Exodo 32
32
Siyamba it mga Israelita i binwat nira nga ipiyasbung it uꞌuybun it bakaꞌ
1Temed ta, it nakakaꞌlay si Moises duꞌut siyagpawan it bukid ngayti, binwat it mga Israelita, naꞌaduꞌun sira it ki Aaron, ka maat nira, “Muwat ka it mga ladawan it Ampuꞌang Diyus nga manguꞌna it aten nga ganti ni Moises, ka egaytu magkaꞌrutan tami in naꞌunu naytu si Moises ngaytu nga nagpaliꞌwan ngaytut aten duꞌut Egipto.”
2“Ta in atkayan,” maat ni Aaron, “awaꞌen mi i mga bulawan nga aritis nga pagꞌaꞌaritisen it mga asawa mi baw mga anak mi, bawnga panabanen mi situt aken.” 3Ta, atkayti nga matuud i binwat nira. 4Pagkatanggap ni Aaron, binwat ya, tiyunaw ya na. Pagkatunaw, itinggis ya na duꞌun it urnuwan. Binwat ya nga ipiyasbung it uꞌuybun it bakaꞌ, bawnga piyalinuꞌ ya. Iyan nagayen-gayen ya na, maamaatan i kadakel ngayti, “Ta, waytu na i ladawan it Ampuꞌang Diyus tami, nga nagpaliꞌwan it aten duꞌut Egipto.”
5Pagkamuya ni Aaron nga nasagyaan it kadakel i binwat ya ngayti, nagbuwat kanya it papangantengan duꞌun it sarungaan it bakaꞌ ngayti. Bawnga inaat ya i kadakel, “Dedelem pistaꞌan tami i AMPUꞌANG DIYUS.” 6Aypaꞌ pagꞌeyag nagbuwat na sira it panalisi nga pagꞌantengen baw beken gasiꞌ nga ipagsamba nga subuk mga pasalamat. Pagkabwat nira, iyan nay buwat nira, nagkaraꞌnen-karaꞌnen baw namagꞌinum-inum, langkuy it nagkasagyaan sira it maraꞌway nga pagkasagyaan.
7Ta, it atkayti na, maat it AMPUꞌANG DIYUS it ki Moises, “Uliꞌen mu kayti i mga Israelita nga kabilug mu ngayan nga ipiyaliꞌwan mu duꞌut Egipto. Kayting-kayti egay beken nga buwat nira, mamagparaꞌe-raꞌet na it sadili nira. 8Piyaswayan nira nga lagi i mga urdin ku. Minwat na sira it ipiyasbung it uꞌuybun it bakaꞌ nga bulawan i binwat. Iyan na i pagsambaen nira kayti baw pagꞌantengan it panalisi nga ipagsamba. Ka maat nira, ‘Waytu na i ladawan it Ampuꞌang Diyus tami nga nagpaliꞌwan it aten duꞌut Egipto.’
9Kayti urut ku nay adat it mga taw ngayan baw kapiyasngel nira. 10Aypaꞌ kayti, pataꞌnan mu aku ka magsikrab nay iseg kut kanira. Puuꞌun ku na sira bawnga buwaten ku nga ikaw mana i panggaringan it dakulaꞌ nga bangsa.”
11Temed nagpasanguꞌ-sanguꞌ si Moises duꞌun it Ampuꞌang Diyus ya. “AMPUꞌANG DIYUS,” maat ya, “ayaw beteꞌ, ega isgan mu i mga taawan mu ngaytu, sira nga ipiyaliꞌwan mu duꞌut Egipto kat keseg it guna mu. 12Ka in puuꞌun mu na sira, unu na lamang i aaten it mga taga Egipto? Daꞌga aaten nira nga, ‘Palan may antap it nakem it Ampuꞌang Diyus nga ega magayen. Ipiyaliꞌwan ya palan i mga Israelita situt banwa ta ka kupuuꞌun ya sira duꞌut kabubukidan.’ Pagꞌangutun ku nga ega naga ipatabus-tabus muy iseg mut kanira baw pagpikiren mu ngaytu nga ikaꞌilang it kanira. 13Demdemen mu naga i mga manigsirbi mu nga si Abraham, si Isaac baw si Jacob. Ka isiyanggup mu it kanira nga mga tungtung-inapuꞌ nira, padaklen mu nga subung it kadakel it mga bituꞌun duꞌut langit, baw seked it magtungtung-magꞌinapuꞌ makanira i kapuꞌsaan it banwa nga isiyanggup mu it kanira.” 14Ta ega naga ipiyatubus it AMPUꞌANG DIYUS i napikir ya ngayti nga puuꞌun i mga Israelita.
