Luglaa 16

Haga ni Ismɛl wia

1A saŋa, di Abram haaŋ Sarai waa bie maa lullɛ tɛu. U faa dɔɔ yoŋhaaŋ bɛl n lii Ijip hɛri, ba ra yiruu Haga. 2U ŋɔ Abram be, “Kɔraawiizi ɛɛmbuu màá wer lul bie. Gil i ni n yoŋhaaŋ naa chɔɔ, aŋhinabe, i nuu daŋ wer lul biizi, bá ɛɛ n hora.”

Uŋ wa ŋɔ guŋ, Abram nuu a zɛɛ. 3Denii Sarai faa jaa gil u jaari kpa u yoŋhaaŋ hiŋ di ɛɛ u haaŋ. Guŋ faa ɛɛwɔɔ binni fi mɔɔ, ka Abram haa wa hel Keenan hɛri la.

4Too, Abram ni u haaŋ Haga hiŋ faa du de, u wa kpogli hia.

Ka Haga n wa zummɛ lugɔ u kpogli hiarɛ la, u faa waa kaa ra tɔgzi u dɔɔrihaaŋ Sarai la. 5Denii Sarai ŋɔ u jaari be, “Hinuu baani la. N yoŋhaaŋ naa kpogli hiarɛ, waa kaa ra tɔgzi, haali miŋ tɛu ŋmɛnɛɛ lugɔ i nuu ra chɔɔ gba. Awia, Kɔraawiizi daŋ turgii a kim, dikuu hiŋ ɛɛŋ guŋ wia!”

6Ka Abram ŋɔ, “Uŋ jaa ɛɛ i yoŋhaaŋ, i daŋ wer ɛɛu gunla maa n dɛkkɛ.” Denii Sarai faa jaa kpogluu ni biinikpola. Uŋ faa ra ɛɛu gunla, Haga chɔ.

7Un chɔwɛɛ la, Kɔraawiizi mɛlika wa nau bule bɛl n du Suur ŋmɛnɛɛ hɛribɔduma nua. 8Mɛlika la n wa nau, u ŋɔ u be, “Sarai yom Haga, lee i liiyɛi, lee i ra lanɛi?” Haga ŋɔ,

“N chɔwɔɔrɛ di ra lii n dɔɔrihaaŋ be.”

9Denii Kɔraawiizi mɛlika la ŋɔ u be, “Bir la i dɔɔri la be di gaa sɛɛ u dɔɔra.” 10Kɔraawiizi mɛlika la kaa ŋɔ, “N daŋ gil i dee wazi werge maa, ba wàá wer kur baa.”

11Kɔraawiizi mɛlika la kaa ŋɔ u be,

“Filaŋkennaa, i kpogli hiarɛ.

Di i wa ŋɔ i lul,

biibaallɛ i lul.

I daŋ dau u sɔŋ Ismɛl.

Kɔraawiizi na

i biinichɔgrɛ.

12Hin niŋ luluu la, u daŋ ɛɛ lugɔ kaukpoŋlii,

u ni nɛr maa

wàá dɔɔ nuukpaŋ.

U ni u lulla gba

wàá dɔɔ nuukpaŋ.”

13Kɔraawiizi n ŋɔ wia tɛu gunla, Haga faa jaa ra yir Kɔraawiizi, “Hinuu Kɔraawiizi la n na naŋ.” U kaa ŋɔ, “N jaa na unla n ɔɔ ra nambuu.” 14Saŋa bɛl n wa helle, ba faa dau a bule hiŋ sɔŋ, Bɛɛ Lahai Rɔi,#16:14 Bɛɛ Lahai Rɔi zɛɛrɛ Unla n du de saŋa maa di ra naŋ. de haa du Kadɛs ni Bɛrɛd baambaannɛ.

15Haga faa lul biibaal tɛɛ Abram, u dau u sɔŋ Ismɛl. 16A guŋ saŋa, di Abram binni faa du tokkoanaazu ni anumbɛl.

Currently Selected:

Luglaa 16: vag

Highlight

Copy