Markus 14

Tikaketi Fanseti a bwa̱u yii ka ma muli̱n ti Masiya

(Mat 26:1-5; Luk 22:1-2; Yow 11:45-53)

1Yo du ditiyu yurabu ni̱bu ka ma Yiye Yabake n ti Yiye ki̱dani yiyu a fubufuweye. Tikaketi fansetiyu n ti ni̱bu yungku yili̱n Musayimu, ki̱babba fi̱li wu ka tan Yesu ka chide. 2N chi a kekan ko, “A bwin ki̱dang Yiye Yabakengu, di̱ne ke ki̱la yo kulangkulange.”

Ni̱bu a wa Yesu mi̱n ki̱nung ki̱ki fi̱rfi̱ra̱ng a Betani

(Mat 26:6-13; Yow 12:1-8)

3Ki̱dangu n Yesu a lon Simun a Betani, ni wu ki̱ni burang mwa̱liye. Yo n Yesu ki̱chau chabte, wuka naye a be ki̱ni ki̱nung ki̱ki fi̱rfi̱ra̱ng, wa tiyang nardiyang, ki̱ku ki̱ni kwa̱ti̱rang a lure wu ni̱bu a mubbi ki̱ni kale alabasta. N ki̱n a wur lure ki̱nunge a kur ki̱mi̱n we duru.

4Bi̱kamu ni̱bu n chi ware we fikonmu a kai ni̱r ko, “A mayire ki̱kai ki̱nunge? 5A no ka midu a sure kuuliti ti̱ta, a no ni ti̱lusani.” N chi a kai ni̱r ko a mayire ka kai ki̱nun yi ki̱n kwa̱ti̱riye.

6Aya n Yesu a yi chi ko, “Ti̱du bwe naye, ti̱yidu ya̱m we. Naye wu a mami chi ti̱yili. 7Ti̱n ware ti ti̱lusaniti kwadu, ta medu ta maka chi we ki̱dangu ti̱baddangu. Aya a ne tike, ne mang swedu n ti chi̱ni kwadu. 8N ki̱n a ma chi ka maditu, a wa bwimiyu mi̱n ki̱nung ki̱ku ki̱doyu di̱ne furemang. 9Mi̱n fwa chimi̱n bi̱yili̱m, bwa ni̱bu ka mwan ya̱m bi̱li̱m mi̱me we ti̱ti̱niti kwang, ni̱bu ka kur chi naye wu a maatu.”

N Yafuda a ke ka ni Yesu

(Mat 26:14-16; Luk 22:3-6)

10Yinu n Yafuda Yiskariyoti wu we miyari̱mi kub chiri burabi̱me, a ya we tikaketi fansetiyu di̱ne ke ki̱ni Yesu. 11N chi a nwe ta̱ma̱ng ki̱ni ya̱m bi̱bu, n chi a dokan we yichiyu ka ni Yafuda ka̱mbi̱r. A ri, n ki̱n a le ki̱babba da ka niin Yesu we.

Yesu a chau Yiye Yabake n ti miyari̱ki̱m

(Mat 26:17-25; Yow 13:21-30)

12We di wu wiine wu a yiye ki̱daniye, di wu ni̱bu ki̱ma niku ki̱ni kwani we Yiye Yabake, miyari̱m Yesumu a bi̱u ki̱n ko, “Mun baddu nang do mi̱n Yiye Yabake a fi̱re?”

13Yinu n ki̱n a tum miyari̱m ki̱mi burau ko, “Ti̱le bi̱n Wurchalimanu, ta tekandu n ti wukane nii ki̱ni suur mwen a dur ti̱bungan n ti ki̱n. 14Lo wu ka lede, ti̱le ti̱yi naba loko, ‘Naba yungke ki̱bi̱du ko, a bwa̱le kan rungkonu, di̱du Mang chan, Yiye Yabake n ti miyari̱m mi̱mi̱nu?’ 15N ki̱n ka yung chi̱n di̱kan kan di̱duun di̱du a tu a do ki̱ni fantiyi sweri. Ti̱do chabtu Yiye Yabaketu a fiko.”

16Yinu miyari̱mi burabi̱mu a kun, a le mure bi̱ne, a ya ya̱mu we yinangu n Yesu a fwa chimi̱nangu. N chi a do chabtu Yiye Yabake a fiko.