15Pagkatiwas it sugi-sugid nira ngayti, nanadsad na si Moises, taban ya na i duwa ngayting dapiꞌpis nga batu nga pagsusuratan maglimbang it mga urdin ngayti it Ampuꞌang Diyus. 16Ampuꞌang Diyus mismu i nagbuwat it mga batu ngayti baw nagsurat kayti.
17Desang magpanadsad na na Moises, nagnegan ni Josue i kukurisang it mga taw. Maat ya it ki Moises, “Subung it may gira na duꞌut mga kaꞌibaan ta!”
18Temed maat i tubag ni Moises, “Magkagnegan ku ngayan nga kukurisang nira, ega bayan kurisang it nandaꞌeg u diyaꞌeg, in daꞌga karantaꞌan.”
19Magdarapaꞌ sira duꞌut pagbabalay-balayan nira ngayti, magkaltegan ni Moises i binwat ngayti nga ipiyasbung it bakaꞌ baw mga taw ngayting sumayad-sayadan i mamagbayliꞌ. Pagkalteg ya kayti, simnikrab i iseg ya. Egay beken, ipiyagwaꞌsag ya duꞌut riyengkadan it bukid ngayti i mga dapiꞌpis ngayting batu, unupat naremek-remek. 20Inanu yay baka-bakaꞌ ngayti nga binwat ka inanteng ya, bawnga ininek. Iliyamaꞌ yay purbus ngayti duꞌut danum bawnga ipiyaꞌinum ya it mga Israelita.
21Bawnga siyarunga ya si Aaron ngayti. Maat ya, “Munut mga taw ngaytu ka siyumbayaꞌ mu? Daꞌga ipiyakursud mu na sira it mabeꞌgat ngaytu nga kasalaꞌan?”
22Katubag si Aaron, maat ya, “Ayaw ka daꞌat iseg it aken, Agalen ku, ka urut mu nay adat it itung mga taw. Talagang marway sira muwat it karaꞌe-raꞌetan. 23Ka maat nira it aken, ‘Muwat ka it mga ladawan it Ampuꞌang Diyus nga manguꞌnat aten nga ganti ni Moises, ka egaytu magkaꞌrutan tami in naꞌunu naytu si Moises ngaytu nga nagpaliꞌwan ngaytut aten duꞌut Egipto.’ 24Aypaꞌ ka maat kut kanira nga in siyu may siyu i may bulawan nga rurug it bilug, awaꞌen na ka tabanen situt aken. Ta pagkatanggap ku, itiyalpak ku duꞌut apuy, baraꞌan ya, yanayan, subung ngayat baka-bakaꞌ.”
25Namuyaan ni Moises nga, mga taw ngayti, talagang pagsariyen na nira it sumbayaꞌ i muꞌsang mararaꞌway nga kaꞌirgan nira, beken it piyalugtan na ngayti ni Aaron, ega piyaar ya, aypaꞌ sudi-sudiyen naytu sira it mga bangsa nga kalaban nira. 26Aypaꞌ binwat ni Moises, timnindeg kanya duꞌut salakwaten it pagbabalay-balayan nira ngayti baw nanggesang-gesang, nga maat ya, “Melep sinit aken i muꞌsa nga kampiꞌ paꞌ it AMPUꞌANG DIYUS!” Minlep nga muꞌsa duꞌut kanya i mga Levita nga mga tungtung-inapuꞌ ni Levi.
27Bawnga maat ya it mga minlep ngayti nga mga Levita, “Ituy ipagꞌaat it AMPUꞌANG DIYUS it bangsa ta nga Israel, ‘Panaꞌbiten mi i mga basiꞌ mi. Lekep-lekepen mi i pagbabalay-balayan ta ngaytu. Mangimatay kamu it kabilug mi nga Israelita, abir kung kaduguꞌan u iba-iba mi.’” 28Piyamayaꞌ it mga Levita i ipagtaꞌeg ngayti ni Moises. Mga tulung ribu nga kataawan i napatay nirat iting aldaw. 29“Ta kayti,” maat ni Moises, “ipiyapinpin kamu na kat beken nga taw ka ipiyasiguru na nga manigsirbi kamu na it AMPUꞌANG DIYUS, ka siyunud mi i taꞌeg ya nga mangimatay it kabilug mi, nga yay panriga ya it kanira. Aypaꞌ pagꞌildawan kamu na it AMPUꞌANG DIYUS.”
