Matyu 21

Yesu Nwuo Urusha̱lima ma̱ Sa̱t nang A̱gwam a̱ni

(Ma̱r 11:1-11; Luk 19:28-40; Yon 12:12-19)

1Nang Yesu ma̱ng mman ta̱m nggu na ntat kpa̱mkpaan ma̱ng Urusha̱lima a̱ni, ba̱ si̱ nwuo ma̱ a̱keang Ba̱ti̱faji da̱ a̱beam Tsok Za̱itun. Yesu si̱ ta̱m mman ta̱m nggu a̱feang, ba̱ shya̱ a̱son gu. 2A̱ si̱ nyia̱ ma̱ng a̱mba, “Nyi nat ma̱ a̱bada̱dei a̱keang keniaau. Mi̱ di̱ nwuo nyin hu a̱ja, nyi na kin di a̱yang a̱ka̱za̱nki ma̱ng nggwon nggu ka nang á̱ la̱p ba kpa̱mkpaan ma̱ng á̱ghyang. Nyi byii̱k naa, nyi bai ma̱ng a̱nung ndyo.

3“Ka̱ a̱yin lyip nyin, ‘Nyi bai ma̱ng á̱ka̱za̱nki na a̱ji?’ Nyi hyia̱ ma̱ng a̱nggu, ‘A̱tyoli wa chat á̱ka̱za̱nki na,’ a̱wot mi̱ di̱ yong a̱hwa a̱nyuu na kin shim nyin dyo, nyi nkat ma̱ng á̱na.”

4A̱lyiat byii̱k á̱ka̱za̱nki nani bai cha̱chaat da̱ a̱nu ka, ma̱nang a̱ta̱m a̱kwonu A̱gwaza wu ku nshei á̱zanson a̱ni, nyia̱,#21:4 Wa̱i a̱lyiat: Shimba Yesu wa ni̱ lyiat ma̱ a̱da̱dei zwunzwuo a̱naai ma̱ng a̱fwuon wu (4-5).

5“Nyi tak ma̱ng á̱niet Urusha̱lima#21:5a Lyuut cha̱chaat: “A̱nap Si̱hiyona.” ba nyia̱,

‘Di, A̱gwam nyin wu wa wu

chobai da̱ a̱vwuo nyin!

A̱ kyiak a̱pyia̱ nggu nang kyang a̱ni bah.

A̱ swan tazwa a̱ka̱za̱nki,

nggwon a̱ka̱za̱nki kya gu nyeak.’#21:5b Za̱k 9:9. ”

6Mman ta̱m a̱feang a̱nia si̱si̱ nyia̱ ma̱nang Yesu ntak ba a̱ni. 7Ba̱ si̱ bai ma̱ng a̱yang a̱ka̱za̱nki wu ma̱ng nggwon ka. Ba̱ si̱ teak a̱yaatoot mba ba a̱zama nggwon a̱ka̱za̱nki ka. A̱wot Yesu si̱ nyeak a̱ nswan.

8Á̱kpa á̱niet ma̱ a̱di̱di̱t si̱ teak a̱yaatoot mba ba di̱n vak hu a̱zanson gu. A̱wot á̱ghyang á̱niet mameang si̱ ma ntyam mbwak ntswan, ba̱ si̱ teak di̱n vak hu, Yesu si̱ nswak. 9Á̱niet ma̱ a̱di̱di̱t ba̱ khwat a̱son Yesu ma̱ng á̱si̱ ba̱ khwi nggu lilyim a̱ni, si̱ nwuo tang nggu a̱didyep, á̱ khwot a̱gugwong nyia̱,

“Hosana! Á̱ dyep A̱gwaza

da̱nian a̱ka̱mbwon Da̱wuda!

Shok yet si̱ a̱tyu a̱ chobai di̱ Tyok A̱gwaza a̱ni!

Hosana! Zi̱ dyep gu a̱ shya̱ Ma A̱gwaza tswazwa a̱ni!”

10Nang Yesu nnwuo Urusha̱lima a̱ni, a̱mgba̱m á̱niet ma̱ a̱keang ba si̱ koot a̱gugwong mi̱ chet, á̱ lyi̱ri̱m nyia̱, “Zang tangka̱i a̱yin hwa lili huni?”

