠞꠤꠀ ꠖꠦꠡ ꠙꠞ꠆ꠎꠘ꠆ꠔ ꠉꠦꠟ। ꠢꠈꠣꠘꠞ ꠘꠤꠘꠜ, ꠞꠢꠛꠔꠙꠥꠞ, ꠇꠦꠟꠢ 12ꠀꠞ ꠞꠦꠡꠘ ꠘꠣꠝꠞ ꠐꠣꠃꠘ ꠅꠇꠟꠅ ꠔꠣꠞ ꠛꠣꠘꠣꠁꠟ। ꠞꠦꠡꠘ ꠀꠍꠤꠟ ꠘꠤꠘꠜ ꠀꠞ ꠇꠦꠟꠢꠞ ꠝꠣꠎꠈꠣꠘꠅ, ꠁ ꠔꠤꠘꠐꠣꠄ ꠝꠤꠟꠤꠀ ꠄꠇ ꠛꠤꠞꠣꠐ ꠡꠢꠞ ꠅꠁꠟ। 13ꠝꠤꠡꠞꠞ ꠛꠋꠡ ꠅꠁꠟꠣ ꠅꠃ ꠎꠣꠔ ꠅꠇꠟ: ꠟꠥꠖꠤ, ꠅꠘꠣꠝꠤ, ꠟꠢꠣꠛꠤ, ꠘꠙ꠆ꠔꠥꠢꠤ, 14ꠙꠕ꠆ꠞꠥꠡꠤ, ꠇꠡꠟꠥꠢꠤ, ꠀꠞ ꠇꠙ꠆ꠔꠥꠞꠤ, ꠅꠃ ꠇꠙ꠆ꠔꠥꠞ ꠖꠤꠙ ꠕꠣꠇꠤ ꠚꠤꠟꠤꠡ꠆ꠔꠤꠘꠤ ꠅꠇꠟ ꠛꠣꠞ ꠅꠁꠀ ꠀꠁꠟꠣ।
15ꠇꠦꠘꠣꠘꠞ ꠛꠠ ꠙꠥꠀ ꠍꠤꠖꠘ, ꠛꠣꠖꠞ ꠙꠥꠀ ꠢꠤꠐ, ꠢꠤꠐ꠆ꠐꠤ ꠎꠣꠔꠤꠞ ꠝꠥꠟ ꠛꠣꠚ। 16ꠇꠦꠘꠣꠘ ꠀꠍꠟꠣ ꠎꠤꠛꠥꠎꠤ, ꠀꠝꠥꠞꠤ, ꠉꠤꠞ꠆ꠉꠣꠡꠤ, 17ꠢꠤꠛ꠆ꠛꠤ, ꠀꠞ꠆ꠇꠤ, ꠍꠤꠘꠤ, 18ꠀꠞ꠆ꠛꠣꠖꠤ, ꠎꠝꠣꠞꠤ ꠀꠞ ꠢꠣꠝꠣꠔꠤ, ꠅꠃ ꠎꠣꠔꠤ ꠅꠇꠟꠞ ꠝꠥꠟ ꠛꠣꠚ। ꠢꠦꠡꠦ ꠅꠃ ꠇꠦꠘꠣꠘꠤ ꠅꠇꠟ ꠌꠣꠁꠞꠅꠛꠣꠄ ꠍꠤꠔ꠆ꠞꠤ ꠉꠦꠍꠟꠣ। 19ꠍꠤꠖꠘ ꠐꠣꠃꠘ ꠕꠣꠇꠤ ꠉꠦꠞꠣꠞꠞ ꠝꠥꠈꠣ ꠉꠣꠎꠣ ꠙꠞ꠆ꠎꠘ꠆ꠔ, ꠀꠞ ꠉꠣꠎꠣ ꠕꠣꠇꠤ ꠍꠣꠖꠥꠝ, ꠀꠝꠥꠞꠣ, ꠅꠖꠝꠣ ꠀꠞ ꠍꠛꠂꠁꠝ ꠎꠣꠅꠀꠞ ꠙꠕꠦ ꠟꠣꠡꠣ ꠙꠞ꠆ꠎꠘ꠆ꠔ ꠇꠦꠘꠣꠘꠤ ꠅꠇꠟꠞ ꠞꠣꠎꠔ꠆ꠔ ꠀꠍꠤꠟ। 20ꠙꠞꠤꠛꠣꠞ, ꠝꠣꠔ-ꠇꠕꠣ, ꠖꠦꠡ ꠀꠞ ꠎꠣꠔ ꠢꠤꠡꠣꠛꠦ ꠄꠞꠣ ꠀꠍꠤꠟ ꠢꠣꠝꠞ ꠈꠣꠘ꠆ꠖꠣꠘ।
