Jɔɔn 11

Lazarɔs siu wia

1Baal bɛllɛ faa du Bɛtani di ra wii. U sɔnnɛ faa Lazarɔs.#Luuk 10:38-39 2Mɛɛri la n faa kpa tulaale bɛl di waari Yeesu naazi ni ka kpa u nyuhuna billaa la niubambiere faa ra wii la.#Jɔɔn 12:3 U ni u kpɛɛma Maata bolle a Bɛtani. 3Awia, ba hum nɛra Yeesu be, di ŋɔ, “Yaa Dɔɔri, i dammu labuu ra wii.”

4Yeesu n wa nuu guŋ, u ŋɔ, “Siu wia lɛi u ra wii a wiila. Kɔraawiizi girme wiarɛ u ra wii a wiila, nɛ́ra wer kpa sɔŋ tɛɛ u bie, ú wiila naa biini.”

5Yeesu faa nɔŋŋi Maata, Mɛɛri ani Lazarɔs labuu. 6Ka uŋ wa nuu Lazarɔs wiila wia, u haa laŋŋi bɔr la un duwɛɛ la hɔpizaa anɛɛ mɔɔ. 7Denii u izi di ŋɔ u hiŋra be, “Ya bir la Juda hɛri.”

8U hiŋra ŋɔ, “Yaa Nabɔma, yaa n faa du de la, Jus hina faa ra nyiŋŋuu ba lɔɔzii ni bia. Ka i kaa ŋɔ ya bir la de filaŋkeŋŋ?”

9Yeesu ŋɔ, “Di hɔɔ wa pizɔɔ guŋŋ di wa hel wiizi cholaa saŋa la, karfizi fidaanɛɛ lɛiyaa? Di hinla maa ra vol bɔchaaŋ, hàá lɔ i naa dikuu wiizi n na chaani bɔr wia. 10Ka hinla maa n na vol hamuŋa ni daŋ lɔ i naa, dikuu bɔr n waa chaanɛɛ wia.”

11Uŋ wa ŋɔ guŋ tuŋ, u kaa ŋɔ, “Yaa dammu Lazarɔs a chɔɔ dɔɔrɛ. N ŋɔ ń la ga lalluu.” 12U hiŋra ŋɔ, “Yaa Dɔɔri, di u ra chɔɔ dɔɔ, amɔ, u daŋ nyaagi.” 13Baawaa faa zumɔɔ lugɔ dɔɔ himmaanii Yeesu ŋɔ. Ka siu wiarɛ u ŋɔ gunla.

14Denii Yeesu ŋɔ kaiih, “Lazarɔs siuwɔɔ. 15Ii daŋ yardiŋ jaa di lii wia naa biini. Awia, n bɔra sɔɔnɔɔrɛ miŋ faa waa hoo de. Ka ií izi ya la u be.”

16Yeesu hiŋri bɛl sɔnnɛ Tɔmas, ba kaa ra yiruu Biinɛɛri. U ŋɔ u dɔŋa Yeesu hiŋra la be, “Ií gil yaa nuu maa la, di ba gaa kpuu, yaa nuu maa siu.”

Yeesu n tig Lazarɔs niuhambizi bampiree wia

17Ba la. Baŋ ga hel de, ba ŋɔ Yeesu be lugɔ baŋ hug Lazarɔs la, u hɔpizaa anaazuu guŋ. 18Bɛtani ni Jɛrusalɛm faa waa nɛɛ. U daŋ ɛɛ lugɔ kilomitazi anɛɛ bɛŋ.#Maak 11:1 19Jɛrusalɛm hina kpila lii de ba, bá wa tig Maata ni Mɛɛri bampiree, dikuu ba kpɛɛma n siuwɛ la wia. 20Maata n wa nuuwɛ lugɔ Yeesu ra bau, u lii ga chem u ni ŋmɛnɛɛ, ka Mɛɛri haa so dia.