11A̱wot susot á̱kpa á̱niet ji si̱ nwuak shim nyia̱, “A̱tyu wuni wa yet Yesu, a̱ta̱m a̱kwonu A̱gwaza, a̱ neet Na̱za̱ra̱t mi̱ fam a̱byin Ga̱lili a̱ni!”

Yesu Vwuong A̱bwuang mi̱ Didyaat A̱li Nwuat Za̱nang A̱gwaza

(Ma̱r 11:15-19; Luk 19:45-48; Yon 2:13-22)

12Yesu si̱ nwuo didyaat A̱li Nwuat Za̱nang A̱gwaza hu. A̱ si̱ vwuong á̱niet a̱bwuang a̱ ghwut ndyo. A̱ si̱ ghyun a̱yaatyii á̱niet shai a̱ka̱kurum ma̱ng chuchuk á̱niet lyiai a̱yaabwa. 13Yesu si̱ nyia̱ ma̱ng a̱mba, “Á̱ lyuut mami A̱lyiat A̱gwaza na nyia̱,

‘Á̱ na ngyei a̱li nung ka,

A̱li naai A̱gwaza.’#21:13 Ish 56:7; Iri̱ 7:11.

“A̱wot nyi bwuak ka ntyia̱ kuu ya̱khwi á̱niet á̱tsaai!”

14A̱jawa á̱niet a̱fi̱fan ma̱ng á̱niet ta̱luk nkap si̱ bai da̱ a̱vwuo nggu mi̱ didyaat A̱li Nwuat Za̱nang A̱gwaza hu. A̱wot a̱ si̱ choot baa. 15Nang a̱cha̱chet a̱yaapris ma̱ng á̱niet tyiet doka ba ndi nkyang a̱ga̱de na nang Yesu nyia̱ a̱ni, a̱wot ba̱ si̱ bu fa̱k si̱sak nang mman na nkhwot a̱gugwong A̱mali Nwuat Za̱nang A̱gwaza ka a̱ni, nyia̱, “Hosana, zi̱ dyep A̱gwaza da̱nian A̱ka̱mbwon Da̱wuda!”

Huhwa a̱cha̱chet a̱yaapris ba ma̱ng á̱niet tyiet doka ba si̱ fa̱k a̱lyia̱ ya. Ba̱ si̱ nwuo kwop a̱dyii̱ng. 16Ba̱ si̱ lyip Yesu nyia̱, “A sa fwuong a̱lyiat na nang mman nani lyiat a̱ni a?”

Yesu si̱ nwuak ba shim nyia̱, “Ii, nyi ka̱n fang ma̱ A̱lyiat A̱gwaza na baa? Nyia̱,

‘A ka̱n tyiet a̱cha̱chet ma̱ng a̱chyuang mman,

ba̱ ka dyep ang’ a?#21:16 Za̱b 8:2.”

17Nang Yesu nghwon a̱cha̱chet a̱yaapris ma̱ng á̱niet tyiet doka ba a̱ni, a̱ si̱ bwuok a̱ nat a̱keang Ba̱ta̱ni, a̱ si̱si̱ kwai a̱ja.

Yesu Shyi A̱kwon A̱bwabwap

(Ma̱r 11:12-14,20-24)

18Da̱ a̱tsotson tat ka, nang Yesu mbwuot a̱ naat Urusha̱lima a̱ni, a̱ si̱ fa̱k zong. 19A̱jawa gu si̱ li a̱kwon a̱bwabwap da̱ a̱beam nvak. A̱ si̱ teap a̱ nat kpa̱mkpaan, a̱ ka li ke a̱kwon a̱bwabwap ka byia̱ sum. A̱wot a̱ si̱ shya̱ nang ka̱ yet ma̱ a̱kikyo bya. Yesu si̱ shyi a̱kwon a̱bwabwap ka, nyia̱, “A̱yin bu si̱ mi̱n mak ya sum ang bah, si̱ nat sang sangba̱p!” Mi̱ di̱ yong a̱hwa, a̱kwon a̱bwabwap ka si̱ kin shyuk kiki.

