Jɔɔn 13

Yeesu n sanzi u hiŋra naazi wia

1Ba Gillikaali Hɔpizizeŋ dii la saŋa jaa ra dugluu. Yeesu zum lugɔ u daŋ jaa lii durnya di bir kaali u mɛɛ be. Un du durnya la, u nɔŋŋi banla n ɛɛ u hora labuu werge maa di ga tuŋ.

2A duana hiŋ, u ni u hiŋra maa chaali so di ra di. Sitaani teŋ feli kpa nfɛrchɔgii bɛl di du Saimɔn bie Judas Iskariɔt la bampirii alugɔ ú ɛɛ Yeesu sɔsɔgɔ. 3Yeesu n zummɛ lugɔ Kɔraawiizi kpa wiimaa fɔŋŋaa tɛu la, di zum lugɔ u lii Kɔraawiizi benii ka kaa ra nyiŋŋi ú kaa la u be la, 4u izi ba diiribɔr la di kpa u laala dau, ka kpa bɔrduba di nigni#Mat 20:28 5di ɛɛ nii du tassazeŋ bɛl biini di kpa la ga sanzi u hiŋra bɛl naazi, ka pur bɔrduba la uŋ kpawɛɛ nigni la di ra billi u naazi. 6Gunnɛ u ɛɛ ba maa guŋŋ di wa hel Saimɔn Pitta. Pitta ŋɔ, “N Dɔɔri, hàá sam miŋwaa naazi.” 7Yeesu ŋɔ, “Gil n samaa. Haa zum wii la minna ɛɛ filaŋkeŋ, ka ŋmɛnɛbɛl i daŋ wa zum u zɛɛ.” 8Pitta ŋɔ, “Akai! Màá gil i sanzi n naazi maa.” Yeesu ŋɔ, “Di maa i naazi sanzɛɛ, amɔ, n nii waa wiimaa dɔɔwɛ.” 9Saimɔn ŋɔ, “N Dɔɔri, di gunnɛ, í sanzi n naazi naa di kaa sanzi n nonee ni n siwee naa maa gba.” 10Yeesu ŋɔ, “Nɛr la maa n sɔ nii, u guŋ wesso. Wàá ka sɔ nii di u naazi bɛŋ lɛi u sanzi. Awia, ii wessoo guŋ. Ka ii maa lɛi wesse.” 11U zum unla n niŋ wa ɛɛu sɔsɔgɔ labuu. Awiarɛ u ŋɔ ba maa lɛi wesse la.

12U sanzi ba maa naazi guŋŋ di wa tuŋ, ka kaa kpa u kuna laali di ba wa so di pɛɛzi baa, “Wii naa miŋ ɛɛwɛ tɛɛ ia naa, ii zum u zɛɛa? 13Ii ɔɔ ra yirimbuu ii ‘Nabɔma’ ni ii ‘Dɔɔri.’ Gunnɛ. N ɛɛ ii dɔɔrii di kaa ɛɛ ii nabɔma. Awia, a dɛkkɔ iinna yiriŋ guŋ. 14Too. Ii Dɔɔri n sanzi ii naazi filaŋkennaa, u gunnɛ ra bagli lugɔ a dɛkkɔɔ ii ge n ninna sanzi ii dɔŋahina naazi guŋ. 15N ɛɛ gunnɛ ií wer na di hiŋ. 16Ií gil n ŋɔ wibii maa tɛɛ ia. Balii waa u dɔɔri ra kaali gɛɛ huŋhunni ge waa nɛr la n humuu a kaali. 17Di ii zum wia naa di kaa ra hiŋ guŋ, ii bɔra daŋ sɔɔni ia.

18Ka ii maa wia lɛi n ŋɔ guŋ. N zum ii banla miŋ lizɛɛ ii ra hiŋiŋ labuu. Ka wii la baŋ faa sɛbɛɛ Kɔraawiizi Hɔŋ biinii niŋ wa ɛɛ. Ba faa sɛbɔɔrɛ, dí,

‘N dammu la n nuu n kpauwɛ ra di la gba

bittɔɔ chɔɔ hɛri,

di vir hɛɛhraa

du n siwee.’#Yira 41:9

19Filaŋkeŋ n danna bagli ia wia aŋhina n niŋ wa ɛɛ ií zum a wia mɔɔ ka a waa ɛɛ ií wer yardiŋ. 20Ií gil n ŋɔ wibii maa tɛɛ ia. Nɛr la maa n niŋ lɛɛ n huŋhunni di dau, minuu u lɛɛ dau la. Nɛr la maa n niŋ lɛɛ n ge dau, unla n humiŋ labuu u lɛɛ dau.”#Mat 10:40-42

