Гелип чыкыш 14

14‑нҗи бап

Ыбрам Луты халас эдйәр

1Омрапел Шингарың, Арёк Эласарың, Кедорлагомер Эйламың, Тидал болса Гойимиң патышасыды. 2Булар Содом шасы Бераның, Гомора шасы Биршаның, Адма шасы Шинабың, Себойым шасы Шемебериң ве Согар дийип атландырылян Бала шасының гаршысына урша башладылар. 3Олар Сиддим дересинде, ягны Өли деңизде өз гүйчлерини бирлешдирдилер. 4Бу шалар он ики йыллап, Кедорлагомере гуллук этдилер, он үчүнҗи йыл болса оңа гаршы баш гөтердилер. 5-6Он дөрдүнҗи йылда Кедорлагомер ве онуң билен бирлешен шалар, Аштероткарнайымда рапалары, Хамда зузылары, Шавекирятайымда эймимлери ве чөл этегиндәки Эйлпарана ченли узалып гидйән Сегир дагларында хорылары дерби-дагын этдилер. 7Олар Сегир дагларындан ызларына өврүлип, Эйнмишпат (ягны Кадеш) галасына гелдилер ве амалеклериң тутуш топрагыны басып алып, Хасесон Тамарда яшаян аморлары-да еңлише сезевар этдилер. 8-9Онсоң Содом, Гомора, Адма, Себойым ве Бала, ягны Согар шалары сөвеш мейданына чыкдылар ве бәш ша болуп, Сиддим дересинде дөрт шаның: Эйлам шасы Кедорлагомериң, Гойим шасы Тидалың, Шингар шасы Омрапелиң, Эласар шасы Арёгың гаршысына сөвеше гирдилер.

10Сиддим дереси ичи шепбикли чукурлардан долуды. Содом билен Гомора шалары гачып баряркалар, оларың адамларындан кәбирлери шол чукурлара йыкылдылар, бейлекилери болса даглара гачдылар. 11Дөрт ша болса Содомы ве Гомораны талап, олҗа алан әхли мал-мүлкүдир азыкларыны алып гитдилер. 12Олар Ыбрамың доганының оглы Луты-да әхли мал-мүлки билен биле әкитдилер. Ол хем Содомда яшаярды.

13Гачып гутуланлардан бири гелип, болан ваканы Ыбрам еврее хабар берди. Шол вагтлар Ыбрам Эшкол билен Анериң доганы амор Мамрәниң дуб токайҗыгының гапдалында яшаярды. Олар Ыбрамың аркадашларыды.

14Өз доганының оглы Лутуң есир дүшендигини эшидип, хоҗалыгында доглуп, сөвеше түргенлешдирилен үч йүз он секиз саны эсгериң өңүне дүшүп, Ыбрам Дана ченли шол дөрт шаның ызындан ковды. 15Ыбрам эсгерлерини топарлара бөлүп, гиҗе шаларың үстүне чозуп, олары дерби-дагын этди. Соңра Ыбрам олары ене Дамаскдан демиргазыкда ерлешен Хобаха ченли ковды. 16Ыбрам олҗа алан әхли мал-мүлкүни, доганының оглы Луты, онуң әхли эмләгини, аяллары хем халкы ызына гайтарып гетирди.

Мәликсадык Ыбрама пата берйәр

17Ыбрам Кедорлагомери ве онуң янындакы шалары дерби-дагын эдип геленден соң, Содом шасы оны гаршыламак үчин Шаве дересине, ягны ша җүлгесине гитди. 18Бейик Худайың руханысы болан Салим шасы Мәликсадык Ыбрама чөрек билен шерап гетирди. 19Ол Ыбрама пата берип:

«Ери-гөги ярадан Бейик Худай Ыбрамы ялкасын!

20Душманларыны онуң элине берен

Бейик Худая алкыш болсун!» дийди.

Ыбрам әхли задың ондан бирини Мәликсадыга берди. 21Онсоң Содом шасы Ыбрама: «Мениң адамларымы ызына бер, әхли мал-мүлки болса өзүң ал» дийди. 22-23Ыбрам Содом шасына шейле дийди: «„Ыбрамы мен гурпландырдым“ диймезиң ялы, саңа дегишли затларың хич бирини, хатда бир гушаҗыгы я-да сапаҗыгы хем алмаҗакдыгыма Ери-гөги ярадан Бейик Худайың – Реббиң адындан ант ичйәрин. 24Йөне йигитлериң иен иймитлери муңа дегишли дәлдир. Шейле хем мениң билен гиден Анер, Эшкол ве Мамре хем өз пайларыны алсынлар».

Currently Selected:

Гелип чыкыш 14: TukCyr16

Highlight

Copy