17Ki̱ni me, n Yesu a ya lo wu n ti miyari̱mi kub chiri burabi̱mu. 18Yo n chi a le ki̱chau chabti̱te, yinu n Yesu a yi chi ko, “Bi̱yili̱m mi̱n fwa chimi̱nu, wuka nii we tibe chi̱n ka miyu, wu ni̱n chau chabti̱tu ware ti ki̱ne.”

19Miyari̱mu a kai ni̱tu, n kawure ki̱yidu ko, “M mi̱na?”

20N Yesu a yi chi ko, “Wiin we tibe chi̱n, n ki̱n nang wu a di̱ku falang we kwa̱se ti mi̱ne. 21Bwe Nii ka yikadu yinang ka a mwal we dur ki̱nangu. Aya a no nii wu ka mii Bwe Nii! A no la ki̱mi̱n chi ka ni̱bu a no bi̱bu ki̱ne.”

Ki̱dane Tewuduwe

(Mat 26:26-30; Luk 22:14-20; 1Kor 11:23-25)

22Yo n chi a le ki̱chau chatti̱te, n Yesu a da̱u ki̱dane a wana Kwama, a dwa̱kan a ni miyiri̱m ki̱mu a yi ko, “Ti̱yiu ti̱tu nang bwimiyu.”

23A kuteng ki̱ku, a da̱u kwa̱se wu a mwe yinabi a ma di̱wan we di̱Kwama, a ni chi, n chi kwang a no we mure.

24Yinu a yi chi ko, “Bi̱bu nang ki̱tum bwa̱ki̱ mi̱mu, bi̱bu mang kuru di̱ne ni̱bu nabweni̱mu.” 25Mi̱n fwa chimi̱n bi̱yili̱m, nemang noti̱ mwe yinabe wu we ki̱da, ka lami̱nti̱ di wu mang no wu fwiye a Yaa Kwama.

26Yinu yo n chi a kau tee, a chir a fi̱l Kun di̱du ki̱ni tini Setuniye.

N Yesu a fwa ko m Biti̱r yaka kwila ki̱nu

(Mat 26:31-35; Luk 22:31-34; Yow 13:36-38)

27N Yesu a yi miyari̱m ki̱mu ko, “N ti̱ni ki̱ni kwang ta wulu ta dwiyu we. Yinangu a mwal we ya̱m Kwamamu ko,

‘Mang chi̱u naba toke

Kwantiyu ka yaradu.’

28Aya we kuteng ki̱ku n Kwama ka kukiyu we furangu, mang tu chi̱nu we yikaku Ka̱lili yangu.”

29M Biti̱r we fiko kabdu ko, “Kasi no n chi kwang ka yaradu, m mi̱n ne mang dunnu.”

30N Yesu a yi ki̱n ko, “Bi̱yili̱m mi̱n fwa mi̱nu Biti̱r, a ne lami̱nti̱ yo kware ka ta̱ru ki̱da yurabe, mwang kwilayu ki̱da yitta mwi mwang yimbu mi̱n.”

31Aya m Biti̱r ki̱fundu ki̱fwadu ki̱ni dukan ko, “Kasi no ni̱bu ka chiyu ware n ti mun nemang kan yinku mwangu ko bayim.” Bi̱kamu miyari̱m ki̱mu a fwa ti̱ni yiko.

Twa̱ba̱ku a Kesemani

(Mat 26:36-46; Luk 22:39-46)

32N chi a yika wukane fi ni̱bu ki̱yalu ko, “Kesemani.” Yinu n Yesu a yi miyari̱m ki̱mu ko, “Ti̱swe a finu Yamang twa̱ba̱ buni.” 33N ki̱n a bungan n ti Biti̱r, n ti Yakubu n ti Yowana. Ni̱r ki̱nu a mwe ki̱kaiyadu, bwiyu a fwi kangu n ki̱n a yim chi yaka fweditangu. 34Yinu a yi chi ko, “Ki̱lliye wu a ni̱r mi̱ne ka medu ka chiyu, ti̱swe a finu ti̱ma ki̱yolang.”

