ꠔꠃꠞꠣꠔ ১: ꠙꠄꠖꠣ ꠘꠣꠝꠣ 17
17
ꠀꠛ꠆ꠞꠣꠝ ꠕꠣꠇꠤ ꠘꠄꠀ ꠘꠣꠝ ꠁꠛ꠆ꠞꠣꠢꠤꠝ
1ꠀꠛ꠆ꠞꠣꠝꠞ ꠘꠤꠞꠣꠘ꠆ꠘꠛ꠆ꠛꠁ ꠛꠞꠍꠞ ꠡꠝꠄ ꠝꠣꠛꠥꠖꠦ ꠢꠤꠞꠛꠣꠞ ꠔꠣꠘꠞꠦ ꠖꠤꠖꠣꠞ ꠖꠤꠀ ꠇꠁꠟꠣ, “ꠀꠝꠤ ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣ। ꠔꠥꠝꠤ ꠀꠝꠣꠞ ꠖꠦꠅꠀ ꠙꠕꠅ ꠕꠣꠇꠤꠀ ꠇꠣꠝꠤꠟ ꠅꠅ। 2ꠀꠝꠤ ꠔꠥꠝꠣꠞ-ꠀꠝꠣꠞ ꠝꠣꠎꠦ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ ꠀꠞ ꠔꠥꠝꠣꠞ ꠅꠀꠞꠤꠡ ꠈꠥꠛ ꠛꠦꠡꠤ ꠛꠣꠠꠣꠁ ꠖꠤꠝꠥ।” 3ꠔꠦꠃ ꠀꠛ꠆ꠞꠣꠝ ꠍꠁꠎꠖꠣꠔ ꠙꠠꠟꠣ, ꠀꠞ ꠀꠟ꠆ꠟꠣꠄ ꠔꠣꠘ ꠟꠉꠦ ꠛꠣꠔꠌꠤꠔ ꠇꠞꠤ ꠇꠁꠟꠣ, 4“ꠔꠥꠝꠣꠞ ꠟꠉꠦ ꠀꠝꠤ ꠅꠀꠖꠣ ꠇꠣꠁꠝ ꠇꠞꠤꠀꠞ, ꠔꠥꠝꠤ ꠛꠃꠔ ꠎꠣꠔꠤꠞ ꠝꠥꠟ ꠛꠣꠚ ꠅꠁꠛꠣꠄ। 5ꠔꠥꠝꠣꠞꠦ ꠀꠞ ꠀꠛ꠆ꠞꠣꠝ [ꠝꠣꠘꠤ, ꠛꠠ ꠛꠣꠚ] ꠇꠁꠀ ꠒꠣꠇꠣ ꠅꠁꠔ ꠘꠣꠄ, ꠅꠈꠘ ꠕꠣꠇꠤ ꠔꠥꠝꠣꠞ ꠘꠣꠝ ꠅꠁꠟ ꠁꠛ꠆ꠞꠣꠢꠤꠝ [ꠝꠣꠘꠤ, ꠛꠃꠔ ꠎꠣꠔꠤꠞ ꠛꠣꠚ], ꠀꠝꠤ ꠔꠥꠝꠣꠞꠦ ꠛꠃꠔ ꠎꠣꠔꠤꠞ ꠝꠥꠟ ꠛꠣꠚ ꠛꠣꠘꠣꠁꠟꠣꠝ। 6ꠀꠝꠤ ꠔꠥꠝꠣꠞꠦ ꠛꠃꠔ ꠚꠟꠀꠟꠣ ꠇꠞꠝꠥ, ꠀꠞ ꠔꠥꠝꠣꠞ ꠝꠣꠎ ꠕꠘꠦ ꠛꠃꠔ ꠎꠣꠔꠤ ꠀꠞ ꠛꠣꠖꠡꠣ ꠅꠇꠟ ꠙꠄꠖꠣ ꠇꠞꠝꠥ। 