Jɔɔn 16

1Yeesu kaa ŋɔ, “N bagli iabuu wia naa, wii maa gilɛɛ wa wer bir ia har. 2Ba daŋ duŋŋi ia ba jaamaa diini biini zuui. Wibii maa, ŋmɛnɛbɛl ba danna binni lugɔ di ba kpu ia, Kɔraawiizi kiparuu ba ra ɛɛ guŋ. 3Annii maanii bá ɛɛ ia dikuu baŋ waa n ni n Mɛɛ zummɛ la wia.

4Ka n bagli iabuu a wia, di a wa ɛɛwɔ, ií wer liizi di zum lugɔ n faa bagli iabuu guŋ.

Kɔraawiizi Dumnanii huma wia

N faa waa ia baglɛɛ wia naa saŋa la dikuu miŋ ɔɔ faa du ii be la wia. 5Ka filaŋkennaa, n daŋ bir la unla n humiŋ la be. Ii bɛl maa waa kaa ra pɛɛziŋ bɔr la minna la, 6Ka ii gillɔɔ ii biine chɔgi dikuu n wiŋɔzi naa wia. 7Ií gil n ŋɔ wibii maa tɛɛ ia. Minna kaali naa, u guŋ daŋ lii suma tɛɛ ia. Di maa haŋ kaali, Nɛhiini la ge wàá ba ii be. Ka di n wa kaalɔɔ, n daŋ humuu tɛɛ ia. 8Di u wa ballɔ, u daŋ di wibii tɛɛ durnya, di bagli unla hor n waa sum ani unla hor n summɛ ani gunla Kɔraawiizi seriya dii n duwɛɛ. 9U daŋ di wibii tɛɛ baa, bá sɛɛ lugɔ ba hor waa sum, dikuu baŋ waa sɛɛwɛ tɛŋ wia, 10di kaa bagli lugɔ n hor summɔ dikuu minna la n Mɛɛ be ii wàá ka naŋ wia, 11di kaa bagli gunla Kɔraawiizi seriya dii n duwɛɛ, dikuubɛɛwiai, u teŋ di durnya naa koorii seriya u chol.

12N dɔɔ wikpila min niŋ ŋɔ ii be. Ka a daŋ du kpol ii be iin niŋ wer zum a zɛɛ filaŋkeŋ. 13Ka di Kɔraawiizi Dumnanii la n ɔɔ bagli wibii la wa ballɔ, u daŋ pilli wiimaa ni u zɛɛ di tɛɛ ia. Wàá kpa u himmaa hor bagli ia. Gunla un nuuwɛ Kɔraawiizi be, gunnɛ ú bagli ia di gil ii zum wia la n niŋ haa ba la. 14U daŋ tɛɛ n ge sɔŋ, dikuubɛɛwiai, u daŋ kpa n wia bagli ia. 15N Mɛɛ wia la maa ɛɛ n gba wiarɛ. Awiarɛ n ŋɔ u Dumnanii daŋ kpa n wia bagli ia la.

Biinichɔg ni Bɔsɔna wia

16Di a wa ɛɛ tama, ii wàá ka naŋ. Di a kaa wa ɛɛ tama ge, ii daŋ kaa naŋ.”

17U hiŋra baŋhina pɛɛzi dɔŋa, “U wiŋɔzi naa zɛɛrɛ ɛrɛɛ? U ŋɔ di a wa ɛɛ tama yaa wàá ka nau, di a kaa wa ɛɛ tama ge, yaa daŋ kaa nau, di kaa ŋɔ yaa wàá nau dikuu unna la u mɛɛ be wia.” 18Ba maa ra aani u wiŋɔzi la zɛɛ di ŋɔ, “A ka tama naa, u zɛɛrɛ ɛrɛɛ? Yaa waa zum wii la maa wia unna bagli keŋ.”

19Yeesu zum lugɔ ba ra nyiŋŋuu ba pɛɛzuu guŋ. U ge pɛɛzi baa, “Miŋ ŋɔ a ka tama ii wàá ka naŋ, a kaa wa ɛɛ tama, ii daŋ kaa naŋ naa, ii ra aani u zɛɛrɛ gɛɛ? 20Ií gil n ŋɔ wibii maa tɛɛ ia. Ii biine daŋ chɔgi werge maa ii ra wii, ka durnya waa bɔra sɔɔni baa. Wibii maa, ii biine daŋ chɔgi. Ka di a kaa wa ɛɛ tama, ii bɔra bir sɔɔni ia werge maa.#Mat 5:4; Jɔɔn 20:19-20 21Di haaŋ na nyiŋŋi u lul bie, di u saŋa wa hello, a ɔɔ ra nuubuu, u biini chɔgi. Ka di u wa luluu tuŋ, u bɔra ɔɔ kaa sɔɔnuu dikuu uŋ wette lul bie du durnya wia. Waa kaa ra liizi gunla aŋ faa nuuu la. 22Gunnɛ ií ge du. Ii biine chɔkkɔɔ filaŋkeŋ, ka n daŋ kaa na ia. Denii ií bɔra sɔɔni ia werge maa nɛra chɔg ii bɔsɔna hiŋ huhzi.

23Ii wàá ka pɛɛziŋ wiimaa a saŋa. Ií gil n ŋɔ wibii maa tɛɛ ia. N Mɛɛ daŋ kuu n wia tɛɛ ia wii la maa iin niŋ suŋŋuu. 24Ii faa waa kummaa ra suŋŋi ani n sɔŋ. Ka filaŋkennaa, ií ra suŋŋi. Di ii ra suŋŋi, ii daŋ na ií bɔra sɔɔni ia werge maa di ga tuŋ.

25N faa ta sɛɛliizii ra bagli ia. Ka saŋa bɛl daŋ wa hel, di a saŋa wa hello, màá ka ta sɛɛliizi ra bagli ia n Mɛɛ wia, ka ra bagli ia u wia la kaiih. 26Di ii wa kpa n sɔŋ di suŋŋi wiizi a saŋa, a wàá ka ɛɛ lugɔ min niŋ suŋŋuu tɛɛ ia. 27U himmaa nɔŋŋi iabuu dikuu iin nɔŋŋiŋ di yardiŋ lugɔ n lii u benii wia. 28U benii n lii di ba durnya. Filaŋkeŋ n jaa ra nyiŋŋuu ń gil durnya ka bir la u be.”

29Denii u hiŋra ŋɔ u be, “Filaŋkeŋ i wiŋɔzi jaa ra lii bɔchaannɛ. A waa kaa du kpol lugɔ sɛɛliizi la. 30Yaa jaa zum lugɔ i zum wiimaanii. A waa ɛɛwɛ lugɔ nɛr daŋ pɛɛzii wia mɔɔ ka i haa zum a wia biini. Awia, yaa yardiibuu lugɔ i lii Kɔraawiizi benii.”

31Yeesu pɛɛzi baa, “Ii jaa yardimbuu naa? 32Saŋa bɛl daŋ wa hel, u duglɔɔrɛ gba, ií maa yaari, di kaali ii diini. Ka n bɛŋ lɛi. N Mɛɛ ɔɔ du n benii. 33N bagli iabuu wia naa ií wer dɔɔ bampirsɔna dikuu n ni ia n ɛɛ kpaŋ wia. Durnya daŋ tɛɛ ia tɔɔrɔɔ, ka ií gilɛɛ ra ɔm. N kpegli durnyaa.”

Currently Selected:

Jɔɔn 16: vag

Highlight

Copy