21Uŋ ga chem Yeesu ni la, u ŋɔ u be, “N Dɔɔri, di i faa du ɛnnɛ, n kpɛɛma faa waa siuwɛ. 22Ama, n zummɔ lugɔ di i suŋŋi Kɔraawiizi filaŋkeŋ gba, u daŋ tɛi kunla maa hin niŋ suŋŋi.”

23Yeesu ŋɔ u be, “I kpɛɛma daŋ izi siu biini.”

24Maata ŋɔ, “N zummɔ. Durnya tunaa saŋa la lalaa maa n niŋ izi la, u gba daŋ izi a saŋa.”

25Yeesu ŋɔ, “Minuu siu biini izaa. Minuu kaa miibɔɔ. Nɛr la maa n yardiŋ, di u siuwɔ gba, ka u daŋ izi.#1Kɔr 15:21-23 26Nɛr la maa n dɔɔ miibɔɔ di yardiŋ, wàá siu maa. I yardi guŋŋ?”

27U ŋɔ, “Ɛɛh, n Dɔɔri. N yardɔɔrɛ lugɔ hinuu Kɔraawiizi Biibaal Kristo la n niŋ ba durnya la.”#Mat 16:16

Yeesu wiraa wia

28Uŋ wa ŋɔ guŋ, u bir la dia, di ga yir u niwee Mɛɛri la lii kɛrii di ŋɔ u be bɔɔiih, “Nabɔma la ballɔɔ, u ra yirii.” 29Mɛɛri n wa nuu guŋ, u izi manaŋ di la Yeesu be. 30Yeesu faa haa waa bol zuuwɛ, ka haa du bɔr la Maata n wa chem u ni la. 31Jus hina la n faa du Mɛɛri be dia di ra tig u bampirii la n wa na uŋ izee manaŋ lii la, ba gba izi hiŋuu lii. Ba zumɔɔ lugɔ u ra la ŋmam labuu, ú gaa wii.

32Mɛɛri n wa hel bɔr la Yeesu n duwɛɛ la di nau, u la ga giŋŋi u see, di ŋɔ u be, “N Dɔɔri, di i faa du ɛnnɛ, n kpɛɛma faa waa siuwɛ.”

33U ra wii. Jus hina la maa n faa hiŋuu ba la gba ra wii. Yeesu n wa na guŋ, a tiruu werge maa, u biini chɔgi. 34U pɛɛzi baa, “Lee ii huguuwei?”

Ba ŋɔ, “Yaa Dɔɔri, ba wa na a bɔr.” Ba ra la.

35Yeesu ge jaa ra wii.

36Jus hina la n wa na Yeesu n na wii la, ba ŋɔ, “Baal naa faa ra nyiŋŋi u wiarɛ werge.”

37Ka baŋhina ge ŋɔ, “Baal naa n faa pilli nyuŋŋi siwee naa, di u vii du ɛnnɛ, u vii waa gillɛ baal naa siu.”

Yeesu n lalli Lazarɔs di lii siu biini wia

38Yeesu biini kaa chɔgi werge, u him. Ba jaa ga hel ŋmam la bɔr. U ŋmam la ɛɛ bɔr la baŋ tug biirɛ, ka kpa bii bɛl tɔ u nua. 39Yeesu ŋɔ ba be, “Ií lau bii la pilli bɔɔ la nua.”

Ka Maata ŋɔ, “N Dɔɔri, u hɔpizaa anaazuu keŋ zinaa. U daŋ jaa ra sɔɔhri.”

40Yeesu ŋɔ u be, “Maa ŋɔwɛɛ ŋɔ lugɔ di i yardiŋ, i daŋ wer na Kɔraawiizi girmeaa?”

41Ba jaa lau bii la pilli bɔɔ la nua. Yeesu binni chiŋ ka ŋɔ, “N Mɛ, n na jaamii hiŋ nuuwɛ ra tɛŋ. 42Ɛɛ nuuu ra tɛŋ, ka nɛkpila naa n chaalɛɛ naa wiarɛ n ŋɔ guŋ, bá wer zum lugɔ hinuu humiŋ.”