7ꠀꠝꠤ ꠔꠥꠝꠣꠞ ꠀꠞ ꠔꠥꠝꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠅꠇꠟꠞ ꠟꠉꠦ ꠎꠦ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ, ꠁꠇꠐꠣ ꠢꠞ-ꠢꠣꠝꠦꠡꠣ ꠛꠅꠀꠁꠟ ꠕꠣꠇꠛ, ꠅꠃ ꠃꠍꠤꠟ꠆ꠟꠣꠄ ꠀꠝꠤ ꠔꠥꠝꠣꠞ ꠀꠞ ꠔꠥꠝꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠅꠇꠟꠞ ꠀꠟ꠆ꠟꠣ ꠅꠁꠝꠥ। 8ꠀꠞ ꠎꠦ ꠇꠦꠘꠣꠘ ꠖꠦꠡꠅ ꠔꠥꠝꠤ ꠅꠈꠘ ꠝꠥꠍꠣꠚꠤꠞ ꠅꠁꠀ ꠕꠣꠇꠞꠣꠄ, ꠁ ꠙꠥꠞꠣꠐꠣꠃ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠢꠞ-ꠢꠣꠝꠦꠡꠣꠇꠥꠞ ꠖꠈꠟꠞ ꠟꠣꠉꠤ ꠖꠤꠝꠥ। ꠀꠝꠤ ꠔꠣꠞꠣꠞ ꠀꠟ꠆ꠟꠣ ꠅꠁꠝꠥ।”
ꠝꠍꠟꠝꠣꠘꠤ ꠇꠣꠝꠞ ꠌꠥꠇ꠆ꠔꠤ
9ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠔꠥꠝꠤ ꠀꠝꠣꠞ ꠇꠣꠁꠝ ꠇꠞꠣ ꠌꠥꠇ꠆ꠔꠤ ꠝꠣꠘꠤꠅ, ꠔꠥꠝꠤ ꠀꠞ ꠔꠥꠝꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠅꠇꠟꠦꠅ ꠝꠣꠘꠤꠀ ꠌꠟꠤꠅ। 10ꠔꠥꠝꠞꠣꠞ ꠟꠉꠦ ꠀꠞ ꠔꠥꠝꠞꠣꠞ ꠅꠀꠞꠤꠡꠞ ꠟꠉꠦ ꠀꠝꠣꠞ ꠅꠃꠟꠣ ꠌꠥꠇ꠆ꠔꠤ ꠇꠣꠁꠝ ꠅꠁꠟ, ꠔꠥꠝꠞꠣꠞ ꠢꠇꠟ ꠛꠦꠐꠣꠁꠘ꠆ꠔꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠔꠦ ꠅꠁꠛ। 