Luka 9

Yesu a tum miyari̱m ki̱mi kub chiri burabi̱mu

(Mat 10:5-15; Mar 6:7-13)

1N Yesu a yal miyari̱m ki̱mi kub chiri burabi̱mu a fi wine, a ni chi dukanu ka chaku ki̱fi̱bti, ka berati̱ buri̱ntu. 2Yinu a tum chi ko a ya mwa ni̱bu we Yaa Kwama, a beti̱ bi̱bu a buraburanemu. 3A wu chimi̱n ki̱tele ko, “Ti̱da̱du chi we yayu yinang: Ki̱twalang n ti swe n ti chabtu n ti ka̱mbi̱r ka kuli̱n di̱dori̱ne a bwin di̱du ta donu.#9:3-5 Luk 10:4-11; Nfa 13:51. 4Ti̱swe we lo ni̱bu a mwe a yin chi̱ne, a lami̱nti̱ yo ta du bi̱n di̱ki̱ne. 5Bi̱nu a ko a yiu chimbi̱nu, ti̱chir ti̱du bi̱n di̱ki̱nu, ka yati̱ chire, ti̱bu nani chiyu ke ti̱du chimi̱nti̱ kur chi̱nu. Ti̱tu ka yungdu ki̱fwini Kwama we dur chi̱nu.”

6Fandubi̱bu a ya, ki̱chira di̱du kir, ki̱le ti̱n di̱du kir. N chi ki̱fwa ni̱bu mi̱n ya̱m bi̱li̱m, ki̱bera bi̱bu a burani̱mu we di̱bwa̱l chi̱nu ka nang file.

Yiridu ki̱baddu ka yindu ka n Yesu wure?

(Mat 14:1-12; Mar 6:14-29)

7Yiridu wu ki̱chau mati̱n Ka̱liliye, a nwe chi ka̱ta̱kitu N Yesu ki̱maditu. Chitu a bwa ki̱n di̱ne bi̱kamu ki̱yidu ko, “N Kwama a kuki̱te Yowana wu ki̱ma batisma we bwa,#9:7-8 Mat 16:14; Mar 8:28; Luk 9:19. 8bi̱kamu ki̱yidu ko n Yiliya fa̱ku Kwama a ki̱latewe. Aya bi̱kamu ki̱yidu ko we fa̱kubi̱bu a no we ti̱ti̱ni feredimu, bi̱bu a bwamu, wuka kanodu a ki̱latewe.” 9N Yiridu a yiko. “N Yowana nang wu mang yo ni̱bu a bi dur ki̱ne. Yoye kanodu n wure niko wu beka ma chi ti̱ka̱ta̱ri ti̱te?”

N Yesu a chabi ki̱ni ni̱bu kuniriti tunu

(Mat 14:13-21; Mar 6:30-44; Yow 6:1-14)

10Yo fandu bi̱bu a ki̱lawe, n chi a fwa Yesu mi̱n chitu n chi a maatu. N Yesu a yal chi, a yika wuka fi wu a kwatuwe bi̱n Betsaida, ko ke chi swe n chikun. 11Aya ni̱bu a yim bwanu n Yesu n ti Miyari̱m ki̱mu ki̱yade, n chi a nabu ti̱n. N Yesu a yiu ni̱bu, yinu a fwa chimi̱n ya̱m Yaa Kwamamu. Yinu n ki̱n a bera bi̱bu a buraburanemu. 12Yo di a le, miyari̱m ki̱mu a be we di̱ki̱ne, a yi ki̱n ko, “Yai ni̱bu a beti̱ bi̱nti̱tu ki̱dwangiyu n ti loniyu ke a ya chabti̱tu n ti fa̱ntiyu ka daandiyu. Di̱ne finu n chi̱ni wemi̱ne a ne ni̱buwe.”

13N Yesu a yi chi ko, “N ti̱nde, ti̱ni ni̱bu chabti̱tu.”

N chi a yi ko, “Ne nang medu, di̱ne ni̱ni ki̱ni ki̱danniyi yuunu ti chingiyi yurau. Ka n ke yani ta̱n ni̱bu mi̱n chabte.”

14Kwartaba fikomu a lam kuniriti tunu.

N Yesu a yi miyari̱m ki̱mu ko, “Ti̱yi ni̱bu a sweswe yi kwa̱li ti̱tu wan tunutunui.” 15Miyari̱m ki̱mu a yiti̱ ni̱bu, ni̱bu a swera ti̱n. 16N Yesu a da̱u ki̱danniyi yuunu n ti chi̱ngi yurabiyu, a kuku kabu a di, a twa̱ba̱ buni a wana Kwama, yinu a wulan ki̱daniyu n ti chingiyu a ni miyari̱m ki̱mu, a keran ni̱bu mi̱n. 17Miyari̱m ki̱mu a kera ni̱bumi̱n ti̱n, chabti̱tu a bwi, ni̱bu a chabitu, a lwe kawure. Miyari̱mu a mur ti̱buken ti̱tu a ki̱danni n ti chi̱ngi, ni̱bu a chau, ti̱bukenta dubitu, ti̱ti̱ngriti kub chiri turau.