20Nang mman ta̱m Yesu na ndi a̱nia a̱ni, ba̱ si̱ fa̱k a̱ga̱de. A̱wot ba̱ si̱ lyip gu nyia̱, “Á̱ nyia̱ ni wa nang a̱kwon a̱bwabwap ka nshyuk kiki ma a̱nggang a̱nia?”

21A̱jawa Yesu si̱ nwuak ba shim nyia̱, “N tak nyin a̱tsak a̱lyiat, ka̱ nyi nwuak fwuo da̱ A̱gwaza da̱nang nyi but mi̱ fwuo bah, nyi na nyia̱ nkyang a̱ga̱de na̱ swak shyishyi a̱kwon a̱bwabwap jini a̱ni. A̱wot ka̱ nyi ma nyia̱ ma̱ng a̱fan kani, ‘Doot a̱ji, a si̱ kwa mami a̱gba̱ndang jok a̱sa̱khwot!’ Ku na bai da̱ a̱nu ka. 22Ka̱ nyi nwuak a̱chuchuk, a̱mgba̱m kyang nang nyi lyip A̱gwaza mami naai a̱ni, nyi na shya̱.”

Á̱ Kwop A̱dyii̱ng tazwa Tyok Yesu

(Ma̱r 11:27-33; Luk 20:1-8)

23Nang Yesu mbwuok a̱ nat didyaat A̱li Nwuat Za̱nang A̱gwaza hu a̱ni, a̱ si̱ nwuo tyiet. A̱cha̱chet a̱yaapris ma̱ng á̱niet khwop á̱niet si̱ neet á̱ bai da̱ a̱vwuo nggu. Ba̱ si̱ kwop a̱dyii̱ng, ba̱ si̱ zop Yesu nyia̱, “Zang tangka̱i tyok hwa nang a byia̱ nnyia̱ nkyang nani? A̱wot a̱nyan wa nwuak ang tyok hu?”

24Yesu si̱ nwuak ba shim nyia̱, “Nung meang, n ma na ndyip nyin kyang nyiung. Ka̱ nyi nwuak nung shim hu, n ma na ntak nyin tyok hu nang n byia̱ n nyia̱ nkyang nani a̱ni. 25Nyi tak nung, tyok nang Yoona ku nnyia̱ Ba̱ptisman ji a̱ni, ku neet a̱ji wa? Ku neet Ma A̱gwaza tswazwa kya kee, da̱ a̱vwuo a̱tyubishyi kya?”

A̱wot ba̱ si̱ ya nwuo a̱di̱dam tsi̱tsak mba nyia̱, “Ka̱ zi̱ nyia̱, tyok nyia̱ ba̱ptisman nggu hu neet Ma A̱gwaza tswazwa kya, a̱ na lyip zi̱t, mi̱ yihwa mbyia̱ zi̱ ndak nwuak a̱chuchuk di̱ tyiet Yoona hu? 26A̱wot di̱n vak ghyang, ka̱ zi̱ nyia̱ tyok ba̱ptisman nggu hu neet da̱ a̱vwuo a̱tyubishyi kya, shimba a̱mgba̱m á̱niet ba na doot jhya̱. Mat á̱niet ba wa ka̱n kyiak nang Yoona ngyet a̱tsak a̱ta̱m a̱kwonu A̱gwaza wa.” 27Huhwa ba̱ si̱ nwuak Yesu shim nyia̱, “Zi̱ lyen bah.”

Yesu si̱ ma nyia̱ ma̱ng a̱mba, “Ka̱ a̱nia wa, nung meang, n na ntak ma̱ng a̱nyin tangka̱i tyok nang n nyia̱ nkyang nani a̱ni bah.”