Yeesu n ŋɔ u sɔsɔgɔ ɛɛi wia

(Mat 26:20-25; Maak 14:17-21; Luuk 22:21-23)

21Yeesu n wa ŋɔ guŋ tuŋ, u biini jaa chɔgi werge maa. U ŋɔ, “Ií gil n ŋɔ wibii maa tɛɛ ia. Ii bɛl daŋ ɛɛŋ sɔsɔgɔ.” 22U hiŋra binni dɔŋa siwee. Ba waa zum unla maa wia uŋ ŋɔ guŋ. 23U hiŋrinɔŋŋii bɛl sogo dugluu. 24Saimɔn kamzi ŋɔ u be dí ú pɛɛzuu nɛr la wia uŋ ŋɔ guŋ. 25U kuli pɛɛzuu, “N Dɔɔri, anɛɛwɛi?” 26Yeesu ŋɔ, “Unla min niŋ kpa paanuu di lii dɔzi tɛu la, waabuu niŋ ɛɛŋ a sɔsɔgɔ.” U kpa paanuu lii dɔzi, di kpa tɛɛ Saimɔn Iskariɔt bie Judas. 27Judas lɛɛ a paanuu. Kakpaŋ Sitaani zuu u ni.

Yeesu ŋɔ u be, “Wii la hin niŋ ɛɛ, izi manaŋ di ga ɛɛ a widee.” 28Ka banla maa n soge de di ra di la waa u wiŋɔzi la zɛɛ zummɛ. 29Baŋhina zumɔɔ lugɔ Judas n kpogli ba kebee la, aabuu Yeesu ŋɔ ú kpa ga yau ba Hɔpizizeŋ la diwee gɛɛ u ŋɔ ú kpa a kebee yenne di ga tɛɛ nyaara. 30Judas n wa hee paanuu la tuŋ, u izi lii ba be, di bɔr biroo.

Widaulifalii bɛl Yeesu n dauwɛ wia

31Uŋ wa liwɛɛ la, Yeesu jaa ŋɔ ba be, “Filaŋkeŋ Mìŋ́ Newee Biibaal jaa na n girmee, Kɔraawiizi ge na girme dikuu n wia. 32Di Kɔraawiizi na girme dikuu n wia, u daŋ kaa gil ń na girme. Filaŋkennaabuu ń na girme la.

33N biizi, màá ka birgi ii be filaŋkeŋ. Ii daŋ nyiŋŋi n bɔr ka gunla miŋ ŋɔ Jus hina be la, gunnɛ n na ŋɔ i ge be la. Ii wàá wer ba bɔr la min niŋ la naa.#Jɔɔn 7:34

34Widaulifalii bɛllɛ keŋ n ŋɔ ń dau tɛɛ ia. Ií nɔŋŋi dɔŋa. Gunla miŋ nɔŋŋi ia la, ií ge nɔŋŋi dɔŋaa guŋ.#1Jɔɔ 3:23 35Di nɛra wa na lugɔ ii nɔŋŋi dɔŋa guŋ, denii bá chi zum lugɔ ii ɛɛ n hiŋraa.”

Yeesu n ŋɔ Pitta n niŋ hɔɔ u wia

(Mat 26:31-35; Maak 14:27-31; Luuk 22:31-34)

36Saimɔn Pitta pɛɛzuu, “N Dɔɔri, lee i ra lanɛi?” Yeesu ŋɔ, “Hàá wer hiŋiŋ la bɔr la minna la. Ka i gba daŋ ŋmɛnɛ ba.” 37Pitta kaa pɛɛzuu, “N Dɔɔri, bɛɛ n baani màá wer la filaŋkeŋwaai? Di siu gbaa, n daŋ wer siu dikuu i wia.” 38Yeesu pɛɛzuu, “Wibii maa, i daŋ sɛɛ di siu dikuu n wiaa? Gil ń ŋɔ wibii maa tɛi. I daŋ hɔɔ n wia buhoro lugɔ n nii lɛi, ka zabal haa wii.”#Jɔɔn 18:25-27

Currently Selected:

Jɔɔn 13: vag

Highlight

Copy