30Pagkadedelman, maat siꞌ ni Moises it mga Israelita, “Talagang dakulaꞌ na i nabwat mi ngaytu nga kasalaꞌan. Tumungul aku siꞌ duꞌut bukid ngayti ka pakikita aku siꞌ it AMPUꞌANG DIYUS. Barang baꞌ maꞌangut ku naga nga pasinsiyaen ya naga kamu.”
31Egay beken nanungul siꞌ si Moises duꞌut bukid ngayti. Pagꞌabut ya duꞌun it AMPUꞌANG DIYUS, maat ya, “Talagang dakulaꞌ naytu nga kasalaꞌan i nabwat it mga taw ngaytu, ka minwat sira it ladawan nga bulawan i binwat, ka siyamba nira. 32Temed kayti pagꞌangut-angutun ku nga in mapakay naga, pasinsiyaen mu naga sira. In ega na mapasinsiya mu, ta buraen mu na lamang i ngaran ku asat pagsuratan mu it mga ngaran it mga taawan mu nga pagꞌildawan mu.”
33Katubag i AMPUꞌANG DIYUS, maat ya, “Yay matuud, in siyu-siyuy nagkasalaꞌan kuntraꞌ it aken, iyan i buraen ku kat pagsuratan ku ngayan. 34Kayti panguꞌnaan mu naga sira duꞌut rugar nga ipiyagꞌaat ku it imu. Kat uꞌnaan mi nagayan i anghil ku. Temed mabut yan i aldaw nga rigaen kuy mga Israelita ngaytu sabap it kasalaꞌan nira.”
35Ta miyabut nga matuud i panriga ngayti, ka piyasarut it AMPUꞌANG DIYUS i mga katataawan sabap it ipiyabwat nira ngayti it ki Aaron nga ipiyasbung it uꞌuybun it bakaꞌ nga siyamba nira.
Currently Selected:
Exodo 32: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
Exodo 32
32
Siyamba it mga Israelita i binwat nira nga ipiyasbung it uꞌuybun it bakaꞌ
1Temed ta, it nakakaꞌlay si Moises duꞌut siyagpawan it bukid ngayti, binwat it mga Israelita, naꞌaduꞌun sira it ki Aaron, ka maat nira, “Muwat ka it mga ladawan it Ampuꞌang Diyus nga manguꞌna it aten nga ganti ni Moises, ka egaytu magkaꞌrutan tami in naꞌunu naytu si Moises ngaytu nga nagpaliꞌwan ngaytut aten duꞌut Egipto.”
2“Ta in atkayan,” maat ni Aaron, “awaꞌen mi i mga bulawan nga aritis nga pagꞌaꞌaritisen it mga asawa mi baw mga anak mi, bawnga panabanen mi situt aken.” 3Ta, atkayti nga matuud i binwat nira. 4Pagkatanggap ni Aaron, binwat ya, tiyunaw ya na. Pagkatunaw, itinggis ya na duꞌun it urnuwan. Binwat ya nga ipiyasbung it uꞌuybun it bakaꞌ, bawnga piyalinuꞌ ya. Iyan nagayen-gayen ya na, maamaatan i kadakel ngayti, “Ta, waytu na i ladawan it Ampuꞌang Diyus tami, nga nagpaliꞌwan it aten duꞌut Egipto.”
5Pagkamuya ni Aaron nga nasagyaan it kadakel i binwat ya ngayti, nagbuwat kanya it papangantengan duꞌun it sarungaan it bakaꞌ ngayti. Bawnga inaat ya i kadakel, “Dedelem pistaꞌan tami i AMPUꞌANG DIYUS.” 6Aypaꞌ pagꞌeyag nagbuwat na sira it panalisi nga pagꞌantengen baw beken gasiꞌ nga ipagsamba nga subuk mga pasalamat. Pagkabwat nira, iyan nay buwat nira, nagkaraꞌnen-karaꞌnen baw namagꞌinum-inum, langkuy it nagkasagyaan sira it maraꞌway nga pagkasagyaan.