43Uŋ wa ŋɔ guŋ tuŋ, u ŋɔ bɔkpega ni, “Lazarɔs, wa lii!” 44Lazarɔs izi wa lii. U nonee ni u naazi maanii faa haa vɔɔzi wɛjɛ la baŋ kpawɛɛ tɔu la. Bɛl ge faa haa vɔɔ u nyuu.

Yeesu ŋɔ, “Ií ga pur u wɛjɛ la, ka ú wer lii a biini.”

Ban ta Yeesu kpui jina wia

(Mat 26:1-5; Maak 14:1-2; Luuk 22:1-2)

45Denii Jus hina la n ba Mɛɛri be la, baŋ wa na gunla Yeesu n ɛɛwɛ la, bakpila maa jaa yarduu. 46Ka baŋhina ge la Farisizi be, di ga ŋɔ ba be gunla uŋ ɛɛwɛ la. 47Awia, Kɔraawiizi Kizeehina Nabɔnzi ani Farisizi yir sitɔɔra la maa. Ba ba wa chaali, ba ŋɔ ba be,

“Ɛrɛɛ ya ɛɛ naanɛi? Baal naa ra ɛɛ wizenaare werge. 48Di yaa siigi u ni guŋ, nɛr maa daŋ jaa sɛɛ u wia, ka yaa dɔɔra Room hina la ba di wa lɛɛ bɔnnaa, di kaa lɛɛ yaa hɛri fɔŋŋa maa.”

49Kɔraawiizi Kizeehina Maa Nabɔma bɛl sɔnnɛ faa Kaifas. Waabuu faa ɛɛ ba nabɔma a saŋa. U ŋɔ ba be, “Ii waa nfɛrɛ dɔɔwɛ gɛɛ? 50Di nɛkpaŋ lɛɛ nɛkpila siu di siu bá dee gilɛɛ dinzi, u guŋ waa bɔɔ?”#Jɔɔn 18:14 51Uŋ ŋɔ wia naa kennaa, u himmaa fɔŋŋa biini lɛi u wer ŋɔa. Ka uŋ ɛɛ Kɔraawiizi Kizeehina Maa Nabɔma a saŋa wiarɛ u wer ŋɔ guŋ di feli bagli gunla Yeesu n niŋ lɛɛ ba hɛri hina siu, siu.#Mat 20:28 52Ba hɛri hina bɛŋ siu lɛi ú lɛɛ. Yeesu daŋ siu di wer chaali Kɔraawiizi biizi la maa n du yeŋa maa bá maa wer kpau ɛɛ kpaŋ.

53Denii ba ɛɛ nuukpaŋ a hɔl bá kpuu. 54Awia, Yeesu waa kaa sɛɛ ú ni Jus hina a vol, ka suahzi la bol bɛl n du hɛri la n dugli laŋgara la. A bol sɔnnɛ Ɛfram. U ni u hiŋra ga du de.

55Denii Jus hina Gillikaali Hɔpizizeŋ saŋa n waa dugli, nɛkpila lii kɛraa di la Jɛrusalɛm bá wer ɛɛ wia aŋhina, di lizi ba doŋa ha ka wer di ba Gillikaali diwee la. 56Ban du Jɛrusalɛm la, ba ra nyiŋŋi Yeesu bɔr di ɔɔ chi Kɔraawiizi Dia biini di ra pɛɛzi dɔŋa, “Amɔ, u daŋ ba di wa di Gillikaali diwee naa gɛɛ wàá banɛi? Ɛrɛɛ i ge nai?” 57Kɔraawiizi Kizeehina Nabɔnzi ni Farisizi la maa faa ŋɔwɔɔrɛ, Di unla maa zum u bɔr, ú bagli baa bá wer lawuu.

Currently Selected:

Jɔɔn 11: vag

Highlight

Copy