Kidee tazwa Mman Á̱sam A̱feang

28“A̱wot nyin, yihwa nang nyi dam? Á̱ ku byia̱ a̱tyok a̱ghyang, a̱ si̱ byia̱ mman á̱sam a̱feang. A̱ si̱ nyia̱ ma̱ng á̱niet khwop nggwon a̱sam wu, ‘Nggwon nung, nat a nyia̱ ta̱m ma̱ a̱byin a̱na̱p nung ka a̱fwun.’ 29Á̱niet khwop nggwon wu si̱ nyia̱, ‘Kaai, n naat bah.’ A̱wot á̱ si̱ labeang bah, ka̱ si̱ shyak a̱di̱dam nka wu. Ka̱ si̱ nat ta̱m hu ma̱ a̱byin ka.

30“A̱jawa a̱tyia̱ wu si̱ bu nyia̱ ma̱ng a̱shushyuo nggwon a̱sam wu, ‘Nwan, nat a nyia̱ nung ta̱m hu ma̱ a̱byin a̱na̱p nung ka.’ A̱shushyuo nggwon wu si̱ shim nyia̱, ‘Ii, Abba, n na nat.’ A̱wot ka̱ si̱ lak nat hu.

31“Mami mman a̱feang a̱nia, a̱nyan wa nyia̱ kyang nang a̱tyia̱ wu chat a̱ni?”

Ba̱ si̱ nyia̱, “Á̱niet khwop nggwon wu wa.”

A̱jawa Yesu si̱ wa̱i mba kyang nang kidee ji fa a̱ni, “N tak nyin a̱tsak a̱lyiat, á̱ka̱tuk á̱niet saai kurum ga̱ndu ma̱ng á̱nyiuk ba̱ yet khám a̱ni, na kyiak a̱son nyin di̱ nwuo Tyok A̱gwaza hu! 32Mat Yoona a̱tyu nyia̱ ba̱ptisman ku bai, a̱ si̱ tyiet nyin a̱tsatsak nvak swat mi̱ swanta hu. A̱wot nyi si̱ lak nwuak a̱chuchuk da̱ nggu. A̱wot á̱ka̱tuk á̱niet saai kurum ga̱ndu ma̱ng á̱nyiuk ba̱ yet khám a̱ni, si̱ nwuak a̱chuchuk da̱ a̱nggu. A̱mgba̱m nang nyi ndi á̱ka̱tuk á̱niet bani nnwuak a̱chuchuk da̱ a̱nggu a̱ni, nyi si̱ lak ghwon a̱ka̱tuk nyia̱ nyin wu.

Kidee tazwa Á̱ka̱tuk Á̱niet Khap ba̱ Khwap A̱byin a̱ni

(Ma̱r 12:1-12; Luk 20:9-19)

33“Nyi myiai a̱fufwuo nyi fa̱k kidee jhyang! A̱tyoli a̱ghyang wa ku kap a̱byin a̱na̱p. A̱ si̱ nok bat a̱ nkeang a̱byin ka. A̱ si̱ lung jhyat da̱ a̱fang nang gu na nshyui a̱sa̱khwot a̱na̱p na a̱ni. A̱ si̱ nok a̱ga̱nga̱ng a̱dak nang á̱ na nswan á̱ cham a̱byin ka a̱ni. A̱wot a̱ si̱ khwap á̱niet khap á̱ghyang a̱byin ka, a̱ si̱ nkat a̱keang a̱ghyang.

34“Nang jen kpa̱i sum a̱na̱p ji nnyia̱ a̱ni, a̱ si̱ ta̱m ma̱ng á̱khwo nggu ba da̱ a̱vwuo á̱niet khap nang gu khwap ba a̱byin ka a̱ni, ba̱ ka̱u sum a̱na̱p hu, ba̱ nwuak nggu a̱kwonu nggu ka. 35A̱wot á̱niet khap a̱bya, si̱ ya̱baat á̱khwo a̱tyoli ba. Ba̱ si̱ tsot a̱tyo nyiung, ba̱ si̱ hyat a̱ghyang, a̱wot ba̱ si̱ mang a̱khwo a̱ghyang ma̱ng nfang á̱ hyat.