35Yo a yika kakki bayi̱me, a sung a ti̱m a twa̱ba̱ buni ko ka mwang kenge, yo n nwedu riye we. Aya n ke di̱ne ki̱ke mi, ma ki̱kemo. 36A yi ko, “Wa, Tete, a ne chi ka bwane we, ka mwang kede, da̱mi kwa̱se riye wu. Aya bunti̱ ki̱ke mo, n ke wumi.”

37Yo n ki̱n a ki̱lawe, a be ya miyari̱m ki̱mu a da duum. N ki̱n a yi Biti̱r ko, “Simun, mun da duuma? Wule yo wu a ne ta medu ta swedu kasi no awa wiine? 38Ti̱ma ki̱yolang, ti̱twa̱ba̱ buni ke ti̱yaru we, yo fwakware ka swe chi̱ne. Kasi ki̱ku fi̱ki̱mu we ki̱ni dukanangu aya bwiyu a fwi.”

39Yinu a ki̱latuwe ki̱da, a twa̱ba̱ bunitu, ki̱fwa ya̱mu ka bi̱biini̱m. 40Yinu a ki̱lawe, a be ya chi a dati̱ dumuwe. kwalangi chiyu a yi̱lteni ki̱ni duumu. N chi a kwala chi ka fwa ki̱mi̱nditu.

41N ki̱n a yikatuwe yinu a ki̱lawe ki̱dang tarang, a yi chi ko, “A lanta ki̱kang n ti̱n we duma, n ti̱n we ti̱fi̱kada? A ri! Ki̱swi a be, ni̱bu a ni Bwe Nii a fa̱li ni̱bu bi̱bwilame. 42Ti̱kun, ni yikan! Wu ka miye nang wu a lam fiye.”

Ni̱bu a tau Yesu

(Mat 26:47-56; Luk 22:47-53; Yow 18:3-12)

43Yo n Yesu we ki̱fwa ya̱me, n Yafuda wu we miyari̱m ki̱mi kub chiri burabi̱me n ti ki̱tuu ni̱be nabwen wu ki̱ni kuli n ti dwamiye. Tikaketi fanseti n ti ni̱bu yungku yili̱ne a tume chi. 44N Yafuda, wu ka mi Yesuwe a tu a dokan n ti chi ko, “Nii wu mang sidu ki̱ni kwarke, n nang wu ta tadde, ti̱tau ti̱yikani ki̱n, ti̱to yinang.” 45Yo n ki̱n a lam fi a di̱Yesuwe, a kwar Yesu ko, “Tete, naba yungke!” A kwar ti̱n. 46Bi̱nabi̱na ni̱bu a tau Yesu, a tituwe ki̱ri̱ng. 47Aya wuka ni a chaku kul ki̱nu, a swi ka̱be wuduwe fansetiyeye mi̱n ki̱tele wad.

48N Yesu a yi chi ko, “Ti̱chire ki̱ni kulitu n ti dwamiyu be ta tayu yinang dakuwa? 49Kanang wuwule diye n mi̱n we ti chi̱n we Kan Kwaman Wurchalimanu mi̱n ma yungki̱ku ta taibu, aya ti̱tu a fwe ke a ri chitu a mwal we ya̱m Kwamamitu.” 50We fiko miyari̱m ki̱mu ki̱ni kwang a du ki̱n a yarani yak.

51A ya wuka bwele we fiko n ti bi̱bu ki̱bunti̱ Yesumu, n ki̱n a ne luke we bwikiyu kana kwadu. Yo ni̱bu a tau ki̱ne, 52m bwele a wuli ti̱ri̱m a du kwadu ki̱nu we a fa̱li chiyu.

N Yesu a kakku kwa̱l kabaki̱n

(Mat 26:57-68; Luk 22:53-54; Yow 18:13-14,19-24)

53N chi a yikani ki̱ni Yesu a kakku wuduwe fansetiyeyu. Tikaketi fansetiye n ti seli̱bu n ti ni̱bu yungku yili̱n Musayimu a muran we fiko. 54M Biti̱r a bunti̱ Yesu, aya a marti̱ ki̱twalang a le mure tare lo wuduwe fansetiyeye. A swe we fiko n ti bi̱bu ki̱to Kan Kwama di̱dunu ki̱wul ki̱rang.