M Biti̱r a yi ko n Yesu nang Masiya

(Mat 16:13-19; Mar 8:27-29)

18Kaang ki̱daang, n Yesu a swe ki̱kun ki̱ twa̱ba̱ buni miyari̱m ki̱mu a be ya ki̱n. Yo n ki̱n a ri twa̱ba̱ku buniyange, a bi̱u chi ko, “Yo ni̱bu ki̱fwa ya̱mu we dur mi̱ne, ki̱yidu ko mi̱n n wure?”

19Miyari̱m ki̱mu a yi ki̱n ko, “Bi̱kamu ki̱yidu ko, m mun nang Yowana naba Batisma wu a bwa a ki̱latewe, bi̱kamu ko fa̱ku Yiliya wu a ki̱latewe, bi̱kamu ko kano wuka we fa̱kubu Kwamamu feredi a no bwamu a ki̱latewe.”#9:19 Mat 14:1-2; Mar 6:14-15; Luk 9:7-8.

20Yinu n Yesu a yi chi ko, “N ti̱nde? Ti̱yidu ko mi̱n n wure?”

M Biti̱r a ke ki̱mi̱n ko, “Mun nang Masiya, wu n Kwama fwa ko ka tumede.”#9:20 Yow 6:68-69.

N Yesu a fwa ki̱duum bwamu yaka madi̱mu

(Mat 16:20-28; Mar 8:31–9:1)

21N Yesu a wu chimi̱n ki̱tele ki̱ni dukan ko, “Ti̱ fwa wuka ni mi̱nu bi̱bu we.”

22Yinu a yi chi fal ko, “A mwintuwe Bwe Nii ka nwe riye nabwen. Seli̱bu ni̱bu Yafudamu n ti wuduwe fansetiye n ti ni̱bu yungku yili̱n Musati̱mu ka kodu ko, m mi̱n n ke Masiya. Ni̱bu ka chiyu, aya we wutare di mang kaba ti̱nuwe.”

23Yinu n ki̱n a yi miyari̱mu ko, “Kanang wuwule niye wu a ke ka kau miyare miye, a ne maang chi n ki̱n ki̱baddu ka maditu we, ka n ke ti̱miye. N ki̱n a ke ka nwe riye kwadu di̱ne ki̱bumiti̱ne, kasi no ni̱bu a ke ka chi̱u ki̱nu, a ne dwiyu.#9:23 Mat 10:39; Luk 14:27. 24N fwa bi̱bu di̱ne ni ki̱baddu ka yu ti̱kuri kiye, ka kwala ti̱tu ki̱diya kwaditu. Aya wu a ke ka kwala ti̱kuri ki̱tu di̱ne mi̱ne, ka ya ti̱kuri ki̱diya kwaditu.#9:24 Mat 10:39; Luk 17:33; Yow 12:25. 25Ta̱ma̱ng kangu wureni ka ni a ya ti̱ti̱nitu ki̱ni kwang, yinu a kwala ti̱kuri ki̱diya kwadite? 26Wu ka nwe dibwi miye n ti ya̱m mi̱me, mi̱n Bwe Nii, mang nweti̱ dibwi ko yo mang bedu ki̱ni dwiyen ti̱dui temitu n ti ni̱bu ti̱tumbi̱ri Kwamamu bi̱bi wauwadu ki̱delayimu. 27Mi̱n fwa chimi̱n bi̱yili̱m, bi̱kam chimu ki̱ni ti̱kuri ki̱ka̱ngi̱mu, ka ku Yaa Kwama yo n chi we ti̱ti̱nitu a tibu bwade.”