36“A̱tyu byia̱ a̱byin wu si̱ bu ta̱m ma̱ng á̱khwo á̱ghyang ba̱ swak á̱si̱ ba̱ yet a̱son ka a̱ni ma̱ng shi á̱kpa. Á̱niet khap ba si̱ bu nyia̱ ma̱ng á̱khwo ba, ma̱nang ba̱ nnyia̱ ma̱ng á̱si̱ ba niau ndyo a̱ni. 37Di̱ ngaan hu, a̱tyu byia̱ a̱byin wu si̱ ta̱m ma̱ng nggwon byin nggu ka ma̱ng a̱di̱dam, nyia̱, ‘Mami a̱chuchuk, ki̱ ba̱ li nggwon nung ka ka̱ chobai, ba̱ na nwuak ka shi!’

38“A̱wot nang á̱niet khap ba ndi nggwon a̱tyu byia̱ a̱byin ka chobai a̱ni, ba̱ si̱ nyia̱ ma̱ng á̱ghyang mba, ‘Di, nggwon ka̱ na ya gado a̱byin hu a̱ni kya chobai! Nyi bai zi̱ hyat ka! A̱wot zi̱ san a̱byin ka, ka̱ yet a̱si̱ nzi̱t!’ 39Huhwa ba̱ si̱ ta̱bat nggwon ka, ba̱ si̱ kwak ka á̱ nat ndyo a̱ma̱nta a̱byin a̱na̱p ka. Ba̱ si̱si̱ hyat ka a̱ja.” 40Yesu si̱ lyip ba nyia̱, “Jen nang a̱tyu byia̱ a̱byin wu mbwuok a̱ bai a̱ni, yihwa nang nyi dam a̱ na nyia̱ á̱niet khap a̱bya ndyo?”

41Á̱niet tyiet doka ba si̱ nwuak shim nyia̱, “A̱ na tyei á̱ka̱tuk á̱niet khap a̱bya a̱ka̱tuk a̱khwu. A̱wot a̱ bu khwap á̱ghyang á̱niet a̱byin ka; á̱si̱ ba ba̱ na jhyet gu a̱kwonu nggu ka mi̱ jen kpa̱i sum a̱na̱p ji kuzang jen a̱ni.”

42A̱jawa Yesu si̱ lyip ba nyia̱, “Nyi ka̱n fang A̱lyiat A̱gwaza na nang á̱ lyuut a̱ni baa? Nyia̱,

‘A̱fang ka nang á̱niet nok ba lak a̱ni,

kikya nang á̱ kpaat da̱ a̱ta̱m kuntyin nok ka.

Si̱ huni yet ta̱m A̱gwaza hwa.

A̱wot ku yet kyang a̱ga̱de hwa da̱ a̱vwuo nzi̱t.’#21:42 Za̱b 118:22-23.

43“Mat a̱nia, n shei nyin, á̱ na ta̱wap Tyok A̱gwaza hu mbwak nyin, á̱ nwuak á̱niet a̱byin a̱ghyang ba̱ na nyia̱ a̱tan nta̱m a̱ni. Ma̱nang á̱ ndyuut a̱ni nyia̱,

44[[‘Konyan wa ga̱u da̱ a̱fang a̱kya,

a̱ si̱ kwa,

a̱ na chwaat di̱ chinchong.

A̱wot a̱tyu nang a̱fang ka meang kwa da̱ a̱nggu a̱ni,

ka̱ na kwang gu, a̱ tyia̱ nkyuo ma̱ luluk a̱luk!’]]#21:44 Lyuut ghyang mbyia̱ a̱da̱dei zwunzwuo wuni (44) bah. Luk 20:18. ”

45Nang a̱cha̱chet a̱yaapris ma̱ng A̱fa̱risawa ba nfa̱k kidee Yesu ji a̱ni, ba̱ si̱ fi̱k nang gu ndyiat tazwa mba kya. (Bibya ku yet á̱ka̱tuk á̱niet khap ba). 46Ba̱ si̱ chat ba̱ ta̱bat guu. A̱wot ba̱ si̱ fa̱k a̱wun susot á̱kpa á̱niet ji. Mat á̱niet ba ku kyiak Yesu, a̱ yet a̱tsak a̱ta̱m a̱kwonu A̱gwaza wa.

Currently Selected:

Matyu 21: TyapNT

Highlight

Copy