Гелип чыкыш 35

35‑нҗи бап

Худай Бейтелде Якуба пата берйәр

1Худай Якуба: «Бейтеле гит-де, шол ерде месген тут. Доганың Ысавдан гачып баряркаң, өзүңе гөрнен Худая гурбанлык сыпасыны яса» дийди. 2Шейдип, Якуп машгаласына ве янындакылара йүзленип: «Кесеки худайларыңызы ташлаң, тәмизлениң ве гейимлериңизи чалшырың. 3Гелиң, Бейтеле гиделиң. Ол ерде хасратлы гүнүмде маңа көмек эден ве гиден еримде мениң билен болан Худая гурбанлык сыпасыны ясайын» дийди. 4Шондан соң олар өз кесеки худайларыны ве гулакхалкаларыны Якуба бердилер. Якуп олары Шекемиң голайындакы дуб агаҗының ашагында гизледи.

5Соңра олар ёла дүшдүлер. Якубың огулларыны хич ким ызарламаз ялы, төверекдәки галаларың әхлисиниң илатыны Худайың горкусы гаплады. 6Якуп өз адамлары билен Кенгандакы Луза, ягны хәзирки Бейтеле гелди. 7Якуп ол ерде гурбанлык сыпасыны ясап, ол ери «Бейтелиң Худайы» дийип атландырды, себәби Якуп доганындан гачып барярка, Худай Өзүни шол ерде оңа аян эдипди. 8Ребеканың энекеси Дебора арадан чыкды ве ол Бейтелиң голайындакы дуб агаҗының дүйбүнде җайланды. Шейдип, бу агач Алон-бакут#35:8 Алон-бакут – бу сөз агылы дуб агаҗы диймеги аңладяр. дийлип атландырылды.

9Якуп Паданарамдан гайдып геленден соң, Худай Өзүни Якуба ене-де аян эдип, оңа пата берди. 10Худай Якуба: «Сениң адың хәзир Якуп, йөне мундан бейләк сениң адың Якуп дәл-де, Ысрайыл болар» дийди. Шейдип, Ол онуң адына Ысрайыл дакды. 11Соңра Худай ене: «Мен Гудратыгүйчли Худайдырын. Өрңәң, көпелиң. Сенден миллет ве биртопар миллетлер дөрәр, сениң несиллериңден шалар чыкар. 12Ыбрайыма, Ысхага берен юрдумы саңа ве сениң неслиңе берерин» дийди. 13Соңра Худай Якуп билен сөзлешен еринден ёкары гөтерилип гитди. 14Якуп Худайың өзи билен геплешен еринде улы даш дикди ве онуң үстүне ичги садакасыны хем-де зейтун ягыны гуйды. 15Якуп Худайың өзи билен геплешен ерини Бейтел#35:15 Бейтел – бу сөз Худайың өйи диймеги аңладяр. дийип атландырды.

Рахелиң өлүми

16Олар Бейтелден уградылар. Эфрат велаятына етмәге санлыҗа мензил галанда, ёлда Рахелиң чагасының болмалы пурсады гелип, оны агыр бургы тутуп уграды. 17Агыр бургы тутярка, гөбегене оңа: «Горкма, ине, сениң муның-да огул!» дийди. 18Җаны чыкып барян Рахел оглуна Беноны#35:18 Беноны – бу сөз хасратымда доглан огул диймеги аңладяр. дийип ат дакды. Йөне какасы онуң адына Бенямин#35:18 Бенямин – бу сөз оглум – саг элим диймеги аңладяр. гойды. 19Шейдип, Рахел дүнйәден өтди. Ол Эфрата, ягны Бейтуллахама гидилйән ёлуң гырасында җайланылды. 20Якуп Рахелиң губурының үстүнде бир улы даш дикди. (Шол даш Рахелиң губурының үстүнде шу гүне ченли хем дур.) 21Ысрайыл ене ёлуны довам этдирди. Ол Эдер диңиниң аңырсында өз чадырыны дикди. 22-23Ысрайыл Эдерде яшаярка, онуң оглы Рубен өз какасының гырнак аялы Билха билен ятды. Ысрайыл муны эшитди.

Ысрайылың он ики оглы барды. Онуң Леядан болан огуллары: Рубен (новбахар оглы), Шимгон, Леви, Яхуда, Ысакар, Зебулун; 24онуң Рахелден болан огуллары: Юсуп, Бенямин; 25онуң Рахелиң гырнагы Билхадан болан огуллары: Дан, Нафталы; 26онуң Леяның гырнагы Зилпадан болан огуллары: Гат ве Ашер. Бу Якубың Паданарамда доглан огулларыды.

Ысхагың өлүми

27Якуп Ыбрайым билен Ысхагың гелмишек болуп яшан ери болан Мамрә, ягны Кирятарба (Хеброна) какасы Ысхагың янына гелди. 28Ысхак йүз сегсен йыл өмүр сүрди. 29Ол гаррап дүнйәден өтүп, ата-бабаларына говушды. Огуллары Ысав билен Якуп оны җайлады.

Currently Selected:

Гелип чыкыш 35: TukCyr16

Highlight

Copy