11ꠔꠥꠝꠞꠣ ꠢꠇꠟꠦ ꠘꠤꠎꠞ ꠙꠥꠞꠥꠡ ꠅꠋꠉꠞ ꠝꠥꠈꠣꠞ ꠌꠣꠝꠠꠣ ꠇꠣꠐꠛꠣꠄ। ꠅꠇꠐꠣꠃ ꠔꠥꠝꠞꠣꠞ ꠀꠞ ꠀꠝꠣꠞ ꠝꠣꠎꠦ ꠛꠅꠀꠁꠟ ꠇꠞꠣ ꠌꠥꠇ꠆ꠔꠤꠞ ꠘꠤꠡꠣꠘꠣ। 12ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤꠀ ꠔꠥꠝꠞꠣꠞ ꠢꠇꠟ ꠙꠥꠀꠂꠘ꠆ꠔꠞꠦ ꠎꠘꠝꠞ ꠀꠐ ꠖꠤꠘꠞ ꠖꠤꠘ ꠝꠍꠟꠝꠣꠘꠤ ꠇꠞꠣꠁꠛꠣꠄ। ꠎꠣꠞꠣ ꠔꠥꠝꠣꠞ ꠅꠀꠞꠤꠡ ꠘꠣꠄ, ꠈꠣꠟꠤ ꠔꠥꠝꠞꠣꠞ ꠛꠣꠠꠤꠔ ꠎꠘꠝꠤꠍꠦ ꠛꠣ ꠔꠥꠝꠞꠣꠞ ꠈꠞꠤꠖꠣ ꠉꠥꠟꠣꠝ, ꠔꠣꠞꠣꠞꠅ ꠝꠍꠟꠝꠣꠘꠤ ꠇꠞꠣꠘꠤ ꠟꠣꠉꠛ। 13ꠔꠥꠝꠞꠣꠞ ꠊꠞꠅ ꠎꠘꠝꠤꠍꠦ ꠛꠣ ꠈꠞꠤꠖꠣ ꠉꠥꠟꠣꠝ ꠅꠇꠟꠞꠦ ꠘꠤꠌꠄ ꠝꠍꠟꠝꠣꠘꠤ ꠇꠞꠣꠁꠛꠣꠄ। ꠔꠥꠝꠞꠣꠞ ꠡꠞꠤꠟꠅ ꠎꠣꠞꠤ ꠇꠞꠣ ꠀꠝꠣꠞ ꠁ ꠌꠥꠇ꠆ꠔꠤ ꠢꠞ-ꠢꠣꠝꠦꠡꠣꠇꠥꠞ ꠌꠥꠇ꠆ꠔꠤ ꠅꠁꠛ। 14ꠎꠦ ꠛꠦꠐꠣꠄ ꠙꠥꠞꠥꠡ ꠅꠋꠉꠞ ꠝꠥꠈꠣꠞ ꠌꠣꠝꠠꠣ ꠇꠣꠐꠔ ꠘꠣꠄ, ꠔꠣꠞꠦ ꠔꠣꠞ ꠎꠣꠔꠤꠞ ꠝꠣꠎ ꠕꠣꠇꠤ ꠚꠥꠍꠤꠀ ꠚꠣꠟꠣꠁꠟ ꠅꠁꠛ। ꠢꠦ ꠔ ꠀꠝꠣꠞ ꠌꠥꠇ꠆ꠔꠤꠞ ꠛꠞꠈꠦꠟꠣꠚ ꠇꠞꠍꠦ।”
15ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠔꠥꠝꠣꠞ ꠛꠤꠛꠤꠞꠦ ꠀꠞ ꠍꠣꠞꠣ ꠇꠁꠀ ꠒꠣꠇꠤꠅ ꠘꠣ। ꠄꠘ ꠘꠣꠝ ꠅꠁꠛ ꠍꠣꠄꠞꠣ [ꠝꠣꠘꠤ, ꠞꠣꠘꠤ]। 