55Tikaketi fansetiye n ti kwa̱l yili̱nu a muran ki̱bau nii wu ka mwe ti̱kwanitu a dur Yesunu ko a ma ki̱le ko ke chi chi̱u Yesu, n chi a yabu fi̱li ka mang ti̱te. 56Ni̱bu nabwen a mwe ti̱kwanitu we dur ki̱nu. Aya ya̱mi chiyu dangtidangti.

57A kuteng ki̱ku, bi̱kam a kun a fwa bi̱chimu ya̱m ti̱kwanimi ying; 58“Ni̱n nwe a fwa ko, ‘Mang wur Kan Kwamana Wurchalimanu ni̱bu a mubbi̱nu, a ditiyi yitta mang mu di̱kan di̱du n ke nangang Fa̱liyang.’ ” 59Ki̱ni ye ya̱m chimu a beba fi wiine.

60Yinu wuduwe fansetiyeye a kun a ti we tibe chi, a bi̱u Yesu ko, “M mun n ne di̱kan di̱ki̱li̱n yiin wenga? We a ya̱miyu ni̱bu a fwa dur muniya?” 61N Yesu a yibu ya̱m.

Yinu tikake Fansetiye a bi̱ti̱ ki̱n ki̱da ko, “M mun nang Masiya Bwe Kwama naba delaka?”

62N Yesu a ke ko, “M mi̱n nang ki̱n. Aya ta ku Bwe Nii ka swedu we kang ki̱yilang Kwamangu, ki̱ni dukan Naba Wuduwenu wu ti̱ti̱nitu a fa̱la̱ng kange, ka suwedu a dii, a ti̱twini we twiye.”

63Tikake fansetiye a ngi̱ra luke ko, a kur a bwa yinu a yi ni̱bu ko, “Ni bau di̱di̱le di̱kwa̱l, we ya̱m bi̱bu? 64A ta nwe yinang kangu a swa̱ba Kwamangu, ti̱kama wureni?”

Ni̱bi kwang a ke ko, “A lwe bwa.” 65Bi̱kamu bidum fanseti fal, a mwe ki̱tibe ki̱nu ki̱ni ki̱tum, a bwa̱u ki̱mi̱n kwalangi kiyu, ki̱ngaddu ki̱ni fa̱la̱ng yinu ki̱bi̱du ko, “N ma fa̱kuitu we chi a fwe.” Yinu ni̱bu toki̱mu a yikani ki̱n ki̱twaladu.

M Biti̱r a kwilan ko ka yimbi̱ Yesu

(Mat 26:69-75; Luk 22:56-62; Yow 18:15-18,25-27)

66M Biti̱r a ki̱ti̱bang we lo, yinu wukane be fwa̱ne wu ki̱ma nangang we lo wuduwe fansetiyeye a be fiko. 67Yo n ki̱n a ku Biti̱r ki̱wul ki̱range, a da̱ng ki̱n yinang, a yi ko, “A mi ka n mun we wa̱re n ti Yesu Banasa̱rete?”

68Aya m Biti̱r a kwilan ko, “Mang yimbu chi mun fwaditu fal! Mang swanbu ki̱n!” Yo a fwa ye, a yikati̱ sa̱ngka, bi̱nabi̱na, kware a ta̱r chitu.

69Yo fwa̱n ka̱be wu a ku ki̱n we bwako, a fwa ni̱bu bi̱bu a tirana fikomu mi̱n ko, “Wu wetuwe tibe chi.” 70M Biti̱r a kwila ti̱n ki̱da.

We kuteng ki̱ku bi̱bu a ti we fikomu a mwe ki̱fwati̱nu, ko, “A mwintuwe m mun we ti chi, m mun naba Ka̱liliye ti̱n.”

71Aya m Biti̱r a mwe ki̱ni ka ti̱turan ki̱twa̱mati̱ chitu we kakku chiyangu, ko, “Mang yimbu chi ti̱fwaditu.”

72Bi̱nabi̱na kware a ta̱r ki̱dang robang yinu m Biti̱r a kur ya̱m bi̱bu n Yesu a fwa ki̱mi̱ni̱mu ko, “Yibe a neka ta̱ru ka lam ki̱dang robangu, mwang kwilayu ki̱da yitta.” Yo a kur ya̱m bi̱be a mwe ki̱ni wi.

Currently Selected:

Markus 14: Tula

Highlight

Copy