7Ta, it atkayti na, maat it AMPUꞌANG DIYUS it ki Moises, “Uliꞌen mu kayti i mga Israelita nga kabilug mu ngayan nga ipiyaliꞌwan mu duꞌut Egipto. Kayting-kayti egay beken nga buwat nira, mamagparaꞌe-raꞌet na it sadili nira. 8Piyaswayan nira nga lagi i mga urdin ku. Minwat na sira it ipiyasbung it uꞌuybun it bakaꞌ nga bulawan i binwat. Iyan na i pagsambaen nira kayti baw pagꞌantengan it panalisi nga ipagsamba. Ka maat nira, ‘Waytu na i ladawan it Ampuꞌang Diyus tami nga nagpaliꞌwan it aten duꞌut Egipto.’
9Kayti urut ku nay adat it mga taw ngayan baw kapiyasngel nira. 10Aypaꞌ kayti, pataꞌnan mu aku ka magsikrab nay iseg kut kanira. Puuꞌun ku na sira bawnga buwaten ku nga ikaw mana i panggaringan it dakulaꞌ nga bangsa.”
11Temed nagpasanguꞌ-sanguꞌ si Moises duꞌun it Ampuꞌang Diyus ya. “AMPUꞌANG DIYUS,” maat ya, “ayaw beteꞌ, ega isgan mu i mga taawan mu ngaytu, sira nga ipiyaliꞌwan mu duꞌut Egipto kat keseg it guna mu. 12Ka in puuꞌun mu na sira, unu na lamang i aaten it mga taga Egipto? Daꞌga aaten nira nga, ‘Palan may antap it nakem it Ampuꞌang Diyus nga ega magayen. Ipiyaliꞌwan ya palan i mga Israelita situt banwa ta ka kupuuꞌun ya sira duꞌut kabubukidan.’ Pagꞌangutun ku nga ega naga ipatabus-tabus muy iseg mut kanira baw pagpikiren mu ngaytu nga ikaꞌilang it kanira. 13Demdemen mu naga i mga manigsirbi mu nga si Abraham, si Isaac baw si Jacob. Ka isiyanggup mu it kanira nga mga tungtung-inapuꞌ nira, padaklen mu nga subung it kadakel it mga bituꞌun duꞌut langit, baw seked it magtungtung-magꞌinapuꞌ makanira i kapuꞌsaan it banwa nga isiyanggup mu it kanira.” 14Ta ega naga ipiyatubus it AMPUꞌANG DIYUS i napikir ya ngayti nga puuꞌun i mga Israelita.
15Pagkatiwas it sugi-sugid nira ngayti, nanadsad na si Moises, taban ya na i duwa ngayting dapiꞌpis nga batu nga pagsusuratan maglimbang it mga urdin ngayti it Ampuꞌang Diyus. 16Ampuꞌang Diyus mismu i nagbuwat it mga batu ngayti baw nagsurat kayti.
17Desang magpanadsad na na Moises, nagnegan ni Josue i kukurisang it mga taw. Maat ya it ki Moises, “Subung it may gira na duꞌut mga kaꞌibaan ta!”
18Temed maat i tubag ni Moises, “Magkagnegan ku ngayan nga kukurisang nira, ega bayan kurisang it nandaꞌeg u diyaꞌeg, in daꞌga karantaꞌan.”
19Magdarapaꞌ sira duꞌut pagbabalay-balayan nira ngayti, magkaltegan ni Moises i binwat ngayti nga ipiyasbung it bakaꞌ baw mga taw ngayting sumayad-sayadan i mamagbayliꞌ. Pagkalteg ya kayti, simnikrab i iseg ya. Egay beken, ipiyagwaꞌsag ya duꞌut riyengkadan it bukid ngayti i mga dapiꞌpis ngayting batu, unupat naremek-remek. 20Inanu yay baka-bakaꞌ ngayti nga binwat ka inanteng ya, bawnga ininek. Iliyamaꞌ yay purbus ngayti duꞌut danum bawnga ipiyaꞌinum ya it mga Israelita.
21Bawnga siyarunga ya si Aaron ngayti. Maat ya, “Munut mga taw ngaytu ka siyumbayaꞌ mu? Daꞌga ipiyakursud mu na sira it mabeꞌgat ngaytu nga kasalaꞌan?”