N Yesu a suten bwi kiyu

(Mat 17:1-8; Mar 9:2-8)

28N ki̱n a fwa ya̱m bi̱bu we kuteng diti yidariyi nari̱biyu: N Yesu a yal Biti̱r n ti Yowana n ti Yakubu, a fi̱l kun yaki̱ twa̱ba̱ buni ware. 29Yo n Yesu a yaki̱ twa̱ba̱ buniye, kabu ko a suten ki̱yiladu wulbi̱wulbi̱. Kuli̱n ki̱nu ti̱n a suten mwemwe. 30Bi̱kam ni̱bu burau a fwetuwe fiko, fa̱ku Musa n ti fa̱ku Yiliya. 31N chi bi̱bi burabi̱mu ki̱ni dwiyen bwadi. N chi a fwa ya̱mu n ti Yesu we di n ki̱n ka bwade, yo n ki̱n a mwatan ka ri ki̱ke Kwama a Wurchalima. 32M Biti̱r ti fati̱bu ki̱mu a bika duum. Yo n chi a kabane, a ku tiyangu n Yesu a sutenangu, n chi a ku dwiyen ki̱tu, a kuti̱ bi̱bu burabu a ti waremu. 33Yo m Musa n ti Yiliya a do bwi yaka du Yesuwe, m Biti̱r a yi Yesu ko, “Tewuduwe, a le kangu chi̱ni a fiyangu. Nang mu ti̱kubiti ti̱tta. Nang mumi̱n di̱kanu, di̱kanu n di̱u Musa, di̱tari̱nu n di̱u Yiliya.”

M Biti̱r a yimbu ya̱mu n ki̱n ki̱fwadi̱mu.

34Yo m Biti̱r we fwaku ya̱ma̱nge, di̱twin a suwe a yinge chi ki̱ni kwang. Miyari̱mu a nwe tayi kangu di̱twinu a yinge chiyangu. 35N Kwama a fwa ya̱m we di̱twinu ko, “Wu nang bwemi, n ki̱n nang wu mang sute. N ki̱n nang wu ta bunti̱ ya̱m ki̱me.”#9:35 Yic 42:1; Mat 3:17; 12:18; Mar 1:11; Luk 3:22; 2Bit 1:17-18. 36Yo Kwama a ri ya̱m ki̱me, miyari̱mu a ki̱la ku Yesu a ti n ki̱kun. Miyari̱mu a fwabu ya̱m bi̱bu, ka n ke a bwiti chiye. N chi a fwabu wuka nimi̱nbu ya̱m chi ya̱rku yii n chi a kuwetu, yinu a be fwa a yikai wandi.

Yesu a chaku ki̱fi̱be

(Mat 17:14-18; Mar 9:14-27)

37Bafi̱nenangeko, n Yesu a suwe n ti miyari̱m ki̱mi bi̱tamu we kunnu. Nabwe ki̱tuu ni̱be a be ya ki̱n. 38Wuka nii we muraki̱ku a ma di̱yal ki̱ni dukan ko, “Naba yungke, n daan dur mun, be m bemi bwemi, nang bwe mi̱ni ki̱ne wiin! 39Ki̱fi̱bti ki̱kwau ki̱nu, ki̱bwe keme. Ki̱fi̱be ki̱mi̱ku ki̱nu, ki̱yo yii ki̱ridu ki̱ni ka ki̱fwiye. Ki̱dati kwang a kebu ka du ki̱nu. 40N da miyari̱m mumu mi̱n ki̱ti̱m mi a chaku ki̱fi̱ti yiyu, n chi a yabu dawe.”

41N Yesu a yi chi ko, “Ta kebu bi̱yili̱mu, ti̱nti̱ne n ti̱n bi̱bwilam. Di̱ne nabwe ki̱swi mang swe ti chi̱ne n ti nabwe Ki̱swi mang ya ti chi̱na?”

Yinu a yi nii wu ko, “Be miye ki̱ni bwemo.”

42Yo bwe a kun ki̱ya bwa di̱Yesuwe, ki̱fi̱bti a kun ki̱ni riye, ki̱ngadu ki̱maiya ti̱m, bwiyu ki̱mi̱ka kana mi̱kaku. Aya n Yesu a wele ki̱fi̱bti ko a chir we bwe, ki̱fi̱bti a chir ti̱n. N ki̱n a be bwe, a niti̱ te. 43Ni̱bu a fikomu a ya̱r yii we dukan Kwama n chi a ku a di̱Yesuwenu, we chi ka̱ta̱ki ti̱tu a beku bwengitu.

Yesu a fwati̱ ki̱da ko bwako a mwatawe

(Mat 17:22-23; Mar 9:30-32)

N chi kwang a ka̱ta̱n we chitu Yesu a maatu, a yi miyari̱m ki̱mu ko, 44“Ti̱tabi̱du chi ya mang fwa chimi̱ndewe, wuka nii yaka yo Bwe Nii ka le Kwadi̱me fakwarbu ki̱me.”

45Aya miyari̱m ki̱mu a swaanbu chi a ni̱r ki̱ne. N Kwama dubu chi ko a swaan bi̱yili̱mu we chi yaka fweditu. Aya n chi a mwibu yinangu ka bi̱u Yesu chi we muretangu.

Wa la chiye wure?