16ꠀꠝꠤ ꠔꠣꠁꠞꠦ ꠛꠞꠇꠔ ꠘꠣꠎꠤꠟ ꠇꠞꠝꠥ, ꠔꠣꠁꠞ ꠊꠞꠅ ꠔꠥꠝꠣꠞ ꠄꠇ ꠙꠥꠀ ꠖꠤꠝꠥ। ꠀꠞ ꠛꠞꠇꠔ ꠘꠣꠎꠤꠟ ꠇꠞꠤꠀ ꠛꠃꠔ ꠎꠣꠔꠤꠞ ꠝꠥꠟ ꠝꠣ ꠛꠣꠘꠣꠁꠝꠥ, ꠀꠞ ꠛꠃꠔ ꠝꠥꠟ꠆ꠟꠥꠇꠞ ꠛꠣꠖꠡꠣ ꠅꠇꠟꠅ ꠙꠄꠖꠣ ꠅꠁꠛꠣ।” 17ꠅꠃ ꠁꠛ꠆ꠞꠣꠢꠤꠝꠦ ꠝꠣꠐꠤꠔ ꠍꠁꠎꠖꠣꠔ ꠙꠠꠤ ꠀꠡꠤꠀ ꠝꠘꠦ ꠝꠘꠦ ꠇꠁꠟꠣ, “ꠢꠣꠍꠣꠃ ꠄꠇ-ꠡ ꠛꠍꠞꠞ ꠛꠥꠠꠣꠞ ꠢꠥꠞꠥꠔ꠆ꠔꠣ ꠅꠁꠔ ꠘꠤ! ꠔꠣ-ꠅ ꠘꠛ꠆ꠛꠁ ꠛꠍꠞꠞ ꠛꠥꠠꠤ ꠍꠣꠄꠞꠣꠞ ꠙꠦꠐꠅ?” 18ꠔꠣꠁꠘ ꠀꠟ꠆ꠟꠣꠞꠦ ꠇꠁꠟꠣ, “ꠀꠢ! ꠁꠍꠝꠣꠁꠟꠉꠥ ꠎꠣꠘꠥ ꠔꠥꠝꠣꠞ ꠞꠢꠝꠔꠦ ꠛꠣꠌꠤꠀ ꠕꠣꠇꠦ।” 19ꠅꠃ ꠀꠟ꠆ꠟꠣꠄ ꠚꠞꠝꠣꠁꠟꠣ, “ꠑꠤꠇ ꠀꠍꠦ। ꠅꠁꠟꠦ ꠔꠥꠝꠣꠞ ꠛꠤꠛꠤ ꠍꠣꠄꠞꠣꠞ ꠙꠦꠐꠅ ꠢꠣꠍꠣꠃ ꠔꠥꠝꠣꠞ ꠙꠥꠀ ꠅꠁꠛ, ꠔꠥꠝꠤ ꠔꠣꠞ ꠘꠣꠝ ꠞꠣꠈꠛꠣꠄ ꠁꠍꠢꠣꠇ [ꠝꠣꠘꠤ, ꠢꠦ ꠀꠡꠦ]। ꠔꠣꠞ ꠟꠉꠦ ꠀꠝꠣꠞ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ, ꠔꠣꠞ ꠅꠀꠞꠤꠡꠞ ꠟꠉꠦ ꠁꠇꠐꠣ ꠀꠝꠣꠞ ꠢꠞ-ꠢꠣꠝꠦꠡꠣꠇꠥꠞ ꠌꠥꠇ꠆ꠔꠤ ꠅꠁꠛ। 20ꠀꠞ ꠁꠍꠝꠣꠁꠟꠞ ꠟꠣꠉꠤꠅ ꠔꠥꠝꠣꠞ ꠖꠥꠀ ꠢꠥꠘꠍꠤ। ꠢꠥꠘꠅ, ꠀꠝꠤ ꠔꠣꠞꠦꠅ ꠛꠞꠇꠔ ꠘꠣꠎꠤꠟ ꠇꠞꠝꠥ ꠀꠞ ꠔꠣꠞꠦ ꠚꠟꠀꠟꠣ ꠇꠞꠤꠀ ꠛꠃꠔ ꠛꠣꠠꠣꠁ ꠖꠤꠝꠥ। ꠢꠦ ꠛꠣꠞꠅꠎꠘ ꠞꠣꠎꠣꠞ ꠛꠣꠚ ꠅꠁꠛ ꠀꠞ ꠔꠣꠞ ꠝꠣꠎꠦꠖꠤ ꠀꠝꠤ ꠛꠤꠞꠣꠐ ꠎꠣꠔꠤ ꠙꠄꠖꠣ ꠇꠞꠝꠥ। 