22Katubag si Aaron, maat ya, “Ayaw ka daꞌat iseg it aken, Agalen ku, ka urut mu nay adat it itung mga taw. Talagang marway sira muwat it karaꞌe-raꞌetan. 23Ka maat nira it aken, ‘Muwat ka it mga ladawan it Ampuꞌang Diyus nga manguꞌnat aten nga ganti ni Moises, ka egaytu magkaꞌrutan tami in naꞌunu naytu si Moises ngaytu nga nagpaliꞌwan ngaytut aten duꞌut Egipto.’ 24Aypaꞌ ka maat kut kanira nga in siyu may siyu i may bulawan nga rurug it bilug, awaꞌen na ka tabanen situt aken. Ta pagkatanggap ku, itiyalpak ku duꞌut apuy, baraꞌan ya, yanayan, subung ngayat baka-bakaꞌ.”
25Namuyaan ni Moises nga, mga taw ngayti, talagang pagsariyen na nira it sumbayaꞌ i muꞌsang mararaꞌway nga kaꞌirgan nira, beken it piyalugtan na ngayti ni Aaron, ega piyaar ya, aypaꞌ sudi-sudiyen naytu sira it mga bangsa nga kalaban nira. 26Aypaꞌ binwat ni Moises, timnindeg kanya duꞌut salakwaten it pagbabalay-balayan nira ngayti baw nanggesang-gesang, nga maat ya, “Melep sinit aken i muꞌsa nga kampiꞌ paꞌ it AMPUꞌANG DIYUS!” Minlep nga muꞌsa duꞌut kanya i mga Levita nga mga tungtung-inapuꞌ ni Levi.
27Bawnga maat ya it mga minlep ngayti nga mga Levita, “Ituy ipagꞌaat it AMPUꞌANG DIYUS it bangsa ta nga Israel, ‘Panaꞌbiten mi i mga basiꞌ mi. Lekep-lekepen mi i pagbabalay-balayan ta ngaytu. Mangimatay kamu it kabilug mi nga Israelita, abir kung kaduguꞌan u iba-iba mi.’” 28Piyamayaꞌ it mga Levita i ipagtaꞌeg ngayti ni Moises. Mga tulung ribu nga kataawan i napatay nirat iting aldaw. 29“Ta kayti,” maat ni Moises, “ipiyapinpin kamu na kat beken nga taw ka ipiyasiguru na nga manigsirbi kamu na it AMPUꞌANG DIYUS, ka siyunud mi i taꞌeg ya nga mangimatay it kabilug mi, nga yay panriga ya it kanira. Aypaꞌ pagꞌildawan kamu na it AMPUꞌANG DIYUS.”
30Pagkadedelman, maat siꞌ ni Moises it mga Israelita, “Talagang dakulaꞌ na i nabwat mi ngaytu nga kasalaꞌan. Tumungul aku siꞌ duꞌut bukid ngayti ka pakikita aku siꞌ it AMPUꞌANG DIYUS. Barang baꞌ maꞌangut ku naga nga pasinsiyaen ya naga kamu.”
31Egay beken nanungul siꞌ si Moises duꞌut bukid ngayti. Pagꞌabut ya duꞌun it AMPUꞌANG DIYUS, maat ya, “Talagang dakulaꞌ naytu nga kasalaꞌan i nabwat it mga taw ngaytu, ka minwat sira it ladawan nga bulawan i binwat, ka siyamba nira. 32Temed kayti pagꞌangut-angutun ku nga in mapakay naga, pasinsiyaen mu naga sira. In ega na mapasinsiya mu, ta buraen mu na lamang i ngaran ku asat pagsuratan mu it mga ngaran it mga taawan mu nga pagꞌildawan mu.”
33Katubag i AMPUꞌANG DIYUS, maat ya, “Yay matuud, in siyu-siyuy nagkasalaꞌan kuntraꞌ it aken, iyan i buraen ku kat pagsuratan ku ngayan. 34Kayti panguꞌnaan mu naga sira duꞌut rugar nga ipiyagꞌaat ku it imu. Kat uꞌnaan mi nagayan i anghil ku. Temed mabut yan i aldaw nga rigaen kuy mga Israelita ngaytu sabap it kasalaꞌan nira.”
35Ta miyabut nga matuud i panriga ngayti, ka piyasarut it AMPUꞌANG DIYUS i mga katataawan sabap it ipiyabwat nira ngayti it ki Aaron nga ipiyasbung it uꞌuybun it bakaꞌ nga siyamba nira.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.