(Mat 18:1-5; Mar 9:33-37)

46Kungakunga a le tibe miyari̱me, n chi ki̱baddu ka yim wu ka ya dwiyen we Yaa Kwama yo Yesu ka swe mati̱n yaakote.#9:46 Luk 22:24. 47N Yesu kanga swaan ti̱kuran chitangu, a yale wuka bwe wuti̱re, a yo ki̱n a ti ki̱dwan. 48Yinu a yi miyari̱mu ko, “Ka wuka nii we tibe chi̱n a yiu bwe wuti̱re yinang wu di̱ne mi̱ne a yiu mi̱n. Ti̱nti̱ne, n ki̱n wu a yiu mi̱n ki̱ni furi mwe, ki̱yiu Kwama wu a tume mi̱ne ki̱ni furi mwen ti̱n. Kanang wuwule niye we tibe chi̱n wu ka si̱ku dur ki̱nu a ti̱m ka maka ni̱be, n ki̱n nang wuduwe.”#9:48 Luk 10:16; Yow 13:20.

Kanang wuwule niye, wu a katabu ti chi̱ne a ba̱la̱ng chang

(Mar 9:38-40)

49N Yowana a ke ki̱mi̱n ko, “Tewuduwe, ni̱n ku wuka ni ki̱ma nangangu ki̱ni dukan munu ki̱chaku ki̱fi̱bti we ni̱bu, ni̱n yi ki̱n ko a du, di̱ne n ki̱n a newe kwa̱l chi̱renu.”

50N Yesu a yi chi ko, “Ti̱kodu wuka nii we. Di̱ne ka nang wuwule niye wu a katabu ti chi̱ne, a bale chi̱n.”

Ni̱bu Samariyamu a kebu Yesu ka sudu we ti̱m chimu

51Yo ki̱swi a lam n Yesu ka ki̱la bwa diye a di̱Kwama, n ki̱n a do we ni̱r ki̱nu ka yika Wurchalima. 52N ki̱n a tum bi̱tumbi̱ri̱m ki̱mu ki̱ni ya̱m ko a ya do fi we ki̱bedu. Bi̱ki̱mu a yikan a le be bi̱ne a yaa Samariya, ke chi do chi yiu Yesu n ti miyari̱mu we bwako.

53Aya ni̱bu a be bi̱nemu a ko ka yiu Yesu n ti miyari̱m ki̱mu di̱ne n Yesu n ti miyari̱m ki̱mu a wa̱re ki̱yika Wurchalima yaka sii Kwama. 54Yo miyari̱m Yesumu, n Yakubu n ti Yowana a ku chitiye, a yi Yesu ko, “Tewuduwe, ka n du ni̱n, ni̱n yale ki̱rang a twi bi̱n di̱de de?”#9:54 2Ya̱m 1:9-16.

55N Yesu a sabran, a yi chi ko, “Ti̱kuran chi̱ntu a lebu.” 56N Yesu n ti miyari̱m ki̱mu a yikati̱ wuka be bi̱ne.

Ni̱bu ki̱fwadu ko chi bunti̱ Yesumu

(Mat 8:19-22)

57Yo n chi a yaki̱ yikadu we wa̱re, wuka nii we ni̱bu ki̱nabu ki̱ni̱mu a yi Yesu ko, “Mang kau miyaremo kasi no mwang ya bwa̱le!”

58N Yesu a ke, a yi ki̱n ko, “Wuba futu ki̱ni bwang ka laiyuwe. Ki̱ni̱biyu ki̱ni ki̱kuli. Aya Bwe Nii a ne fi ka sweendu, ka fi̱kande we.”

59N Yesu a chakakku a yi wuka nii ko, “Bumite ni yikan, mwang kau miyaremi.”

Wuko a ki̱la yi ko, “Tewuduwe, yam mang fure Temi didin.”

60N Yesu a yi ki̱n ko, “Ti̱du bi̱bu a yimbu Kwamamu a fur kal chi̱nu. Aya m mun, yikan yanang fwa ni̱bu mi̱n ya̱m bi̱li̱mu a Yaa Kwamamu.”

61Ti̱nti̱ne, wuka a bete fi a di̱Yesuwe a yi ki̱n ko, “Tewuduwe, mi̱n mang kau miyaremo. Aya du mi̱n n yikan n yang kuwe lomi n fwa chimi̱nti̱n mi n du chi̱n li̱mang.”#9:61 1Ma̱t 19:20.

62N Yesu a yi ki̱n ko, “A ne nii ka yo fa̱la̱ng kangu we ka̱rma yinu kani da̱ng kutenge we, a dakabu we nanganga Yaa Kwamangu.”

Currently Selected:

Luka 9: Tula

Highlight

Copy