21ꠍꠣꠝꠘꠞ ꠛꠞꠍ ꠁ ꠌꠣꠘ꠆ꠖꠅ ꠍꠣꠄꠞꠣꠞ ꠊꠞꠅ ꠔꠥꠝꠣꠞ ꠎꠦ ꠢꠥꠞꠥꠔ꠆ꠔꠣ ꠅꠁꠛ, ꠢꠃ ꠁꠍꠢꠣꠇꠞ ꠟꠉꠦ ꠀꠝꠤ ꠀꠝꠣꠞ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ।” 22ꠁꠛ꠆ꠞꠣꠢꠤꠝꠞ ꠟꠉꠦ ꠛꠣꠔꠌꠤꠔ ꠡꠦꠡ ꠇꠞꠤꠀ ꠀꠟ꠆ꠟꠣꠄ ꠔꠣꠘ ꠉꠦꠍ ꠕꠣꠇꠤ ꠃꠑꠤꠀ ꠔꠡꠞꠤꠚ ꠘꠤꠟꠣꠉꠤ।
23ꠀꠟ꠆ꠟꠣꠞ ꠢꠥꠇꠥꠝ ꠝꠔ ꠁꠛ꠆ꠞꠣꠢꠤꠝꠦ ꠢꠃ ꠖꠤꠘꠃ ꠁꠍꠝꠣꠁꠟꠞꠦ ꠝꠍꠟꠝꠣꠘꠤ ꠇꠞꠣꠁꠟꠣ। ꠄꠞ ꠟꠉꠦ ꠈꠞꠤꠖꠣ ꠉꠥꠟꠣꠝ ꠅꠇꠟ ꠀꠞ ꠔꠣꠘ ꠛꠣꠠꠤꠔ ꠎꠘꠝꠤꠍꠦ ꠁꠟꠣ ꠢꠇꠟ ꠉꠥꠟꠣꠝꠞꠦ, ꠛꠣꠠꠤꠞ ꠢꠇ꠆ꠇꠟ ꠛꠦꠐꠣꠁꠘ꠆ꠔꠞꠦ ꠝꠍꠟꠝꠣꠘꠤ ꠇꠞꠣꠁꠟꠣ। 24ꠁꠛ꠆ꠞꠣꠢꠤꠝꠞ ꠘꠤꠎꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠡꠝꠄ ꠔꠣꠘ ꠛꠄꠅꠡ ꠀꠍꠤꠟ ꠘꠤꠞꠣꠘ꠆ꠘꠛ꠆ꠛꠁ ꠛꠞꠍ, 25ꠀꠞ ꠔꠣꠘ ꠙꠥꠀ ꠁꠍꠝꠣꠁꠟꠞ ꠛꠄꠅꠡ ꠔꠦꠞꠅ। 26ꠄꠇ ꠖꠤꠘꠦꠃ ꠁꠛ꠆ꠞꠣꠢꠤꠝ ꠀꠞ ꠔꠣꠘ ꠙꠥꠀ ꠁꠍꠝꠣꠁꠟꠞ ꠝꠍꠟꠝꠣꠘꠤ ꠇꠞꠣꠁꠟ ꠅꠁꠟ। 27ꠢꠤ ꠖꠤꠘ ꠛꠣꠠꠤꠞ ꠢꠇꠟ ꠛꠦꠐꠣꠁꠘ꠆ꠔꠞ, ꠎꠣꠞꠣ ꠔꠣꠘ ꠛꠣꠠꠤꠔ ꠎꠘꠝꠤꠍꠤꠟ ꠀꠞ ꠎꠦꠞꠣꠞꠦ ꠛꠤꠖꠦꠡ ꠕꠣꠇꠤ ꠟꠁꠀ ꠀꠘꠍꠂꠘ, ꠁꠔꠣ ꠢꠇꠟꠞꠃ ꠝꠍꠟꠝꠣꠘꠤ ꠇꠣꠝ ꠄꠇꠟꠉꠦ ꠇꠞꠣꠁꠟ ꠅꠁꠟ।
Currently Selected:
ꠔꠃꠞꠣꠔ ১: ꠙꠄꠖꠣ ꠘꠣꠝꠣ 17: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