21ꠁꠀꠚꠦꠔꠞ ꠛꠠ ꠜꠣꠁ ꠡꠣꠝꠞꠅ ꠙꠥꠀ-ꠙꠥꠠꠤꠘ ꠅꠁꠍꠟꠣ। ꠡꠣꠝ ꠅꠁꠟꠣ ꠀꠛꠦꠞ ꠀꠞ ꠔꠣꠞ ꠈꠣꠘ꠆ꠖꠣꠘꠞ ꠛꠣꠚ। 22ꠡꠣꠝꠞ ꠙꠥꠀꠂꠘ꠆ꠔꠞ ꠘꠣꠝ: ꠁꠟꠣꠝ, ꠀꠡꠥꠞ, ꠀꠞ꠆ꠚꠣꠇꠍꠣꠖ, ꠟꠥꠖ ꠀꠞ ꠅꠞꠣꠝ। 23ꠅꠞꠣꠝꠞ ꠙꠥꠀꠂꠘ: ꠃꠎ, ꠢꠥꠟ, ꠉꠦꠕꠞ ꠀꠞ ꠝꠡ। 24ꠀꠞ꠆ꠚꠣꠇꠍꠣꠖꠞ ꠙꠥꠀ ꠡꠣꠟꠦꠈ, ꠀꠞ ꠡꠣꠟꠦꠈꠞ ꠙꠥꠀꠞ ꠘꠣꠝ ꠀꠛꠦꠞ। 25ꠀꠛꠦꠞꠞ ꠖꠥꠁ ꠙꠥꠀ ꠅꠁꠍꠟꠣ, ꠄꠇꠎꠘꠞ ꠘꠣꠝ ꠚꠣꠟꠦꠎ [ꠝꠣꠘꠤ, ꠀꠟꠉꠣ], ꠔꠣꠘ ꠡꠝꠄ ꠖꠥꠘꠤꠀ ꠀꠟꠉ ꠅꠁꠍꠤꠟ ꠇꠞꠤ ꠔꠣꠘ ꠅꠃ ꠘꠣꠝ ꠅꠁꠟ। ꠚꠣꠟꠦꠎꠞ ꠜꠣꠁꠞ ꠘꠣꠝ ꠁꠀꠇꠔꠣꠘ। 26ꠁꠀꠇꠔꠣꠘꠞ ꠙꠥꠀꠂꠘ ꠅꠁꠟꠣ: ꠅꠟꠝꠥꠖꠖ, ꠡꠦꠟꠚ, ꠢꠣꠎꠞꠣꠝꠣꠅꠔ, ꠎꠦꠞꠢ, 27ꠢꠖꠥꠞꠣꠝ, ꠃꠎꠣꠟ, ꠖꠤꠇ꠆ꠟꠣ, 28ꠅꠛꠟ, ꠅꠛꠤꠝꠣꠁꠄꠟ, ꠡꠣꠛꠣ, 29ꠅꠚꠤꠞ, ꠢꠛꠤꠟꠣ ꠀꠞ ꠎꠥꠛꠛ। ꠄꠞꠣ ꠢꠇꠟ ꠅꠁꠟꠣ ꠁꠀꠇꠔꠣꠘꠞ ꠙꠥꠀꠂꠘ। 30ꠝꠦꠡꠣ ꠕꠣꠇꠤ ꠙꠥꠛꠦꠖꠤ ꠍꠦꠚꠣꠞꠅ ꠎꠣꠅꠀꠞ ꠙꠕꠅ ꠎꠦ ꠙꠣꠠꠤ ꠎꠣꠉꠣ ꠀꠍꠦ, ꠅꠘꠅ ꠔꠣꠞꠣ ꠕꠣꠇꠔꠣ। 31ꠙꠞꠤꠛꠣꠞ, ꠝꠣꠔ-ꠇꠕꠣ, ꠖꠦꠡ, ꠀꠞ ꠎꠣꠔ ꠢꠤꠡꠣꠛꠦ ꠄꠞꠣ ꠅꠁꠟꠣ ꠡꠣꠝꠞ ꠈꠣꠘ꠆ꠖꠣꠘ।
32ꠎꠣꠔ ꠀꠞ ꠛꠋꠡ ꠢꠤꠡꠣꠛꠦ ꠄꠞꠣ ꠅꠁꠟ ꠘꠥꠢꠞ ꠙꠥꠀꠂꠘ꠆ꠔꠞ ꠙꠞꠤꠛꠣꠞ। ꠛꠣꠘꠞ ꠛꠣꠖꠦ ꠄꠞꠣꠞ ꠛꠋꠡ ꠅꠇꠟꠦ ꠘꠣꠘꠣꠘ ꠎꠣꠔ ꠅꠁꠀ ꠀꠡ꠆ꠔꠣ ꠖꠥꠘꠤꠀꠁꠔ ꠍꠤꠔ꠆ꠞꠤ ꠉꠦꠍꠟꠣ।
Currently Selected:
ꠔꠃꠞꠣꠔ ১: ꠙꠄꠖꠣ ꠘꠣꠝꠣ 10: sylN
Highlight
Share
Copy
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© Ahle Kitab Society. All rights reserved.